Chapter 114

[English text for this chapter is available]

sūta uvāca |
so'pi vipro dvijaśreṣṭhā visphoṭakapariplutaḥ |
lajjayā parayā yukto gatvā kiṃcidvanāṃtaram || 1 ||
[Analyze grammar]

tato vairāgyamāpanno raudre tapasi saṃsthitaḥ |
tyaktvā gṛhādikaṃ sarvaṃ snehaṃ dārasutodbhavam || 2 ||
[Analyze grammar]

niyamaiḥ saṃyamaiścaiva śoṣayannātmanastanum |
kiṃcijjalāśrayaṃ gatvā sthāpayitvā maheśvaram || 3 ||
[Analyze grammar]

tataḥ kālena mahatā tuṣṭastasya maheśvaraḥ |
provāca darśanaṃ gatvā prārthayasva yathepsitam || 4 ||
[Analyze grammar]

trijāta uvāca |
mātṛdoṣādahaṃ deva vailakṣyaṃ paramaṃ gataḥ |
madhye brāhmaṇamukhyānāmānarttādhipatestathā || 5 ||
[Analyze grammar]

ahaṃ śaknomi no vaktuṃ kasyaciddarśituṃ vibho |
trijāto'smīti vijñāya bhūrividyānvito'pi ca || 6 ||
[Analyze grammar]

tasmātsarvottamasteṣāmahaṃ caiva dvijanmanām |
yathā bhavāmi deveśa tathā nītirvidhīyatām || 7 ||
[Analyze grammar]

śrībhagavānuvāca |
camatkārapure viprā ye vasaṃti dvijottama |
teṣāṃ sarvottamo nūnaṃ matprasādādbhaviṣyasi || 8 ||
[Analyze grammar]

tasmātkālaṃ pratīkṣasva kañcittvaṃ brāhmaṇottama |
samaye samanuprāpte tvāṃ ca neṣyāmi tatra vai || 9 ||
[Analyze grammar]

evamuktvā sa deveśastataścādarśanaṃ gataḥ |
brāhmaṇo'pi tapastepe tathā saṃpūjayanharam || 10 ||
[Analyze grammar]

kasyacittvatha kālasya matkārapure dvijāḥ |
maudgalyānvayasaṃbhūto devarāto'bhavaddvijaḥ || 11 ||
[Analyze grammar]

tasya putraḥ krathonāma yauvanoddhatavigrahaḥ |
sadā garvasamāyuktaḥ pauruṣe ca vyavasthitaḥ || 12 ||
[Analyze grammar]

sa kadācidyayau vipro nāgatīrthaṃ prati dvijāḥ |
śrāvaṇasyāsite pakṣe paṃcamyāṃ paryaṭanvane || 13 ||
[Analyze grammar]

athāpaśyatsa nāgendratanayaṃ bhūrivarccasam |
rudramālamiti khyātaṃ jananyā saha saṃgatam || 14 ||
[Analyze grammar]

athā'sau taṃ samālokya sulaghuṃ sarpa putrakam |
jalasarpamiti jñātvā laguḍena vyapothayat || 15 ||
[Analyze grammar]

hanyamānena tenātha pramuktaḥ sumahānsvanaḥ |
hā mātastāta tāteti vipanno'smi nirāgasaḥ || 16 ||
[Analyze grammar]

so'pi śrutvā'tha taṃ śabdaṃ brāhmaṇo mānuṣodbhavam |
sarpasya bhayasaṃtrastaḥ satvaraṃ svagṛhaṃ yayau || 17 ||
[Analyze grammar]

atha sā jananī tasya niṣkrāṃtā salilāśrayāt |
yāvatpaśyati tīrasthaṃ tāvatputraṃ nipātitam || 18 ||
[Analyze grammar]

tato mūrcchāmanuprāptā dṛṣṭvā putraṃ tathāvidham |
yaṣṭiprahāranirbhinnaṃ sarvāṃgarudhirokṣitam || 19 ||
[Analyze grammar]

atha labdhvā punaḥ saṃjñāṃ pralāpānakarodbahūn |
karuṇaṃ śokasaṃtaptā vāṣpaparyākulekṣaṇā || 20 ||
[Analyze grammar]

