Chapter 29

tataḥ śāsanamājñāya bhrātuḥ śubhataraṃ priyam |
gatvā sa praviveśāśu suyajñasya niveśanam || 1 ||
[Analyze grammar]

taṃ vipramagnyagārasthaṃ vanditvā lakṣmaṇo'bravīt |
sakhe'bhyāgaccha paśya tvaṃ veśma duṣkarakāriṇaḥ || 2 ||
[Analyze grammar]

tataḥ saṃdhyāmupāsyāśu gatvā saumitriṇā saha |
juṣṭaṃ tat prāviśal lakṣmyā ramyaṃ rāmaniveśanam || 3 ||
[Analyze grammar]

tamāgataṃ vedavidaṃ prāñjaliḥ sītayā saha |
suyajñamabhicakrāma rāghavo'gnimivārcitam || 4 ||
[Analyze grammar]

jātarūpamayairmukhyairaṅgadaiḥ kuṇḍalaiḥ śubhaiḥ |
sahema sūtrairmaṇibhiḥ keyūrairvalayairapi || 5 ||
[Analyze grammar]

anyaiśca ratnairbahubhiḥ kākutsthaḥ pratyapūjayat |
suyajñaṃ sa tadovāca rāmaḥ sītāpracoditaḥ || 6 ||
[Analyze grammar]

hāraṃ ca hemasūtraṃ ca bhāryāyai saumya hāraya |
raśanāṃ cādhunā sītā dātumicchati te sakhe || 7 ||
[Analyze grammar]

paryaṅkamagryāstaraṇaṃ nānāratnavibhūṣitam |
tamapīcchati vaidehī pratiṣṭhāpayituṃ tvayi || 8 ||
[Analyze grammar]

nāgaḥ śatruṃ jayo nāma mātulo yaṃ dadau mama |
taṃ te gajasahasreṇa dadāmi dvijapuṃgava || 9 ||
[Analyze grammar]

ityuktaḥ sa hi rāmeṇa suyajñaḥ pratigṛhya tat |
rāmalakṣmaṇasītānāṃ prayuyojāśiṣaḥ śivāḥ || 10 ||
[Analyze grammar]

atha bhrātaramavyagraṃ priyaṃ rāmaḥ priyaṃvadaḥ |
saumitriṃ tamuvācedaṃ brahmeva tridaśeśvaram || 11 ||
[Analyze grammar]

agastyaṃ kauśikaṃ caiva tāv ubhau brāhmaṇottamau |
arcayāhūya saumitre ratnaiḥ sasyamivāmbubhiḥ || 12 ||
[Analyze grammar]

kausalyāṃ ca ya āśīrbhirbhaktaḥ paryupatiṣṭhati |
ācāryastaittirīyāṇāmabhirūpaśca vedavit || 13 ||
[Analyze grammar]

tasya yānaṃ ca dāsīśca saumitre saṃpradāpaya |
kauśeyāni ca vastrāṇi yāvattuṣyati sa dvijaḥ || 14 ||
[Analyze grammar]

sūtaścitrarathaścāryaḥ sacivaḥ suciroṣitaḥ |
toṣayainaṃ mahārhaiśca ratnairvastrairdhanaistathā || 15 ||
[Analyze grammar]

śālivāhasahasraṃ ca dve śate bhadrakāṃstathā |
vyañjanārthaṃ ca saumitre gosahasramupākuru || 16 ||
[Analyze grammar]

tataḥ sa puruṣavyāghrastaddhanaṃ lakṣmaṇaḥ svayam |
yathoktaṃ brāhmaṇendrāṇāmadadāddhanado yathā || 17 ||
[Analyze grammar]

athābravīdbāṣpakalāṃstiṣṭhataścopajīvinaḥ |
saṃpradāya bahu dravyamekaikasyopajīvinaḥ || 18 ||
[Analyze grammar]

lakṣmaṇasya ca yadveśma gṛhaṃ ca yadidaṃ mama |
aśūnyaṃ kāryamekaikaṃ yāvadāgamanaṃ mama || 19 ||
[Analyze grammar]

ityuktvā duḥkhitaṃ sarvaṃ janaṃ tamupajīvinam |
uvācedaṃ dhanadhyakṣaṃ dhanamānīyatāmiti |
tato'sya dhanamājahruḥ sarvamevopajīvinaḥ || 20 ||
[Analyze grammar]

tataḥ sa puruṣavyāghrastaddhanaṃ sahalakṣmaṇaḥ |
dvijebhyo bālavṛddhebhyaḥ kṛpaṇebhyo'bhyadāpayat || 21 ||
[Analyze grammar]

tatrāsīt piṅgalo gārgyastrijaṭo nāma vai dvijaḥ |
ā pañcamāyāḥ kakṣyāyā nainaṃ kaścidavārayat || 22 ||
[Analyze grammar]

sa rājaputramāsādya trijaṭo vākyamabravīt |
nirdhano bahuputro'smi rājaputra mahāyaśaḥ |
uñchavṛttirvane nityaṃ pratyavekṣasva māmiti || 23 ||
[Analyze grammar]

tamuvāca tato rāmaḥ parihāsasamanvitam |
gavāṃ sahasramapyekaṃ na tu viśrāṇitaṃ mayā |
parikṣipasi daṇḍena yāvattāvadavāpsyasi || 24 ||
[Analyze grammar]

sa śāṭīṃ tvaritaḥ kaṭyāṃ saṃbhrāntaḥ pariveṣṭya tām |
āvidhya daṇḍaṃ cikṣepa sarvaprāṇena vegitaḥ || 25 ||
[Analyze grammar]

uvāca ca tato rāmastaṃ gārgyamabhisāntvayan |
manyurna khalu kartavyaḥ parihāso hyayaṃ mama || 26 ||
[Analyze grammar]

tataḥ sabhāryastrijaṭo mahāmunirgavāmanīkaṃ pratigṛhya moditaḥ |
yaśobalaprītisukhopabṛṃhiṇīstadāśiṣaḥ pratyavadanmahātmanaḥ || 27 ||
[Analyze grammar]