Chapter 2

tau tu dṛṣṭvā mahātmānau bhrātarau rāmalakṣmaṇau |
varāyudhadharau vīrau sugrīvaḥ śaṅkito'bhavat || 1 ||
[Analyze grammar]

udvignahṛdayaḥ sarvā diśaḥ samavalokayan |
na vyatiṣṭhata kasmiṃściddeśe vānarapuṃgavaḥ || 2 ||
[Analyze grammar]

naiva cakre manaḥ sthāne vīkṣamāṇo mahābalau |
kapeḥ paramabhītasya cittaṃ vyavasasāda ha || 3 ||
[Analyze grammar]

cintayitvā sa dharmātmā vimṛśya gurulāghavam |
sugrīvaḥ paramodvignaḥ sarvairanucaraiḥ saha || 4 ||
[Analyze grammar]

tataḥ sa sacivebhyastu sugrīvaḥ plavagādhipaḥ |
śaśaṃsa paramodvignaḥ paśyaṃstau rāmalakṣmaṇau || 5 ||
[Analyze grammar]

etau vanamidaṃ durgaṃ vālipraṇihitau dhruvam |
chadmanā cīravasanau pracarantāvihāgatau || 6 ||
[Analyze grammar]

tataḥ sugrīvasacivā dṛṣṭvā paramadhanvinau |
jagmurgiritaṭāttasmādanyacchikharamuttamam || 7 ||
[Analyze grammar]

te kṣipramabhigamyātha yūthapā yūthaparṣabham |
harayo vānaraśreṣṭhaṃ parivāryopatasthire || 8 ||
[Analyze grammar]

ekamekāyanagatāḥ plavamānā girergirim |
prakampayanto vegena girīṇāṃ śikharāṇi ca || 9 ||
[Analyze grammar]

tataḥ śākhāmṛgāḥ sarve plavamānā mahābalāḥ |
babhañjuśca nagāṃstatra puṣpitāndurgasaṃśritān || 10 ||
[Analyze grammar]

āplavanto harivarāḥ sarvatastaṃ mahāgirim |
mṛgamārjāraśārdūlāṃstrāsayanto yayustadā || 11 ||
[Analyze grammar]

tataḥ sugrīvasacivāḥ parvatendraṃ samāśritāḥ |
saṃgamya kapimukhyena sarve prāñjalayaḥ sthitāḥ || 12 ||
[Analyze grammar]

tatastaṃ bhayasaṃtrastaṃ vālikilbiṣaśaṅkitam |
uvāca hanumān vākyaṃ sugrīvaṃ vākyakovidaḥ || 13 ||
[Analyze grammar]

yasmādudvignacetāstvaṃ pradruto haripuṃgava |
taṃ krūradarśanaṃ krūraṃ neha paśyāmi vālinam || 14 ||
[Analyze grammar]

yasmāttava bhayaṃ saumya pūrvajāt pāpakarmaṇaḥ |
sa neha vālī duṣṭātmā na te paśyāmyahaṃ bhayam || 15 ||
[Analyze grammar]

aho śākhāmṛgatvaṃ te vyaktameva plavaṃgama |
laghucittatayātmānaṃ na sthāpayasi yo matau || 16 ||
[Analyze grammar]

buddhivijñānasaṃpanna iṅgitaiḥ sarvamācara |
na hyabuddhiṃ gato rājā sarvabhūtāni śāsti hi || 17 ||
[Analyze grammar]

sugrīvastu śubhaṃ vākyaṃ śrutvā sarvaṃ hanūmataḥ |
tataḥ śubhataraṃ vākyaṃ hanūmantamuvāca ha || 18 ||
[Analyze grammar]

dīrghabāhū viśālākṣau śaracāpāsidhāriṇau |
kasya na syādbhayaṃ dṛṣṭvā etau surasutopamau || 19 ||
[Analyze grammar]

vālipraṇihitāvetau śaṅke'haṃ puruṣottamau |
rājāno bahumitrāśca viśvāso nātra hi kṣamaḥ || 20 ||
[Analyze grammar]

arayaśca manuṣyeṇa vijñeyāśchannacāriṇaḥ |
viśvastānāmaviśvastāśchidreṣu praharanti hi || 21 ||
[Analyze grammar]

kṛtyeṣu vālī medhāvī rājāno bahudarśanāḥ |
bhavanti parahantāraste jñeyāḥ prākṛtairnaraiḥ || 22 ||
[Analyze grammar]

tau tvayā prākṛtenaiva gatvā jñeyau plavaṃgama |
śaṅkitānāṃ prakāraiśca rūpavyābhāṣaṇena ca || 23 ||
[Analyze grammar]

lakṣayasva tayorbhāvaṃ prahṛṣṭamanasau yadi |
viśvāsayanpraśaṃsābhiriṅgitaiśca punaḥ punaḥ || 24 ||
[Analyze grammar]

mamaivābhimukhaṃ sthitvā pṛccha tvaṃ haripuṃgava |
prayojanaṃ praveśasya vanasyāsya dhanurdharau || 25 ||
[Analyze grammar]

śuddhātmānau yadi tvetau jānīhi tvaṃ plavaṃgama |
vyābhāṣitairvā rūpairvā vijñeyā duṣṭatānayoḥ || 26 ||
[Analyze grammar]

ityevaṃ kapirājena saṃdiṣṭo mārutātmajaḥ |
cakāra gamane buddhiṃ yatra tau rāmalakṣmaṇau || 27 ||
[Analyze grammar]

tatheti saṃpūjya vacastu tasya kapeḥ subhītasya durāsadasya |
mahānubhāvo hanumānyayau tadā sa yatra rāmo'tibalaśca lakṣmaṇaḥ || 28 ||
[Analyze grammar]