Chapter 15

[English text for this chapter is available]

prahlāda uvāca ||
śrutvā tamāgataṃ devaṃ brahmāṇaṃ pitaraṃ svakam |
sanakādyā namaskarttuṃ jagmuḥ sarve pitāmaham || 1 ||
[Analyze grammar]

taṃ dṛṣṭvā lokakarttāraṃ daṇḍavatpraṇatāḥ kṣitau |
tato dṛṣṭvā sa tanayānsaṃgṛhya pariṣasvaje || 2 ||
[Analyze grammar]

pṛṣṭaścānāmayaṃ taistu pṛṣṭvā tānsamuvāca ha |
ārādhito yairbhagavāndhanyā yūyaṃ vayaṃ tathā || 3 ||
[Analyze grammar]

saṃsiddhiṃ paramāṃ yātā bhagavaddarśanena hi |
na jñātaṃ putrakāḥ samyagajñānādbālabuddhibhiḥ || 4 ||
[Analyze grammar]

yenārcito mahādevastasya tuṣyati keśavaḥ |
anarcite nīlakaṇṭhe na gṛhṇātyarcanaṃ hariḥ |
tasmātsarvaprayatnena pūjyatāṃ nīlalohitaḥ || 5 ||
[Analyze grammar]

yena saṃpūrṇatāṃ yāti kṛṣṇapūjā kṛtā sadā |
tacchrutvā vacanaṃ tasyā brahmaputrā yayustadā || 6 ||
[Analyze grammar]

devāgārāgrato gatvā yogasiddhā maharṣayaḥ |
liṃgaṃ saṃsthāpayāmāsuḥ śivabhaktipuraskṛtā || 7 ||
[Analyze grammar]

saṃsthāpya śivaliṃgaṃ te snānārthaṃ munisattamāḥ |
kūpaṃ cakrustataḥ sarva ṛṣayaḥ saṃśitavratāḥ || 8 ||
[Analyze grammar]

dṛṣṭvā tamamṛtaprakhyaṃ jalapūrṇaṃ sunirmalam |
saṃhṛṣṭā ṛṣayaḥ sarve sādhusādhviti cābruvan || 9 ||
[Analyze grammar]

sthāpitaṃ śivaliṃgaṃ ca dṛṣṭvā lokapitāmahaḥ |
uvāca vacanaṃ brahmā prītaḥ putrāṃstadā dvijāḥ || 10 ||
[Analyze grammar]

brahmovāca |
bhavadbhiryogasaṃsiddhairyasmātsaṃsthāpitaḥ śivaḥ |
tasmātsiddheśvara iti khyātiṃ loke gamiṣyati || 11 ||
[Analyze grammar]

samīpe śitikaṇṭhasya kūpoyamṛṣibhiḥ kṛtaḥ |
ṛṣitīrthamiti khyātaṃ tasmālloke bhaviṣyati || 12 ||
[Analyze grammar]

vinā śrāddhena viprendrā dānena pitṛtarpaṇāt |
bhaktitaḥ snānamātreṇa pitṛbhiḥ saha mucyate || 13 ||
[Analyze grammar]

asatyavādino ye ca paranindā parāyaṇāḥ |
snānamātreṇa śudhyanti ṛṣitīrthe na saṃśayaḥ || 14 ||
[Analyze grammar]

snānaṃ praśastaṃ viṣuve manvādiṣu tathaiva ca |
tathā kṛtayugādyāyāṃ māghasya dvijasattamāḥ || 15 ||
[Analyze grammar]

śivarātrau vasedyastu liṃge siddheśasaṃjñite |
snātvā ṛṣikṛte tīrthe kiṃ tasyānyena vai dvijāḥ |
gatvā tatra mahābhāgā gṛhītvā phalamuttamam || 16 ||
[Analyze grammar]

arghyaṃ dattvā vidhānena kṛtvā ca karayoḥ kuśān |
gṛhṇaṃtvarghyamimaṃ devā yogasiddhā maharṣayaḥ || 17 ||
[Analyze grammar]

ṛṣitīrthe ca pāpaghne siddheśvarasamanvite |
dattvārghyaṃ mṛdamālabhya snānaṃ kuryātsamāhitaḥ || 18 ||
[Analyze grammar]

tarpayecca pitṝndevānmanuṣyāṃśca yathākramam |
tataḥ śrāddhaṃ prakurvīta pitṝṇāṃ śraddhayā'nvitaḥ || 19 ||
[Analyze grammar]

tathā ca dakṣiṇāṃ dadyādvittaśāṭhyavivarjitaḥ |
viśeṣataḥ pradeyāni phalāni rasavaṃti ca || 20 ||
[Analyze grammar]

dadyācchayāmākanīvārānvidrumaṃ cājināni ca |
saptadhānyāni śālīṃśca saktūṃśca guḍasaṃyutān || 21 ||
[Analyze grammar]

gaṃdhamālyāni tāṃbūlaṃ vastrāṇi ca tathā payaḥ |
evaṃ kṛtvā samagraṃ ca kṛtakṛtyo bhavennaraḥ || 22 ||
[Analyze grammar]

pūjayitvā mahādevaṃ siddheśvaramumāpatim |
saphalaṃ janma martyasya jīvitaṃ ca sujīvitam || 23 ||
[Analyze grammar]

yaḥ snātvā ṛṣitīrthe tu paśyetsiddheśvaraṃ śivam |
pitarastasya tuṣyanti tuṣyanti ca pitāmahāḥ || 24 ||
[Analyze grammar]

aputrā putriṇaḥ syuste putriṇaścāpi pautriṇaḥ |
nirdhanā dhanavaṃtaśca siddheśvararatā narāḥ || 25 ||
[Analyze grammar]

duṣkṛtaṃ yāti vilayaṃ sukṛtaṃ ca vivarddhate |
bhavenmanorathāvāptiḥ praṇate siddhanāyake || 26 ||
[Analyze grammar]

ṛṣitīrthe naraḥ snātvā dṛṣṭvā siddheśvaraṃ haram |
sarvānkāmānavāpnoti nātra kāryā vicāraṇā || 27 ||
[Analyze grammar]

śivarātryāṃ viśeṣeṇa siddheśaḥ saṃprapūjitaḥ |
yaṃyaṃ kāmayate kāmaṃ taṃ dadāti na saṃśayaḥ |
cintāmaṇisamaḥ svāmī hyathavā cākṣayo nidhiḥ || 28 ||
[Analyze grammar]

śrutvādhyāyamimaṃ puṇyaṃ sarvāghaharaṇaṃ param |
prayāti paramaṃ sthānaṃ mānavaḥ śraddhayānvitaḥ || 29 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakā māhātmya ṛṣitīrthasiddheśvaramāhātmyavarṇanaṃnāma pañcadaśo'dhyāyaḥ || 15 ||
[Analyze grammar]