Chapter 32

[English text for this chapter is available]

pulastya uvāca |
mahāvināyakaṃ gacchettataḥ pārthivasattama |
yasmindṛṣṭe nṛṇāṃ sadyo nirvighnatvaṃ prajāyate || 1 ||
[Analyze grammar]

yayātiruvāca |
kathaṃ mahattvamagamatpūrvaṃ tatra vināyakaḥ |
kasminkāle dvijaśreṣṭha sarvaṃ vistarato vada || 2 ||
[Analyze grammar]

pulastya uvāca |
purodvarttanajaṃ lepaṃ gṛhītvā nṛpa pārvatī |
vinodārthaṃ cakārātha bālakaṃ sukumārakam || 3 ||
[Analyze grammar]

lepābhāvācchirohīnaṃ śeṣāṃgāvayavaṃ nṛpa |
yathoktaṃ nirmayitvā taṃ skandaṃ vākyamathābravīt || 4 ||
[Analyze grammar]

lepamānaya bhadraṃ te śiro'rthaṃ skanda satvaram |
yenāyaṃ putrako me syādbhrātā te paradurjayaḥ || 5 ||
[Analyze grammar]

tato gaurīsamādeśāllepālabdhau nṛpottama |
mattaṃ gajavaraṃ dṛṣṭvā śirastasya samānayat || 6 ||
[Analyze grammar]

tasminniyojayāmāsa gātre lepasamudbhave |
mahaddhīdaṃ śiro bhāvi putra kasmāttvayā'hṛtam || 7 ||
[Analyze grammar]

bruvaṃtyāścāpi pārvatyā mā meti ca muhurmuhuḥ |
nyaste śirasi tadgātre daivayogānnarādhipa || 8 ||
[Analyze grammar]

viśeṣānnāyakatvaṃ ca gātrebhyaḥ samajāyata |
bālakapratimaṃ kāntaṃ sarvalakṣaṇalakṣitam || 9 ||
[Analyze grammar]

trigaṃbhīraṃ caturhastaṃ saptaraktaṃ mahīpate |
ṣaḍunnataṃ pañcadīrghaṃ paścasūkṣmaṃ susundaram || 10 ||
[Analyze grammar]

trivistīrṇaṃ mahārāja dṛṣṭvā gaurī suvismitā |
sajīvaṃ kārayāmāsa svaśaktyā śaktirūpiṇī || 11 ||
[Analyze grammar]

sa sajīvaḥ kṛto devyā samuttasthau ca tatkṣaṇāt |
ādeśaṃ yācayāmāsa vinayānatakandharaḥ || 12 ||
[Analyze grammar]

taṃ dṛṣṭvā cādbhutākāraṃ proktvā putraṃ muhurmuhuḥ |
śaṃbhoḥ sakāśamanayatprahṛṣṭenāntarātmanā || 13 ||
[Analyze grammar]

tato'bravītsutaṃ deva mamaiva gātralepajam |
dehi deva varānitthaṃ mahattvaṃ yena gacchati || 14 ||
[Analyze grammar]

śrībhagavānuvāca |
śarīrasthaṃ śiro mukhyaṃ yasmātparvatanandini |
mahattvidaṃ śiraḥ proktaṃ tvayā skandena yojitam || 15 ||
[Analyze grammar]

viśeṣānnāyakatvaṃ ca gātre cāsya yataḥ sthitam |
mahāvināyako hyeṣa tasmānnāmnā bhaviṣyati || 16 ||
[Analyze grammar]

gaṇānāṃ caiva sarveṣāmādhipatyaṃ nagātmaje |
asya dattaṃ mayā yasmādbhaviṣyati gaṇādhipaḥ || 17 ||
[Analyze grammar]

sarvakāryeṣu ye martyāḥ pūrvamenaṃ gaṇādhipam |
smariṣyaṃti na vai teṣāṃ kāryahānirbhaviṣyati || 18 ||
[Analyze grammar]

tato'sya pradadau skandaḥ prakrīḍārthaṃ kuṭhārakam |
tadeva cāyudhaṃ tasya supriyaṃ hi sadā'bhavat || 19 ||
[Analyze grammar]

tato gaurī dadau bhojyapātraṃ modakapūritam |
putrasnehātsa tatprāpya lāsyamevaṃ tadā'karot || 20 ||
[Analyze grammar]

tasya bhakṣyasya gandhena niṣkrānto mūṣako bilāt |
bhakṣaṇāccāmaro jātastasya vāhyo vyajāyata || 21 ||
[Analyze grammar]

pulastya uvāca |
mahāvināyako hyevaṃ tatra jāto mahī pate |
tasmindṛṣṭe ca yatpuṇyaṃ tattvamekamanāḥ śṛṇu || 22 ||
[Analyze grammar]

bālye vayasi yatpāpaṃ vārddhake yauvane'pi yat |
karoti mānavo rājaṃstasmātpāpātpramucyate || 23 ||
[Analyze grammar]

māghamāse site pakṣe caturthyāṃ samupoṣitaḥ |
yastaṃ paśyati vāggmī sa sarvajñaśca prajāyate |
tasyāgre sumahatkuṇḍaṃ svacchodakapūritam || 24 ||
[Analyze grammar]