hāhā putra parityaktvā māṃ ca kvāsi vinirgataḥ |
anāvṛttikaraṃ sthānaṃ kiṃ sneho nāsti te mayi || 21 ||
[Analyze grammar]

kena tvaṃ nihataḥ putra pāpena ca durātmanā |
niṣpāpo'pi ca putra tvaṃ kasya kruddho'dyavai yamaḥ || 22 ||
[Analyze grammar]

sapurasya sarāṣṭrasya sakuṭuṃbasya durmateḥ |
yena tvaṃ nihato'dyāpi paṃcamyāṃ pūjito na ca || 23 ||
[Analyze grammar]

rajasā krīḍayitvā'dya samāgatya cirādatha |
kāmenotsaṃgamāgatya glāniṃ naiṣyati cāṃbaram || 24 ||
[Analyze grammar]

gadgadāni manojñāni janahāsyakarāṇi ca |
tvayā vinā'dya vākyāni ko vadiṣyati me puraḥ || 25 ||
[Analyze grammar]

piturutsaṃgamāśritya kūrcākarṣaṇapūrvakam |
kaḥ kariṣyati putrā'dya satoṣaṃ bhavatā vinā || 26 ||
[Analyze grammar]

niṣiddho'si mayā vatsa tvamāyāto'nupṛṣṭhataḥ |
martyalokamimaṃ tāta bahudoṣasamākulam || 27 ||
[Analyze grammar]

evaṃ vilapya nāgī sā saṃkruddhā śokakarṣitā |
taṃ mṛtaṃ sutamādāya jagāmānaṃtasaṃnidhau || 28 ||
[Analyze grammar]

tatastadagrataḥ kṣiptvā taṃ mṛtaṃ nijabālakam |
pralāpānakaroddīnā viyuktā kurarī yathā || 29 ||
[Analyze grammar]

nāgarājo'pi taṃ dṛṣṭvā svaputraṃ vinipātitam |
jagāma so'pi mūrcchāṃ ca putraśokena pīḍitaḥ || 30 ||
[Analyze grammar]

tataḥ sikto jalaiḥ śītaiḥ saṃjñāṃ labdhvā sa kṛcchrataḥ |
pralāpānkṛpaṇāṃścakre prākṛtaḥ puruṣo yathā || 31 ||
[Analyze grammar]

etasminnaṃtare nāgāḥ sarve tatra samāgatāḥ |
rurudurduḥkhitāḥ saṃto bāṣpaparyākulekṣaṇāḥ || 32 ||
[Analyze grammar]

vāsukiḥ padmajaḥ śaṃkhastakṣakaśca mahāviṣaḥ |
śaṃkhacūḍaḥ sacūḍaśca puṃḍarīkaśca dāruṇaḥ || 33 ||
[Analyze grammar]

añjano vāmanaścaiva kumudaśca tathā paraḥ |
kambalāśvatarau nāgau nāgaḥ karkoṭakastathā || 34 ||
[Analyze grammar]

puṣpadaṃtaḥ sudaṃtaśca mūṣako mūṣakādanaḥ |
elāpatraḥ supatraśca dīrghāsyaḥ puṣpavāhanaḥ || 35 ||
[Analyze grammar]

ete cānye tathā nāgāstatrā'yātāḥ sahasraśaḥ |
putraśokābhisataptaṃ jñātvā taṃ pannagādhipam || 36 ||
[Analyze grammar]

tataḥ saṃbodhya te sarve tamīśaṃ pavanāśanam |
pūrvavṛttaiḥ kathodbhedairdṛṣṭāṃtairvividhairapi || 37 ||
[Analyze grammar]

evaṃ saṃbodhitastaistu cirātpannagasattamaḥ |
agnidāhyaṃ tataścakre tasya putrasya duḥkhitaḥ || 38 ||
[Analyze grammar]

jaladānasya kāle ca sarpānsarvānuvāca saḥ |
sarvānnāgānpradānārthaṃ toyasya samupasthitān || 39 ||
[Analyze grammar]

