Chapter 199

[English text for this chapter is available]

īśvara uvāca |
tato gacchenmahādevi tasya dakṣiṇataḥ sthitam |
sarasvatyāstaṭe ramye devaṃ tatra kṛtasmaram || 1 ||
[Analyze grammar]

svayaṃbhūtaṃ mahādevi sarvapāpapraṇāśanam |
tasyotpattiṃ pravakṣyāmi yathā jātaṃ mahītale || 2 ||
[Analyze grammar]

purā kāmo mayā dagdho yadā tatra varānane |
tadā ratiḥ samāgamya vilalāpa suduḥkhitā || 3 ||
[Analyze grammar]

tāṃ tu śokāturāṃ dṛṣṭvā tatrāhaṃ karuṇānvitaḥ |
avocaṃ mā rudiṣveti tava bhartā punaḥ śubhe |
samutthāsyati kālena matprasādānna saṃśayaḥ || 4 ||
[Analyze grammar]

devyuvāca |
kimarthaṃ sa purā dagdhaḥ kāmadevastvayā vibho |
kathamāpa punarjanma vistarātkathayasva me || 5 ||
[Analyze grammar]

īśvara uvāca |
dakṣaḥ prajāpatiḥ pūrvaṃ babhūva tvatpitā priye |
śataṃ sutānāṃ jajñe'sya gaurīṇāṃ dīrghacakṣuṣām || 6 ||
[Analyze grammar]

dadau tvāṃ prathamaṃ mahyaṃ satīnāmeti kīrtitām |
dadau daśa ca dharmāya śraddhā medhā dhṛtiḥ kṣamā || 7 ||
[Analyze grammar]

anasūyā śucirlajjā smṛtiḥ śaktiḥ śrutistathā |
dve bhārye kāmadevāya ratiḥ prītistathaiva ca || 8 ||
[Analyze grammar]

ekāṃ svāhāṃ dadau vahneḥ pitṝṇāṃ ca tataḥ svadhām |
saptaviṃśacchaśāṅkāya aśvinyādyāḥ prakīrtitāḥ || 9 ||
[Analyze grammar]

tavāpi viditā devi revatyantāstathā jane |
kaśyapāya dadau devi sa tu kanyāstrayodaśa || 10 ||
[Analyze grammar]

aditiśca ditiścaiva vinatā kadrureva ca |
siṃhikā suprabhā caiva ulūkī yā varānane || 11 ||
[Analyze grammar]

anuviddhā sitā caiva īrṣyā hiṃsā tathā parā |
māyā niṣkṛtisaṃyuktā dakṣaḥ pūrvaṃ mahāmatiḥ || 12 ||
[Analyze grammar]

gaurī ca suprabhā caiva vārttā sādhvī sumālikā |
varuṇāya dadau pañca tadā'sau parvatātmaje || 13 ||
[Analyze grammar]

bhadrā ca madirā caiva vidyā dhanyā dhanā śubhā |
dadau pañca kuberāya patnyarthaṃ parvatātmaje || 14 ||
[Analyze grammar]

jayā ca vijayā caiva madhuspandā irāvatī |
supriyā janakā kāntā subhadrā dhārmikā śubhā || 15 ||
[Analyze grammar]

rudrāṇāṃ pradadau kanyā daśānāṃ dharmavittadā |
prabhāvatī subhadrā ca vimalā nirmalā'nṛtā || 16 ||
[Analyze grammar]

tīvrā dakṣāruṇā vidyā dhārapālā ca varcasā |
ādityānāṃ dadau dakṣaḥ kanyādvādaśakaṃ priye || 17 ||
[Analyze grammar]

yoganidrābhibhūtasya saṃsarpā saramā guhā |
mālā caṃpā tathā jyotsnā sa viśvebhyaśca eva ca || 18 ||
[Analyze grammar]

aśvibhyāṃ dve tathā kanye suveṣā bhūṣaṇā śubhā |
ekā kanyā tathā vāyordattā etāḥ prakīrtitāḥ || 19 ||
[Analyze grammar]

sāvitrīṃ brahmaṇe prādāllakṣmīṃ viṣṇormahātmanaḥ |
kasyacittvatha kālasya sa īje dakṣiṇāvatā || 20 ||
[Analyze grammar]