tatra snātvā naro bhaktyā yaḥ paśyati vināyakam |
tasyānvaye'pi sarvajñā jāyante mānavā nṛpa || 25 ||
[Analyze grammar]

gaṇānāṃ tveti maṃtreṇa kṛtvā vai triḥ pradakṣiṇam |
yastaṃ paśyati rājendra duritaṃ na sa paśyati || 26 ||
[Analyze grammar]

tasmātsarvaprayatnena taṃ prapaśyedvināyakam |
ya icchetsakalānkāmāniha loke paratra ca || 27 ||
[Analyze grammar]

gṛhastho'pi ca yo bhaktyā smaretkārya upasthite |
avighnaṃ tasya tatsarvaṃ saṃsiddhimupagacchati || 28 ||
[Analyze grammar]

prātarutthāya yo martyaḥ smareddevaṃ vināyakam |
tasya taddinajātāni siddhiṃ kṛtyāni yāṃti hi || 29 ||
[Analyze grammar]

vivāhe kalahe yuddhe prasthāne kṛṣikarmaṇi |
praveśe ca smaredyastu bhaktipūrvaṃ vināyakam |
tasya tadvāṃchitaṃ sarvaṃ prasādāttasya siddhyati || 30 ||
[Analyze grammar]

mahāvināyakīṃ śāṃtiṃ yaḥ karoti samāhitaḥ |
na taṃ pretā grahā rogāḥ pīḍayaṃti vināyakāḥ || 31 ||
[Analyze grammar]

yayātiruvāca |
mahāvaināyikīṃ śāṃtiṃ vada me munisattama |
ke maṃtrāḥ kiṃ vidhānaṃ ca paraṃ kautūhalaṃ hi me || 32 ||
[Analyze grammar]

pulastya uvāca |
śuklapakṣe śubhe vāre nakṣatre doṣavarjite |
śreṣṭhacaṃdrabale śāṃtiṃ gaṇeśasya samācaret || 33 ||
[Analyze grammar]

pūrvottare same deśe kṛtvā vediṃ ca maṃḍapam |
madhye cāṣṭadalaṃ padmaṃ gṛhyasūtraṃ prayojayet || 34 ||
[Analyze grammar]

indrādilokapālāṃśca dikṣu sarvāsu bhūpate |
gaṇeśapūrvikāścāpi mātaraśca viśeṣataḥ || 35 ||
[Analyze grammar]

gaṃdhapuṣpopahāraiśca yathoktairbalivistaraiḥ |
śvetavastrayugacchannaṃ kalaśaṃ jalapūritam || 36 ||
[Analyze grammar]

tasyaiva pūrvadigbhāge sahiraṇyaṃ phalānvitam || 37 ||
[Analyze grammar]

gaṇānāṃ tveti maṃtreṇa sahasraṃ cāṣṭasaṃyutam |
japettatra tathā cārūnpaṃcāṃgānnṛpasattama || 35 ||
[Analyze grammar]

vināyakaṃ samuddiśya puraḥ kuṇḍe karātmake |
caturasre yoniyute mekhalābhirvibhūṣite || 39 ||
[Analyze grammar]

madhudūrvākṣataihomairgrahahomādanaṃtaram |
gaṇānāṃ tveti maṃtreṇa daśasāhasrikastathā || 40 ||
[Analyze grammar]

kāryo vai pārthivaśreṣṭha kāryaścodaṅmukhairdvijaiḥ |
caturbhiścaturai rājanpītavastrānulepanaiḥ || 41 ||
[Analyze grammar]

pītāṃbaradharaiścaiva dhṛtahemāṃgulīyakaiḥ |
tato homāvasāne tu yajamānaṃ nṛpottama || 42 ||
[Analyze grammar]

mṛgacarmoparisthaṃ ca maṃtrairebhirvidhānataḥ |
snāpayetprāṅmukhaṃ śāṃtaṃ śuklavastrāvaguṃṭhitam || 43 ||
[Analyze grammar]

imaṃ me gaṃge yamune paṃcanadyaḥ supuṣkare |
śrīsūktasahitaṃ viṣṇoḥ pāvamānaṃ vṛṣākapim || 44 ||
[Analyze grammar]

samyaguccārya vighnānāṃ tato nāśaṃ prapadyate |
grahāḥ saumyatvamāyāṃti bhūtā naśyaṃti tatkṣaṇāt || 45 ||
[Analyze grammar]

ādhayo vyādhayo raudrā duṣṭarogā jvarādayaḥ |
praṇaśyaṃti drutaṃ sarve tathotpātāḥ sudāruṇāḥ || 46 ||
[Analyze grammar]

etatte sarvamākhyātaṃ yanmāṃ tvaṃ paripṛcchasi |
vināyakasya māhātmyaṃ mahattvaṃ śāṃtikaṃ tathā || 47 ||
[Analyze grammar]

yaśca kīrttayate samyakcaturthyāṃ susamāhitaḥ |
śṛṇoti vā nṛpaśreṣṭha tasyā'vighnaṃ sadā bhavet || 48 ||
[Analyze grammar]

yaṃyaṃ kāmamabhidhyāyanyajeccedaṃ samāhitaḥ |
tattadāpnoti nūnaṃ ca gaṇanāthaprasādataḥ || 49 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe vināyakamāhātmyavarṇanaṃ nāma dvātriṃśo'dhyāyaḥ || 32 ||
[Analyze grammar]