Chapter 57

pratibuddho muhur tena śokopahatacetanaḥ |
atha rājā daśarathaḥ sa cintāmabhyapadyata || 1 ||
[Analyze grammar]

rāmalakṣmaṇayoścaiva vivāsādvāsavopamam |
āviveśopasargastaṃ tamaḥ sūryamivāsuram || 2 ||
[Analyze grammar]

sa rājā rajanīṃ ṣaṣṭhīṃ rāme pravrajite vanam |
ardharātre daśarathaḥ saṃsmaranduṣkṛtaṃ kṛtam |
kausalyāṃ putraśokārtāmidaṃ vacanamabravīt || 3 ||
[Analyze grammar]

yadācarati kalyāṇi śubhaṃ vā yadi vāśubham |
tadeva labhate bhadre kartā karmajamātmanaḥ || 4 ||
[Analyze grammar]

guru lāghavamarthānāmārambhe karmaṇāṃ phalam |
doṣaṃ vā yo na jānāti sa bāla iti hocyate || 5 ||
[Analyze grammar]

kaścidāmravaṇaṃ chittvā palāśāṃśca niṣiñcati |
puṣpaṃ dṛṣṭvā phale gṛdhnuḥ sa śocati phalāgame || 6 ||
[Analyze grammar]

so'hamāmravaṇaṃ chittvā palāśāṃśca nyaṣecayam |
rāmaṃ phalāgame tyaktvā paścācchocāmi durmatiḥ || 7 ||
[Analyze grammar]

labdhaśabdena kausalye kumāreṇa dhanuṣmatā |
kumāraḥ śabdavedhīti mayā pāpamidaṃ kṛtam |
tadidaṃ me'nusaṃprāptaṃ devi duḥkhaṃ svayaṃ kṛtam || 8 ||
[Analyze grammar]

saṃmohādiha bālena yathā syādbhakṣitaṃ viṣam |
evaṃ mamāpyavijñātaṃ śabdavedhyamayaṃ phalam || 9 ||
[Analyze grammar]

devyanūḍhā tvamabhavo yuvarājo bhavāmyaham |
tataḥ prāvṛḍanuprāptā madakāmavivardhinī || 10 ||
[Analyze grammar]

upāsyahi rasānbhaumāṃstaptvā ca jagadaṃśubhiḥ |
paretācaritāṃ bhīmāṃ ravirāviśate diśam || 11 ||
[Analyze grammar]

uṣṇamantardadhe sadyaḥ snigdhā dadṛśire ghanāḥ |
tato jahṛṣire sarve bhekasāraṅgabarhiṇaḥ || 12 ||
[Analyze grammar]

patitenāmbhasā channaḥ patamānena cāsakṛt |
ābabhau mattasāraṅgastoyarāśirivācalaḥ || 13 ||
[Analyze grammar]

tasminnatisukhe kāle dhanuṣmāniṣumān rathī |
vyāyāma kṛtasaṃkalpaḥ sarayūmanvagāṃ nadīm || 14 ||
[Analyze grammar]

nipāne mahiṣaṃ rātrau gajaṃ vābhyāgataṃ nadīm |
anyaṃ vā śvāpadaṃ kaṃ cijjighāṃsurajitendriyaḥ || 15 ||
[Analyze grammar]

athāndhakāre tvaśrauṣaṃ jale kumbhasya paryataḥ |
acakṣurviṣaye ghoṣaṃ vāraṇasyeva nardataḥ || 16 ||
[Analyze grammar]

tato'haṃ śaramuddhṛtya dīptamāśīviṣopamam |
amuñcaṃ niśitaṃ bāṇamahamāśīviṣopamam || 17 ||
[Analyze grammar]

tatra vāguṣasi vyaktā prādurāsīdvanaukasaḥ |
hā heti patatastoye vāgabhūttatra mānuṣī |
kathamasmadvidhe śastraṃ nipatettu tapasvini || 18 ||
[Analyze grammar]

praviviktāṃ nadīṃ rātrāv udāhāro'hamāgataḥ |
iṣuṇābhihataḥ kena kasya vā kiṃ kṛtaṃ mayā || 19 ||
[Analyze grammar]

