Chapter 165

[English text for this chapter is available]

sūta uvāca |
tataḥprabhṛtipuṇye ca sarasvatyāstaṭeśubhe |
bāhyānāṃ nāgarāṇāṃ ca sthānaṃ jātaṃ mahattaram || 1 ||
[Analyze grammar]

putrapautrapravṛddhānāṃ dauhitrāṇāṃ dvijottamāḥ |
camatkārapurasyāgre yajjñātaṃ vidyayā dhanaiḥ || 2 ||
[Analyze grammar]

kasyacittvatha kālasya viśvāmitreṇa dhīmatā |
śaptā sarasvatī kopātkṛtā rudhiravāhinī || 3 ||
[Analyze grammar]

tataḥ saṃsevyate hṛṣṭai rākṣasaiḥ sā divāniśam |
gītanṛtyaparaiścānyairbhūtaiḥ pretaiḥ piśācakaiḥ || 4 ||
[Analyze grammar]

tataste nāgarā bāhyāstāṃ tyaktvā dūrataḥ sthitāḥ |
kāṃdiśīkāstato yātā bhakṣyamāṇāstu rākṣasaiḥ |
narmadāyāstaṭe puṇye mārkaṇḍāśramasaṃnidhau || 5 ||
[Analyze grammar]

ṛṣaya ūcuḥ |
kasmātsarasvatī śaptā viśvāmitreṇa dhīmatā |
mahānadyā ko'parādhastayā tasya vinirmitaḥ || 6 ||
[Analyze grammar]

sūta uvāca |
āsītpurā mahadvairaṃ viśvāmitravasiṣṭhayoḥ |
brāhmaṇyasya kṛte viprāḥ prāṇāntakaraṇaṃ mahat |
sa sarvairbrāhmaṇaiḥ prokto viśvāmitro mahāmuniḥ || 7 ||
[Analyze grammar]

kṣatriyo'pi puraskṛtya devadevaṃ pitāmaham |
na caikena vasiṣṭhena tenaitadvairamāhitam || 8 ||
[Analyze grammar]

ṛṣaya ūcuḥ |
kṣatriyo'pi kathaṃ vipro viśvā mitro mahāmate |
vasiṣṭhena kathaṃ nokto yaḥ prokto brahmaṇā svayam || 9 ||
[Analyze grammar]

etannaḥ sarvamācakṣva paraṃ kautūhalaṃ sthitam || 10 ||
[Analyze grammar]

sūta uvāca |
āsītpurā ṛcīkākhyo bhṛguputro mahāmuniḥ |
vratādhyayanasaṃpannaḥ sutapasvī mahāyaśāḥ || 11 ||
[Analyze grammar]

tīrthayātrāprasaṃgena sa kadācinmunīśvaraḥ |
sthānaṃ bhojakaṭaṃ nāma prāpto gādhimahīpateḥ |
yatra sā kauśikīnāma nadī trailokyaviśrutā || 12 ||
[Analyze grammar]

tasyāṃ snātvā dvijaśreṣṭho yāvattiṣṭhati tīragaḥ |
samādhistho japaṃ kurvansaṃtarpya pitṛdevatāḥ || 13 ||
[Analyze grammar]

tāvattatra samāyātā rājakanyā suśobhanā |
sarvalakṣaṇasampūrṇā sarvaireva guṇairyutā || 14 ||
[Analyze grammar]

sa tāṃ saṃvīkṣate yāvatsarvāvayavaśobhanām |
tāvatkāmaśarairvyāptaḥ kartavyaṃ nābhyaviṃdata || 15 ||
[Analyze grammar]

tataḥ papraccha lokānsa labdhvā kṛcchreṇa cetanām |
kasyeyaṃ kanyakā sādhvī kimarthamiha cāgatā || 16 ||
[Analyze grammar]

kva yāsyati varārohā sarvaṃ me kathyatāṃ janāḥ || 17 ||
[Analyze grammar]

janā ūcuḥ |
eṣā gādhisutānāma khyātā trailokyasundarī |
antaḥpurātsamāyātā gaurīpūjanalālasā || 18 ||
[Analyze grammar]

vāṃchamānā subharttāraṃ sarvaiḥ samuditaṃguṇaiḥ |
prāsādo'yaṃ sthito yo'tra nadītīre bṛhattaraḥ || 19 ||
[Analyze grammar]

