Chapter 209

[English text for this chapter is available]

īśvara uvāca |
tato gacchenmahādevi mārkaṇḍeyeśamuttamam |
tasmāduttaradigbhāge mārkaṇḍena pratiṣṭhitam || 1 ||
[Analyze grammar]

sāvitryāḥ pūrvabhāge tu nātidūre vyavasthitam |
maharṣirabhavatpūrvaṃ mārkaṇḍeya iti śrutaḥ || 2 ||
[Analyze grammar]

ajaraścāmaraścaiva prasādātpadmayoninaḥ |
sa gatvā tatra viprendro devadevasya śūlinaḥ |
liṃgaṃ tu sthāpayāmāsa jñātvā tatkṣetramuttamam || 3 ||
[Analyze grammar]

sa taṃ pūjya vidhānena sthitvā dakṣiṇato muniḥ |
padmāsanadharo bhūtvā dhyānāvasthastadā'bhavat || 4 ||
[Analyze grammar]

tasya dhyānaratasyaiva prayutānyarbudāni ca |
yugānāṃ samatītāni na jānāti munīśvaraḥ || 5 ||
[Analyze grammar]

atha lopaṃ samāpannaḥ prāsādaḥ śāṃkaraḥ sthitaḥ |
kālena mahatā devi pāṃsubhirmārutodbhavaiḥ || 6 ||
[Analyze grammar]

kasyacittvatha kālasya prabuddho munisattamaḥ |
apaśyatpāṃsubhirvyāptaṃ tatsarvaṃ śivamandiram || 7 ||
[Analyze grammar]

tataḥ kṛcchrātsa niṣkrāntaḥ khanitvā munipuṃgavaḥ |
akarotsumahādvāraṃ pūjārthaṃ tasya bhāmini || 8 ||
[Analyze grammar]

praviśya tatra yo bhaktyā pūjayedvṛṣabhadhvajam |
sa yāti paramaṃ sthānaṃ yatra devo maheśvaraḥ || 9 ||
[Analyze grammar]

devyuvāca |
amaratvaṃ kathaṃ prāpto mārkaṃṇḍo munisattamaḥ |
abhavatkautukaṃ hyetattasmāttvaṃ vaktumarhasi || 10 ||
[Analyze grammar]

amaratvaṃ yato nāsti prāṇināṃ bhuvi śaṃkara |
devānāmapi kalpāṃte sa kathaṃ na mṛto muniḥ || 11 ||
[Analyze grammar]

īśvara uvāca |
athātastvāṃ prava kṣyāmi yathāsāvamaro'bhavat |
āsīnmuniḥ purākalpe mṛkaṇḍa iti viśrutaḥ || 12 ||
[Analyze grammar]

bhṛgoḥ putro mahābhāgaḥ sabhāryastapasi sthitaḥ |
tasya putrastadā jāto vasatastu vanāṃtare || 13 ||
[Analyze grammar]

sa pāñcavārṣiko bhūtvā bāla eva guṇānvitaḥ |
kasyacittvatha kālasya jñānī tatra samāgataḥ || 14 ||
[Analyze grammar]

tena dṛṣṭastadā bālaḥ prāṃgaṇe vicaranpriye |
smṛtvā'hasacciraṃ kālaṃ bhāvyarthaṃ prati noditaḥ || 15 ||
[Analyze grammar]

tasya pitrā sa dṛṣṭastu sāmudrajño viduttamaḥ |
hāsyasya kāraṇaṃ pṛṣṭo vismayānvitacetasā || 16 ||
[Analyze grammar]

kasmānme sutamālokya smitaṃ vipra kṛtaṃ tvayā |
tatra me kāraṇaṃ brahmanyathāvadvaktumarhasi || 17 ||
[Analyze grammar]

iti tasya vacaḥ śrutvā jñānī vipro vaco'bravīt || 18 ||
[Analyze grammar]

ayaṃ putrastava mune sarvalakṣaṇasaṃyutaḥ |
adyaprabhṛti ṣaṇmāsamadhye mṛtyumavāpsyati || 19 ||
[Analyze grammar]

yadi jīvetpunarayaṃ cirāyurvai bhaviṣyati |
ato mayā kṛtaṃ hāsyaṃ vicitrā karmaṇo gatiḥ || 20 ||
[Analyze grammar]

etacchrutvā vaco raudraṃ jñāninā samudāhṛtam |
vratopanayanaṃ cakre bālakasya pitā tadā || 21 ||
[Analyze grammar]

