Chapter 223

[English text for this chapter is available]

īśvara uvāca |
tato gacchenmahādevi liṃgaṃ trailokyapūjitam |
gātrotsargamiti khyātaṃ tasya dakṣiṇataḥ sthitam || 1 ||
[Analyze grammar]

yatra gātraṃ parityaktaṃ balabhadreṇa dhīmatā |
anyaiścaiva mahābhāgairyādavaistatra saṃyuge || 2 ||
[Analyze grammar]

yatra te yādavāḥ kṣīṇā brahmaśāpabalāhinā |
etatpuruṣottamaṃ kṣetraṃ samantāddhanuṣāṃ śatam || 3 ||
[Analyze grammar]

yatra sākṣātsvayaṃ devi tiṣṭhate puruṣottamaḥ |
tadeva vaiṣṇavaṃ kṣetraṃ kalau pātakanāśanam || 4 ||
[Analyze grammar]

rahasyaṃ paramaṃ devi tīrthānāṃ pravaraṃ hi tat |
pūrvaṃ kṛtayuge devi pretatīrthaṃ ca saṃsmṛtam |
kalau yuge tu saṃprāpte gātrotsargamiti tvabhūt || 5 ||
[Analyze grammar]

ṛṇamocanapārśve tu madhye tu pāpamocanāt |
etanmadhyaṃ samāśritya mṛtaḥ pāpairvimucyate || 6 ||
[Analyze grammar]

tasya kiṃ varṇyate devi yatrānantaphalaṃ mahat |
athamedhasahasrasya phalaṃ snātvā hyavāpyate || 7 ||
[Analyze grammar]

yatrāśvatthaṃ samāsādya samādhinyastamānasaḥ |
mumoca dustyajānprāṇānbrahmadvāreṇa keśavaḥ || 8 ||
[Analyze grammar]

tatra nārāyaṇaṃ sākṣādbalabhadraṃ ca rukmiṇīm |
pūjayitvā vidhānena mucyate pātakatrayāt || 9 ||
[Analyze grammar]

tatra snātvā naro bhaktyā yaḥ saṃtarpayate pitṝn |
pretatvātpitaro muktā bhavanti śrāddhadāyinaḥ || 10 ||
[Analyze grammar]

goghnaḥ surāpo durmedhā brahmahā gurutalpagaḥ |
tatra snātvā naraḥ sadyo vipāpaḥ saṃprapadyate || 11 ||
[Analyze grammar]

bālye vayasi yatpāpaṃ vārddhake yauvane'pi vā |
ajñānājjñānato vāpi yaḥ karoti naraḥ priye |
tatra snātvā pramucyeta tīrthe gātrapramocane || 12 ||
[Analyze grammar]

tatra piṇḍapradānena pitṝṇāṃ jāyate parā |
tṛptirvarṣaśataṃ yāvadetadāha purā hariḥ || 13 ||
[Analyze grammar]

yaḥ punaścānnadānaṃ tu tatra kuryātsamāhitaḥ |
tasyānvaye'pi deveśi na preto jāyate naraḥ || 14 ||
[Analyze grammar]

śrīdevyuvāca |
pretatīrthamiti proktaṃ paścādgātravimocanam |
vada me devadeveśa pretatīrthasya kāraṇam || 19 ||
[Analyze grammar]

īśvara uvāca |
śṛṇu devi pravakṣyāmi pretatīrthasya kāraṇam |
yacchrutvā mānavo bhaktyā muktaḥ syātsarvakilbiṣaiḥ || 16 ||
[Analyze grammar]

purā'sīdgautamonāma maharṣiḥ śaṃsitavrataḥ |
bhṛgukalpātsamāyātaḥ kṣetre prābhāsike śubhe || 17 ||
[Analyze grammar]

ayane cottare puṇye śrīsomeśadidṛkṣayā |
dṛṣṭvā someśvaraṃ devaṃ snātvā tīrtheṣu kṛtsnaśaḥ || 18 ||
[Analyze grammar]

