Chapter 74

atha bhūmipradeśajñāḥ sūtrakarmaviśāradāḥ |
svakarmābhiratāḥ śūrāḥ khanakā yantrakāstathā || 1 ||
[Analyze grammar]

karmāntikāḥ sthapatayaḥ puruṣā yantrakovidāḥ |
tathā vardhakayaścaiva mārgiṇo vṛkṣatakṣakāḥ || 2 ||
[Analyze grammar]

kūpakārāḥ sudhākārā vaṃśakarmakṛtastathā |
samarthā ye ca draṣṭāraḥ purataste pratasthire || 3 ||
[Analyze grammar]

sa tu harṣāttamuddeśaṃ janaugho vipulaḥ prayān |
aśobhata mahāvegaḥ sāgarasyeva parvaṇi || 4 ||
[Analyze grammar]

te svavāraṃ samāsthāya vartmakarmāṇi kovidāḥ |
karaṇairvividhopetaiḥ purastāt saṃpratasthire || 5 ||
[Analyze grammar]

latāvallīśca gulmāṃśca sthāṇūnaśmana eva ca |
janāste cakrire mārgaṃ chindanto vividhāndrumān || 6 ||
[Analyze grammar]

avṛkṣeṣu ca deśeṣu ke cidvṛkṣānaropayan |
ke cit kuṭhāraiṣ ṭaṅkaiśca dātraiśchindan kva cit kva cit || 7 ||
[Analyze grammar]

apare vīraṇastambānbalino balavattarāḥ |
vidhamanti sma durgāṇi sthalāni ca tatastataḥ || 8 ||
[Analyze grammar]

apare'pūrayan kūpānpāṃsubhiḥ śvabhramāyatam |
nimnabhāgāṃstathā ke cit samāṃścakruḥ samantataḥ || 9 ||
[Analyze grammar]

babandhurbandhanīyāṃśca kṣodyān saṃcukṣudustadā |
bibhidurbhedanīyāṃśca tāṃstāndeśānnarāstadā || 10 ||
[Analyze grammar]

acireṇaiva kālena parivāhānbahūdakān |
cakrurbahuvidhākārān sāgarapratimānbahūn |
udapānānbahuvidhān vedikā parimaṇḍitān || 11 ||
[Analyze grammar]

sasudhākuṭṭimatalaḥ prapuṣpitamahīruhaḥ |
mattodghuṣṭadvijagaṇaḥ patākābhiralaṃkṛtaḥ || 12 ||
[Analyze grammar]

candanodakasaṃsikto nānākusumabhūṣitaḥ |
bahvaśobhata senāyāḥ panthāḥ svargapathopamaḥ || 13 ||
[Analyze grammar]

ājñāpyātha yathājñapti yuktāste'dhikṛtā narāḥ |
ramaṇīyeṣu deśeṣu bahusvāduphaleṣu ca || 14 ||
[Analyze grammar]

yo niveśastvabhipreto bharatasya mahātmanaḥ |
bhūyastaṃ śobhayāmāsurbhūṣābhirbhūṣaṇopamam || 15 ||
[Analyze grammar]

nakṣatreṣu praśasteṣu muhūrteṣu ca tadvidaḥ |
niveśaṃ sthāpayāmāsurbharatasya mahātmanaḥ || 16 ||
[Analyze grammar]

bahupāṃsucayāścāpi parikhāparivāritāḥ |
tatrendrakīlapratimāḥ pratolīvaraśobhitāḥ || 17 ||
[Analyze grammar]

prāsādamālāsaṃyuktāḥ saudhaprākārasaṃvṛtāḥ |
patākā śobhitāḥ sarve sunirmitamahāpathāḥ || 18 ||
[Analyze grammar]

visarpadbhirivākāśe viṭaṅkāgravimānakaiḥ |
samucchritairniveśāste babhuḥ śakrapuropamāḥ || 19 ||
[Analyze grammar]

jāhnavīṃ tu samāsādya vividhadruma kānanām |
śītalāmalapānīyāṃ mahāmīnasamākulām || 20 ||
[Analyze grammar]

sacandratārāgaṇamaṇḍitaṃ yathā nabhaḥkṣapāyāmamalaṃ virājate |
narendramārgaḥ sa tathā vyarājata krameṇa ramyaḥ śubhaśilpinirmitaḥ || 21 ||
[Analyze grammar]