Chapter 31

[English text for this chapter is available]

pulastya uvāca |
raktānubandhaṃ vai gacchettīrthaṃ trailokyaviśrutam |
yatra snāto naraḥ samyaṅmucyate brahmahatyayā || 1 ||
[Analyze grammar]

purā'sītpārthivonāma iṃdraseno mahīpatiḥ |
tasyā'sītsupriyā bhāryā sunandānāma bhāminī |
pativratā patiprāṇā sadā patyuḥ priye sthitā || 2 ||
[Analyze grammar]

kasyacittvatha kālasya sa rājā saparigrahaḥ |
paradeśaṃ gato haṃtuṃ śatrusaṃghaṃ durāsadam || 3 ||
[Analyze grammar]

taṃ nihatya dhanaṃ bhūri gṛhītvā prasthito gṛham |
tato'gre preṣayāmāsa sa dūtaṃ kṛtrimaṃ nṛpa || 4 ||
[Analyze grammar]

sunandāṃ brūhi gatvā tvamindraseno hato raṇe |
tadākārastato lakṣyaḥ pātivratye mamājñayā || 5 ||
[Analyze grammar]

yadi sā niścayaṃ gacchenmaraṇaṃ prati bhāminī |
tadā rakṣyā prayatnena vācyaṃ hāsyaṃ mamodbhavam || 6 ||
[Analyze grammar]

evamukto gato dūtastatkṣaṇānnṛpasattama |
tasyai nivedadāmāsa yaduktaṃ tena bhūbhujā || 7 ||
[Analyze grammar]

atha tasya vacaḥ śrutvā sunaṃdā cāruhāsinī |
gataprāṇā nṛpaśreṣṭha patiprāṇā mahāsatī || 8 ||
[Analyze grammar]

yasminkāle mṛtā sā tu sunandā śīlamaṃḍanā |
tasminkāle nṛpaḥ so'pi tatpāpena samāśritaḥ || 9 ||
[Analyze grammar]

athāpaśyaddvitīyāṃ sa cchāyāṃ gātrasya copari |
tathā gurutaraṃ kāyaṃ sālasyaṃ samapadyata || 10 ||
[Analyze grammar]

tejohīnaṃ sudurgaṃdhi vivarṇaṃ nṛpasattama |
atha prāpto gṛhaṃ rājā śrutvā bhāryāsamudbhavam || 11 ||
[Analyze grammar]

vināśaṃ duḥkhaśokārtaḥ karuṇaṃ paryadevayat |
sa jñātvā pāpamātmānaṃ strīhatyāsuvidūṣitam || 12 ||
[Analyze grammar]

brāhmaṇānāṃ samādeśāttathā yātrāparo'bhavat |
kṛtvaurddhvadaihikaṃ tasyā laghumātra parigrahaḥ |
vārāṇasyāṃ gataḥ pūrvaṃ tatra dānaṃ dadau bahu || 13 ||
[Analyze grammar]

kapālamocane tīrthe sarvapāpapraṇāśane |
trinetro yatra nirmuktaḥ purā vai brahmahatyayā || 14 ||
[Analyze grammar]

tasya cchāyā dvitīyā sā na naṣṭā tatra bhūpate |
tataḥ kanakhalaṃ prāptaḥ supuṇyaṃ śuddhidaṃ nṛṇām || 15 ||
[Analyze grammar]

tathaiva puṣkarāraṇyaṃ tasmādamarakaṇṭakam |
kurukṣetraṃ tato rājanprāpto'sau nṛpasattamaḥ || 16 ||
[Analyze grammar]

prabhāsaṃ somatīrthaṃ ca tatastu kṛmijāṃgale |
ekahaṃsaṃ tato rājanpuṇyapāriplavaṃ tataḥ || 17 ||
[Analyze grammar]

