Chapter 5

sarvāpūrvamiyaṃ yeṣāmāsīt kṛtsnā vasuṃdharā |
prajāpatimupādāya nṛpāṇāṃ jayaśālinām || 1 ||
[Analyze grammar]

yeṣāṃ sa sagaro nāma sāgaro yena khānitaḥ |
ṣaṣṭiḥ putrasahasrāṇi yaṃ yāntaṃ paryavārayan || 2 ||
[Analyze grammar]

ikṣvākūṇāmidaṃ teṣāṃ rājñāṃ vaṃśe mahātmanām |
mahadutpannamākhyānaṃ rāmāyaṇamiti śrutam || 3 ||
[Analyze grammar]

tadidaṃ vartayiṣyāmi sarvaṃ nikhilamāditaḥ |
dharmakāmārthasahitaṃ śrotavyamanasūyayā || 4 ||
[Analyze grammar]

kosalo nāma muditaḥ sphīto janapado mahān |
niviṣṭaḥ sarayūtīre prabhūtadhanadhānyavān || 5 ||
[Analyze grammar]

ayodhyā nāma nagarī tatrāsīl lokaviśrutā |
manunā mānavendreṇa yā purī nirmitā svayam || 6 ||
[Analyze grammar]

āyatā daśa ca dve ca yojanāni mahāpurī |
śrīmatī trīṇi vistīrṇā suvibhaktamahāpathā || 7 ||
[Analyze grammar]

rājamārgeṇa mahatā suvibhaktena śobhitā |
muktapuṣpāvakīrṇena jalasiktena nityaśaḥ || 8 ||
[Analyze grammar]

tāṃ tu rājā daśaratho mahārāṣṭravivardhanaḥ |
purīmāvāsayāmāsa divi devapatiryathā || 9 ||
[Analyze grammar]

kapāṭatoraṇavatīṃ suvibhaktāntarāpaṇām |
sarvayantrāyudhavatīmupetāṃ sarvaśilpibhiḥ || 10 ||
[Analyze grammar]

sūtamāgadhasaṃbādhāṃ śrīmatīmatulaprabhām |
uccāṭṭāladhvajavatīṃ śataghnīśatasaṃkulām || 11 ||
[Analyze grammar]

vadhūnāṭakasaṅghaiśca saṃyuktāṃ sarvataḥ purīm |
udyānāmravaṇopetāṃ mahatīṃ sālamekhalām || 12 ||
[Analyze grammar]

durgagambhīraparikhāṃ durgāmanyairdurāsadām |
vājivāraṇasaṃpūrṇāṃ gobhiruṣṭraiḥ kharaistathā || 13 ||
[Analyze grammar]

sāmantarājasaṅghaiśca balikarmabhirāvṛtām |
nānādeśanivāsaiśca vaṇigbhirupaśobhitām || 14 ||
[Analyze grammar]

prasādai ratnavikṛtaiḥ parvatairupaśobhitām |
kūṭāgāraiśca saṃpūrṇāmindrasyevāmarāvatīm || 15 ||
[Analyze grammar]

citrāmaṣṭāpadākārāṃ varanārīgaṇairyutām |
sarvaratnasamākīrṇāṃ vimānagṛhaśobhitām || 16 ||
[Analyze grammar]

gṛhagāḍhāmavicchidrāṃ samabhūmau niveśitām |
śālitaṇḍulasaṃpūrṇāmikṣukāṇḍarasodakām || 17 ||
[Analyze grammar]

dundubhībhirmṛdaṅgaiśca vīṇābhiḥ paṇavaistathā |
nāditāṃ bhṛśamatyarthaṃ pṛthivyāṃ tāmanuttamām || 18 ||
[Analyze grammar]

vimānamiva siddhānāṃ tapasādhigataṃ divi |
suniveśitaveśmāntāṃ narottamasamāvṛtām || 19 ||
[Analyze grammar]

ye ca bāṇairna vidhyanti viviktamaparāparam |
śabdavedhyaṃ ca vitataṃ laghuhastā viśāradāḥ || 20 ||
[Analyze grammar]

siṃhavyāghravarāhāṇāṃ mattānāṃ nadatāṃ vane |
hantāro niśitaiḥ śastrairbalādbāhubalairapi || 21 ||
[Analyze grammar]

tādṛśānāṃ sahasraistāmabhipūrṇāṃ mahārathaiḥ |
purīmāvāsayāmāsa rājā daśarathastadā || 22 ||
[Analyze grammar]

tāmagnimadbhirguṇavadbhirāvṛtāṃ dvijottamairvedaṣaḍaṅgapāragaiḥ |
sahasradaiḥ satyaratairmahātmabhirmaharṣikalpairṛṣibhiśca kevalaiḥ || 23 ||
[Analyze grammar]