Chapter 7

jñātidāsī yato jātā kaikeyyāstu sahoṣitā |
prāsādaṃ candrasaṃkāśamāruroha yadṛcchayā || 1 ||
[Analyze grammar]

siktarājapathāṃ kṛtsnāṃ prakīrṇakamalotpalām |
ayodhyāṃ mantharā tasmāt prāsādādanvavaikṣata || 2 ||
[Analyze grammar]

patākābhirvarārhābhirdhvajaiśca samalaṃkṛtām |
siktāṃ candanatoyaiśca śiraḥsnātajanairvṛtām || 3 ||
[Analyze grammar]

avidūre sthitāṃ dṛṣṭvā dhātrīṃ papraccha mantharā |
uttamenābhisaṃyuktā harṣeṇārthaparā satī || 4 ||
[Analyze grammar]

rāmamātā dhanaṃ kiṃ nu janebhyaḥ saṃprayacchati |
atimātraṃ praharṣo'yaṃ kiṃ janasya ca śaṃsa me |
kārayiṣyati kiṃ vāpi saṃprahṛṣṭo mahīpatiḥ || 5 ||
[Analyze grammar]

vidīryamāṇā harṣeṇa dhātrī paramayā mudā |
ācacakṣe'tha kubjāyai bhūyasīṃ rāghave śriyam || 6 ||
[Analyze grammar]

śvaḥ puṣyeṇa jitakrodhaṃ yauvarājyena rāghavam |
rājā daśaratho rāmamabhiṣecayitānagham || 7 ||
[Analyze grammar]

dhātryāstu vacanaṃ śrutvā kubjā kṣipramamarṣitā |
kailāsa śikharākārāt prāsādādavarohata || 8 ||
[Analyze grammar]

sā dahyamānā kopena mantharā pāpadarśinī |
śayānāmetya kaikeyīmidaṃ vacanamabravīt || 9 ||
[Analyze grammar]

uttiṣṭha mūḍhe kiṃ śeṣe bhayaṃ tvāmabhivartate |
upaplutamahaughena kimātmānaṃ na budhyase || 10 ||
[Analyze grammar]

aniṣṭe subhagākāre saubhāgyena vikatthase |
calaṃ hi tava saubhāgyaṃ nadyaḥ srota ivoṣṇage || 11 ||
[Analyze grammar]

evamuktā tu kaikeyī ruṣṭayā paruṣaṃ vacaḥ |
kubjayā pāpadarśinyā viṣādamagamat param || 12 ||
[Analyze grammar]

kaikeyī tvabravīt kubjāṃ kaccit kṣemaṃ na manthare |
viṣaṇṇavadanāṃ hi tvāṃ lakṣaye bhṛśaduḥkhitām || 13 ||
[Analyze grammar]

mantharā tu vacaḥ śrutvā kaikeyyā madhurākṣaram |
uvāca krodhasaṃyuktā vākyaṃ vākyaviśāradā || 14 ||
[Analyze grammar]

sā viṣaṇṇatarā bhūtvā kubjā tasyā hitaiṣiṇī |
viṣādayantī provāca bhedayantī ca rāghavam || 15 ||
[Analyze grammar]

akṣemaṃ sumahaddevi pravṛttaṃ tvadvināśanam |
rāmaṃ daśaratho rājā yauvarājye'bhiṣekṣyati || 16 ||
[Analyze grammar]

sāsmyagādhe bhaye magnā duḥkhaśokasamanvitā |
dahyamānānaleneva tvaddhitārthamihāgatā || 17 ||
[Analyze grammar]

tava duḥkhena kaikeyi mama duḥkhaṃ mahadbhavet |
tvadvṛddhau mama vṛddhiśca bhavedatra na saṃśayaḥ || 18 ||
[Analyze grammar]

narādhipakule jātā mahiṣī tvaṃ mahīpateḥ |
ugratvaṃ rājadharmāṇāṃ kathaṃ devi na budhyase || 19 ||
[Analyze grammar]

dharmavādī śaṭho bhartā ślakṣṇavādī ca dāruṇaḥ |
śuddhabhāve na jānīṣe tenaivamatisaṃdhitā || 20 ||
[Analyze grammar]

upasthitaṃ prayuñjānastvayi sāntvamanarthakam |
arthenaivādya te bhartā kausalyāṃ yojayiṣyati || 21 ||
[Analyze grammar]

apavāhya sa duṣṭātmā bharataṃ tava bandhuṣu |
kālyaṃ sthāpayitā rāmaṃ rājye nihatakaṇṭake || 22 ||
[Analyze grammar]

śatruḥ patipravādena mātreva hitakāmyayā |
āśīviṣa ivāṅkena bāle paridhṛtastvayā || 23 ||
[Analyze grammar]

yathā hi kuryāt sarpo vā śatrurvā pratyupekṣitaḥ |
rājñā daśarathenādya saputrā tvaṃ tathā kṛtā || 24 ||
[Analyze grammar]

pāpenānṛtasāntvena bāle nityaṃ sukhocite |
rāmaṃ sthāpayatā rājye sānubandhā hatā hyasi || 25 ||
[Analyze grammar]

sā prāptakālaṃ kaikeyi kṣipraṃ kuru hitaṃ tava |
trāyasva putramātmānaṃ māṃ ca vismayadarśane || 26 ||
[Analyze grammar]

mantharāyā vacaḥ śrutvā śayanāt sā śubhānanā |
ekamābharaṇaṃ tasyai kubjāyai pradadau śubham || 27 ||
[Analyze grammar]

dattvā tvābharaṇaṃ tasyai kubjāyai pramadottamā |
kaikeyī mantharāṃ hṛṣṭā punarevābravīdidam || 28 ||
[Analyze grammar]

idaṃ tu manthare mahyamākhyāsi paramaṃ priyam |
etanme priyamākhyātuḥ kiṃ vā bhūyaḥ karomi te || 29 ||
[Analyze grammar]

rāme vā bharate vāhaṃ viśeṣaṃ nopalakṣaye |
tasmāttuṣṭāsmi yad rājā rāmaṃ rājye'bhiṣekṣyati || 30 ||
[Analyze grammar]

na me paraṃ kiṃ ciditastvayā punaḥ priyaṃ priyārhe suvacaṃ vaco varam |
tathā hyavocastvamataḥ priyottaraṃ varaṃ paraṃ te pradadāmi taṃ vṛṇu || 31 ||
[Analyze grammar]