nāhaṃ toyaṃ pradāsyāmi svaputrasya kathaṃcana |
bhavadbhiḥ prerito'pyevaṃ tathānyairapi bāṃdhavaiḥ || 40 ||
[Analyze grammar]

yāvattasya na duṣṭasya mama putrāṃtakāriṇaḥ |
sadāraputrabhṛtyasya vihito na parikṣayaḥ || 41 ||
[Analyze grammar]

evamuktvā tataḥ śeṣaḥ śodhayāmāsa taṃ dvijam |
yena saṃsūditaḥ putro daṃḍakāṣṭhena pāpmanā || 42 ||
[Analyze grammar]

tataḥ provāca tānnāgānpārśvasthānpannagādhipaḥ |
hāṭakeśvaraje kṣetre yāṃtu me suhṛduttamāḥ || 43 ||
[Analyze grammar]

putraghnaṃ taṃ nihatyā'śu sakuṭumbaparigraham |
camatkārapuraṃ sarvaṃ bhakṣaṇīyaṃ tataḥ param || 44 ||
[Analyze grammar]

tatraiva vasatiḥ kāryā samastaiḥ pannagottamaiḥ |
yathā bhūyo vasennaiva tathā kāryaṃ ca tatpuram || 45 ||
[Analyze grammar]

evamuktāstatastena nāgāḥ prādhānyataḥ śrutāḥ |
gatvātha satvaraṃ tatra prathamaṃ taṃ dvijottamam || 46 ||
[Analyze grammar]

devarātasutaṃ suptaṃ bhakṣayitvā tataḥ param |
tatkuṭuṃbaṃ samagraṃ ca krodhena mahatānvitāḥ || 47 ||
[Analyze grammar]

tato'nyānapi saṃkruddhā bālānvṛddhānkumārakān |
bhakṣayāmāsuḥ sarve te tiryagyonigatā api || 48 ||
[Analyze grammar]

etasminnaṃtare jātaḥ pure tatra sudāruṇaḥ |
ākraṃdo brāhmaṇeṃdrāṇāṃ sarpabhakṣaṇasaṃbhavaḥ || 49 ||
[Analyze grammar]

tatra bhūmau tathā'nyacca yatkiṃcidapi dṛśyate |
tatsarvaṃ pannagairvyāptaṃ raudraiḥ kṛṣṇavapurdharaiḥ || 50 ||
[Analyze grammar]

etasminnaṃtare prāptāḥ kecinmṛtyuvaśaṃ gatāḥ |
viṣasaṃ ghūrṇitāḥ kecitpatitā dharaṇītale || 51 ||
[Analyze grammar]

anye gṛhādikaṃ sarvaṃ parityajya sutādi ca |
vitrastāḥ paridhāvaṃti vanamuddiśya dūrataḥ || 52 ||
[Analyze grammar]

anye maṃtravido viprāḥ prayataṃte samaṃtataḥ |
maṃdaṃ dhāvaṃti saṃtrastā gṛhītvauṣadhayaḥ pare || 53 ||
[Analyze grammar]

evaṃ tatpuramuddiśya sarve te pannagottamāḥ |
pracaraṃti yathā kaścinna tatra brāhmaṇo vaset || 54 ||
[Analyze grammar]

atha śūnyaṃ puraṃ kṛtvā sarve te pannagottamāḥ |
vyacaransvecchayā tatra tīrtheṣvāyataneṣu ca || 55 ||
[Analyze grammar]

na kaścitpannagaḥ kṣetrāttyaktvā niryāti bāhyataḥ |
praviśenna paraḥ kaścittatra kṣetre ca mānavaḥ || 56 ||
[Analyze grammar]

vyavasthaivaṃ samudbhūtā sarpāṇāṃ mānuṣaiḥ saha |
vadhabhakṣaṇajā nyonyaṃ bāhyābhyaṃtarasaṃbhavā || 57 ||
[Analyze grammar]

etasminnaṃtare śeṣo muktvā duḥkhaṃ sutodbhavam |
prahṛṣṭaḥ pradadau toyaṃ tasya jātibhiranvitaḥ || 58 ||
[Analyze grammar]