yajñena parvatasute himavante mahāgirau |
yajñavāṭo hyabhūttasya sarvakāmasamṛddhimān || 21 ||
[Analyze grammar]

tasminyajñe samāyātā ādityā vasava stathā |
viśvedevāśca maruto lokapālāśca sarvaśaḥ || 22 ||
[Analyze grammar]

brahmā viṣṇuḥ sahasrākṣo vāruṇo yama eva ca |
dhanadaśca kumāraśca tathā nadyaśca sāgarāḥ || 23 ||
[Analyze grammar]

vāpyaḥ kūpāstathā caiva taḍāgāḥ palvalāni ca |
suparṇaścātha ye nāgāḥ sarve mūrtā vyavasthitāḥ || 24 ||
[Analyze grammar]

dānavāpsarasaścaiva yakṣāḥ kinnaraguhyakāḥ |
sānugāste sabhāryāśca vedavedāṃgapāragāḥ || 25 ||
[Analyze grammar]

maharṣayo mahābhāgāstathā devarṣayaśca ye |
te bhāryāsahitāstatra vasaṃti ca varānane || 26 ||
[Analyze grammar]

kapālamālābharaṇaścitābhasma bibharti yaḥ |
apavitratayā śaṃbhurnāhūtastu tathāvidhaḥ || 27 ||
[Analyze grammar]

yatastataḥ samāyātāḥ kailāse parvatottame |
aśvinyādyā bhaginyastāstvāṃ pratīdaṃ vaco'buvan || 28 ||
[Analyze grammar]

kiṃ tuṣṭeva ca kalyāṇi tiṣṭhasi tvaṃ sumadhyame |
vayaṃ ca prasthitāḥ sarvāḥ pituryajñe sabhartṛkāḥ || 29 ||
[Analyze grammar]

vayamākāritāstena sutāḥ sarvā yaśasvini |
na tvāmāhūtavāndakṣastrapate śaṃkarādyataḥ || 30 ||
[Analyze grammar]

tāsāṃ vacanamākarṇya satī prāha krudhānvitā |
hā dhigdakṣa durācāra kiṃ vadiṣye maheśvaram || 31 ||
[Analyze grammar]

kathaṃ saṃdarśaye vaktramityuktvā'tmānamātmanā |
visasarja tapoyogātsasmārānyanna kiñcana || 32 ||
[Analyze grammar]

atha dṛṣṭvā mahādevaḥ satīṃ prāṇairvinā sthitām |
avamānāttathā'tmānaṃ tyaktvā matvā kapālinam || 33 ||
[Analyze grammar]

gaṇānsaṃpreṣayāmāsa yajñavidhvaṃsanāya ca |
te gatāśca gaṇā raudrāḥ śataśo'tha sahasraśaḥ || 34 ||
[Analyze grammar]

vikṛtā vikṛtākārā asaṃkhyātā mahābalāḥ |
rudreṇa preritāndṛṣṭvā vīrabhadrapurogamān || 35 ||
[Analyze grammar]

tato devagaṇāḥ sarve vasavaḥ saha bhāskaraiḥ |
viśvedevāśca sādhyāśca dhanurhastā mahābalāḥ || 36 ||
[Analyze grammar]

yuddhāya ca viniṣkrāntā muñcantaḥ sāyakāñchitān |
te sametya tato'nyonyaṃ pramathā vibudhaiḥ saha || 37 ||
[Analyze grammar]

mumucuḥ śaravarṣāṇi vāridhārāṃ yathā ghanāḥ |
teṣāṃ hastī gaṇenātha śūlena hṛdi bheditaḥ || 38 ||
[Analyze grammar]

sa tu tena prahāreṇa visaṃjño niṣasāda ha |
atha muṣṭyā hataḥ kumbhe nāga airāvaṇastadā || 39 ||
[Analyze grammar]

sahasā sa hatastena vāraṇo bhairavānravān |
vinadañjavamāsthāya yajñavāṭamupādravat || 40 ||
[Analyze grammar]

viśvedevā nirucchvāsāḥ kṛtā raudrairmahāśaraiḥ |
cakarṣa sa dhanuṣyeṇa vasumānbalavataraḥ || 41 ||
[Analyze grammar]

