Chapter 52

hriyamāṇā tu vaidehī kaṃ cinnāthamapaśyatī |
dadarśa giriśṛṅgasthānpañcavānarapuṃgavān || 1 ||
[Analyze grammar]

teṣāṃ madhye viśālākṣī kauśeyaṃ kanakaprabham |
uttarīyaṃ varārohā śubhānyābharaṇāni ca |
mumoca yadi rāmāya śaṃseyuriti maithilī || 2 ||
[Analyze grammar]

vastramutsṛjya tanmadhye vinikṣiptaṃ sabhūṣaṇam |
saṃbhramāttu daśagrīvastat karma na ca buddhivān || 3 ||
[Analyze grammar]

piṅgākṣāstāṃ viśālākṣīṃ netrairanimiṣairiva |
vikrośantīṃ tadā sītāṃ dadṛśurvānararṣabhāḥ || 4 ||
[Analyze grammar]

sa ca pampāmatikramya laṅkāmabhimukhaḥ purīm |
jagāma rudatīṃ gṛhya maithilīṃ rākṣaseśvaraḥ || 5 ||
[Analyze grammar]

tāṃ jahāra susaṃhṛṣṭo rāvaṇo mṛtyumātmanaḥ |
utsaṅgenaiva bhujagīṃ tīkṣṇadaṃṣṭrāṃ mahāviṣām || 6 ||
[Analyze grammar]

vanāni saritaḥ śailān sarāṃsi ca vihāyasā |
sa kṣipraṃ samatīyāya śaraścāpādiva cyutaḥ || 7 ||
[Analyze grammar]

timinakraniketaṃ tu varuṇālayamakṣayam |
saritāṃ śaraṇaṃ gatvā samatīyāya sāgaram || 8 ||
[Analyze grammar]

saṃbhramāt parivṛttormī ruddhamīnamahoragaḥ |
vaidehyāṃ hriyamāṇāyāṃ babhūva varuṇālayaḥ || 9 ||
[Analyze grammar]

antarikṣagatā vācaḥ sasṛjuścāraṇāstadā |
etadanto daśagrīva iti siddhāstadābruvan || 10 ||
[Analyze grammar]

sa tu sītāṃ viveṣṭantīmaṅkenādāya rāvaṇaḥ |
praviveśa purīṃ laṅkāṃ rūpiṇīṃ mṛtyumātmanaḥ || 11 ||
[Analyze grammar]

so'bhigamya purīṃ laṅkāṃ suvibhaktamahāpathām |
saṃrūḍhakakṣyā bahulaṃ svamantaḥpuramāviśat || 12 ||
[Analyze grammar]

tatra tāmasitāpāṅgīṃ śokamohaparāyaṇām |
nidadhe rāvaṇaḥ sītāṃ mayo māyāmivāsurīm || 13 ||
[Analyze grammar]

abravīcca daśagrīvaḥ piśācīrghoradarśanāḥ |
yathā naināṃ pumān strī vā sītāṃ paśyatyasaṃmataḥ || 14 ||
[Analyze grammar]

muktāmaṇisuvarṇāni vastrāṇyābharaṇāni ca |
yad yadicchettadevāsyā deyaṃ macchandato yathā || 15 ||
[Analyze grammar]

yā ca vakṣyati vaidehīṃ vacanaṃ kiṃ cidapriyam |
ajñānād yadi vā jñānānna tasyā jīvitaṃ priyam || 16 ||
[Analyze grammar]

tathoktvā rākṣasīstāstu rākṣasendraḥ pratāpavān |
niṣkramyāntaḥpurāttasmāt kiṃ kṛtyamiti cintayan |
dadarśāṣṭau mahāvīryān rākṣasānpiśitāśanān || 17 ||
[Analyze grammar]

sa tāndṛṣṭvā mahāvīryo varadānena mohitaḥ |
uvācaitānidaṃ vākyaṃ praśasya balavīryataḥ || 18 ||
[Analyze grammar]

nānāpraharaṇāḥ kṣipramito gacchata satvarāḥ |
janasthānaṃ hatasthānaṃ bhūtapūrvaṃ kharālayam || 19 ||
[Analyze grammar]

tatroṣyatāṃ janasthāne śūnye nihatarākṣase |
pauruṣaṃ balamāśritya trāsamutsṛjya dūrataḥ || 20 ||
[Analyze grammar]

balaṃ hi sumahad yanme janasthāne niveśitam |
sadūṣaṇakharaṃ yuddhe hataṃ tad rāmasāyakaiḥ || 21 ||
[Analyze grammar]

tataḥ krodho mamāpūrvo dhairyasyopari vardhate |
vairaṃ ca sumahajjātaṃ rāmaṃ prati sudāruṇam || 22 ||
[Analyze grammar]

niryātayitumicchāmi tacca vairamahaṃ ripoḥ |
na hi lapsyāmyahaṃ nidrāmahatvā saṃyuge ripum || 23 ||
[Analyze grammar]

taṃ tvidānīmahaṃ hatvā kharadūṣaṇaghātinam |
rāmaṃ śarmopalapsyāmi dhanaṃ labdhveva nirdhanaḥ || 24 ||
[Analyze grammar]

janasthāne vasadbhistu bhavadbhī rāmamāśritā |
pravṛttirupanetavyā kiṃ karotīti tattvataḥ || 25 ||
[Analyze grammar]

apramādācca gantavyaṃ sarvaireva niśācaraiḥ |
kartavyaśca sadā yatno rāghavasya vadhaṃ prati || 26 ||
[Analyze grammar]

yuṣmākaṃ hi balajño'haṃ bahuśo raṇamūrdhani |
ataścāsmiñjanasthāne mayā yūyaṃ niyojitāḥ || 27 ||
[Analyze grammar]

tataḥ priyaṃ vākyamupetya rākṣasā mahārthamaṣṭāvabhivādya rāvaṇam |
vihāya laṅkāṃ sahitāḥ pratasthire yato janasthānamalakṣyadarśanāḥ || 28 ||
[Analyze grammar]

tatastu sītāmupalabhya rāvaṇaḥ susaṃprahṛṣṭaḥ parigṛhya maithilīm |
prasajya rāmeṇa ca vairamuttamaṃ babhūva mohānmuditaḥ sa rākṣasaḥ || 29 ||
[Analyze grammar]