Chapter 9

navamaḥ paṭalaḥ |
ataḥ paraṃ pravakṣyāmi rahasyamidamuttamam |
yanna kasyacidākhyātaṃ tatte vakṣyāmi suvrate || 1 ||
[Analyze grammar]

mahābhairavadevasya krīḍamānasya bhāmini |
sṛṣṭisaṃhārakartāraṃ hṛdayāttu vinirgataḥ || 2 ||
[Analyze grammar]

kalpāntavahnivapuṣaṃ pralayāmbudaniḥsvanam |
taḍitpuñjanibhoddaṃṣṭraṃ jaṭājvālāsamaprabham || 3 ||
[Analyze grammar]

candrasūryāgninayanaṃ koṭarākṣaṃ subhīṣaṇam |
bṛhadvakṣaḥ sthalābhogaṃ nāgayajñopavītinam || 4 ||
[Analyze grammar]

sphuranmāṇikyamukuṭaṃ sarpakuṇḍalabhūṣitam |
sarpahārakṛtāṭopaṃ sarpakaṅkaṇanūpuram || 5 ||
[Analyze grammar]

siṃhacarmaparīdhānaṃ sarpamekhalamaṇḍitam |
gajacarmāvṛtapaṭaṃ śaśāṅkakṛtaśekharam || 6 ||
[Analyze grammar]

pañcavaktraṃ śavārūḍhaṃ daśabāhuṃ trilocanam |
kapālamālābharaṇaṃ khaḍgakheṭakadhāriṇam || 7 ||
[Analyze grammar]

pāśāṅkuśadharaṃ devaṃ śaraśārṅgāvatānitam |
kapālakhaṭvāṅgadharaṃ varadābhayapāṇikam || 8 ||
[Analyze grammar]

bhinnāñjanacayaprakhyaṃ sphuritādharabhāsvaram |
brahmendraviṣṇunamitaṃ tridaśairapi durlabham || 9 ||
[Analyze grammar]

evaṃ taṃ bhairavaṃ devaṃ svacchandaṃ parikīrtayet |
smaraṇānnāśayeddevaḥ pāpasaṃghātamulbaṇam || 10 ||
[Analyze grammar]

asya mantraḥ purākhyāto dvātriṃśākṣarasaṃmitaḥ |
pañcapraṇavapūrvāntaṃ tatra līnaṃ japenmanum || 11 ||
[Analyze grammar]

tasya kalpaṃ pravakṣyāmi samāsānna tu vistarāt |
pūrvoktabhūpradeśe ca viśuddhe śubhalakṣaṇe || 12 ||
[Analyze grammar]

puṣpaprakarasaṃkīrṇe gandhadhūpādhivāsite |
tatra maṇḍalamālikhya pūrvoktairvarṇakaiḥ śubhaiḥ || 13 ||
[Analyze grammar]

ekahastaṃ dvihastaṃ vā caturhastāṣṭahastakam |
susūtritaṃ samaṃ kṛtvā caturasraṃ samantataḥ || 14 ||
[Analyze grammar]

pūrvavatsādhayitvā tu digbhāgāṃstu varānane |
caturdvārasamopetamaṣṭapatraṃ sakarṇikam |
madhye padmaṃ samālikhya kesarairupalakṣitam || 15 ||
[Analyze grammar]

dvātriṃśadakṣaraṃ bāhye cakramālikhya śobhanam |
evaṃ susūtritaṃ kṛtvā bāhye caiva tu vartulam || 16 ||
[Analyze grammar]

caturasraṃ tadāsannaṃ bāhye vīthiṃ prakalpayet |
madhyapadmapramāṇena dvāraṃ kalpyeta pūrvavat || 17 ||
[Analyze grammar]

bhasmoddhūlitadehastu mudrālaṅkārabhūṣitaḥ |
keśayajñopavītī ca digvāsāḥ saṃyatendriyaḥ || 18 ||
[Analyze grammar]

