Chapter 84

bharadvājāśramaṃ dṛṣṭvā krośādeva nararṣabhaḥ |
balaṃ sarvamavasthāpya jagāma saha mantribhiḥ || 1 ||
[Analyze grammar]

padbhyāmeva hi dharmajño nyastaśastraparicchadaḥ |
vasāno vāsasī kṣaume purodhāya purohitam || 2 ||
[Analyze grammar]

tataḥ saṃdarśane tasya bharadvājasya rāghavaḥ |
mantriṇastānavasthāpya jagāmānu purohitam || 3 ||
[Analyze grammar]

vasiṣṭhamatha dṛṣṭvaiva bharadvājo mahātapāḥ |
saṃcacālāsanāttūrṇaṃ śiṣyānarghyamiti bruvan || 4 ||
[Analyze grammar]

samāgamya vasiṣṭhena bharatenābhivāditaḥ |
abudhyata mahātejāḥ sutaṃ daśarathasya tam || 5 ||
[Analyze grammar]

tābhyāmarghyaṃ ca pādyaṃ ca dattvā paścāt phalāni ca |
ānupūrvyācca dharmajñaḥ papraccha kuśalaṃ kule || 6 ||
[Analyze grammar]

ayodhyāyāṃ bale kośe mitreṣvapi ca mantriṣu |
jānandaśarathaṃ vṛttaṃ na rājānamudāharat || 7 ||
[Analyze grammar]

vasiṣṭho bharataścainaṃ papracchaturanāmayam |
śarīre'gniṣu vṛkṣeṣu śiṣyeṣu mṛgapakṣiṣu || 8 ||
[Analyze grammar]

tatheti ca pratijñāya bharadvājo mahātapāḥ |
bharataṃ pratyuvācedaṃ rāghavasnehabandhanāt || 9 ||
[Analyze grammar]

kimihāgamane kāryaṃ tava rājyaṃ praśāsataḥ |
etadācakṣva me sarvaṃ na hi me śudhyate manaḥ || 10 ||
[Analyze grammar]

suṣuve yama mitraghnaṃ kausalyānandavardhanam |
bhrātrā saha sabhāryo yaściraṃ pravrājito vanam || 11 ||
[Analyze grammar]

niyuktaḥ strīniyuktena pitrā yo'sau mahāyaśāḥ |
vanavāsī bhavetīha samāḥ kila caturdaśa || 12 ||
[Analyze grammar]

kaccinna tasyāpāpasya pāpaṃ kartumihecchasi |
akaṇṭakaṃ bhoktumanā rājyaṃ tasyānujasya ca || 13 ||
[Analyze grammar]

evamukto bharadvājaṃ bharataḥ pratyuvāca ha |
paryaśru nayano duḥkhādvācā saṃsajjamānayā || 14 ||
[Analyze grammar]

hato'smi yadi māmevaṃ bhagavānapi manyate |
matto na doṣamāśaṅkernaivaṃ māmanuśādhi hi || 15 ||
[Analyze grammar]

na caitadiṣṭaṃ mātā me yadavocanmadantare |
nāhametena tuṣṭaśca na tadvacanamādade || 16 ||
[Analyze grammar]

ahaṃ tu taṃ naravyāghramupayātaḥ prasādakaḥ |
pratinetumayodhyāṃ ca pādau tasyābhivanditum || 17 ||
[Analyze grammar]

tvaṃ māmevaṃgataṃ matvā prasādaṃ kartumarhasi |
śaṃsa me bhagavan rāmaḥ kva saṃprati mahīpatiḥ || 18 ||
[Analyze grammar]

uvāca taṃ bharadvājaḥ prasādādbharataṃ vacaḥ |
tvayyetat puruṣavyāghra yuktaṃ rāghavavaṃśaje |
guruvṛttirdamaścaiva sādhūnāṃ cānuyāyitā || 19 ||
[Analyze grammar]

jāne caitanmanaḥsthaṃ te dṛḍhīkaraṇamastviti |
apṛcchaṃ tvāṃ tavātyarthaṃ kīrtiṃ samabhivardhayan || 20 ||
[Analyze grammar]

asau vasati te bhrātā citrakūṭe mahāgirau |
śvastu gantāsi taṃ deśaṃ vasādya saha mantribhiḥ |
etaṃ me kuru suprājña kāmaṃ kāmārthakovida || 21 ||
[Analyze grammar]

tatastathetyevamudāradarśanaḥ pratītarūpo bharato'bravīdvacaḥ |
cakāra buddhiṃ ca tadā mahāśrame niśānivāsāya narādhipātmajaḥ || 22 ||
[Analyze grammar]