sa gacchaṃstīrthayātrāyāṃ gātrotsargaṃ tato gataḥ || 19 ||
[Analyze grammar]

athāsau brāhmaṇo devi yāvatsīmāmupāgataḥ |
tāvadviṣṇupriyaṃ tatra dadṛśe vaiṣṇavaṃ vanam || 20 ||
[Analyze grammar]

puruṣottamanāmāḍhyaṃ kṣetraṃ ca dhanuṣāṃ śatam |
tasminkṣetre sa cāpaśyatpaṃca pretānsudāruṇān || 21 ||
[Analyze grammar]

mahāvṛkṣasamārūḍhānmahākāyānmahotkaṭān |
ūrdhvakeśāñchaṃkukarṇānsnāyunaddhakalevarān || 22 ||
[Analyze grammar]

vimāṃsarudhirānnagnānatha kṛṣṇakalevarān |
dṛṣṭvā'sau bhayasaṃtrasto vinaṣṭo'smītyacintayat || 23 ||
[Analyze grammar]

dhyātvā'ha suciraṃ kālaṃ dhairyamāsthāya yatnataḥ |
ke yūyaṃ vikṛtākārā dṛṣṭāḥ pūrvaṃ mayā purā || 24 ||
[Analyze grammar]

na kadācidyathā yūyaṃ kimarthaṃ kṣetramadhyataḥ |
dhāvamānāḥ suduḥkhārtā etanme kautukaṃ mahat || 25 ||
[Analyze grammar]

pretā ūcuḥ |
vayaṃ pretā mahābhāga dūrādiha samāgatāḥ |
śrutvā tīrthavaraṃ puṇyaṃ praveśaṃ na labhāmahe || 26 ||
[Analyze grammar]

gaṇairaṃtardhānagataiḥ prahārairjarjarīkṛtāḥ |
lekhako rohakaścaiva sūcakaḥ śīghragastathā || 27 ||
[Analyze grammar]

ahaṃ paryuṣitonāma pañcamaḥ pāpakṛttamaḥ || 28 ||
[Analyze grammar]

gautama uvāca |
pretayonau pravṛttānāṃ kena nāmāni kṛtsnaśaḥ |
yuṣmākaṃ nirmitānyevametanme kautukaṃ mahat || 29 ||
[Analyze grammar]

pretā ūcuḥ |
yācamānasya viprasya likhatyeṣa dharātale |
nottaraṃ paṭhate kiñcittenāsau lekhakaḥ smṛtaḥ || 30 ||
[Analyze grammar]

dvitīyo brāhmaṇabhayātprāsādamadhirohati |
tato'sau rohakākhyo'bhūcchṛṇu vipra tṛtīyakam || 31 ||
[Analyze grammar]

sūcitā bahavo'nena brāhmaṇā vittasaṃyutāḥ |
rājñe pāpena tenāsau sūcako bhuvi viśrutaḥ || 32 ||
[Analyze grammar]

brāhmaṇaiḥ prārthyamānastu śīghraṃ dhāvati nityaśaḥ |
na kadāciddadāti sma tenāsau śīghragaḥ smṛtaḥ || 33 ||
[Analyze grammar]

mayā kadannaṃ dattaṃ ca paryuṣitaṃ brāhmaṇottame |
brāhmaṇebhyaḥ sadā dānaṃ miṣṭānnena tu poṣaṇam |
tasmātparyuṣitonāma saṃjāto'haṃ dharātale || 34 ||
[Analyze grammar]

gautama uvāca |
na vinā bhojanenaiva vartante prāṇino bhuvi |
kimāhārā bhavanto vai vadadhvaṃ mama kautukāt || 35 ||
[Analyze grammar]

pretā ūcuḥ |
prāpte bhojanakāle tu yatra yuddhaṃ pravartate |
tasyānnasya rasaṃ sarvaṃ bhuṃjāmo dvijasattama || 36 ||
[Analyze grammar]

nānulipte dharāpṛṣṭhe yatra bhuṃjanti mānavāḥ |
bhraṣṭaśaucā dvijaśreṣṭha tadasmākaṃ tu bhojanam || 37 ||
[Analyze grammar]

aprakṣālitapādastu yo bhuṃkte dakṣiṇāmukhaḥ |
yo veṣṭitaśirā bhuṃkte pretā bhuṃjanti nityaśaḥ || 38 ||
[Analyze grammar]

