Chapter 96

[English text for this chapter is available]

sūta uvāca |
evaṃ tasmingate bhūpe hyajāpāle rasātalam |
tatputraścābhavadrājā maṃtribhistu puraskṛtaḥ || 1 ||
[Analyze grammar]

yo nityamagamatsvarge vāsavaṃ ramate sadā |
śanaiścaro jito yena rohiṇīṃ paribhedayan || 2 ||
[Analyze grammar]

gṛhe yasya svayaṃ viṣṇurbhūtvā caiva caturvidhaḥ |
rāvaṇasya vināśārthaṃ janma cakre praharṣitaḥ || 3 ||
[Analyze grammar]

tenāgatyātra satkṣetre toṣito madhusūdanaḥ |
prāsādaṃ śobhanaṃ kṛtvā tataścaiva pratiṣṭhitaḥ || 4 ||
[Analyze grammar]

tasyāpi viśrutā vāpī svayaṃ tena vinirmitā |
rājavāpīti loke'sminvikhyātiṃ paramāṃ gatā || 5 ||
[Analyze grammar]

tasyāṃ yaḥ kurute śrāddhaṃ saṃprāpte pañcamīdine |
pretapakṣe viśeṣeṇa sa naraḥ syātsatāṃ priyaḥ || 6 ||
[Analyze grammar]

ṛṣaya ūcuḥ |
kathaṃ tena jitaḥ saurī rohiṇīśakaṭaṃ ca yat |
bhiṃdānastoṣitastena kathaṃ nārāyaṇo vada || 7 ||
[Analyze grammar]

|sūta uvāca |
tasmiñchāsati dharmajñe svadharmeṇa vasundharām |
atisaukhyānvito lokaḥ sarvadaiva vyajāyata || 8 ||
[Analyze grammar]

bahukṣīrapradā gāvaḥ sasyāni guṇavaṃti ca |
kāmavarṣī ca parjanyo yatharttuphalitā drumāḥ || 9 ||
[Analyze grammar]

kasyacittvatha kālasya daivajñaistasya bhūpateḥ |
kathitaṃ rohiṇībhedaṃ raviputraḥ kariṣyati || 10 ||
[Analyze grammar]

tasyānaṃtaramevāśu durbhikṣaṃ saṃbhaviṣyati |
anāvṛṣṭiśca bhavitā raudrā dvādaśa vārṣikī |
yayā saṃpatsyate sarvaṃ bhūtalaṃ gatamānavam || 11 ||
[Analyze grammar]

teṣāṃ tadvacanaṃ śrutvā sa rājā kupito'bhyagāt |
śanaiścaraṃ samuddiśya vimānamadhiruhya ca || 12 ||
[Analyze grammar]

tasya tuṣṭena saṃdattaṃ vimānaṃ kāmagaṃ purā |
śakreṇa tatra saṃtiṣṭhañchanaiścaramupādravat || 13 ||
[Analyze grammar]

tataḥ sūryapathaṃ muktvā tataścaṃdrasya pārthivaḥ |
nakṣatrasaraṇiṃ prāpya sajyaṃ kṛtvā mahaddhanuḥ || 14 ||
[Analyze grammar]

tatra bāṇaṃ samāropya śanaiścaramupādravat |
provāca purataḥ sthitvā sūryaputramadhomukham || 15 ||
[Analyze grammar]

tyajainaṃ rohiṇīmārgaṃ sāṃprataṃ tvaṃ śanaiścara |
madvākyādanyathā'haṃ tvāṃ nayiṣyāmi yamakṣayam || 16 ||
[Analyze grammar]

etena niśitāgrega śareṇā nataparvaṇā |
divyāstramaṃtrayuktena satyametadbravīmyaham || 17 ||
[Analyze grammar]

tasya tadvacanaṃ śrutvā tādṛgraudratamaṃ mahat |
mando vismayamāpannastataścedamabhāṣata || 18 ||
[Analyze grammar]

kastvaṃ brūhi mahābhāga mama mārgaṃ ruṇatsi yaḥ |
agamyaṃ kenacilloke sarvairapi surāsuraiḥ || 19 ||
[Analyze grammar]

rājovāca |
ahaṃ daśaratho nāma sūryavaṃśodbhavo nṛpaḥ |
ajasya tanayaḥ prāptaḥ kāmaṃ vārayituṃ krudhā || 20 ||
[Analyze grammar]

maṃda uvāca |
na tvayā saha saṃbaṃdhaḥ kaścidasti mahīpate |
mama yattvaṃ prakopāḍhyo manmārgaṃ haṃtumicchasi || 21 ||
[Analyze grammar]

