Chapter 81

[English text for this chapter is available]

| śrīgaruḍa uvāca |
mamāsti dayitaṃ mitraṃ brāhmaṇo bhṛguvaṃśajaḥ |
tasyāsti mādhavīnāma kanyā kamalalocanā || 1 ||
[Analyze grammar]

na tasyāḥ sadṛśaḥ kāṃtaḥ prāptastena mahātmanā |
yatastato'hamādiṣṭaḥ kāṃtamasyāstvamānaya |
anurūpaṃ dvijaśreṣṭha yadyahaṃ saṃmatastava || 2 ||
[Analyze grammar]

tato mayā'khilā bhūmistadvarārthaṃ vilokitā |
na tadarthaṃ varo labdhaḥ sarvaiḥ samucito guṇaiḥ || 3 ||
[Analyze grammar]

tatastvaṃ puṇḍarīkākṣa mama citte vyavasthitaḥ |
anurūpaḥ patistasyāḥ sarvaireva guṇairyutaḥ || 4 ||
[Analyze grammar]

tasmātpāṇigrahaṃ tasyāḥ svīkuruṣva sureśvara |
atyantarūpayuktāyā mama vākyapraṇoditaḥ || 5 ||
[Analyze grammar]

bhagavānuvāca |
atrānaya dvijaśreṣṭha tāṃ kanyāṃ kamalekṣaṇām |
yena dṛṣṭvā svayaṃ paścātprakaromi yathoditam || 6 ||
[Analyze grammar]

garuḍa uvāca |
tava tejobhayādeva sā kanyā janakānvitā |
mayā dūre vinirmuktā tatkathaṃ tāmihānaye || 7 ||
[Analyze grammar]

śrībhagavānuvāca |
atra tāṃ mama tattejo janakena samanvitām |
na hi dhakṣyati tasmāttvaṃ śīghraṃ dvijavarā'naya || 8 ||
[Analyze grammar]

evamuktastatastena viṣṇunā prabhaviṣṇunā |
tāṃ kanyā mānayāmāsa taṃ ca viprabhṛgūdvaham || 9 ||
[Analyze grammar]

athāsau praṇipatyoccairbrāhmaṇo madhusūdanam |
lakṣmīvannyaviśatpārśve garuḍasya samīpataḥ || 10 ||
[Analyze grammar]

sāpi kanyā varārohā bālyabhāvādaninditā |
śayyaikāṃte samāviṣṭā dakṣiṇe muravidviṣaḥ || 11 ||
[Analyze grammar]

atha kopaparītāṃgī mahiṣyādharmamāśritā |
lakṣmīḥ śaśāpa tāṃ kanyāṃ sapatnīti vicintya ca || 12 ||
[Analyze grammar]

yasmānme purataḥ pāpe kāṃtasya mama harṣitā |
śayyāyāṃ tvaṃ samāviṣṭā lajjāṃ tyaktvā sudūrataḥ |
tasmādaśvamukhī nūnaṃ vikṛtā tvaṃ bhaviṣyasi || 13 ||
[Analyze grammar]

evaṃ śāpe śriyā datte hāhākāro mahānabhūt |
sarveṣāṃ tatra saṃsthānāṃ kopaścāpi dvijanmanaḥ || 14 ||
[Analyze grammar]

brāhmaṇa uvāca |
sahasraṃ yācyate kanyā karotyekaḥ karagraham |
vāṅmātreṇa na tasyāḥ syātpatnībhāvaḥ kathaṃcana || 19 ||
[Analyze grammar]

yāvannāgnidvijātīnāṃ pratyakṣaṃ gurusaṃnidhau |
sasaṃkalpaṃ svayaṃ dattā gṛhyoktavidhinā janaiḥ || 16 ||
[Analyze grammar]

tasmāttaddoṣanirmuktā sapatnyeṣā samā tvayā |
kṛtā vājimukhī pāpe tvaṃ gajāsyā bhaviṣyasi || 7 ||
[Analyze grammar]

evamuktvā sa vipreṃdrastataḥ provāca keśavam |
ātithyaṃ vihitaṃ hyetattava patnyā yathocitam |
tasmāttatra prayāsyāmi yatra syāttādṛśī sutā || 18 ||
[Analyze grammar]

śrībhagavānuvāca |
na santāpastvayā kāryaḥ kṛtyesmindvijasattama |
mamāṃtike prayātānāṃ nāśubhaṃ jāyate kvacit || 19 ||
[Analyze grammar]

tasmānnāśvamukhī hyeṣā janmanyasminbhaviṣyati |
gṛhītvemāṃ gṛhaṃ gaccha prayaccha svepsitāya ca || 20 ||
[Analyze grammar]

