Chapter 58

tadajñānānmahat pāpaṃ kṛtvā saṃkulitendriyaḥ |
ekastvacintayaṃ buddhyā kathaṃ nu sukṛtaṃ bhavet || 1 ||
[Analyze grammar]

tatastaṃ ghaṭamādaya pūrṇaṃ paramavāriṇā |
āśramaṃ tamahaṃ prāpya yathākhyātapathaṃ gataḥ || 2 ||
[Analyze grammar]

tatrāhaṃ durbalāvandhau vṛddhāvapariṇāyakau |
apaśyaṃ tasya pitarau lūnapakṣāviva dvijau || 3 ||
[Analyze grammar]

tannimittābhirāsīnau kathābhiraparikramau |
tāmāśāṃ matkṛte hīnāv udāsīnāvanāthavat || 4 ||
[Analyze grammar]

padaśabdaṃ tu me śrutvā munirvākyamabhāṣata |
kiṃ cirāyasi me putra pānīyaṃ kṣipramānaya || 5 ||
[Analyze grammar]

yannimittamidaṃ tāta salile krīḍitaṃ tvayā |
utkaṇṭhitā te māteyaṃ praviśa kṣipramāśramam || 6 ||
[Analyze grammar]

yadvyalīkaṃ kṛtaṃ putra mātrā te yadi vā mayā |
na tanmanasi kartavyaṃ tvayā tāta tapasvinā || 7 ||
[Analyze grammar]

tvaṃ gatistvagatīnāṃ ca cakṣustvaṃ hīnacakṣuṣām |
samāsaktāstvayi prāṇāḥ kiṃ cinnau nābhibhāṣase || 8 ||
[Analyze grammar]

munimavyaktayā vācā tamahaṃ sajjamānayā |
hīnavyañjanayā prekṣya bhīto bhīta ivābruvam || 9 ||
[Analyze grammar]

manasaḥ karma ceṣṭābhirabhisaṃstabhya vāgbalam |
ācacakṣe tvahaṃ tasmai putravyasanajaṃ bhayam || 10 ||
[Analyze grammar]

kṣatriyo'haṃ daśaratho nāhaṃ putro mahātmanaḥ |
sajjanāvamataṃ duḥkhamidaṃ prāptaṃ svakarmajam || 11 ||
[Analyze grammar]

bhagavaṃścāpahasto'haṃ sarayūtīramāgataḥ |
jighāṃsuḥ śvāpadaṃ kiṃ cinnipāne vāgataṃ gajam || 12 ||
[Analyze grammar]

tatra śruto mayā śabdo jale kumbhasya pūryataḥ |
dvipo'yamiti matvā hi bāṇenābhihato mayā || 13 ||
[Analyze grammar]

gatvā nadyāstatastīramapaśyamiṣuṇā hṛdi |
vinirbhinnaṃ gataprāṇaṃ śayānaṃ bhuvi tāpasaṃ || 14 ||
[Analyze grammar]

bhagavañ śabdamālakṣya mayā gajajighāṃsunā |
visṛṣṭo'mbhasi nārācastena te nihataḥ sutaḥ || 15 ||
[Analyze grammar]

sa coddhṛtena bāṇena tatraiva svargamāsthitaḥ |
bhagavantāv ubhau śocannandhāviti vilapya ca || 16 ||
[Analyze grammar]

ajñānādbhavataḥ putraḥ sahasābhihato mayā |
śeṣamevaṃgate yat syāttat prasīdatu me muniḥ || 17 ||
[Analyze grammar]

sa tacchrutvā vacaḥ krūraṃ niḥśvasañ śokakarśitaḥ |
māmuvāca mahātejāḥ kṛtāñjalimupasthitam || 18 ||
[Analyze grammar]

yadyetadaśubhaṃ karma na sma me kathayeḥ svayam |
phalenmūrdhā sma te rājan sadyaḥ śatasahasradhā || 19 ||
[Analyze grammar]

