Chapter 14

medhāvī tu tato dhyātvā sa kiṃ cididamuttamam |
labdhasaṃjñastatastaṃ tu vedajño nṛpamabravīt || 1 ||
[Analyze grammar]

iṣṭiṃ te'haṃ kariṣyāmi putrīyāṃ putrakāraṇāt |
atharvaśirasi proktairmantraiḥ siddhāṃ vidhānataḥ || 2 ||
[Analyze grammar]

tataḥ prākramadiṣṭiṃ tāṃ putrīyāṃ putra kāraṇāt |
juhāva cāgnau tejasvī mantradṛṣṭena karmaṇā || 3 ||
[Analyze grammar]

tato devāḥ sagandharvāḥ siddhāśca paramarṣayaḥ |
bhāgapratigrahārthaṃ vai samavetā yathāvidhi || 4 ||
[Analyze grammar]

tāḥ sametya yathānyāyaṃ tasmin sadasi devatāḥ |
abruvaṃl lokakartāraṃ brahmāṇaṃ vacanaṃ mahat || 5 ||
[Analyze grammar]

bhagavaṃstvatprasādena rāvaṇo nāma rākṣasaḥ |
sarvānno bādhate vīryācchāsituṃ taṃ na śaknumaḥ || 6 ||
[Analyze grammar]

tvayā tasmai varo dattaḥ prītena bhagavanpurā |
mānayantaśca taṃ nityaṃ sarvaṃ tasya kṣamāmahe || 7 ||
[Analyze grammar]

udvejayati lokāṃstrīnucchritāndveṣṭi durmatiḥ |
śakraṃ tridaśarājānaṃ pradharṣayitumicchati || 8 ||
[Analyze grammar]

ṛṣīnyakṣān sagandharvānasurānbrāhmaṇāṃstathā |
atikrāmati durdharṣo varadānena mohitaḥ || 9 ||
[Analyze grammar]

nainaṃ sūryaḥ pratapati pārśve vāti na mārutaḥ |
calormimālī taṃ dṛṣṭvā samudro'pi na kampate || 10 ||
[Analyze grammar]

tanmananno bhayaṃ tasmād rākṣasādghoradarśanāt |
vadhārthaṃ tasya bhagavannupāyaṃ kartumarhasi || 11 ||
[Analyze grammar]

evamuktaḥ suraiḥ sarvaiścintayitvā tato'bravīt |
hantāyaṃ vihitastasya vadhopāyo durātmanaḥ || 12 ||
[Analyze grammar]

tena gandharvayakṣāṇāṃ devadānavarakṣasām |
avadhyo'smīti vāguktā tathetyuktaṃ ca tanmayā || 13 ||
[Analyze grammar]

nākīrtayadavajñānāttad rakṣo mānuṣāṃstadā |
tasmāt sa mānuṣādvadhyo mṛturnānyo'sya vidyate || 14 ||
[Analyze grammar]

etacchrutvā priyaṃ vākyaṃ brahmaṇā samudāhṛtam |
devā maharṣayaḥ sarve prahṛṣṭāste'bhavaṃstadā || 15 ||
[Analyze grammar]

etasminnantare viṣṇurupayāto mahādyutiḥ |
brahmaṇā ca samāgamya tatra tasthau samāhitaḥ || 16 ||
[Analyze grammar]

tamabruvan surāḥ sarve samabhiṣṭūya saṃnatāḥ |
tvāṃ niyokṣyāmahe viṣṇo lokānāṃ hitakāmyayā || 17 ||
[Analyze grammar]

rājño daśarathasya tvamayodhyādhipatervibho |
dharmajñasya vadānyasya maharṣisamatejasaḥ |
tasya bhāryāsu tisṛṣu hrīśrīkīrtyupamāsu ca |
viṣṇo putratvamāgaccha kṛtvātmānaṃ caturvidham || 18 ||
[Analyze grammar]

tatra tvaṃ mānuṣo bhūtvā pravṛddhaṃ lokakaṇṭakam |
avadhyaṃ daivatairviṣṇo samare jahi rāvaṇam || 19 ||
[Analyze grammar]

sa hi devān sagandharvān siddhāṃśca ṛṣisattamān |
rākṣaso rāvaṇo mūrkho vīryotsekena bādhate || 20 ||
[Analyze grammar]

taduddhataṃ rāvaṇamṛddhatejasaṃ pravṛddhadarpaṃ tridaśeśvaradviṣam |
virāvaṇaṃ sādhu tapasvikaṇṭakaṃ tapasvināmuddhara taṃ bhayāvaham || 21 ||
[Analyze grammar]