rājovāca |
rohiṇīsaṃbhavaṃ tvaṃ hi śakaṭaṃ bhedayiṣyasi |
sāṃprataṃ mama daivajñairvākyametadudāhṛtam || 22 ||
[Analyze grammar]

tasminmanda tvayā bhinne na varṣati śatakratuḥ |
etadvadati daivajñā jyotiḥśāstravicakṣaṇāḥ || 23 ||
[Analyze grammar]

jāte vṛṣṭinirodhe'tha jāyaṃte'nnāni na kṣitau |
annābhāvātkṣayaṃ yāṃti tato bhūbhitale janāḥ || 24 ||
[Analyze grammar]

janocchede tato jāte agniṣṭomādikāḥ kriyāḥ |
na bhavaṃti dharā pṛṣṭhe tataḥ syādeva saṃkṣayaḥ || 25 ||
[Analyze grammar]

etasmātkāraṇādruddho mārgaste sūryasaṃbhava |
rohiṇīṃ gaṃtukāmasya satyametanmayoditam || 26 ||
[Analyze grammar]

śaniruvāca |
gaccha putra nijaṃ gehaṃ mamāpi tvaṃ ca rocase |
tuṣṭo'haṃ tava vīryeṇa na tvanyena mahīpate || 27 ||
[Analyze grammar]

na kenacitkṛtaṃ karma yadetadbhavatā kṛtam |
na kariṣyati caivānyo devo vā mānavo'tha vā || 28 ||
[Analyze grammar]

nāhaṃ paśyāmi bhūpāla kathaṃcidapi tūrdhvataḥ |
yato dṛṣṭivinirdagdhaṃ bhasmasājjāyate'khilam || 29 ||
[Analyze grammar]

jātamātreṇa bālena mayā pādau nirīkṣitau |
tātasya sahasā dagdhau tato'haṃ vāritoṃ'bayā || 30 ||
[Analyze grammar]

na tvayā putra draṣṭavyaṃ kiṃcideva kathaṃcana |
pramāṇaṃ yadi te dharmo mātṛvākyasamudbhavaḥ || 31 ||
[Analyze grammar]

tasmāttvayā mahatkarma kṛtamīdṛksuduṣkaram |
prajānāṃ pārthivaśreṣṭha tyaktvā dūrādbhayaṃ mama || 32 ||
[Analyze grammar]

tasmā ttava kṛte nāhaṃ bhedayiṣyāmi rohiṇīm |
kathaṃcidapi bhūpāla yugāṃtararaśateṣvapi || 33 ||
[Analyze grammar]

varaṃ varaya cāsmākaṃ tasmādadya bhaviṣyati |
hṛtatsthitaṃ durlabhaṃ bhūpa sarveṣāmiha dehinām || 34 ||
[Analyze grammar]

rājovāca |
tava yo vāsare prāpte tailābhyaṃgaṃ karoti vai |
tasyā'nyadivasaṃ yāvatpīḍā kāryā na ca tvayā || 35 ||
[Analyze grammar]

tiladānaṃ karotyevaṃ lohadānaṃ ca yastava |
karoti divase śaktyā yāvadvarṣaṃ tvayā hi saḥ || 36 ||
[Analyze grammar]

rakṣaṇīyaḥ sukṛcchreṣu saṃkaṭeṣu sadaiva hi |
tvayi gocarapīḍāyāṃ saṃsthite cārkasaṃbhava || 37 ||
[Analyze grammar]

yaḥ kuryācchāṃtikaṃ samyaktilahomaṃ ca bhaktitaḥ |
vāsare tava saṃprāpte samidbhiśca tathā'kṣataiḥ || 38 ||
[Analyze grammar]

tasya sārdhāni varṣāṇi sapta kāryā prayatnataḥ |
tvayā rakṣā mahābhāga varaṃ cenmama yacchasi || 39 ||
[Analyze grammar]

sūta uvāca |
evamityeva saṃprocya virarāma tataḥ param |
śanaiścaro mahīpālavacanāddvijasattamāḥ || 40 ||
[Analyze grammar]

etadvaḥ sarvamākhyātaṃ yatpṛṣṭo'haṃ suvistarāt |
bhavadbhiḥ sūryaputrasya rājñā daśarathena hi |
saṃvādaṃ rohiṇībhede sañjātaṃ samupasthite || 41 ||
[Analyze grammar]

yaścaitatpaṭhate nityaṃ śṛṇuyādyo viśeṣataḥ |
śanaiścarakṛtā pīḍā tasya nāśaṃ pragacchati || 42 ||
[Analyze grammar]