Chapter 13

atha saṃvatsare pūrṇe tasminprāpte turaṅgame |
sarayvāścottare tīre rājño yajño'bhyavartata || 1 ||
[Analyze grammar]

ṛśyaśṛṅgaṃ puraskṛtya karma cakrurdvijarṣabhāḥ |
aśvamedhe mahāyajñe rājño'sya sumahātmanaḥ || 2 ||
[Analyze grammar]

karma kurvanti vidhivad yājakā vedapāragāḥ |
yathāvidhi yathānyāyaṃ parikrāmanti śāstrataḥ || 3 ||
[Analyze grammar]

pravargyaṃ śāstrataḥ kṛtvā tathaivopasadaṃ dvijāḥ |
cakruśca vidhivat sarvamadhikaṃ karma śāstrataḥ || 4 ||
[Analyze grammar]

abhipūjya tato hṛṣṭāḥ sarve cakruryathāvidhi |
prātaḥsavanapūrvāṇi karmāṇi munipuṃgavāḥ || 5 ||
[Analyze grammar]

na cāhutamabhūttatra skhalitaṃ vāpi kiṃ cana |
dṛśyate brahmavat sarvaṃ kṣemayuktaṃ hi cakrire || 6 ||
[Analyze grammar]

na teṣvahaḥsu śrānto vā kṣudhito vāpi dṛśyate |
nāvidvānbrāhmaṇastatra nāśatānucarastathā || 7 ||
[Analyze grammar]

brāhmaṇā bhuñjate nityaṃ nāthavantaśca bhuñjate |
tāpasā bhuñjate cāpi śramaṇā bhuñjate tathā || 8 ||
[Analyze grammar]

vṛddhāśca vyādhitāścaiva striyo bālāstathaiva ca |
aniśaṃ bhuñjamānānāṃ na tṛptirupalabhyate || 9 ||
[Analyze grammar]

dīyatāṃ dīyatāmannaṃ vāsāṃsi vividhāni ca |
iti saṃcoditāstatra tathā cakruranekaśaḥ || 10 ||
[Analyze grammar]

annakūṭāśca bahavo dṛśyante parvatopamāḥ |
divase divase tatra siddhasya vidhivattadā || 11 ||
[Analyze grammar]

annaṃ hi vidhivat svādu praśaṃsanti dvijarṣabhāḥ |
aho tṛptāḥ sma bhadraṃ te iti śuśrāva rāghavaḥ || 12 ||
[Analyze grammar]

svalaṃkṛtāśca puruṣā brāhmaṇānparyaveṣayan |
upāsate ca tānanye sumṛṣṭamaṇikuṇḍalāḥ || 13 ||
[Analyze grammar]

karmāntare tadā viprā hetuvādānbahūnapi |
prāhuḥ suvāgmino dhīrāḥ parasparajigīṣayā || 14 ||
[Analyze grammar]

divase divase tatra saṃstare kuśalā dvijāḥ |
sarvakarmāṇi cakruste yathāśāstraṃ pracoditāḥ || 15 ||
[Analyze grammar]

nāṣaḍaṅgavidatrāsīnnāvrato nābahuśrutaḥ |
sadasyastasya vai rājño nāvādakuśalo dvijaḥ || 16 ||
[Analyze grammar]

prāpte yūpocchraye tasmin ṣaḍbailvāḥ khādirāstathā |
tāvanto bilvasahitāḥ parṇinaśca tathāpare || 17 ||
[Analyze grammar]

śleṣmātakamayo diṣṭo devadārumayastathā |
dvāveva tatra vihitau bāhuvyastaparigrahau || 18 ||
[Analyze grammar]

kāritāḥ sarva evaite śāstrajñairyajñakovidaiḥ |
śobhārthaṃ tasya yajñasya kāñcanālaṃkṛtā bhavan || 19 ||
[Analyze grammar]

vinyastā vidhivat sarve śilpibhiḥ sukṛtā dṛḍhāḥ |
aṣṭāśrayaḥ sarva eva ślakṣṇarūpasamanvitāḥ || 20 ||
[Analyze grammar]

ācchāditāste vāsobhiḥ puṣpairgandhaiśca bhūṣitāḥ |
saptarṣayo dīptimanto virājante yathā divi || 21 ||
[Analyze grammar]

iṣṭakāśca yathānyāyaṃ kāritāśca pramāṇataḥ |
cito'gnirbrāhmaṇaistatra kuśalaiḥ śulbakarmaṇi || 22 ||
[Analyze grammar]

sa cityo rājasiṃhasya saṃcitaḥ kuśalairdvijaiḥ |
garuḍo rukmapakṣo vai triguṇo'ṣṭādaśātmakaḥ || 23 ||
[Analyze grammar]

niyuktāstatra paśavastattaduddiśya daivatam |
uragāḥ pakṣiṇaścaiva yathāśāstraṃ pracoditāḥ |
śāmitre tu hayastatra tathā jala carāśca ye || 24 ||
[Analyze grammar]