śayane vāmadigbhāgaḥ kalatrāṇāmudāhṛtaḥ |
dakṣiṇe bandhulokānāṃ tatkālocitaśāyinām || 2 ||
[Analyze grammar]

seyaṃ tava sutā vipra baṃdhusthānaṃ samāśritā |
bhaviṣyati tato jāmiḥ kaniṣṭhā me'nyajanmani || 22 ||
[Analyze grammar]

avatīrṇasya bhūpṛṣṭhe devakāryeṇa kenacit |
vājivaktradharā proktā yadyeṣā mama kāṃtayā || 23 ||
[Analyze grammar]

tato'haṃ sumahatkṛtvā tapaścaivānayā saha |
kariṣyāmi śubhāsyāṃ ca tathā lakṣmīmapi dvija || 24 ||
[Analyze grammar]

evaṃ sa bhagavānvipraṃ taṃ santoṣya tadā girā |
garuḍena samaṃ cakre kathāścitrā manoramāḥ || 25 ||
[Analyze grammar]

atha tasminkathāṃte sa garuḍaḥ puruṣottamam |
provāca tāṃ striyaṃ dṛṣṭvā vṛddhāṃ tejaḥsamanvitām || 26 ||
[Analyze grammar]

apūrveyaṃ suraśreṣṭha strī vṛddhā tava pārśvagā |
kimarthaṃ keyamākhyāhi kutaḥ prāptā janārdana || 27 ||
[Analyze grammar]

śrībhagavānuvāca |
eṣā khyātā khagaśreṣṭha loke'sminvṛddhakanyakā |
śāṃḍilīnāma sarvajñā brahmacaryaparāyaṇā || 28 ||
[Analyze grammar]

tapovīryasamopetā sarvadevābhivaṃditā |
nāsti vai cedṛśī nārī khagendrātra jagattraye || 29 ||
[Analyze grammar]

sūta uvāca |
tasya tadvacanaṃ śrutvā vihasya vihagādhipaḥ |
provāca vāsudevaṃ ca tāṃ vilokya ciraṃ dvijāḥ || 30 ||
[Analyze grammar]

garuḍa uvāca |
naitaccitraṃ tapo yacca kriyate sumahattaram |
yathā ca dīyate dānaṃ yacca tatrāsti cādbhutam |
tathā ca kriyate yuddhaṃ saṃgrāme yuddhaśālibhiḥ || 31 ||
[Analyze grammar]

nāścaryaṃ citrametacca brahmacaryaṃ tadadbhutam |
viśeṣādyauvanāvasthāṃ saṃprāpya puruṣottama || 32 ||
[Analyze grammar]

viśeṣeṇa ca nārībhiratra na śraddadhāmyaham |
avaśyaṃ yauvanasthena tiryagyonigatena ca || 33 ||
[Analyze grammar]

vikāraḥ khalu kartavyo nādhi kārāya yauvanam |
yadi na prāpnuvaṃtyetāḥ puruṣaṃ yoṣitaḥ kvacit || 34 ||
[Analyze grammar]

anyonyaṃ maithunaṃ cakruḥ kāmabāṇaprapīḍitāḥ |
kuṣṭhinaṃ vyādhitaṃ vāpi sthaviraṃ vyaṃgameva ca |
apyetāḥ puruṣābhāve manyaṃte paṃcasāyakam || 35 ||
[Analyze grammar]

nāgnistṛpyati kāṣṭhānāṃ nāpagānāṃ mahodadhiḥ |
nāṃtakaḥ sarvabhūtānāṃ na puṃsāṃ vāmalocanā || 36 ||
[Analyze grammar]

na paratra bhayādetā maryādāṃ vidadhuḥ striyaḥ |
muktvā bhūpabhayaṃ caikamathavā gurujaṃ bhayam || 37 ||
[Analyze grammar]

sūta uvāca |
evaṃ tasya vacaḥ śrutvā śāṃḍilī brahmacāriṇī |
maunavratadharā'pyevaṃ hṛdi kopaṃ dadhāra sā || 38 ||
[Analyze grammar]

etasminnaṃtare tasya pakṣināthasya tatkṣaṇāt |
ubhau pakṣau gatau nāśaṃ ruṇḍākāro'tra so'bhavat || 39 ||
[Analyze grammar]

māṃsapiṃḍamayo raudraḥ sarvarogavivarjitaḥ |
aśaktaśca tathā gantuṃ padamātramapi kvacit || 40 ||
[Analyze grammar]