kṣatriyeṇa vadho rājan vānaprasthe viśeṣataḥ |
jñānapūrvaṃ kṛtaḥ sthānāccyāvayedapi vajriṇam || 20 ||
[Analyze grammar]

ajñānāddhi kṛtaṃ yasmādidaṃ tenaiva jīvasi |
api hyadya kulaṃ nasyād rāghavāṇāṃ kuto bhavān || 21 ||
[Analyze grammar]

naya nau nṛpa taṃ deśamiti māṃ cābhyabhāṣata |
adya taṃ draṣṭumicchāvaḥ putraṃ paścimadarśanam || 22 ||
[Analyze grammar]

rudhireṇāvasitāṅgaṃ prakīrṇājinavāsasaṃ |
śayānaṃ bhuvi niḥsaṃjñaṃ dharmarājavaśaṃ gatam || 23 ||
[Analyze grammar]

athāhamekastaṃ deśaṃ nītvā tau bhṛśaduḥkhitau |
asparśayamahaṃ putraṃ taṃ muniṃ saha bhāryayā || 24 ||
[Analyze grammar]

tau putramātmanaḥ spṛṣṭvā tamāsādya tapasvinau |
nipetatuḥ śarīre'sya pitā cāsyedamabravīt || 25 ||
[Analyze grammar]

na nvahaṃ te priyaḥ putra mātaraṃ paśya dhārmika |
kiṃ nu nāliṅgase putra sukumāra vaco vada || 26 ||
[Analyze grammar]

kasya vāpararātre'haṃ śroṣyāmi hṛdayaṃgamam |
adhīyānasya madhuraṃ śāstraṃ vānyadviśeṣataḥ || 27 ||
[Analyze grammar]

ko māṃ saṃdhyāmupāsyaiva snātvā hutahutāśanaḥ |
ślāghayiṣyatyupāsīnaḥ putraśokabhayārditam || 28 ||
[Analyze grammar]

kandamūlaphalaṃ hṛtvā ko māṃ priyamivātithim |
bhojayiṣyatyakarmaṇyamapragrahamanāyakam || 29 ||
[Analyze grammar]

imāmandhāṃ ca vṛddhāṃ ca mātaraṃ te tapasvinīm |
kathaṃ putra bhariṣyāmi kṛpaṇāṃ putragardhinīm || 30 ||
[Analyze grammar]

tiṣṭha mā mā gamaḥ putra yamasya sadanaṃ prati |
śvo mayā saha gantāsi jananyā ca samedhitaḥ || 31 ||
[Analyze grammar]

ubhāvapi ca śokārtāvanāthau kṛpaṇau vane |
kṣiprameva gamiṣyāvastvayā hīnau yamakṣayam || 32 ||
[Analyze grammar]

tato vaivasvataṃ dṛṣṭvā taṃ pravakṣyāmi bhāratīm |
kṣamatāṃ dharmarājo me bibhṛyāt pitarāvayam || 33 ||
[Analyze grammar]

apāpo'si yathā putra nihataḥ pāpakarmaṇā |
tena satyena gacchāśu ye lokāḥ śastrayodhinām || 34 ||
[Analyze grammar]

yānti śūrā gatiṃ yāṃ ca saṃgrāmeṣvanivartinaḥ |
hatāstvabhimukhāḥ putra gatiṃ tāṃ paramāṃ vraja || 35 ||
[Analyze grammar]

yāṃ gatiṃ sagaraḥ śaibyo dilīpo janamejayaḥ |
nahuṣo dhundhumāraśca prāptāstāṃ gaccha putraka || 36 ||
[Analyze grammar]

yā gatiḥ sarvasādhūnāṃ svādhyāyāt patasaśca yā |
bhūmidasyāhitāgneśca ekapatnīvratasya ca || 37 ||
[Analyze grammar]

gosahasrapradātṝṇāṃ yā yā gurubhṛtāmapi |
dehanyāsakṛtāṃ yā ca tāṃ gatiṃ gaccha putraka |
na hi tvasmin kule jāto gacchatyakuśalāṃ gatim || 38 ||
[Analyze grammar]