atha te brāhmaṇāḥ kecitsarpebhyo bhayavihvalāḥ |
saśokā diṅmukhānyāśu te sarve saṃgatā mithaḥ || 59 ||
[Analyze grammar]

tato vanaṃ samājagmustrijāto yatra saṃsthitaḥ |
haralabdhavaro hṛṣṭaḥ sumahattapasi sthitaḥ || 60 ||
[Analyze grammar]

sa dṛṣṭvā tāñjanānsarvāṃstathā duḥkhapariplutān |
putradārādikaṃ smṛtvā rudataḥ karuṇaṃ bahu || 61 ||
[Analyze grammar]

so'pi duḥkhasamāyukto dṛṣṭvā tānsvapurodbhavān |
brāhmaṇeṃdrāṃstataḥ prāha bāṣpavyākulalocanaḥ || 62 ||
[Analyze grammar]

śṛṇvaṃtu brāhmaṇāḥ sarve vacanaṃ mama sāṃpratam |
mayā vinirgatenaiva tatpurāttoṣito haraḥ || 63 ||
[Analyze grammar]

tena mahyaṃ varo datto vāṃchito dvijasattamāḥ |
gṛhīto na mayādyāpi prārthayiṣyāmi sāṃpratam || 64 ||
[Analyze grammar]

yathā syātsaṃkṣayasteṣāṃ nāgānāṃ sudurātmanām |
yaiḥ kṛtaṃ naḥ puraṃ kṛtsnamudrasaṃ pāpakarmabhiḥ || 65 ||
[Analyze grammar]

evamuktvā'tha vipraḥ sa trijātaḥ parameśvaram |
prārthayāmāsa me deva taṃ varaṃ yaccha sāṃpratam || 66 ||
[Analyze grammar]

tataḥ provāca deveśaḥ prārthayasva drutaṃ dvija |
yenābhīṣṭaṃ prayacchāmi yadyapi syātsudurlabham || 67 ||
[Analyze grammar]

trijāta uvāca |
nāgairasmatpuraṃ kṛtsnaṃ kṛtaṃ janavivarjitam |
tattasmātte kṣayaṃ yāṃtu sarve vṛṣabhavāhana || 68 ||
[Analyze grammar]

yena tatpūryate viprairbhūyo'pi surasattama |
mamāpi jāyate kīrtiḥ svasthānoddharaṇodbhavā || 69 ||
[Analyze grammar]

śrībhagavānuvāca |
nāyuktaṃ vihitaṃ vipra pannagaistairmahātmabhiḥ |
nirdoṣaścāpi putro'tra yeṣāṃ vipreṇa sūditaḥ || 70 ||
[Analyze grammar]

viśeṣeṇa dvijaśreṣṭha saṃprāpte paṃcamīdine |
tatrā'pi śrāvaṇe māsi pūjyaṃte yatra pannagāḥ || 71 ||
[Analyze grammar]

tasmātte'haṃ pravakṣyāmi siddhamaṃtramanuttamam |
yasyoccāraṇamātreṇa sarppāṇāṃ naśyate viṣam || 72 ||
[Analyze grammar]

taṃ maṃtraṃ tatra gatvā tvaṃ tadviprairakhilairvṛtaḥ |
śrāvayasva mahābhāga tāraśabdena sarvaśaḥ || 73 ||
[Analyze grammar]

taṃ śrutvā ye na yāsyaṃti pātālaṃ pannagādhamāḥ |
yuṣmadvākyādbhaviṣyaṃti nirviṣāste na saṃśayaḥ || 74 ||
[Analyze grammar]

trijāta uvāca |
brūhi taṃ me mahāmaṃtraṃ sarvatīkṣṇavināśanam |
yena gatvā nijaṃ sthānaṃ sarpānutsādayāmyaham || 75 ||
[Analyze grammar]

