Chapter 4

prāptarājyasya rāmasya vālmīkirbhagavānṛṣiḥ |
cakāra caritaṃ kṛtsnaṃ vicitrapadamātmavān || 1 ||
[Analyze grammar]

kṛtvā tu tanmahāprājñaḥ sabhaviṣyaṃ sahottaram |
cintayāmāsa ko nvetat prayuñjīyāditi prabhuḥ || 2 ||
[Analyze grammar]

tasya cintayamānasya maharṣerbhāvitātmanaḥ |
agṛhṇītāṃ tataḥ pādau muniveṣau kuśīlavau || 3 ||
[Analyze grammar]

kuśīlavau tu dharmajñau rājaputrau yaśasvinau |
bhrātarau svarasaṃpannau dadarśāśramavāsinau || 4 ||
[Analyze grammar]

sa tu medhāvinau dṛṣṭvā vedeṣu pariniṣṭhitau |
vedopabṛhmaṇārthāya tāvagrāhayata prabhuḥ || 5 ||
[Analyze grammar]

kāvyaṃ rāmāyaṇaṃ kṛtsnaṃ sītāyāścaritaṃ mahat |
paulastya vadhamityeva cakāra caritavrataḥ || 6 ||
[Analyze grammar]

pāṭhye geye ca madhuraṃ pramāṇaistribhiranvitam |
jātibhiḥ saptabhirbaddhaṃ tantrīlayasamanvitam || 7 ||
[Analyze grammar]

hāsyaśṛṅgārakāruṇyaraudravīrabhayānakaiḥ |
bībhatsādirasairyuktaṃ kāvyametadagāyatām || 8 ||
[Analyze grammar]

tau tu gāndharvatattvajñau mūrcchanāsthānakovidau |
bhrātarau svarasaṃpannau gandharvāviva rūpiṇau || 9 ||
[Analyze grammar]

rūpalakṣaṇasaṃpannau madhurasvarabhāṣiṇau |
bimbādivoddhṛtau bimbau rāmadehāttathāparau || 10 ||
[Analyze grammar]

tau rājaputrau kārtsnyena dharmyamākhyānamuttamam |
vāco vidheyaṃ tat sarvaṃ kṛtvā kāvyamaninditau || 11 ||
[Analyze grammar]

ṛṣīṇāṃ ca dvijātīnāṃ sādhūnāṃ ca samāgame |
yathopadeśaṃ tattvajñau jagatustau samāhitau |
mahātmānau mahābhāgau sarvalakṣaṇalakṣitau || 12 ||
[Analyze grammar]

tau kadā cit sametānāmṛṣīṇāṃ bhāvitātmanām |
āsīnānāṃ samīpasthāvidaṃ kāvyamagāyatām || 13 ||
[Analyze grammar]

tacchrutvā munayaḥ sarve bāṣpaparyākulekṣaṇāḥ |
sādhu sādhvity tāv ūcatuḥ paraṃ vismayamāgatāḥ || 14 ||
[Analyze grammar]

te prītamanasaḥ sarve munayo dharmavatsalāḥ |
praśaśaṃsuḥ praśastavyau gāyamānau kuśīlavau || 15 ||
[Analyze grammar]

aho gītasya mādhuryaṃ ślokānāṃ ca viśeṣataḥ |
ciranirvṛttamapyetat pratyakṣamiva darśitam || 16 ||
[Analyze grammar]

praviśya tāv ubhau suṣṭhu tadā bhāvamagāyatām |
sahitau madhuraṃ raktaṃ saṃpannaṃ svarasaṃpadā || 17 ||
[Analyze grammar]

evaṃ praśasyamānau tau tapaḥślāghyairmaharṣibhiḥ |
saṃraktataramatyarthaṃ madhuraṃ tāvagāyatām || 18 ||
[Analyze grammar]

prītaḥ kaścinmunistābhyāṃ saṃsthitaḥ kalaśaṃ dadau |
prasanno valkalaṃ kaściddadau tābhyāṃ mahāyaśāḥ || 19 ||
[Analyze grammar]

āścaryamidamākhyānaṃ muninā saṃprakīrtitam |
paraṃ kavīnāmādhāraṃ samāptaṃ ca yathākramam || 20 ||
[Analyze grammar]

praśasyamānau sarvatra kadā cittatra gāyakau |
rathyāsu rājamārgeṣu dadarśa bharatāgrajaḥ || 21 ||
[Analyze grammar]

svaveśma cānīya tato bhrātarau sakuśīlavau |
pūjayāmāsa pūjārhau rāmaḥ śatrunibarhaṇaḥ || 22 ||
[Analyze grammar]

āsīnaḥ kāñcane divye sa ca siṃhāsane prabhuḥ |
upopaviṣṭaiḥ sacivairbhrātṛbhiśca paraṃtapaḥ || 23 ||
[Analyze grammar]

dṛṣṭvā tu rūpasaṃpannau tāv ubhau vīṇinau tataḥ |
uvāca lakṣmaṇaṃ rāmaḥ śatrughnaṃ bharataṃ tathā || 24 ||
[Analyze grammar]

śrūyatāmidamākhyānamanayordevavarcasoḥ |
vicitrārthapadaṃ samyaggāyatormadhurasvaram || 25 ||
[Analyze grammar]

imau munī pārthivalakṣmaṇānvitau kuśīlavau caiva mahātapasvinau |
mamāpi tadbhūtikaraṃ pracakṣate mahānubhāvaṃ caritaṃ nibodhata || 26 ||
[Analyze grammar]

tatastu tau rāmavacaḥ pracoditāvagāyatāṃ mārgavidhānasaṃpadā |
sa cāpi rāmaḥ pariṣadgataḥ śanairbubhūṣayāsaktamanā babhūva ha || 27 ||
[Analyze grammar]