śaṅkhārghapātrahastastu sakalīkṛtavigrahaḥ |
parito'straṃ pravinyasya bhairavaṃ pūjayetpriye || 19 ||
[Analyze grammar]

praṇavāsanasaṃsthaṃ tu mūrtiṃ haṃsākṣareṇa tu |
tameva sakalaṃ devaṃ svacchandaṃ parameśvaram || 20 ||
[Analyze grammar]

yattatparamanirbhāsamanāmayamarūpakam |
tena cāvāhayeddevi hṛcchiraśca śikhāṃ tathā || 21 ||
[Analyze grammar]

varma netre tathāstraṃ ca tenaiva parikalpayet |
sthāpanaṃ saṃnidhānaṃ ca nirodhārdhādipūjanam || 22 ||
[Analyze grammar]

sarvaṃ tenaiva kartavyamuktānuktaṃ varānane |
madhyasthaṃ bhairavaṃ pūjyamaṅgaṣaṭkasamanvitam || 23 ||
[Analyze grammar]

tataḥ patrasthitā devīrdvātriṃśārṇairniveśayet |
pūrvārakātsamārabhya yāvadante vyavasthitāḥ || 24 ||
[Analyze grammar]

tāsāṃ nāmāni vakṣyāmi dvatriṃśatparisaṃkhyayā |
aruṇā ghoṣā devī ca revatī bhogadāyikā || 25 ||
[Analyze grammar]

sthāpanī ghorasaṃjñā ca rakṣā bhārabhareti ca |
ghorarūpā ravā ghoṇā ratistārātha rūpiṇī || 26 ||
[Analyze grammar]

bhayahānistu caṇḍā vai sarvadā ca tathā varā |
takṣakī ca tathā śārvī barbarā sarvagā tathā || 27 ||
[Analyze grammar]

raudrī ca bhrāmaṇī caiva nāginī ca manoharā |
stambhanī roṣaṇī caiva drāvā rudrā praśāsinī || 28 ||
[Analyze grammar]

bhayāpahāriṇī devī jñeyā dvātriṃśa tatkramāt |
praṇavādistato varṇo devīnāma natistathā || 29 ||
[Analyze grammar]

sarvāsāṃ tu vidhirhyeṣa kartavyo vidhivedinā |
hemābhaṃ prākcatuṣkaṃ tadindracāpasamaprabham || 30 ||
[Analyze grammar]

caturmukhaṃ caturbāhu vajrahastaṃ sugarvitam |
kapālamālābharaṇaṃ prahasattu vicintayet || 31 ||
[Analyze grammar]

āgneyaṃ raktavarṇābhaṃ śaktihastaṃ sadā smaret |
daṇḍahastaṃ smaredyāmyāṃ kṛṣṇavarṇaṃ subhīṣaṇam || 32 ||
[Analyze grammar]

nīlamindīvarābhāsaṃ nairṛtaṃ khaḍgahastakam |
śyāmaṃ vāruṇadigbhāge pāśahastaṃ vicintayet || 33 ||
[Analyze grammar]

dhūmraṃ sāmīradigbhāge dhvajahastaṃ sucañcalam |
uttaraṃ dhavalaṃ jñeyaṃ gadākheṭakadhāri ca || 34 ||
[Analyze grammar]

sphaṭikābhaṃ tathaiśānyāṃ triśūlāyudhapāṇikam |
evaṃ dhyānaparo yastu cakrametatsadābhyaset || 35 ||
[Analyze grammar]

vatsarārdhādvarārohe tasya siddhistridhā bhavet |
mahendre malaye sahye pāriyātre'rbude tathā || 36 ||
[Analyze grammar]

vindhye śrīparvate caiva tathā kolagirau priye |
gaṅgāyamunāsaṃbādhe kurukṣetre varānane || 37 ||
[Analyze grammar]

gaṅgādvāre prayoge ca brahmāvarte samāsthitaḥ |
antarvedyāṃ supuṇyāyāṃ narmadāyāṃ tathaiva ca || 38 ||
[Analyze grammar]

susnigdhadeśe bhūbhāge padmaṣaṇḍairmanorame |
yeṣu yeṣu pradeśeṣu svayaṃbhūrbhagavāñchivaḥ || 39 ||
[Analyze grammar]

teṣu sthāneṣu deveśi niyamastho jitendriyaḥ |
vāṅniruddhaḥ prasannātmā lakṣākṣarajape rataḥ || 40 ||
[Analyze grammar]