śrāddhaṃ saṃpaśyate śvā cennārī caiva rajasvalā |
antyajaḥ śūkaraścānnaṃ tadasmākaṃ tu bhojanam || 39 ||
[Analyze grammar]

tyaktvā kramāgataṃ vipraṃ pūjitaṃ prapitāmahaiḥ |
yo dānaṃ dadate'nyasmai tasmai cā'tuṣṭacetasā || 40 ||
[Analyze grammar]

tasya dānasya yatpuṇyaṃ tadasmākaṃ prajāyate |
yasmingṛhe sadocchiṣṭaṃ sadā ca kalaho bhavet |
vaiśvadevavihīne tu tatra bhuṃjāmahe vayam || 41 ||
[Analyze grammar]

gautama uvāca |
yuṣmākaṃ kīdṛśe gehe praveśo na ca vidyate |
satyaṃ vadata mā'satyaṃ satyaṃ sādhuṣu saṃgatam || 42 ||
[Analyze grammar]

pretā ūcuḥ |
vaiśvadevodbhavā yatra dhūmavartiḥ pradṛśyate |
tasmingehe na cāsmākaṃ praveśo vidyate dvija || 43 ||
[Analyze grammar]

yasmingṛhe prabhāte tu kriyate copalepanam |
vidyate veda nirghoṣastatrāsmākaṃ na kiṃcana || 44 ||
[Analyze grammar]

gautama uvāca |
kena karmavipākena pretatvaṃ vrajate naraḥ |
etanme vistareṇaiva yathāvadvaktu marhatha || 45 ||
[Analyze grammar]

pretā ūcuḥ |
mṛṣā'pahāriṇo ye ca ye cocchiṣṭā vrajanti ca |
gobrāhmaṇahatāścaiva pretatvaṃ te vrajanti hi || 46 ||
[Analyze grammar]

paiśunyaniratā ye ca kūṭasākṣyaratā narāḥ |
nyāyapakṣe na vartaṃte mṛtāḥ pretā bhavaṃti te || 47 ||
[Analyze grammar]

śleṣmamūtrapurīṣāṇi ye kṣipanti sarovare |
pretatvaṃ te samāsādya vicaraṃti ca mānavāḥ || 48 ||
[Analyze grammar]

dīyamānaṃ tu viprāṇāṃ goṣu viprātureṣu ca |
mā dehīti prajalpantaste ca pretā bhavaṃti ca || 49 ||
[Analyze grammar]

śūdrānnenodarasthena yadi vipro mriyeta vai |
pretatvaṃ yātyasau nūnaṃ yadyapi syātṣaḍaṃgavit || 50 ||
[Analyze grammar]

yastrīnhale balīvardānvāhayenmadasaṃyutaḥ |
amāvāsyāṃ viśeṣeṇa sa preto jāyate naraḥ || 51 ||
[Analyze grammar]

nāstiko niṃdakaḥ kṣudro nityanaimittyavarjitaḥ |
brāhmaṇāndveṣṭi yo nūnaṃ sa preto jāyate naraḥ || 52 ||
[Analyze grammar]

viśvāsaghātako yastu brahmahā strīvadhe rataḥ |
goghno gurughraḥ pitṛhā sa preto jāyate naraḥ || 53 ||
[Analyze grammar]

yasya naiva pradattāni ekoddiṣṭāni ṣoḍaśa |
mṛtasya na vṛṣotsargaḥ sa preto jāyate naraḥ || 54 ||
[Analyze grammar]