nistejasastadādityāḥ kṛtāstena raṇājire |
etasminnantare devāḥ kṛtāstena parāṅmukhāḥ || 42 ||
[Analyze grammar]

tataste śaraṇaṃ jagmurviṣṇuṃ tatra ca saṃsthitam |
tataḥ kopasamāviṣṭo viṣṇurdevānsavāsavān || 43 ||
[Analyze grammar]

dṛṣṭvā vidrāvitānsarvānmumocāśu sudarśanam |
tamāpatantaṃ vegena viṣṇoścakraṃ sudarśanam || 44 ||
[Analyze grammar]

prasārya vaktraṃ sahasā udarasthaṃ cakāra ha |
tasmiṃścakre tadā graste amoghe parvatātmaje || 45 ||
[Analyze grammar]

cukopa bhagavānviṣṇuḥ śārṅgahasto 'bhyadhāvata |
sa hatvā daśabhistīkṣṇairnaṃdiṃ bhṛṅgiṃ śatena ca || 46 ||
[Analyze grammar]

mahākālaṃ sahasreṇa hyayutena gaṇādhipam |
bāṇānāmayutairbhittvā vīrabhadramupādravat || 47 ||
[Analyze grammar]

taṃ hatvā gadayā viṣṇurvihvalaṃ rudhirokṣitam |
gṛhītvā pādayorbhūmau nijaghānātiroṣitaḥ || 48 ||
[Analyze grammar]

hanyamānasya tasyātha bhūmau cakraṃ sudarśanam |
rudhirodgārasaṃyuktaṃ prahāramakaronna tu || 49 ||
[Analyze grammar]

rudralabdhavaro devi vīrabhadro gaṇeśvaraḥ |
yanna pañcatvamāpanno gadayā pīḍito'pi saḥ || 50 ||
[Analyze grammar]

patitaṃ vīkṣya taṃ sarve viṣṇutejobalārditāḥ |
vidrutāḥ sarvato yātā yatra devo maheśvaraḥ || 51 ||
[Analyze grammar]

tasmai sarvaṃ tathā vṛttaṃ samācakhyuḥ parābhavam |
vikramaṃ vīrabhadrasya tataḥ kruddho maheśvaraḥ || 52 ||
[Analyze grammar]

pragṛhya sahasā śūlaṃ prasthitaḥ svagaṇaiḥ saha |
yajñavāṭaṃ tu dakṣasya parābhavabhavaṃ tataḥ |
vikramanvīrabhadreṇa yatra viṣṇuḥ svayaṃ sthitaḥ || 53 ||
[Analyze grammar]

tamāyāntaṃ samālokya kopayuktaṃ maheśvaram |
saṃgrāme so'jayaṃ matvā tatraivāntaradhīyata || 54 ||
[Analyze grammar]

marudbhiḥ sārdhamindro'pi vasubhiḥ saha kinnaraiḥ |
śivaḥ krodhaparītātmā tataścādarśanaṃ gataḥ || 55 ||
[Analyze grammar]

kevalaṃ brāhmaṇāstatra sthitāḥ sadasi bhāmini |
te dṛṣṭvā śaṃkaraṃ prāptaṃ kopasaṃraktalocanam || 56 ||
[Analyze grammar]

homaṃ cakrustato bhītā rudramaṃtraiḥ samaṃtataḥ |
anye trāsasamāyuktāḥ palāyaṃte diśo daśa || 57 ||
[Analyze grammar]

athāgatya mahādevo dṛṣṭvā tānbrāhmaṇottamān |
apaśyamāno vibudhāṃstatra yajñaṃ jaghāna saḥ || 58 ||
[Analyze grammar]

sa ca mṛgavapurbhūtvā praṇaṣṭaḥ śivabhītitaḥ |
pṛṣṭhatastu dhanuṣpāṇirjagāma bhagavāñchivaḥ |
adyāpi dṛśyate vyomni tārārūpo maheśvari || 59 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye dakṣayajñavidhvaṃsanonāma navanavatyuttaraśatatamo'dhyāyaḥ || 199 ||
[Analyze grammar]