rudrakoṭiṃ virūpākṣaṃ tataḥ paṃcanadaṃ nṛpa |
evamādīni tīrthāni puṇyānyāyatanāni ca |
paribhramanmahīpāla pariśrāṃto narādhipaḥ || 18 ||
[Analyze grammar]

tato varṣasahasrāṃte saṃprāpto'rbudaparvate |
tatrāpaśyannarapatistīrthānyāyatanāni ca || 19 ||
[Analyze grammar]

tapasvisaṃghānvividhānbrāhmaṇānvedapāragān |
dadau dānāni bahuśo brāhmaṇebhyo yadṛcchayā || 20 ||
[Analyze grammar]

prāpto raktānubaṃdhaṃ ca tīrthaṃ tatraiva parvate |
tatra snāto viniṣkrāṃto yāvatpaśyati bhūmipaḥ || 21 ||
[Analyze grammar]

tāvanna dṛśyate cchāyā dvitīyā strīvadhodbhavā |
laghutvaṃ sarvagātrāṇi saṃprāptāni mahīpate || 22 ||
[Analyze grammar]

vigandhatā praṇaṣṭā ca tejovṛddhiḥ parābhavat |
tato hṛṣṭamanā bhūtvā dattvā dānāni bhūriśaḥ |
stūyamānaścaturdikṣu baṃdibhiḥ prasthito gṛham || 23 ||
[Analyze grammar]

tato raktānubaṃdhasya somātikramaṇaṃ nṛpa |
yāvatkaroti rājendra tāvadasya punastathā || 24 ||
[Analyze grammar]

sā cchāyā dṛśyate dehe dvitīyā nṛpasattama |
sa eva gandho gātreṣu tejohāniśca sā nṛpa || 25 ||
[Analyze grammar]

tato duḥkhābhisaṃtapto gatastatraiva tatkṣaṇāt |
raktabaṃdhamanuprāpto vipāpmā so'bhavatpunaḥ || 26 ||
[Analyze grammar]

sa jñātvā tīrthamāhātmyaṃ paraṃ pārthivasattamaḥ |
tatra dārūṇi cāhṛtya citāṃ kṛtvā tato nṛpa |
dānaṃ dattvā dvijāgrebhyaḥ praviṣṭo havyavāhanam || 27 ||
[Analyze grammar]

tato vimānamāruhya parityajya kalevaram |
divyamālyāṃbaradharaḥ śivalokamupāgamat || 28 ||
[Analyze grammar]

śivalokamanuprāpte tasminpārthivasattame |
devarṣayastadā vākyamidamāhuḥ suvismayāt || 29 ||
[Analyze grammar]

tīrthebhyastu paraṃ tīrthamidaṃ vai pāvanaṃ param |
indraseno hyataḥ pāpāttīrthasaṃgādvyamucyata || 30 ||
[Analyze grammar]

tataḥ prabhṛti tattīrthaṃ khyātaṃ ca dharaṇītale |
raktānāṃ prāṇināṃ yasmādanubandhaṃ karoti yat || 31 ||
[Analyze grammar]

raktānubandhamityeva tasmāttatkīrttyate kṣitau |
tatra santarpya vai devānyaḥ śrāddhaṃ kurute nṛpa || 32 ||
[Analyze grammar]

tatra saṃkramaṇe bhānoryaḥ snānaṃ kurute naraḥ |
śraddhayā parayā yukto mucyate brahmahatyayā || 33 ||
[Analyze grammar]

pitṛkṣetre gayāyāṃ ca śrāddhaṃ yaḥ kurute naraḥ |
gayāśrāddhasamaṃ prāhuḥ phalaṃ tasya maharṣayaḥ || 34 ||
[Analyze grammar]

candrasūryoparāge vā godānaṃ nṛpasattama |
yaḥ karoti narastatra sa kulānsapta tārayet || 35 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe raktānubandhamāhātmyavarṇanaṃnāmaikatriṃśo'dhyāyaḥ || 31 ||
[Analyze grammar]