Chapter 8

mantharā tvabhyasūyyaināmutsṛjyābharaṇaṃ ca tat |
uvācedaṃ tato vākyaṃ kopaduḥkhasamanvitā || 1 ||
[Analyze grammar]

harṣaṃ kimidamasthāne kṛtavatyasi bāliśe |
śokasāgaramadhyasthamātmānaṃ nāvabudhyase || 2 ||
[Analyze grammar]

subhagā khalu kausalyā yasyāḥ putro'bhiṣekṣyate |
yauvarājyena mahatā śvaḥ puṣyeṇa dvijottamaiḥ || 3 ||
[Analyze grammar]

prāptāṃ sumahatīṃ prītiṃ pratītāṃ tāṃ hatadviṣam |
upasthāsyasi kausalyāṃ dāsīva tvaṃ kṛtāñjaliḥ || 4 ||
[Analyze grammar]

hṛṣṭāḥ khalu bhaviṣyanti rāmasya paramāḥ striyaḥ |
aprahṛṣṭā bhaviṣyanti snuṣāste bharatakṣaye || 5 ||
[Analyze grammar]

tāṃ dṛṣṭvā paramaprītāṃ bruvantīṃ mantharāṃ tataḥ |
rāmasyaiva guṇāndevī kaikeyī praśaśaṃsa ha || 6 ||
[Analyze grammar]

dharmajño gurubhirdāntaḥ kṛtajñaḥ satyavāk śuciḥ |
rāmo rājñaḥ suto jyeṣṭho yauvarājyamato'rhati || 7 ||
[Analyze grammar]

bhrātṝnbhṛtyāṃśca dīrghāyuḥ pitṛvat pālayiṣyati |
saṃtapyase kathaṃ kubje śrutvā rāmābhiṣecanam || 8 ||
[Analyze grammar]

bharataścāpi rāmasya dhruvaṃ varṣaśatāt param |
pitṛpaitāmahaṃ rājyamavāpsyati nararṣabhaḥ || 9 ||
[Analyze grammar]

sā tvamabhyudaye prāpte vartamāne ca manthare |
bhaviṣyati ca kalyāṇe kimarthaṃ paritapyase |
kausalyāto'tiriktaṃ ca sa tu śuśrūṣate hi mām || 10 ||
[Analyze grammar]

kaikeyyā vacanaṃ śrutvā mantharā bhṛśaduḥkhitā |
dīrghamuṣṇaṃ viniḥśvasya kaikeyīmidamabravīt || 11 ||
[Analyze grammar]

anarthadarśinī maurkhyānnātmānamavabudhyase |
śokavyasanavistīrṇe majjantī duḥkhasāgare || 12 ||
[Analyze grammar]

bhavitā rāghavo rājā rāghavasya ca yaḥ sutaḥ |
rājavaṃśāttu bharataḥ kaikeyi parihāsyate || 13 ||
[Analyze grammar]

na hi rājñaḥ sutāḥ sarve rājye tiṣṭhanti bhāmini |
sthāpyamāneṣu sarveṣu sumahānanayo bhavet || 14 ||
[Analyze grammar]

tasmājjyeṣṭhe hi kaikeyi rājyatantrāṇi pārthivāḥ |
sthāpayantyanavadyāṅgi guṇavatsvitareṣvapi || 15 ||
[Analyze grammar]

asāvatyantanirbhagnastava putro bhaviṣyati |
anāthavat sukhebhyaśca rājavaṃśācca vatsale || 16 ||
[Analyze grammar]

sāhaṃ tvadarthe saṃprāptā tvaṃ tu māṃ nāvabudhyase |
sapatnivṛddhau yā me tvaṃ pradeyaṃ dātumicchasi || 17 ||
[Analyze grammar]

dhruvaṃ tu bharataṃ rāmaḥ prāpya rājyamakaṇṭakam |
deśāntaraṃ nāyayitā lokāntaramathāpi vā || 18 ||
[Analyze grammar]

bāla eva hi mātulyaṃ bharato nāyitastvayā |
saṃnikarṣācca sauhārdaṃ jāyate sthāvareṣvapi || 19 ||
[Analyze grammar]

goptā hi rāmaṃ saumitrirlakṣmaṇaṃ cāpi rāghavaḥ |
aśvinoriva saubhrātraṃ tayorlokeṣu viśrutam || 20 ||
[Analyze grammar]

tasmānna lakṣmaṇe rāmaḥ pāpaṃ kiṃ cit kariṣyati |
rāmastu bharate pāpaṃ kuryāditi na saṃśayaḥ || 21 ||
[Analyze grammar]

tasmād rājagṛhādeva vanaṃ gacchatu te sutaḥ |
etaddhi rocate mahyaṃ bhṛśaṃ cāpi hitaṃ tava || 22 ||
[Analyze grammar]

evaṃ te jñātipakṣasya śreyaścaiva bhaviṣyati |
yadi cedbharato dharmāt pitryaṃ rājyamavāpsyati || 23 ||
[Analyze grammar]

sa te sukhocito bālo rāmasya sahajo ripuḥ |
samṛddhārthasya naṣṭārtho jīviṣyati kathaṃ vaśe || 24 ||
[Analyze grammar]

abhidrutamivāraṇye siṃhena gajayūthapam |
pracchādyamānaṃ rāmeṇa bharataṃ trātumarhasi || 25 ||
[Analyze grammar]

darpānnirākṛtā pūrvaṃ tvayā saubhāgyavattayā |
rāmamātā sapatnī te kathaṃ vairaṃ na yātayet || 26 ||
[Analyze grammar]

yadā hi rāmaḥ pṛthivīmavāpsyati dhruvaṃ pranaṣṭo bharato bhaviṣyati |
ato hi saṃcintaya rājyamātmaje parasya cādyaiva vivāsakāraṇam || 27 ||
[Analyze grammar]