Chapter 8

aṣṭamaḥ paṭalaḥ |
aṃśakaṃ ṣaḍvidhaṃ devi kathayāmyanupūrvaśaḥ |
bhāvāṃśakaḥ svabhāvāṃśaḥ puṣpapātāṃśa eva ca || 1 ||
[Analyze grammar]

mantrāṃśakaḥ smṛtaścānyastvaṃśakāpādanaṃ dvidhā |
devānusmaraṇaṃ bhāvaḥ sahajaṃ taṃ vijānata || 2 ||
[Analyze grammar]

svabhāvaśca bhavecceṣṭā kathayāmyanupūrvaśaḥ |
brahmāṃśo vedabhaktastu rudrāṃśaṃ ca nibodha me || 3 ||
[Analyze grammar]

rudrabhaktaḥ suśīlaśca śivaśāstrarataḥ sadā |
viṣṇvaṃśo viṣṇubhaktaśca candrāṃśaḥ priyadarśanaḥ || 4 ||
[Analyze grammar]

sarvadevarataḥ śānto yakṣāṃśo dhanasaṃgrahī |
lubdho garvitamṛṣṭāśī vātāṃśaścapalaḥ smṛtaḥ || 5 ||
[Analyze grammar]

sarpavisrambhagāmī syānnāgāṃśo dīrghaśāyyatha |
dīrgharoṣaḥ pūtivaktro gurukṣīraruciḥ sadā || 6 ||
[Analyze grammar]

gāndharvo gāyano nityaṃ śivabhakto varānane |
vidyādharāṃśakaḥ prāṇī daityāṃśo dveṣaṇaḥ smṛtaḥ || 7 ||
[Analyze grammar]

kāmāṃśo rūpavāṃścaiva subhago gaṇikāpriyaḥ |
rakṣoṃśaḥ krūranistriṃśo devadveṣī dvijeṣu ca || 8 ||
[Analyze grammar]

piśācāṃśaśchalānveṣī vāsare bhīrukātaraḥ |
agnyaṃśaḥ paruṣastīvra uṣṇādaḥ piṅgalastathā || 9 ||
[Analyze grammar]

savitraṃśaśca tejasvī pūrtadharmarataḥ sadā |
iṣṭāni kurute nityaṃ dayāluḥ śivabhāvitaḥ || 10 ||
[Analyze grammar]

svasiddheḥ phaladāḥ sarve svadhyānajapahomataḥ |
bhairavāṅgasamālabdhāḥ sarve devā varānane || 11 ||
[Analyze grammar]

bhairavāstu smṛtāḥ sarve sarvasiddhiphalapradāḥ |
svabhāvāṃśaḥ samākhyātaḥ sādhakānāṃ hitāya vai || 12 ||
[Analyze grammar]

puṣpapātavaśānnāma kartavyaṃ surasundari |
sa mantraḥ siddhyate tasya tamevārādhayedyadi || 13 ||
[Analyze grammar]

aṃśakāpādanaṃ devi kathayāmi samāsataḥ |
vaihāyasaṃ dhvaja caiva homayedyastu sādhakaḥ || 14 ||
[Analyze grammar]

sa mantraḥ siddhyate tasya aryanto'pi hi suvrate |
anaṃśako'pi yo mantro jñātacihnairvarānane || 15 ||
[Analyze grammar]

tadā yāgaṃ purā kṛtvā agnau homaṃ tu kārayet |
śiṣyasya pūrvavatkarma kṛtvā tu vidhipūrvakam || 16 ||
[Analyze grammar]

pūrṇāhutiprayogeṇa yojayecchāśvate pade |
paratattvamabhidhyāyan sādhayenmanasepsitam || 17 ||
[Analyze grammar]

mantrāṃśaṃ gaṇayitvā tu gṛhṇīyātsuvicāritam |
hīnamadhyasamutkṛṣṭaṃ kathayāmi samāsataḥ || 18 ||
[Analyze grammar]

hīnaṃ śatruṃ vijānīyānmadhyamaṃ sādhyarūpiṇam |
siddhaṃ caiva susiddhaṃ ca uttamaṃ parikīrtitam || 19 ||
[Analyze grammar]

mantrākṣaraṃ tu viśleṣya mātrābindusamanvitam |
ātmanāmākṣaraṃ tadvadadhobhāge'sya yojayet || 20 ||
[Analyze grammar]