āha cainamṛṣiḥ putraṃ dṛṣṭvā brāhmaṇamāgatam |
abhivādyāstrayo varṇāstataḥ śreyo hyavāpsyasi || 22 ||
[Analyze grammar]

evamuktaḥ sa vai vipraḥ karotyevābhivādanam |
na varṇāvarajaṃ vetti bālabhāvādvarānane || 23 ||
[Analyze grammar]

paṃcamāsā hyatikrāntā divasāḥ pañcaviṃśatiḥ |
etasminneva kāle tu prāptāḥ saptarṣayo'malāḥ || 24 ||
[Analyze grammar]

tīrthayātrāprasaṃgena tena mārgeṇa bhāmini |
kālena tena sarve'tha yathāvadabhivādanaiḥ |
āyuṣmānbhava tairuktaḥ sa bālo daṇḍavalkalī || 25 ||
[Analyze grammar]

uktvā te tu punarbālaṃ vīkṣya vai kṣīṇajīvitam |
dināni paṃca te hyāyurjñātvā bhītāstato'nṛtāt || 26 ||
[Analyze grammar]

brahmacāriṇamādāya gatāste brahmaṇo'ntike |
pratimucyāgrato bālaṃ praṇemuste pitāmaham || 27 ||
[Analyze grammar]

tatastenāpi bālena brahmā caivābhivāditaḥ |
cirāyurbrahmaṇā bālaḥ prokto'sāvṛṣisannidhau || 28 ||
[Analyze grammar]

tataste munayaḥ prītāḥ śrutvā vākyaṃ pitāmahāt |
pitāmahastu tāndṛṣṭvā ṛṣīnprovāca vismitān |
kena kāryeṇa vā'yātāḥ kena bālo niveditaḥ || 29 ||
[Analyze grammar]

ṛṣaya ūcuḥ |
bhṛgoḥ putro mṛkaṇḍastu kṣīṇāyustasya bālakaḥ |
akālena pitā jñātvā babaṃdhāsya ca mekhalām || 30 ||
[Analyze grammar]

yajñopavītaṃ ca tatastena vipreṇa bodhitaḥ |
yaṃ kañciddrakṣyase loke bhramantaṃ bhūtale dvijam || 31 ||
[Analyze grammar]

tasyābhivādanaṃ kāryaṃ nityameva ca putraka |
 tato vayamanenaiva dṛṣṭā bālena sattama || 32 ||
[Analyze grammar]

tīrthayātrāprasaṃgena daivayogātpitāmaha |
cirāyureṣa vai prokto hyamībhiścābhivāditaiḥ || 33 ||
[Analyze grammar]

tvatsakāśaṃ samānītastvayā caivamudāhṛtaḥ |
kathaṃ vāganṛtā deva hyasmākaṃ bhavatā saha || 34 ||
[Analyze grammar]

uvāca bālamuddiśya prahasanpadmasaṃbhavaḥ |
matsamānāyuṣo bālo mārkaṇḍeyo bhaviṣyati || 35 ||
[Analyze grammar]

kalpasyādau tathā cānte sahāyo me bhaviṣyati |
tatastu munayaḥ prītā gṛhītvā munidārakam |
tasminneva pradeśe tu mumucuśceṣṭitaṃ yataḥ || 36 ||
[Analyze grammar]

tīrthayātrāṃ gatā viprā mārkaṇḍeyo gṛhaṃ yayau |
gatvā gṛhamathovāca mṛkaṇḍaṃ munisattamam || 37 ||
[Analyze grammar]

brahmalokamahaṃ nīto munibhistāta saptabhiḥ |
ukto'yaṃ brahmaṇā kalpasyādau cānte ca me sakhā || 38 ||
[Analyze grammar]

bhaviṣyati na saṃdeho matsamāyuśca bālakaḥ |
tatastaiḥ punarānīto muktaścaivāśramaṃ prati || 39 ||
[Analyze grammar]

matkṛte hi dvijaśreṣṭha yātu te manaso jvaraḥ |
mārkaṇḍeyavacaḥ śrutvā mṛkaṇḍo munisattamaḥ |
jagāma paramaṃ harṣaṃ kṣaṇamekaṃ suduḥsaham || 40 ||
[Analyze grammar]

tatau dhairyaṃ samāsthāya vākyametaduvāca ha || 41 ||
[Analyze grammar]

adya me saphalaṃ janma jīvitaṃ ca sujīvitam |
yattvayā me suputreṇa dṛṣṭo lokapitāmahaḥ || 42 ||
[Analyze grammar]

vājapeyasahasreṇa rājasūyaśatena ca |
yaṃ na paśyanti vidvāṃsaḥ sa tvayā līlayā suta || 43 ||
[Analyze grammar]

dṛṣṭaścirāyurapyevaṃ kṛtastenābjayoninā |
divārātramahaṃ tāta tava duḥkhena dukhitaḥ |
na nidrāmanugacchāmi tanmeduḥkhaṃ gataṃ mahat || 44 ||
[Analyze grammar]

iti śrīskānde mahā purāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye mārkaṇḍeyeśvaramāhātmyavarṇanaṃnāma navottaradviśatatamo'dhyāyaḥ || 209 ||
[Analyze grammar]