Chapter 227

[English text for this chapter is available]

yudhiṣṭhira uvāca |
narakāṇāṃ svarūpaṃ ca śrutvā me bhayamāgatam |
kathaṃ muktirbhavetteṣāṃ pāpānāmapi pārthiva |
vratairvā niyamairvāpi homairvā tīrthasaṃśrayaiḥ || 1 ||
[Analyze grammar]

bhīṣma uvāca |
gaṃgāyāmasthipāto'tra yeṣāṃ saṃjāyate nṛṇām |
na teṣāṃ nārako vahniḥ prabhavenmadhyavartinām || 2 ||
[Analyze grammar]

gaṃgāyāṃ kriyate śrāddhaṃ yeṣāṃ nāmnā svakaiḥ sutaiḥ |
te vimānaṃ samāśritya prayāṃti narakopari || 3 ||
[Analyze grammar]

pāpaṃ kṛtvā prakurvaṃti prāyaścittaṃ yathoditam |
hema yacchaṃti vā bhūpa na teṣāṃ narako bhavet || 4 ||
[Analyze grammar]

śeṣāḥ svakarmaṇaḥ prāptyā sevaṃte ca yathocitam |
svarga vā narakaṃ vāpi sevante te narādhipa || 5 ||
[Analyze grammar]

dhārātīrthe mriyaṃte ye svāminaḥ purataḥ sthitāḥ |
te gacchaṃti paraṃ sthānaṃ narakāṇāṃ sudūrataḥ || 6 ||
[Analyze grammar]

vārāṇasyāṃ kurukṣetre naimiṣe nāgare pure |
prayāge vā prabhāse vā yastyajettanumā tmanaḥ |
mahāpātakayukto'pi narakaṃ na sa paśyati || 7 ||
[Analyze grammar]

nīlo vā vṛṣabho yasya vivāhe saṃniyujyate |
svaputreṇa na saṃpaśyennarakaṃ brahmahā'pi saḥ || 8 ||
[Analyze grammar]

prāyopaveśanaṃ kṛtvā hṛdayasthe janārdane |
yastyajetpuruṣaḥ prāṇānnarakaṃ na sa paśyati || 9 ||
[Analyze grammar]

prāyopaveśanaṃ yo ca citreśvaraniveśane |
kurvanti narakaṃ naiva te gacchaṃti kadācana || 10 ||
[Analyze grammar]

dīnāṃdhakṛpaṇānāṃ ca pathiśramamupeyuṣām |
tīrthayātrāparāṇāṃ ca yo yacchati sadā'śanam |
kāle vā yadi vā'kāle narakaṃ na sa paśyati || 11 ||
[Analyze grammar]

jaladhenuṃ ca yo dadyāddhṛṣasaṃsthe divākare |
tiladhenuṃ mṛgasthe ca narakaṃ na sa paśyati || 12 ||
[Analyze grammar]

some somagrahe caiva somanāthasya darśanāt |
samudre ca sarasvatyāṃ snātvā na narakaṃ vrajet || 13 ||
[Analyze grammar]

sannihityāṃ kurukṣetre rāhugraste divākare |
sūryavāreṇa yaḥ yāti narakaṃ na sa paśyati || 14 ||
[Analyze grammar]

kārtikyāṃ kṛttikāyoge yaḥ karoti pradakṣiṇām |
tripuṣkarasya maunena narakaṃ na sa paśyati || 15 ||
[Analyze grammar]

mṛgasaṃkramaṇe ye tu sūryavāreṇa saṃsthite |
caṇḍīśaṃ vīkṣayaṃti sma na te narakagāminaḥ || 16 ||
[Analyze grammar]

gāṃ paṃkādbrāhmaṇīṃ dāsyātsādhūnstenāddvijaṃ vadhāt |
mocayanti ca ye rājanna te narakagāminaḥ || 17 ||
[Analyze grammar]

etatte sarvamākhyātaṃ yatpṛṣṭo'smi narādhipa |
yathā na narakaṃ yāti puruṣastu svakarmaṇā |
yathā ca narakaṃ yāti svalpapāpo'pi mānavaḥ || 18 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgara khaṇḍe hāṭakeśvarakṣetramāhātmye śrāddhakalpe bhīṣmayudhiṣṭhirasaṃvāde narakayātanānirasanopāyavarṇanaṃnāma saptaviṃśatyuttaradviśatatamo'dhyāyaḥ || 227 ||
[Analyze grammar]