śākabhakṣaḥ phalāhārī nīvārādyaśane rātaḥ |
trikālapūjānirato'thāgnikāryaparāyaṇaḥ || 41 ||
[Analyze grammar]

bhāvitātmā mahāsattvo rakṣāyāśca vidhānavīt |
tasya mantraḥ prasiddhyettu sādhayetsacarācaram || 42 ||
[Analyze grammar]

kālāgnirnarakāścaiva pātālā hāṭakeśvaraḥ |
saptalokaṃ sabrahmāṇḍaṃ pañcāṣṭakamataḥ param || 43 ||
[Analyze grammar]

devayonyaṣṭakaṃ caiva pradhānapuruṣāntakam |
niyatiḥ kālatattvaṃ ca rāgo vidyā kalā tathā || 44 ||
[Analyze grammar]

māyā vidyeśvaraṃ tattvaṃ sādākhyaṃ śaktigocaram |
sarvaṃ siddhyatyanāyāsānmantrarājaprabbhāvataḥ || 45 ||
[Analyze grammar]

pūrvoktaṃ karma vai kṣipramadhamaṃ madhyamottamam |
sādhayennātra saṃdeho bhairavasya vaco yathā || 46 ||
[Analyze grammar]

athaikavīramāśritya aṅgaṣaṭkasamanvitam |
jātiyogayutaṃ kṛtvā aṣṭapatre kuśeśaye || 47 ||
[Analyze grammar]

pūjayetpūrvavidhinā japahomārcane rataḥ |
dhyāyanneva mahādevi svacchandaṃ parameśvaram || 48 ||
[Analyze grammar]

prāpnoti cintitānkāmāndevi nāstyatra saṃśayaḥ |
atha rakṣāvidhāneṣu aghoraṃ yojayedyathā || 49 ||
[Analyze grammar]

tathāhaṃ kathayiṣyāmi tadekāgramanāḥ śṛṇu |
dvātriṃśadarasaṃyuktaṃ cakramālikhya bhāmini || 50 ||
[Analyze grammar]

nābhikesarasaṃyuktaṃ susamaṃ tu varānane |
gorocanāṃ tu saṃgṛhya siddhālaktakasaṃyutām || 51 ||
[Analyze grammar]

dūrvākāṇḍena deveśi haritena samālikhet |
vidyārājaṃ karṇikāsthaṃ bindunādasamanvitam || 52 ||
[Analyze grammar]

śaktyavasānaṃ deveśi tasminsādhyaṃ samālikhet |
kaṣamadhye varārohe nayanādyantarodhitam || 53 ||
[Analyze grammar]

īkāraveṣṭitaṃ kṛtvā arakasthā niveśayet |
pūrvoktadevatā devi tadgarbhe sādhyamālikhet || 54 ||
[Analyze grammar]

bhavagarbhe tu tatkṛtvā īkārākhyena veṣṭayet |
trīnvārāṃstu varārohe dhyānayogasamāśritaḥ || 55 ||
[Analyze grammar]

ūrdhve caiva tu saṃrodhya kroṃkāreṇa varānane |
indunācchuritaṃ kṛtvā puṣpadhūpaiḥ prapūjayet || 56 ||
[Analyze grammar]

veṣṭayeccaiva tadbhūrjamarandhraṃ nirvraṇaṃ samam |
pañcaraṅgakasūtreṇa veṣṭayitvā varānane || 57 ||
[Analyze grammar]

sikthena muṭayetpaścātkṣaudramadhye nidhāpayet |
yadā mṛtyuvaśāghrātaṃ kālena kalitaṃ priye || 58 ||
[Analyze grammar]

ariṣṭacihnitaṃ jñātvā rakṣāmetāṃ samālikhet |
tasya mṛtyurna jāyeta ityevaṃ bhairavo'bravīt || 59 ||
[Analyze grammar]

kapālīśasya garbhe tu nāma yasya samālikhet |
bhūrjapatre varārohe rocanāyā rasena tu || 60 ||
[Analyze grammar]

oṃkārapuṭamadhyasthaṃ rodhitaṃ nayanākṣaraiḥ |
vauṣaḍjātiprayogeṇa tasya mṛtyurna jāyate || 61 ||
[Analyze grammar]

śikhyāhvena tu deveśi sādhyanāma vidarbhayet |
analārṇamadhaścordhve sādhyārṇeṣu niyojayet || 62 ||
[Analyze grammar]

tasya vai jāyate dāhaḥ phaṭkārādyantarodhitam |
jvalantaṃ cintayetsādhyaṃ dinānāṃ saptakaṃ yadi || 63 ||
[Analyze grammar]

tatkṣaṇājjāyate dāho bhairavasya vaco yathā |
krodharājaniruddhaṃ tu śmaśānapaṭamadhyagam || 64 ||
[Analyze grammar]