etaddhi sarvamākhyātaṃ yatpṛṣṭāḥ sma dvijottama |
bhūyo brūhi dvijaśreṣṭha yaścāsti tava saṃśayaḥ || 55 ||
[Analyze grammar]

gautama uvāca |
yena karmavipākenana preto jāyate naraḥ |
tanme vadata niḥśeṣaṃ kautukaṃ me'tra vidyate || 56 ||
[Analyze grammar]

pretā ūcuḥ |
tīrthayātrā rato yastu devārcanaparāyaṇaḥ |
brāhmaṇeṣu sadā bhakto na preto jāyate naraḥ || 57 ||
[Analyze grammar]

nityaṃ śṛṇoti śāstrāṇi nityaṃ sevati paṃḍitān |
vṛddhāṃstu pṛcchate nityaṃ na sa preto vijāyate || 58 ||
[Analyze grammar]

etasmātkāraṇātprāptā vayaṃ sarve sudūrataḥ |
śaknumo praveṣṭuṃ ca puṇye'sminkṣetra uttame || 59 ||
[Analyze grammar]

nirviṇṇāḥ pretarūpeṇa tasmāttvaṃ dvijasattama |
gatirbhava mahābhāga sarveṣāṃ naḥ prayatnataḥ || 60 ||
[Analyze grammar]

gautama uvāca |
kathaṃ vo jāyate mokṣo vadadhvaṃ kṛtsnaśo mama |
kṛpayāviṣṭacitto'haṃ yatiṣye nātra saṃśayaḥ || 61 ||
[Analyze grammar]

pretā ūcuḥ |
prabhūtakālamasmākaṃ pretatve tiṣṭhatāṃ vibho |
na tvabhyeti pumānkaścidasmākaṃ yo gatirbhavet || 62 ||
[Analyze grammar]

tasmāttvaṃ dehi naḥ śrāddhaṃ gatvā kṣetraṃ tu vaiṣṇavam |
nāmagotrāṇi cādāya mokṣaṃ yāsyāmahe tataḥ || 63 ||
[Analyze grammar]

īśvara uvāca |
tato'sau brāhmaṇo gatvā dayāviṣṭo harergṛham |
śrāddhaṃ ca pradadau teṣāmekaikasya pṛthakpṛthak || 64 ||
[Analyze grammar]

yasyayasya yadā śrāddhaṃ karoti dvijasattamaḥ |
sa rātrau svapna etyainaṃ darśane vākyamabravīt || 65 ||
[Analyze grammar]

prasādāttava viprendra mukto'haṃ pretayonitaḥ |
svasti te'stu gamiṣyāmi vimānaṃ me hyupasthitam || 66 ||
[Analyze grammar]

evaṃ saṃtāritāstena catvāraste dvijottamāḥ || 67 ||
[Analyze grammar]

athāsau brāhmaṇaśreṣṭhaḥ saṃprāpte pañcame dine |
pradadau vidhipūrvaṃ tu śrāddhaṃ paryuṣitasya ca || 68 ||
[Analyze grammar]

athāpaśyata svapnānte prāptaṃ paryuṣitaṃ naram |
dīnavākyaṃ parikliṣṭaṃ niḥśvasantaṃ muhurmuhuḥ || 69 ||
[Analyze grammar]

paryuṣita uvāca |
na me jātā gatirvipra maṃdabhāgyasya pāpinaḥ |
mayā hṛtaṃ taḍāgārthaṃ yadvittaṃ praguṇīkṛtam || 70 ||
[Analyze grammar]

gautama uvāca |
kathaṃ te jāyate mokṣo vada śīghramaśeṣataḥ |
kariṣye nātra saṃdeho yadyapi syātsudurlabham || 71 ||
[Analyze grammar]

paryuṣita uvāca || |
ayane cottare prāpte gatvā tīrthaṃ haripriyam |
śrāddhaṃ tvaṃ dehi me nūnaṃ tato gatirbhaviṣyati || 72 ||
[Analyze grammar]