śrībhagavānuvāca |
garaṃ viṣamiti proktaṃ na tatrāsti ca sāṃpratam |
matprasādāttvayā hyetaduccāryaṃ brāhmaṇottama || 76 ||
[Analyze grammar]

na garaṃ na garaṃ caitacchrutvā ye pannagādhamāḥ |
tatra sthāsyaṃti te vadhyā bhaviṣyaṃti yathāsukham || 77 ||
[Analyze grammar]

adyaprabhṛti tatsthānaṃ nagarākhyaṃ dharātale |
bhaviṣyati suvikhyātaṃ tava kīrtivivardhanam || 78 ||
[Analyze grammar]

tathānyopi ca yo vipro nāgaraḥ śuddhavaṃśajaḥ |
nagarākhyena maṃtreṇa abhimaṃtrya tridhā jalam || 79 ||
[Analyze grammar]

prāṇinaṃ kāla saṃdaṣṭamapi mṛtyuvaśaṃgatam |
prakariṣyati jīvāḍhyaṃ prakṣipya vadane svayam || 80 ||
[Analyze grammar]

anyatrāpi sthito martyo maṃtrametaṃ trirakṣaram |
yaḥ smariṣyati saṃsupto na hiṃsyaḥ syādaherhi saḥ || 81 ||
[Analyze grammar]

sthāvaraṃ jaṃgamaṃ vāpi kṛtrimaṃ vā garaṃ hi tat |
tadanena ca maṃtreṇa saṃspṛṣṭaṃ tvamṛtāyitam || 82 ||
[Analyze grammar]

ajīrṇaprabhavā rogā ye cānye jaṭharodbhavāḥ |
maṃtrasyāsya prabhāvena sarve yāṃti drutaṃ kṣayam || 83 ||
[Analyze grammar]

evamuktvā'tha taṃ vipraṃ bhagavānvṛṣabhadhvajaḥ |
jagāmādarśanaṃ paścādyathā dīpo vitailakaḥ || 84 ||
[Analyze grammar]

trijāto'pi samaṃ viprairhataśeṣaistu tairdrutam |
jagāma saṃprahṛṣṭātmā camatkārapuraṃ prati || 85 ||
[Analyze grammar]

evaṃ te brāhmaṇāḥ sarve trijātena samanvitāḥ |
na garaṃ na garaṃ proccairuccaraṃtaḥ samāyayuḥ || 86 ||
[Analyze grammar]

hāṭakeśvarajaṃ kṣetraṃ yattadvyāptaṃ samaṃtataḥ |
raudrairāśīviṣaiḥ krūraiḥ śeṣasyādeśamāśriteḥ || 87 ||
[Analyze grammar]

atha te pannagāḥ śrutvā siddhamaṃtra śivodbhavam |
nirviṣāstejasā hīnāḥ samantātte pradudravuḥ || 88 ||
[Analyze grammar]

valmīkānkecidāsādya citraraṃdhrāṃtarodbhavān |
anye cāpi prajagmuśca pātālaṃ daṃdaśūkakāḥ || 89 ||
[Analyze grammar]

ye kecidbhayasaṃtrastā vārddhakyena nipīḍitāḥ |
vālatvena tathā cānye śaknuvaṃti na sarpitum || 90 ||
[Analyze grammar]

te sarve brāhmaṇendraistaiḥ kṛtasya pratikārakaiḥ |
nihatāḥ pannagāstatra daṃḍakāṣṭhaiḥ sahasraśaḥ || 91 ||
[Analyze grammar]

evamutsādya tānsarvānbrāhmaṇāste gatavyathāḥ |
taṃ trijātaṃ puraskṛtya sthānakṛtyāni cakrire || 92 ||
[Analyze grammar]

evaṃ tannagaraṃ jātamasmātkālādanaṃtaram |
devadevasya bhargasya prasādena dvijottamāḥ || 93 ||
[Analyze grammar]

etadyaḥ paṭhate nityamākhyānaṃ nagarodbhavam |
na tasya sarpajaṃ kvāpi kathaṃcijjāyate bhayam || 94 ||
[Analyze grammar]

iti śrīskāde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye nagarasaṃjñotpattivarṇanaṃnāma caturdaśottaraśatatamo'dhyāyaḥ || 114 ||
[Analyze grammar]