Chapter 3

vaco vijñāya hanumān sugrīvasya mahātmanaḥ |
parvatādṛśyamūkāttu pupluve yatra rāghavau || 1 ||
[Analyze grammar]

sa tatra gatvā hanumānbalavān vānarottamaḥ |
upacakrāma tau vāgbhirmṛdvībhiḥ satyavikramaḥ || 2 ||
[Analyze grammar]

svakaṃ rūpaṃ parityajya bhikṣurūpeṇa vānaraḥ |
ābabhāṣe ca tau vīrau yathāvat praśaśaṃsa ca || 3 ||
[Analyze grammar]

rājarṣidevapratimau tāpasau saṃśitavratau |
deśaṃ kathamimaṃ prāptau bhavantau varavarṇinau || 4 ||
[Analyze grammar]

trāsayantau mṛgagaṇānanyāṃśca vanacāriṇaḥ |
pampātīraruhān vṛkṣān vīkṣamāṇau samantataḥ || 5 ||
[Analyze grammar]

imāṃ nadīṃ śubhajalāṃ śobhayantau tarasvinau |
dhairyavantau suvarṇābhau kau yuvāṃ cīravāsasau || 6 ||
[Analyze grammar]

siṃhaviprekṣitau vīrau siṃhātibalavikramau |
śakracāpanibhe cāpe pragṛhya vipulairbhujaiḥ || 7 ||
[Analyze grammar]

śrīmantau rūpasaṃpannau vṛṣabhaśreṣṭhavikramau |
hastihastopamabhujau dyutimantau nararṣabhau || 8 ||
[Analyze grammar]

prabhayā parvatendro'yaṃ yuvayoravabhāsitaḥ |
rājyārhāvamaraprakhyau kathaṃ deśamihāgatau || 9 ||
[Analyze grammar]

padmapatrekṣaṇau vīrau jaṭāmaṇḍaladhāriṇau |
anyonyasadṛśau vīrau devalokādivāgatau || 10 ||
[Analyze grammar]

yadṛcchayeva saṃprāptau candrasūryau vasuṃdharām |
viśālavakṣasau vīrau mānuṣau devarūpiṇau || 11 ||
[Analyze grammar]

siṃhaskandhau mahāsattvau samadāviva govṛṣau |
āyatāśca suvṛttāśca bāhavaḥ parighottamāḥ |
sarvabhūṣaṇabhūṣārhāḥ kimarthaṃ na vibhūṣitaḥ || 12 ||
[Analyze grammar]

ubhau yogyāvahaṃ manye rakṣituṃ pṛthivīmimām |
sasāgaravanāṃ kṛtsnāṃ vindhyameruvibhūṣitām || 13 ||
[Analyze grammar]

ime ca dhanuṣī citre ślakṣṇe citrānulepane |
prakāśete yathendrasya vajre hemavibhūṣite || 14 ||
[Analyze grammar]

saṃpūrṇā niśitairbāṇair tūṇāśca śubhadarśanāḥ |
jīvitāntakarairghorairjvaladbhiriva pannagaiḥ || 15 ||
[Analyze grammar]

mahāpramāṇau vipulau taptahāṭakabhūṣitau |
khaḍgāvetau virājete nirmuktabhujagāviva || 16 ||
[Analyze grammar]

evaṃ māṃ paribhāṣantaṃ kasmādvai nābhibhāṣathaḥ || 17 ||
[Analyze grammar]

sugrīvo nāma dharmātmā kaścidvānarayūthapaḥ |
vīro vinikṛto bhrātrā jagadbhramati duḥkhitaḥ || 18 ||
[Analyze grammar]

prāpto'haṃ preṣitastena sugrīveṇa mahātmanā |
rājñā vānaramukhyānāṃ hanumānnāma vānaraḥ || 19 ||
[Analyze grammar]

yuvābhyāṃ saha dharmātmā sugrīvaḥ sakhyamicchati |
tasya māṃ sacivaṃ vittaṃ vānaraṃ pavanātmajam || 20 ||
[Analyze grammar]

bhikṣurūpapraticchannaṃ sugrīvapriyakāmyayā |
ṛśyamūkādiha prāptaṃ kāmagaṃ kāmarūpiṇam || 21 ||
[Analyze grammar]

evamuktvā tu hanumāṃstau vīrau rāmalakṣmaṇau |
vākyajñau vākyakuśalaḥ punarnovāca kiṃ cana || 22 ||
[Analyze grammar]

etacchrutvā vacastasya rāmo lakṣmaṇamabravīt |
prahṛṣṭavadanaḥ śrīmānbhrātaraṃ pārśvataḥ sthitam || 23 ||
[Analyze grammar]

sacivo'yaṃ kapīndrasya sugrīvasya mahātmanaḥ |
tameva kāṅkṣamāṇasya mamāntikamupāgataḥ || 24 ||
[Analyze grammar]

tamabhyabhāṣa saumitre sugrīvasacivaṃ kapim |
vākyajñaṃ madhurairvākyaiḥ snehayuktamariṃdamam || 25 ||
[Analyze grammar]