śmaśānādalinā lekhyaṃ viṣaraktānvitena tu |
yasya nāma varārohe huṃphaṭkāravidarbhitam || 65 ||
[Analyze grammar]

mārayetisamāyogātkrūrajātisamanvitam |
mriyate saptarātreṇa yo rakṣābhiḥ surakṣitaḥ || 66 ||
[Analyze grammar]

vikarālo mahādevi ūrdhvādhaḥ pāśasaṃsthitaḥ |
sādhyanāmnastu deveśi huṃphaṭkāravidarbhiṇaḥ || 67 ||
[Analyze grammar]

na kṣāmayatyayatnena tasya śatrorbhayaṃ bhavet |
manmathena yutaṃ kṛtvā sādhyanāma varānane || 68 ||
[Analyze grammar]

dhruvādyaṃ svāhayāntena raktadhyānasamanvitam |
amuko'tra varārohe taddiśo'bhimukhaḥ sthitaḥ || 69 ||
[Analyze grammar]

amukasya vaśaṃ yātu japahomau samācaret |
saptāhādvaśamāyāti iti śāstrasya niścayaḥ || 70 ||
[Analyze grammar]

meghanādāvasāne tu nāma yasya samālikhet |
yakārādyantasaṃruddhaṃ mantraṃ phaḍdvitayānvitam || 71 ||
[Analyze grammar]

pretasthāne nidhāpyaitadbhairavaṃ tatra pūjayet |
akṣapuṣpairvarārohe taddiśo'bhimukhaḥ sthitaḥ || 72 ||
[Analyze grammar]

tamuccāṭayate kṣipraṃ devi nāstyatra saṃśayaḥ |
somarājena deveśi ādimadhyāntasaṃyutam || 73 ||
[Analyze grammar]

nāma yasya samālikhya vaṣaḍjātisamanvitam |
saṃnidhāpya trimadhure sthāpayetsurasundari || 74 ||
[Analyze grammar]

saptarātraprayogeṇa trikālāṣṭaśatena ca |
asādhyaṃ sādhayatyāśu dhanaṃ ca vipulaṃ labhet || 75 ||
[Analyze grammar]

pañcāṅgena piśācasya krodharājāvasānikām |
saṃjñāṃ samuccareddevi krūrajātisamanvitām || 76 ||
[Analyze grammar]

unmatto jāyate sādyo homena ca japena ca |
mṛtyunñjayaṃ pravakṣyāmi tamekāgramanāḥ śṛṇu || 77 ||
[Analyze grammar]

bhūrjapatraṃ samādāya nīrandhraṃ nirvraṇaṃ samam |
tasminsamālikhetpadmamaṣṭapatraṃ sakarṇikam || 78 ||
[Analyze grammar]

tasminvai karṇikāmadhye sādhyanāma samālikhet |
saṃveṣṭayāṣṭau diśo devi svacchandena kṛśodari || 79 ||
[Analyze grammar]

praṇavena tu saṃveṣṭya patreṣvevaṃ samālikhet |
patrāṣṭake'pyaghorasya nāmādhastātsamālikhet || 80 ||
[Analyze grammar]

vaktavyaṃ deva saṃrakṣa śaraṇaṃ tvāmupāgatam |
ādau tryakṣaravinyāsaṃ svacchandaṃ tadanantaram || 81 ||
[Analyze grammar]

janmanāma tu sādhyasya akṣarāntaritaṃ likhet |
punastryakṣaravinyāsaṃ vaṣaḍantaṃ niyojayet || 82 ||
[Analyze grammar]

muṭitvā sikthakenaiva kṣīramadhye tu prakṣipet |
jāyate paramā śāntiḥ punaranyannibodha me || 83 ||
[Analyze grammar]

juṃsaḥ saṃpuṭamadhyasthaṃ praṇavobhayasaṃyutam |
nāma kṛtvā varārohe prakṣipenmadhuratraye || 84 ||
[Analyze grammar]

parāṃ śāntimavāpnoti mṛtyurogairna bādhyate |
bhūrjapatraṃ samādāya rocanāyā varānane || 85 ||
[Analyze grammar]

mātṛkāntaritaṃ nāma dūrvākāṇḍena cālikhet |
tadabhyantaragarbhe tu svarairantarītaṃ kuru || 86 ||
[Analyze grammar]

punargarbhe samālikhya sādhyanāma varānane |
dhruveṇa veṣṭayetpaścādvakāreṇa tataḥ priye || 87 ||
[Analyze grammar]

sakāraṃ ca kṣakāraṃ ca likhecca tadanantaram |
punarveṣṭaya ṭhakāreṇa māyābījena suvrate || 88 ||
[Analyze grammar]

