Chapter 6

gate purohite rāmaḥ snāto niyatamānasaḥ |
saha patnyā viśālākṣyā nārāyaṇamupāgamat || 1 ||
[Analyze grammar]

pragṛhya śirasā pātrīṃ haviṣo vidhivattadā |
mahate daivatāyājyaṃ juhāva jvalite'nale || 2 ||
[Analyze grammar]

śeṣaṃ ca haviṣastasya prāśyāśāsyātmanaḥ priyam |
dhyāyannārāyaṇaṃ devaṃ svāstīrṇe kuśasaṃstare || 3 ||
[Analyze grammar]

vāgyataḥ saha vaidehyā bhūtvā niyatamānasaḥ |
śrīmatyāyatane viṣṇoḥ śiśye naravarātmajaḥ || 4 ||
[Analyze grammar]

ekayāmāvaśiṣṭāyāṃ rātryāṃ prativibudhya saḥ |
alaṃkāravidhiṃ kṛtsnaṃ kārayāmāsa veśmanaḥ || 5 ||
[Analyze grammar]

tatra śṛṇvan sukhā vācaḥ sūtamāgadhabandinām |
pūrvāṃ saṃdhyāmupāsīno jajāpa yatamānasaḥ || 6 ||
[Analyze grammar]

tuṣṭāva praṇataścaiva śirasā madhusūdanam |
vimalakṣaumasaṃvīto vācayāmāsa ca dvijān || 7 ||
[Analyze grammar]

teṣāṃ puṇyāhaghoṣo'tha gambhīramadhurastadā |
ayodhyāṃ pūrayāmāsa tūryaghoṣānunāditaḥ || 8 ||
[Analyze grammar]

kṛtopavāsaṃ tu tadā vaidehyā saha rāghavam |
ayodhyā nilayaḥ śrutvā sarvaḥ pramudito janaḥ || 9 ||
[Analyze grammar]

tataḥ paurajanaḥ sarvaḥ śrutvā rāmābhiṣecanam |
prabhātāṃ rajanīṃ dṛṣṭvā cakre śobhāṃ parāṃ punaḥ || 10 ||
[Analyze grammar]

sitābhraśikharābheṣu devatāyataneṣu ca |
catuṣpatheṣu rathyāsu caityeṣvaṭṭālakeṣu ca || 11 ||
[Analyze grammar]

nānāpaṇyasamṛddheṣu vaṇijāmāpaṇeṣu ca |
kuṭumbināṃ samṛddheṣu śrīmatsu bhavaneṣu ca || 12 ||
[Analyze grammar]

sabhāsu caiva sarvāsu vṛkṣeṣvālakṣiteṣu ca |
dhvajāḥ samucchritāścitrāḥ patākāścābhavaṃstadā || 13 ||
[Analyze grammar]

naṭanartakasaṃghānāṃ gāyakānāṃ ca gāyatām |
manaḥkarṇasukhā vācaḥ śuśruvuśca tatastataḥ || 14 ||
[Analyze grammar]

rāmābhiṣekayuktāśca kathāścakrurmitho janāḥ |
rāmābhiṣeke saṃprāpte catvareṣu gṛheṣu ca || 15 ||
[Analyze grammar]

bālā api krīḍamānā gṛhadvāreṣu saṃghaśaḥ |
rāmābhiṣekasaṃyuktāścakrureva mithaḥ kathāḥ || 16 ||
[Analyze grammar]

kṛtapuṣpopahāraśca dhūpagandhādhivāsitaḥ |
rājamārgaḥ kṛtaḥ śrīmānpaurai rāmābhiṣecane || 17 ||
[Analyze grammar]

prakāśīkaraṇārthaṃ ca niśāgamanaśaṅkayā |
dīpavṛkṣāṃstathā cakruranu rathyāsu sarvaśaḥ || 18 ||
[Analyze grammar]

alaṃkāraṃ purasyaivaṃ kṛtvā tat puravāsinaḥ |
ākāṅkṣamāṇā rāmasya yauvarājyābhiṣecanam || 19 ||
[Analyze grammar]

sametya saṃghaśaḥ sarve catvareṣu sabhāsu ca |
kathayanto mithastatra praśaśaṃsurjanādhipam || 20 ||
[Analyze grammar]

aho mahātmā rājāyamikṣvākukulanandanaḥ |
jñātvā yo vṛddhamātmānaṃ rāmaṃ rājye'bhiṣekṣyati || 21 ||
[Analyze grammar]

sarve hyanugṛhītāḥ sma yanno rāmo mahīpatiḥ |
cirāya bhavitā goptā dṛṣṭalokaparāvaraḥ || 22 ||
[Analyze grammar]

anuddhatamanā vidvāndharmātmā bhrātṛvatsalaḥ |
yathā ca bhrātṛṣu snigdhastathāsmāsvapi rāghavaḥ || 23 ||
[Analyze grammar]

ciraṃ jīvatu dharmātmā rājā daśaratho'naghaḥ |
yatprasādenābhiṣiktaṃ rāmaṃ drakṣyāmahe vayam || 24 ||
[Analyze grammar]

evaṃvidhaṃ kathayatāṃ paurāṇāṃ śuśruvustadā |
digbhyo'pi śrutavṛttāntāḥ prāptā jānapadā janāḥ || 25 ||
[Analyze grammar]

te tu digbhyaḥ purīṃ prāptā draṣṭuṃ rāmābhiṣecanam |
rāmasya pūrayāmāsuḥ purīṃ jānapadā janāḥ || 26 ||
[Analyze grammar]

janaughaistairvisarpadbhiḥ śuśruve tatra niḥsvanaḥ |
parvasūdīrṇavegasya sāgarasyeva niḥsvanaḥ || 27 ||
[Analyze grammar]

tatastadindrakṣayasaṃnibhaṃ puraṃ didṛkṣubhirjānapadairupāgataiḥ |
samantataḥ sasvanamākulaṃ babhau samudrayādobhirivārṇavodakam || 28 ||
[Analyze grammar]