Chapter 10

suniviṣṭaṃ hitaṃ vākyamuktavantaṃ vibhīṣaṇam |
abravīt paruṣaṃ vākyaṃ rāvaṇaḥ kālacoditaḥ || 1 ||
[Analyze grammar]

vaset saha sapatnena kruddhenāśīviṣeṇa vā |
na tu mitrapravādena saṃvasecchatrusevinā || 2 ||
[Analyze grammar]

jānāmi śīlaṃ jñātīnāṃ sarvalokeṣu rākṣasa |
hṛṣyanti vyasaneṣvete jñātīnāṃ jñātayaḥ sadā || 3 ||
[Analyze grammar]

pradhānaṃ sādhakaṃ vaidyaṃ dharmaśīlaṃ ca rākṣasa |
jñātayo hyavamanyante śūraṃ paribhavanti ca || 4 ||
[Analyze grammar]

nityamanyonyasaṃhṛṣṭā vyasaneṣvātatāyinaḥ |
pracchannahṛdayā ghorā jñātayastu bhayāvahāḥ || 5 ||
[Analyze grammar]

śrūyante hastibhirgītāḥ ślokāḥ padmavane kva cit |
pāśahastānnarāndṛṣṭvā śṛṇu tān gadato mama || 6 ||
[Analyze grammar]

nāgnirnānyāni śastrāṇi na naḥ pāśā bhayāvahāḥ |
ghorāḥ svārthaprayuktāstu jñātayo no bhayāvahāḥ || 7 ||
[Analyze grammar]

upāyamete vakṣyanti grahaṇe nātra saṃśayaḥ |
kṛtsnādbhayājjñātibhayaṃ sukaṣṭaṃ viditaṃ ca naḥ || 8 ||
[Analyze grammar]

vidyate goṣu saṃpannaṃ vidyate brāhmaṇe damaḥ |
vidyate strīṣu cāpalyaṃ vidyate jñātito bhayam || 9 ||
[Analyze grammar]

tato neṣṭamidaṃ saumya yadahaṃ lokasatkṛtaḥ |
aiśvaryamabhijātaśca ripūṇāṃ mūrdhni ca sthitaḥ || 10 ||
[Analyze grammar]

anyastvevaṃvidhaṃ brūyādvākyametanniśācara |
asminmuhūrte na bhavettvāṃ tu dhikkulapāṃsanam || 11 ||
[Analyze grammar]

ityuktaḥ paruṣaṃ vākyaṃ nyāyavādī vibhīṣaṇaḥ |
utpapāta gadāpāṇiścaturbhiḥ saha rākṣasaiḥ || 12 ||
[Analyze grammar]

abravīcca tadā vākyaṃ jātakrodho vibhīṣaṇaḥ |
antarikṣagataḥ śrīmānbhrātaraṃ rākṣasādhipam || 13 ||
[Analyze grammar]

sa tvaṃ bhrātāsi me rājanbrūhi māṃ yad yadicchasi |
idaṃ tu paruṣaṃ vākyaṃ na kṣamāmyanṛtaṃ tava || 14 ||
[Analyze grammar]

sunītaṃ hitakāmena vākyamuktaṃ daśānana |
na gṛhṇantyakṛtātmānaḥ kālasya vaśamāgatāḥ || 15 ||
[Analyze grammar]

sulabhāḥ puruṣā rājan satataṃ priyavādinaḥ |
apriyasya tu pathyasya vaktā śrotā ca durlabhaḥ || 16 ||
[Analyze grammar]

baddhaṃ kālasya pāśena sarvabhūtāpahāriṇā |
na naśyantamupekṣeyaṃ pradīptaṃ śaraṇaṃ yathā || 17 ||
[Analyze grammar]

dīptapāvakasaṃkāśaiḥ śitaiḥ kāñcanabhūṣaṇaiḥ |
na tvāmicchāmyahaṃ draṣṭuṃ rāmeṇa nihataṃ śaraiḥ || 18 ||
[Analyze grammar]

śūrāśca balavantaśca kṛtāstrāśca raṇājire |
kālābhipannā sīdanti yathā vālukasetavaḥ || 19 ||
[Analyze grammar]

ātmānaṃ sarvathā rakṣa purīṃ cemāṃ sarākṣasām |
svasti te'stu gamiṣyāmi sukhī bhava mayā vinā || 20 ||
[Analyze grammar]

nivāryamāṇasya mayā hitaiṣiṇā na rocate te vacanaṃ niśācara |
parītakālā hi gatāyuṣo narā hitaṃ na gṛhṇanti suhṛdbhirīritam || 21 ||
[Analyze grammar]