Chapter 4

tataḥ prahṛṣṭo hanumān kṛtyavāniti tadvacaḥ |
śrutvā madhurasaṃbhāṣaṃ sugrīvaṃ manasā gataḥ || 1 ||
[Analyze grammar]

bhavyo rājyāgamastasya sugrīvasya mahātmanaḥ |
yadayaṃ kṛtyavānprāptaḥ kṛtyaṃ caitadupāgatam || 2 ||
[Analyze grammar]

tataḥ paramasaṃhṛṣṭo hanūmānplavagarṣabhaḥ |
pratyuvāca tato vākyaṃ rāmaṃ vākyaviśāradaḥ || 3 ||
[Analyze grammar]

kimarthaṃ tvaṃ vanaṃ ghoraṃ pampākānanamaṇḍitam |
āgataḥ sānujo durgaṃ nānāvyālamṛgāyutam || 4 ||
[Analyze grammar]

tasya tadvacanaṃ śrutvā lakṣmaṇo rāmacoditaḥ |
ācacakṣe mahātmānaṃ rāmaṃ daśarathātmajam || 5 ||
[Analyze grammar]

rājā daśaratho nāma dyutimāndharmavatsalaḥ |
tasyāyaṃ pūrvajaḥ putro rāmo nāma janaiḥ śrutaḥ || 6 ||
[Analyze grammar]

śaraṇyaḥ sarvabhūtānāṃ piturnirdeśapāragaḥ |
vīro daśarathasyāyaṃ putrāṇāṃ guṇavattaraḥ || 7 ||
[Analyze grammar]

rājyādbhraṣṭo vane vastuṃ mayā sārdhamihāgataḥ |
bhāryayā ca mahātejāḥ sītayānugato vaśī |
dinakṣaye mahātejāḥ prabhayeva divākaraḥ || 8 ||
[Analyze grammar]

ahamasyāvaro bhrātā guṇairdāsyamupāgataḥ |
kṛtajñasya bahujñasya lakṣmaṇo nāma nāmataḥ || 9 ||
[Analyze grammar]

sukhārhasya mahārhasya sarvabhūtahitātmanaḥ |
aiśvaryeṇa vihīnasya vanavāsāśritasya ca || 10 ||
[Analyze grammar]

rakṣasāpahṛtā bhāryā rahite kāmarūpiṇā |
tacca na jñāyate rakṣaḥ patnī yenāsya sā hṛtā || 11 ||
[Analyze grammar]

danurnāma śriyaḥ putraḥ śāpād rākṣasatāṃ gataḥ |
ākhyātastena sugrīvaḥ samartho vānarādhipaḥ || 12 ||
[Analyze grammar]

sa jñāsyati mahāvīryastava bhāryāpahāriṇam |
evamuktvā danuḥ svargaṃ bhrājamāno gataḥ sukham || 13 ||
[Analyze grammar]

etatte sarvamākhyātaṃ yāthātathyena pṛcchataḥ |
ahaṃ caiva hi rāmaśca sugrīvaṃ śaraṇaṃ gatau || 14 ||
[Analyze grammar]

eṣa dattvā ca vittāni prāpya cānuttamaṃ yaśaḥ |
lokanāthaḥ purā bhūtvā sugrīvaṃ nāthamicchati || 15 ||
[Analyze grammar]

śokābhibhūte rāme tu śokārte śaraṇaṃ gate |
kartumarhati sugrīvaḥ prasādaṃ saha yūthapaiḥ || 16 ||
[Analyze grammar]

evaṃ bruvāṇaṃ saumitriṃ karuṇaṃ sāśrupātanam |
hanūmānpratyuvācedaṃ vākyaṃ vākyaviśāradaḥ || 17 ||
[Analyze grammar]

īdṛśā buddhisaṃpannā jitakrodhā jitendriyāḥ |
draṣṭavyā vānarendreṇa diṣṭyā darśanamāgatāḥ || 18 ||
[Analyze grammar]

sa hi rājyācca vibhraṣṭaḥ kṛtavairaśca vālinā |
hṛtadāro vane trasto bhrātrā vinikṛto bhṛśam || 19 ||
[Analyze grammar]

kariṣyati sa sāhāyyaṃ yuvayorbhāskarātmajaḥ |
sugrīvaḥ saha cāsmābhiḥ sītāyāḥ parimārgaṇe || 20 ||
[Analyze grammar]

ityevamuktvā hanumāñ ślakṣṇaṃ madhurayā girā |
babhāṣe so'bhigacchāmaḥ sugrīvamiti rāghavam || 21 ||
[Analyze grammar]

evaṃ bruvāṇaṃ dharmātmā hanūmantaṃ sa lakṣmaṇaḥ |
pratipūjya yathānyāyamidaṃ provāca rāghavam || 22 ||
[Analyze grammar]

kapiḥ kathayate hṛṣṭo yathāyaṃ mārutātmajaḥ |
kṛtyavān so'pi saṃprāptaḥ kṛtakṛtyo'si rāghava || 23 ||
[Analyze grammar]

prasannamukhavarṇaśca vyaktaṃ hṛṣṭaśca bhāṣate |
nānṛtaṃ vakṣyate vīro hanūmānmārutātmajaḥ || 24 ||
[Analyze grammar]

tataḥ sa tu mahāprājño hanūmānmārutātmajaḥ |
jagāmādāya tau vīrau harirājāya rāghavau || 25 ||
[Analyze grammar]

sa tu vipula yaśāḥ kapipravīraḥ pavanasutaḥ kṛtakṛtyavat prahṛṣṭaḥ |
girivaramuruvikramaḥ prayātaḥ sa śubhamatiḥ saha rāmalakṣmaṇābhyām || 26 ||
[Analyze grammar]