ṛṣerhi nyasta daṇḍasya vane vanyena jīvataḥ |
kathaṃ nu śastreṇa vadho madvidhasya vidhīyate || 20 ||
[Analyze grammar]

jaṭābhāradharasyaiva valkalājinavāsasaḥ |
ko vadhena mamārthī syāt kiṃ vāsyāpakṛtaṃ mayā || 21 ||
[Analyze grammar]

evaṃ niṣphalamārabdhaṃ kevalānarthasaṃhitam |
na kaścit sādhu manyeta yathaiva gurutalpagam || 22 ||
[Analyze grammar]

nemaṃ tathānuśocāmi jīvitakṣayamātmanaḥ |
mātaraṃ pitaraṃ cobhāvanuśocāmi madvidhe || 23 ||
[Analyze grammar]

tadetānmithunaṃ vṛddhaṃ cirakālabhṛtaṃ mayā |
mayi pañcatvamāpanne kāṃ vṛttiṃ vartayiṣyati || 24 ||
[Analyze grammar]

vṛddhau ca mātāpitarāvahaṃ caikeṣuṇā hataḥ |
kena sma nihatāḥ sarve subālenākṛtātmanā || 25 ||
[Analyze grammar]

taṃ giraṃ karuṇāṃ śrutvā mama dharmānukāṅkṣiṇaḥ |
karābhyāṃ saśaraṃ cāpaṃ vyathitasyāpatadbhuvi || 26 ||
[Analyze grammar]

taṃ deśamahamāgamya dīnasattvaḥ sudurmanāḥ |
apaśyamiṣuṇā tīre sarayvāstāpasaṃ hatam || 27 ||
[Analyze grammar]

sa māmudvīkṣya netrābhyāṃ trastamasvasthacetasaṃ |
ityuvāca vacaḥ krūraṃ didhakṣanniva tejasā || 28 ||
[Analyze grammar]

kiṃ tavāpakṛtaṃ rājan vane nivasatā mayā |
jihīrṣurambho gurvarthaṃ yadahaṃ tāḍitastvayā || 29 ||
[Analyze grammar]

ekena khalu bāṇena marmaṇyabhihate mayi |
dvāvandhau nihatau vṛddhau mātā janayitā ca me || 30 ||
[Analyze grammar]

tau nūnaṃ durbalāvandhau matpratīkṣau pipāsitau |
ciramāśākṛtāṃ tṛṣṇāṃ kaṣṭāṃ saṃdhārayiṣyataḥ || 31 ||
[Analyze grammar]

na nūnaṃ tapaso vāsti phalayogaḥ śrutasya vā |
pitā yanmāṃ na jānāti śayānaṃ patitaṃ bhuvi || 32 ||
[Analyze grammar]

jānannapi ca kiṃ kuryādaśaktiraparikramaḥ |
bhidyamānamivāśaktastrātumanyo nago nagam || 33 ||
[Analyze grammar]

pitustvameva me gatvā śīghramācakṣva rāghava |
na tvāmanudahet kruddho vanaṃ vahnirivaidhitaḥ || 34 ||
[Analyze grammar]

iyamekapadī rājanyato me piturāśramaḥ |
taṃ prasādaya gatvā tvaṃ na tvāṃ sa kupitaḥ śapet || 35 ||
[Analyze grammar]

viśalyaṃ kuru māṃ rājanmarma me niśitaḥ śaraḥ |
ruṇaddhi mṛdu sotsedhaṃ tīramamburayo yathā || 36 ||
[Analyze grammar]

na dvijātirahaṃ rājanmā bhūtte manaso vyathā |
śūdrāyāmasmi vaiśyena jāto janapadādhipa || 37 ||
[Analyze grammar]

itīva vadataḥ kṛcchrādbāṇābhihatamarmaṇaḥ |
tasya tvānamyamānasya taṃ bāṇamahamuddharam || 38 ||
[Analyze grammar]

jalārdragātraṃ tu vilapya kṛcchānmarmavraṇaṃ saṃtatamucchasantam |
tataḥ sarayvāṃ tamahaṃ śayānaṃ samīkṣya bhadre subhṛśaṃ viṣaṇṇaḥ || 39 ||
[Analyze grammar]