evaṃ sa kṛpaṇaṃ tatra paryadevayatāsakṛt |
tato'smai kartumudakaṃ pravṛttaḥ saha bhāryayā || 39 ||
[Analyze grammar]

sa tu divyena rūpeṇa muniputraḥ svakarmabhiḥ |
āśvāsya ca muhūrtaṃ tu pitarau vākyamabravīt || 40 ||
[Analyze grammar]

sthānamasmi mahat prāpto bhavatoḥ paricāraṇāt |
bhavantāvapi ca kṣipraṃ mama mūlamupaiṣyataḥ || 41 ||
[Analyze grammar]

evamuktvā tu divyena vimānena vapuṣmatā |
āruroha divaṃ kṣipraṃ muniputro jitendriyaḥ || 42 ||
[Analyze grammar]

sa kṛtvā tūdakaṃ tūrṇaṃ tāpasaḥ saha bhāryayā |
māmuvāca mahātejāḥ kṛtāñjalimupasthitam || 43 ||
[Analyze grammar]

adyaiva jahi māṃ rājanmaraṇe nāsti me vyathā |
yacchareṇaikaputraṃ māṃ tvamakārṣīraputrakam || 44 ||
[Analyze grammar]

tvayā tu yadavijñānānnihato me sutaḥ śuciḥ |
tena tvāmabhiśapsyāmi suduḥkhamatidāruṇam || 45 ||
[Analyze grammar]

putravyasanajaṃ duḥkhaṃ yadetanmama sāmpratam |
evaṃ tvaṃ putraśokena rājan kālaṃ kariṣyasi || 46 ||
[Analyze grammar]

tasmānmāmāgataṃ bhadre tasyodārasya tadvacaḥ |
yadahaṃ putraśokena saṃtyakṣyāmyadya jīvitam || 47 ||
[Analyze grammar]

yadi māṃ saṃspṛśed rāmaḥ sakṛdadyālabheta vā |
na tanme sadṛśaṃ devi yanmayā rāghave kṛtam || 48 ||
[Analyze grammar]

cakṣuṣā tvāṃ na paśyāmi smṛtirmama vilupyate |
dūtā vaivasvatasyaite kausalye tvarayanti mām || 49 ||
[Analyze grammar]

atastu kiṃ duḥkhataraṃ yadahaṃ jīvitakṣaye |
na hi paśyāmi dharmajñaṃ rāmaṃ satyaparākyamam || 50 ||
[Analyze grammar]

na te manuṣyā devāste ye cāruśubhakuṇḍalam |
mukhaṃ drakṣyanti rāmasya varṣe pañcadaśe punaḥ || 51 ||
[Analyze grammar]

padmapatrekṣaṇaṃ subhru sudaṃṣṭraṃ cārunāsikam |
dhanyā drakṣyanti rāmasya tārādhipanibhaṃ mukham || 52 ||
[Analyze grammar]

sadṛśaṃ śāradasyendoḥ phullasya kamalasya ca |
sugandhi mama nāthasya dhanyā drakṣyanti tanmukham || 53 ||
[Analyze grammar]

nivṛttavanavāsaṃ tamayodhyāṃ punarāgatam |
drakṣyanti sukhino rāmaṃ śukraṃ mārgagataṃ yathā || 54 ||
[Analyze grammar]

ayamātmabhavaḥ śoko māmanāthamacetanam |
saṃsādayati vegena yathā kūlaṃ nadīrayaḥ || 55 ||
[Analyze grammar]

hā rāghava mahābāho hā mamāyāsa nāśana |
rājā daśarathaḥ śocañjīvitāntamupāgamat || 56 ||
[Analyze grammar]

tathā tu dīnaṃ kathayannarādhipaḥ priyasya putrasya vivāsanāturaḥ |
gate'rdharātre bhṛśaduḥkhapīḍitastadā jahau prāṇamudāradarśanaḥ || 57 ||
[Analyze grammar]