īśvara uvāca |
evamuktaḥ sa viprendrastena pretena vai muniḥ |
ayane cottare prāpte gatvā tīrthaṃ haripriyam |
pradadau vidhivacchrāddhaṃ tataḥ paryuṣitāya ca || 73 ||
[Analyze grammar]

tataḥ paryuṣito rātrau svapnānte vākyamabravīt |
prasannavadano bhūtvā divyamālyavapurdharaḥ || 74 ||
[Analyze grammar]

paryuṣita uvāca |
mukto'haṃ tvatprasādena pretabhāvāddvijottama |
svasti te'stu gamiṣyāmi vimānaṃ me hyupasthitam || 75 ||
[Analyze grammar]

devatvaṃ ca mayā prāptaṃ samartho'haṃ dvijottama |
varaṃ dadāmi te vipra gṛhāṇa tvaṃ varaṃ śubham || 76 ||
[Analyze grammar]

brahmaghne ca surāpe ca caure bhagnavrate tathā |
niṣkṛtirvihitā sadbhiḥ kṛtaghne nāsti niṣkṛtiḥ || 77 ||
[Analyze grammar]

gautama uvāca |
yadi deyo varo'smākaṃ samartho'si varaprada |
yatra sthāne mayā dṛṣṭāḥ pretā yūyaṃ suduḥkhitāḥ |
tatrāhaṃ cāśramaṃ kṛtvā kariṣye cottamaṃ tapaḥ || 78 ||
[Analyze grammar]

nirgatāsmi gṛhaṃ bhūyo snātvā tīrthamidaṃ mahat |
tatra yo bhānavo bhaktyā pitṝnuddiśya bhaktitaḥ || 79 ||
[Analyze grammar]

vidhivaddāsyati śrāddhaṃ snātvā saṃtarpya devatāḥ |
yuṣmatprasādatastasya hyanvaye'pi kadācana |
mā bhūyātpretabhāvo hi api pāpānvitasya bhoḥ || 80 ||
[Analyze grammar]

paryuṣita uvāca |
gaccha tvaṃ cāśramaṃ tatra kuru brāhmaṇasattama |
gamiṣyasi parāṃ siddhiṃ loke khyātiṃ gamiṣyasi || 81 ||
[Analyze grammar]

tatra ye mānavā bhaktyā śrāddhaṃ dāsyaṃti sattamāḥ |
pitṝṇāṃ te vimānasthā yāsyaṃti tridivālayam || 82 ||
[Analyze grammar]

na teṣāṃ vaṃśajaḥ kaścitpretatvaṃ ca gamiṣyati |
prāhuḥ saptapadīṃ maitrīṃ paṃḍitāḥ sthirabuddhayaḥ || 83 ||
[Analyze grammar]

mitratāṃ tu puraskṛtya kiṃ tadvakṣyāmi tacchṛṇu |
tavāśramapadaṃ puṇyaṃ bhaviṣyati mahītale || 84 ||
[Analyze grammar]

sarvapāpapraśamanaṃ sarvaduḥkhavi nāśanam |
mannāmnā khyātimāyātu pretatīrthamiti prabho || 85 ||
[Analyze grammar]

īśvara uvāca |
taṃ tatheti pratijñāya gatastatra dvijottamaḥ |
yathā vedoktamārgeṃṇa sarvaṃ kṛtyaṃ cakāra saḥ || 86 ||
[Analyze grammar]

so'pi svargamanuprāpto hṛṣṭaḥ paryuṣitaḥ priye |
etatsarvaṃ purāvṛttaṃ sthāne'smingātramocane || 87 ||
[Analyze grammar]

yaḥ śṛṇoti naraḥ samyaksarvapāpaiḥ sa mucyate |
śayanotthāpane yoge yaḥ paśyetpuruṣottamam |
gātrotsarge tu gatvā'sau yajñāyutaphalaṃ labhet || 88 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye puruṣottamatīrthapretatīrthamāhātmyavarṇanaṃnāma trayoviṃśatyuttaradviśatatamo'dhyāyaḥ || 223 ||
[Analyze grammar]