aṅkuśena niruddhyeta rakṣāṃ mṛtyuvināśinīm |
svacchandasahitāṃ devi praṇavenādiyojitām || 89 ||
[Analyze grammar]

vaṣaḍjātisamopetāṃ karpūrakṣodacarcitām |
gandhapuṣpādinā pūjya prakṣipenmadhuratraye || 90 ||
[Analyze grammar]

jāyate paramā śāntirnātra kāryā vicāraṇā |
athavā guṭikāṃ kṛtvā kaṇṭhe bāhau ca dhārayet || 91 ||
[Analyze grammar]

tasya vyādhirna jāyeta ityevaṃ bhairavo'bravīt |
tryakṣaraṃ mūlamantraṃ ca vaṣaḍjātisamanvitam || 92 ||
[Analyze grammar]

bhojanodakapāne tu mantrayitvāśnataḥ sadā |
na tasya jāyate mṛtyurbhairavasya vaco yathā || 93 ||
[Analyze grammar]

athā hinā mahādevi dūṣitaḥ sādhako yadā |
mūlamantrasamopetamaghoraṃ tatra yojayet || 94 ||
[Analyze grammar]

ātmano bhairavaṃ rūpaṃ kṛtvā caiva sudāruṇam |
daṃṣṭrākarālavikaṭaṃ jvālāmālopaśobhitam || 95 ||
[Analyze grammar]

sarpairlalallambamānaiḥ khaḍgahastaṃ subhīṣaṇam |
pūrvarūpasamopetaṃ sūryakoṭisamaprabham || 96 ||
[Analyze grammar]

tenākrāntaṃ mahādevi daṣṭakaṃ tu vicintayet |
tajjvālābhiḥ sudīptābhirdagdhaṃ saṃcintayedviṣam || 97 ||
[Analyze grammar]

tatkṣaṇāddevadeveśi nirviṣaḥ sa tu jāyate |
graheṣvevaṃ vidhaṃ dhyānaṃ yaḥ kuryānmocayetkṣaṇāt || 98 ||
[Analyze grammar]

atha dhyāne hyakuśalo yadā kaścinnaro bhavet |
tadāgadairmahādevi nirviṣaṃ kurute kṣaṇāt || 99 ||
[Analyze grammar]

kumāridvitayaṃ gṛhya nāginyā tu sahaikataḥ |
gokarṇikāsitaṃ mūlaṃ somāhvāmūlasaṃyutam || 100 ||
[Analyze grammar]

āmagokṣīrasaṃpiṣṭaṃ bhakṣayennirviṣo bhavet |
gonimbasya ca mūlena nirviṣatvaṃ prajāyate || 101 ||
[Analyze grammar]

aśvamārasya mūlaṃ tu udakena tu peṣayet |
pāne nasye pradātavyaṃ tadā bhavati nirviṣaḥ || 102 ||
[Analyze grammar]

āragvadhasya mūlaṃ tu udakena ca peṣayet |
pāne nasye pradātavyaṃ tadā bhavati nirviṣaḥ || 103 ||
[Analyze grammar]

madhukasya tu sāraṃ yannasye pāne prayojayet |
nirviṣastu prajāyeta bhairavasya vaco yathā || 104 ||
[Analyze grammar]

jambulāsikamūlaṃ tu pāne nasye prayojayet |
nirviṣastu bhaveddevi nātra kāryā vicāraṇā || 105 ||
[Analyze grammar]

ṣaḍbindupaṭakharjūrasūkṣmacūrṇaṃ tu kārayet |
mayūrapittasaṃyuktaṃ guṭikāṃ kārayetpriye || 106 ||
[Analyze grammar]

trilohaveṣṭitāṃ kṛtvā kare kaṇṭhe nidhāpayet |
na viṣaṃ kramate tasya yaśca daṣṭo mahoragaiḥ || 107 ||
[Analyze grammar]

agadānghṛtasaṃyuktānpibedvai viṣadūṣitaḥ |
na viṣaṃ kramate tasya iti śāstrasya niścayaḥ || 108 ||
[Analyze grammar]

evamanye'pi ye yogāḥ svacchandena vinirmitāḥ |
kālāgnirnarakāścaiva pātālā hāṭakeśvaraḥ || 109 ||
[Analyze grammar]

pradadyādbhāvitātmā ca siddhyante nātra saṃśayaḥ |
svacchandeneti sarvaṃ hi parameśvareṇa pravartitam |
iti svacchandatantre navamaḥ paṭalaḥ samāptaḥ || 110 ||
[Analyze grammar]