Chapter 48

te tu tasminmahāvṛkṣa uṣitvā rajanīṃ śivām |
vimale'bhyudite sūrye tasmāddeśāt pratasthire || 1 ||
[Analyze grammar]

yatra bhāgīrathī gaṅgā yamunāmabhivartate |
jagmustaṃ deśamuddiśya vigāhya sumahadvanam || 2 ||
[Analyze grammar]

te bhūmimāgān vividhāndeśāṃścāpi manoramān |
adṛṣṭapūrvānpaśyantastatra tatra yaśasvinaḥ || 3 ||
[Analyze grammar]

yathākṣemeṇa gacchan sa paśyaṃśca vividhāndrumān |
nivṛttamātre divase rāmaḥ saumitrimabravīt || 4 ||
[Analyze grammar]

prayāgamabhitaḥ paśya saumitre dhūmamunnatam |
agnerbhagavataḥ ketuṃ manye saṃnihito muniḥ || 5 ||
[Analyze grammar]

nūnaṃ prāptāḥ sma saṃbhedaṃ gaṅgāyamunayorvayam |
tathā hi śrūyate śambdo vāriṇā vārighaṭṭitaḥ || 6 ||
[Analyze grammar]

dārūṇi paribhinnāni vanajairupajīvibhiḥ |
bharadvājāśrame caite dṛśyante vividhā drumāḥ || 7 ||
[Analyze grammar]

dhanvinau tau sukhaṃ gatvā lambamāne divākare |
gaṅgāyamunayoḥ saṃdhau prāpaturnilayaṃ muneḥ || 8 ||
[Analyze grammar]

rāmastvāśramamāsādya trāsayanmṛgapakṣiṇaḥ |
gatvā muhūrtamadhvānaṃ bharadvājamupāgamat || 9 ||
[Analyze grammar]

tatastvāśramamāsādya munerdarśanakāṅkṣiṇau |
sītayānugatau vīrau dūrādevāvatasthatuḥ || 10 ||
[Analyze grammar]

hutāgnihotraṃ dṛṣṭvaiva mahābhāgaṃ kṛtāñjaliḥ |
rāmaḥ saumitriṇā sārdhaṃ sītayā cābhyavādayat || 11 ||
[Analyze grammar]

nyavedayata cātmānaṃ tasmai lakṣmaṇapūrvajaḥ |
putrau daśarathasyāvāṃ bhagavan rāmalakṣmaṇau || 12 ||
[Analyze grammar]

bhāryā mameyaṃ vaidehī kalyāṇī janakātmajā |
māṃ cānuyātā vijanaṃ tapovanamaninditā || 13 ||
[Analyze grammar]

pitrā pravrājyamānaṃ māṃ saumitriranujaḥ priyaḥ |
ayamanvagamadbhrātā vanameva dṛḍhavrataḥ || 14 ||
[Analyze grammar]

pitrā niyuktā bhagavanpraveṣyāmastapovanam |
dharmamevācariṣyāmastatra mūlaphalāśanāḥ || 15 ||
[Analyze grammar]

tasya tadvacanaṃ śrutvā rājaputrasya dhīmataḥ |
upānayata dharmātmā gāmarghyamudakaṃ tataḥ || 16 ||
[Analyze grammar]

mṛgapakṣibhirāsīno munibhiśca samantataḥ |
rāmamāgatamabhyarcya svāgatenāha taṃ muniḥ || 17 ||
[Analyze grammar]

pratigṛhya ca tāmarcāmupaviṣṭaṃ sarāghavam |
bharadvājo'bravīdvākyaṃ dharmayuktamidaṃ tadā || 18 ||
[Analyze grammar]

cirasya khalu kākutstha paśyāmi tvāmihāgatam |
śrutaṃ tava mayā cedaṃ vivāsanamakāraṇam || 19 ||
[Analyze grammar]

avakāśo vivikto'yaṃ mahānadyoḥ samāgame |
puṇyaśca ramaṇīyaśca vasatviha bhagān sukham || 20 ||
[Analyze grammar]

evamuktastu vacanaṃ bharadvājena rāghavaḥ |
pratyuvāca śubhaṃ vākyaṃ rāmaḥ sarvahite rataḥ || 21 ||
[Analyze grammar]

bhagavannita āsannaḥ paurajānapado janaḥ |
āgamiṣyati vaidehīṃ māṃ cāpi prekṣako janaḥ |
anena kāraṇenāhamiha vāsaṃ na rocaye || 22 ||
[Analyze grammar]

ekānte paśya bhagavannāśramasthānamuttamam |
ramate yatra vaidehī sukhārhā janakātmajā || 23 ||
[Analyze grammar]

etacchrutvā śubhaṃ vākyaṃ bharadvājo mahāmuniḥ |
rāghavasya tato vākyamartha grāhakamabravīt || 24 ||
[Analyze grammar]

daśakrośa itastāta giriryasminnivatsyasi |
maharṣisevitaḥ puṇyaḥ sarvataḥ sukha darśanaḥ || 25 ||
[Analyze grammar]

golāṅgūlānucarito vānararkṣaniṣevitaḥ |
citrakūṭa iti khyāto gandhamādanasaṃnibhaḥ || 26 ||
[Analyze grammar]

yāvatā citra kūṭasya naraḥ śṛṅgāṇyavekṣate |
kalyāṇāni samādhatte na pāpe kurute manaḥ || 27 ||
[Analyze grammar]

ṛṣayastatra bahavo vihṛtya śaradāṃ śatam |
tapasā divamārūḍhāḥ kapālaśirasā saha || 28 ||
[Analyze grammar]

praviviktamahaṃ manye taṃ vāsaṃ bhavataḥ sukham |
iha vā vanavāsāya vasa rāma mayā saha || 29 ||
[Analyze grammar]

sa rāmaṃ sarvakāmaistaṃ bharadvājaḥ priyātithim |
sabhāryaṃ saha ca bhrātrā pratijagrāha dharmavit || 30 ||
[Analyze grammar]

tasya prayāge rāmasya taṃ maharṣimupeyuṣaḥ |
prapannā rajanī puṇyā citrāḥ kathayataḥ kathāḥ || 31 ||
[Analyze grammar]

prabhātāyāṃ rajanyāṃ tu bharadvājamupāgamat |
uvāca naraśārdūlo muniṃ jvalitatejasaṃ || 32 ||
[Analyze grammar]

śarvarīṃ bhavanannadya satyaśīla tavāśrame |
uṣitāḥ smeha vasatimanujānātu no bhavān || 33 ||
[Analyze grammar]

rātryāṃ tu tasyāṃ vyuṣṭāyāṃ bharadvājo'bravīdidam |
madhumūlaphalopetaṃ citrakūṭaṃ vrajeti ha || 34 ||
[Analyze grammar]

tatra kuñjarayūthāni mṛgayūthāni cābhitaḥ |
vicaranti vanānteṣu tāni drakṣyasi rāghava || 35 ||
[Analyze grammar]

prahṛṣṭakoyaṣṭikakokilasvanairvināditaṃ taṃ vasudhādharaṃ śivam |
mṛgaiśca mattairbahubhiśca kuñjaraiḥ suramyamāsādya samāvasāśramam || 36 ||
[Analyze grammar]