ṛtvigbhiḥ sarvamevaitanniyuktaṃ śāstratastadā |
paśūnāṃ triśataṃ tatra yūpeṣu niyataṃ tadā |
aśvaratnottamaṃ tasya rājño daśarathasya ha || 25 ||
[Analyze grammar]

kausalyā taṃ hayaṃ tatra paricarya samantataḥ |
kṛpāṇairviśaśāsainaṃ tribhiḥ paramayā mudā || 26 ||
[Analyze grammar]

patatriṇā tadā sārdhaṃ susthitena ca cetasā |
avasad rajanīmekāṃ kausalyā dharmakāmyayā || 27 ||
[Analyze grammar]

hotādhvaryustathodgātā hayena samayojayan |
mahiṣyā parivṛktyātha vāvātāmaparāṃ tathā || 28 ||
[Analyze grammar]

patatriṇastasya vapāmuddhṛtya niyatendriyaḥ |
ṛtvik parama saṃpannaḥ śrapayāmāsa śāstrataḥ || 29 ||
[Analyze grammar]

dhūmagandhaṃ vapāyāstu jighrati sma narādhipaḥ |
yathākālaṃ yathānyāyaṃ nirṇudanpāpamātmanaḥ || 30 ||
[Analyze grammar]

hayasya yāni cāṅgāni tāni sarvāṇi brāhmaṇāḥ |
agnau prāsyanti vidhivat samastāḥ ṣoḍaśartvijaḥ || 31 ||
[Analyze grammar]

plakṣaśākhāsu yajñānāmanyeṣāṃ kriyate haviḥ |
aśvamedhasya caikasya vaitaso bhāga iṣyate || 32 ||
[Analyze grammar]

tryaho'śvamedhaḥ saṃkhyātaḥ kalpasūtreṇa brāhmaṇaiḥ |
catuṣṭomamahastasya prathamaṃ parikalpitam || 33 ||
[Analyze grammar]

ukthyaṃ dvitīyaṃ saṃkhyātamatirātraṃ tathottaram |
kāritāstatra bahavo vihitāḥ śāstradarśanāt || 34 ||
[Analyze grammar]

jyotiṣṭomāyuṣī caiva atirātrau ca nirmitau |
abhijidviśvajiccaiva aptoryāmo mahākratuḥ || 35 ||
[Analyze grammar]

prācīṃ hotre dadau rājā diśaṃ svakulavardhanaḥ |
adhvaryave pratīcīṃ tu brahmaṇe dakṣiṇāṃ diśam || 36 ||
[Analyze grammar]

udgātre tu tathodīcīṃ dakṣiṇaiṣā vinirmitā |
aśvamedhe mahāyajñe svayambhuvihite purā || 37 ||
[Analyze grammar]

kratuṃ samāpya tu tadā nyāyataḥ puruṣarṣabhaḥ |
ṛtvigbhyo hi dadau rājā dharāṃ tāṃ kratuvardhanaḥ || 38 ||
[Analyze grammar]

ṛtvijastvabruvan sarve rājānaṃ gatakalmaṣam |
bhavāneva mahīṃ kṛtsnāmeko rakṣitumarhati || 39 ||
[Analyze grammar]

na bhūmyā kāryamasmākaṃ na hi śaktāḥ sma pālane |
ratāḥ svādhyāyakaraṇe vayaṃ nityaṃ hi bhūmipa |
niṣkrayaṃ kiṃ cideveha prayacchatu bhavāniti || 40 ||
[Analyze grammar]

gavāṃ śatasahasrāṇi daśa tebhyo dadau nṛpaḥ |
daśakoṭiṃ suvarṇasya rajatasya caturguṇam || 41 ||
[Analyze grammar]

ṛtvijastu tataḥ sarve pradaduḥ sahitā vasu |
ṛśyaśṛṅgāya munaye vasiṣṭhāya ca dhīmate || 42 ||
[Analyze grammar]

tataste nyāyataḥ kṛtvā pravibhāgaṃ dvijottamāḥ |
suprītamanasaḥ sarve pratyūcurmuditā bhṛśam || 43 ||
[Analyze grammar]

tataḥ prītamanā rājā prāpya yajñamanuttamam |
pāpāpahaṃ svarnayanaṃ dustaraṃ pārthivarṣabhaiḥ || 44 ||
[Analyze grammar]

tato'bravīdṛśyaśṛṅgaṃ rājā daśarathastadā |
kulasya vardhanaṃ tattu kartumarhasi suvrata || 45 ||
[Analyze grammar]

tatheti ca sa rājānamuvāca dvijasattamaḥ |
bhaviṣyanti sutā rājaṃścatvāraste kulodvahāḥ || 46 ||
[Analyze grammar]