Chapter 16

[English text for this chapter is available]

pulastya uvāca |
tato gacchennṛpaśreṣṭha tīrthaṃ pāpapraṇāśanam |
maṇikarṇikasaṃjñaṃ tu sarvalokeṣu viśrutam || 1 ||
[Analyze grammar]

yatra siddhiṃ gatā rājanvālakhilyā maharṣayaḥ |
taistatra nirmitaṃ kuṇḍaṃ suramyaṃ giri gahvare || 2 ||
[Analyze grammar]

teṣāṃ tatropaviṣṭānāṃ munīnāṃ bhāvitātmanām |
mahāścaryamabhūttatra tattvaṃ śṛṇu narādhipa || 3 ||
[Analyze grammar]

kirātavanitā kācinnāmnā ca maṇikarṇikā |
atikṛṣṇā virūpākṣī karālā bhīṣaṇākṛtiḥ || 4 ||
[Analyze grammar]

tṛṣārttā tatra saṃprāptā madhyaṃdinagate ravau |
graste ca rāhuṇā sūrye praviṣṭā salile tu sā || 5 ||
[Analyze grammar]

etasminneva kāle tu divyarūpavapurdharā |
munīnāṃ paśyatāṃ caiva viniṣkrāṃtā sumadhyamā || 6 ||
[Analyze grammar]

atha tasyāḥ patiḥ prāptastadanveṣaṇatatparaḥ |
papraccha tāṃ varārohāṃ patnyā duḥkhena duḥkhitaḥ || 7 ||
[Analyze grammar]

mama bhāryātra saṃprāptā yadi dṛṣṭā sumadhyame |
śīghraṃ vada varārohe bālako'yaṃ tadudbhavaḥ || 8 ||
[Analyze grammar]

tṛṣārttaśca kṣudhāviṣṭo rudate ca muhurmuhuḥ |
dṛṣṭā cetkathyatāṃ subhrūrvinā'yaṃ tāṃ mariṣyati || 9 ||
[Analyze grammar]

stryuvāca |
sā'haṃ te dayitā kānta tīrthasyāsya prabhāvataḥ |
divyarūpamidaṃ prāptā devairapi sudurlabham || 10 ||
[Analyze grammar]

tvaṃ cāpi salile hyasminkuru snānaṃ tvarānvitaḥ |
prāpsyasi tvaṃ paraṃ rūpaṃ yathā prāptaṃ mayā'nagha || 11 ||
[Analyze grammar]

athāsau saha putreṇa praviṣṭastatra nirjhare |
vimukte bhāskare rājanvirūpaścābhavatpunaḥ || 12 ||
[Analyze grammar]

duḥkhena mṛtyumāpannastasminneva jalāśaye |
atha sā bhartṛśokācca maraṇe kṛtaniścayā || 13 ||
[Analyze grammar]

citiṃ kṛtvā samaṃ tena jvālayāmāsa pāvakam |
atha te munayo dṛṣṭvā tathāśīlāṃ śubhāṃganām || 14 ||
[Analyze grammar]

kṛpayā parayāviṣṭāstāmūcurvismayānvitāḥ |
sarve tasyāśca saṃdṛṣṭvā sāhasaṃ ca nṛpottama || 15 ||
[Analyze grammar]

ṛṣaya ūcuḥ |
divyarūpaṃ tvayā prāptaṃ devairapi sudurlabham |
kasmādenaṃ supāpmānamanugacchasi bhāmini || 16 ||
[Analyze grammar]

stryuvāca |
pativratāhaṃ viprendrāḥ sadā bhartṛparāyaṇā |
kiṃ rūpeṇa kariṣyāmi vinā patyā nijena ca || 17 ||
[Analyze grammar]

virūpo vā surūpo vā daridro vā dhanādhipaḥ |
strīṇāmekaḥ patirbharttā gatirnānyā jagattraye || 18 ||
[Analyze grammar]

bālako'yaṃ muniśreṣṭhā bhavaccharaṇamāgataḥ |
ahaṃ kāntena saṃyuktā praviśāmi hutāśanam || 19 ||
[Analyze grammar]

pulastya uvāca |
atha te munayaḥ sarve jñātvā tasyāḥ suniścayam |
kṛpayā parayāviṣṭāḥ saṃvīkṣya ca parasparam || 20 ||
[Analyze grammar]

tato jīvāpayāmāsustatpatiṃ te munīśvarāḥ |
sadrūpeṇa samāyuktaṃ divya lakṣaṇalakṣitam || 21 ||
[Analyze grammar]

etasminneva kālaṃ tu vimānaṃ manasepsitam |
devakanyāsamākīrṇaṃ sadyastatra samāgatam || 22 ||
[Analyze grammar]

atha tau daṃpatī teṣāṃ munīnāṃ bhāvitātmanām |
purataḥ praṇipatyātha prasthitau tridivaṃ prati || 23 ||
[Analyze grammar]

atha tairmunibhiḥ proktā sā nārī maṇikarṇikā |
varaṃ varaya kalyāṇi sarve tuṣṭā vayaṃ tava || 24 ||
[Analyze grammar]

pativratatvena tuṣṭāḥ satyena ca viśeṣataḥ |
nāsmākaṃ darśanaṃ vyarthaṃ jāyate ca kathaṃcana || 25 ||
[Analyze grammar]

maṇikarṇikovāca |
yadi māṃ munayastuṣṭāḥ prayacchatha varaṃ mudā |
yadatrāsti mahāliṃgaṃ mannāmnā tadbhaviṣyati || 26 ||
[Analyze grammar]

etadeva mamābhīṣṭaṃ nānyadasti prayojanam |
sarveṣāṃ ca prasādena svargaṃ gacchāmi sāṃpratam || 27 ||
[Analyze grammar]

ṛṣaya ūcuḥ |
evaṃ bhavatu te khyātistīrthaliṃge varānane |
tava nāmānvitaṃ jātaṃ tīrthaṃ vai maṇikarṇikā || 28 ||
[Analyze grammar]

pulastya uvāca |
bhartrā saha divaṃ prāptā putreṇaiva samanvitā |
vālakhilyāstaponiṣṭhā viśeṣāttatra saṃsthitāḥ || 29 ||
[Analyze grammar]

tatra sūryagrahe prāpte snānadānādikāḥ kriyāḥ |
yaḥ karoti phalaṃ tasya kurukṣetra samaṃ bhavet || 30 ||
[Analyze grammar]

yaṃ yaṃ kāmamabhidhyāya snānaṃ tatra karoti yaḥ |
taṃ taṃ prāpnoti rājendra samyagdhyānasamanvitaḥ || 31 ||
[Analyze grammar]

tasmātsarvaprayatnena snānaṃ tatra samācaret |
tīrthe dānaṃ yathāśaktyā devarṣipitṛtarpaṇam || 32 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍe maṇikarṇikeśvaramāhātmyavarṇanaṃnāma ṣoḍaśo'dhyāyaḥ || 16 ||
[Analyze grammar]