ātmavarṇātsamārabhya yāvanmantrārṇamāgatam |
yasminsa nipateddevi tamāyaṃ parikalpayet || 21 ||
[Analyze grammar]

rekhāṅguligataṃ taṃ tu kathayāmi samāsataḥ |
parvaṇi prathame siddhaḥ sādhyaścaiva dvitīyake || 22 ||
[Analyze grammar]

tṛtīye tu susiddhaḥ syādarirjñeyaścaturthake |
arisādhyau parityajya dātavyaścumbakena tu || 23 ||
[Analyze grammar]

siddharūpaḥ susiddhaśca bhuktimuktiphalapradaḥ |
yastvaṃśakaviśuddhaḥ syādbhairavo'tra varānane || 24 ||
[Analyze grammar]

taṃ madhyamasthaṃ saṃpūjya tatsthāne madhyamaṃ nyaset |
yataḥ sarvagato devaḥ sarveṣvantargataḥ smṛtaḥ || 25 ||
[Analyze grammar]

tatsiddhimuktidātāsau na varṇāḥ paramārthataḥ |
kathitaṃ sarahasyaṃ te guhyādguhyataraṃ param || 26 ||
[Analyze grammar]

atastantrāvatārārthaṃ kathayāmi samāsataḥ |
adṛṣṭavigrahāyātaṃ śivātparamakāraṇāt || 27 ||
[Analyze grammar]

dhvanirūpaṃ susūkṣmaṃ tu suśuddhaṃ suprabhānvitam |
tadevāpararūpeṇa śivena paramātmanā || 28 ||
[Analyze grammar]

yadvakṣyati |
adṛṣṭavigrahācchāntācchivātparamakāraṇāt |
dhvanirūpaṃ viniṣkrāntaṃ śāstraṃ paramadurlabham || 28 ||
[Analyze grammar]

mantrasiṃhāsanasthena pañcamantramahātmanā |
puruṣārthaṃ vicāryāśu sādhanāni pṛthakpṛthak || 29 ||
[Analyze grammar]

laukikādiśivāntāni parāparavibhūtaye |
tadanugrahayogyānāṃ sve sve viṣayagocare || 30 ||
[Analyze grammar]

anuṣṭupchandasā baddhaṃ koṭyarbudasahasradhā |
guruśiṣyapade sthitvā svayaṃ devaḥ sadāśivaḥ || 31 ||
[Analyze grammar]

pūrvottarapadairvākyaistantramādhārabhedataḥ |
tajjñānamīśvare'dāttadīśvareṇa śivecchayā || 32 ||
[Analyze grammar]

vidyāyāḥ kathitaṃ pūrvaṃ vidyeśebhyastathādarāt |
māyāniyatiparyantaistasmādrudrairavāpi tat || 33 ||
[Analyze grammar]

śrīkaṇṭheneśvarātprāptaṃ jñānaṃ paramadurlabham |
tenāpi tadadhaḥ proktaṃ rudrāṇāmīśvarecchayā || 34 ||
[Analyze grammar]

pradhānācchatarudrāntaṃ dīkṣayitvā vidhānataḥ |
mamāpi ca purā dīkṣā tathā caivābhiṣecanam || 35 ||
[Analyze grammar]

śrīkaṇṭhena purā dattaṃ tantraṃ sarvārthasādhakam |
mayāpi tava deveśi sādhikāraṃ samarpitam || 36 ||
[Analyze grammar]

tvamapi skandarudrebhyo dadasva vidhipūrvakam |
brahmaviṣvindradevānāṃ vasumātṛdivākṛtām || 37 ||
[Analyze grammar]

loke saṃgṛhya nāgānāṃ yakṣāṇāṃ parameśvari |
kathayasva ṛṣīṇāṃ ca ṛṣibhyo manujeṣvapi || 38 ||
[Analyze grammar]

evaṃ tantravaraṃ divyaṃ siddharatnakaraṇḍakam |
tvayā guptataraṃ kāryaṃ na deyaṃ yasya kasyacit |
iti svacchandatantre'ṃśakādhikāro'ṣṭamaḥ paṭalaḥ samāptaḥ || 39 ||
[Analyze grammar]