umā saṃtiṣṭhate cātra sarvaiḥ saṃpūjitā suraiḥ |
etāṃ ca snāpayitveyaṃ pūjayitvā yathā kramam || 20 ||
[Analyze grammar]

naivedyaṃ vividhaṃ dattvā kariṣyati tataḥ param |
vīṇāvinodamātraṃ ca śrutimārgasukhāvaham || 21 ||
[Analyze grammar]

tato yāsyati harmyaṃ svaṃ mandībhūte ca bhāskare |
ṛcīkastu tadākarṇya lokānāṃ vacanaṃ ca yat || 22 ||
[Analyze grammar]

yayau gādhigṛhaṃ śīghraṃ kāmabāṇaprapīḍitaḥ |
taṃ dṛṣṭvā sahasā prāptamṛcīkaṃ bhṛgu sattamam |
saṃmukhaḥ prayayau tūrṇaṃ gādhiḥ pārthivasattamaḥ || 23 ||
[Analyze grammar]

gṛhyoktena vidhānena kṛtvā caivārhaṇaṃ tataḥ |
kṛtāṃjalipuṭo bhūtvā vākyametaduvāca ha || 24 ||
[Analyze grammar]

niḥspṛhasyāpi te vipra kimāgamanakāraṇam |
tatsarvaṃ me samācakṣva yena yacchāmi te'khilam || 25 ||
[Analyze grammar]

ṛcīka uvāca |
tava kanyā'sti vipreṃdra varārhā varavarṇinī |
brāhmoktena vivāhena tāṃ me dehi mahīpate || 26 ||
[Analyze grammar]

etadarthamahaṃ prāpto gṛhe tava smarārditaḥ |
sā mayā vīkṣitā rājangaurīpūjārthamāgatā || 27 ||
[Analyze grammar]

sūta uvāca |
tacchrutvā bhayasaṃtrasto gādhiḥ pārthivasattamaḥ |
asavarṇaṃ ca taṃ matvā daridraṃ vṛddhamevaca |
adāne śāpabhītastu tato vyājamuvāca saḥ || 28 ||
[Analyze grammar]

asmākaṃ kanyakādāne śulkamasti dvijottama |
taccedyacchasi kanyāṃ tāṃ tubhyaṃ dāsyāmyasaṃśayam || 29 ||
[Analyze grammar]

ṛcīka uvāca |
brūhi pārthivaśārdūla kanyāśulkaṃ mama drutam |
yena yacchāmi te sarvaṃ yadyapi syātsudurlabham || 30 ||
[Analyze grammar]

gādhiruvāca |
ekataḥ śyāmakarṇānāmaśvānāṃ vātaraṃhasām |
śatāni sapta vipreṃdra śvetānāṃ caiva sarvataḥ || 31 ||
[Analyze grammar]

ya ānīya pradadyānme tasmai kanyāṃ dadāmyaham || 32 ||
[Analyze grammar]

sūta uvāca |
sa tatheti pratijñāya ṛcīko munisattamaḥ |
kānyakubjaṃ samāsādya gaṃgātīre viveśa ha || 33 ||
[Analyze grammar]

aśvo voḍheti yatsūktaṃ catuḥṣaṣṭisamudbhavam |
chaṃdaṛṣidevatāyuktaṃ japaṃ cakre tataḥ param || 34 ||
[Analyze grammar]

viniyogaṃ vājikṛtaṃ gādhinā yatprakīrtitam |
tataste vājinastasmānniṣkrāṃtāḥ salilāddvijāḥ || 35 ||
[Analyze grammar]

sarvaśvetāḥ suvegāśca śyāmaikaśravaṇāstathā |
śatāni saptasaṃkhyāni tāvatsaṃkhyai rnaraiyutāḥ || 36 ||
[Analyze grammar]

tataḥ prabhṛti vikhyātamaśvatīrthaṃ dharātale |
gaṃgātīre śubhe puṇye kānyakubjasamīpagam |
yasminsnāne kṛte martyo vājimedhaphalaṃ labhet || 37 ||
[Analyze grammar]

iti śrīskāṃde mahāpurāṇa ekāśītisāhasryāṃ sahitāyāṃ ṣaṣṭhe nāgarakhaṇḍe hāṭakeśvarakṣetramāhātmye'śvatīrthotpattivarṇanaṃnāma paṃcaṣaṣṭyadhikaśatatamo'dhyāyaḥ || 165 ||
[Analyze grammar]