Chapter 13

[English text for this chapter is available]

| sūta uvāca |
evaṃ nivedya putrāṇāṃ sa rājyaṃ pṛthivīpatiḥ |
puraṃ ca taddvijātibhyaḥ pradāya svayameva hi || 1 ||
[Analyze grammar]

tata ārādhayāmāsa devadevaṃ maheśvaram |
kṛtvā tadā'śramaṃ tatra śraddhayā parayā yutaḥ || 2 ||
[Analyze grammar]

sa babhūva phalāhāro yāvadvarṣaśataṃ nṛpaḥ |
śīrṇaparṇāśanaḥ paścāttāvatkālaṃ samāhitaḥ || 3 ||
[Analyze grammar]

tataḥ paraṃ jalāhāro jāto varṣaśataṃ hi saḥ |
vāyubhakṣastato'bhūtsa yāvadvarṣaśataṃ param || 4 ||
[Analyze grammar]

tatastuṣṭo mahādevastasya varṣaśate gate |
caturthe vāyubhakṣasya darśane samupasthitaḥ || 5 ||
[Analyze grammar]

provāca parituṣṭo'smi mattaḥ prārthaya vāṃchitam |
ahaṃ te saṃpradāsyāmi durlabhaṃ tridaśairapi || 6 ||
[Analyze grammar]

rājovāca |
etatpuṇyatamaṃ kṣetraṃ nānātīrthasamāśrayam |
hāṭakeśvaramāhātmyātsarvapāpakṣayāpaham || 7 ||
[Analyze grammar]

tasmāttava nivāsena bhūyānmedhyatamaṃ punaḥ |
etanme vāṃchitaṃ deva dehi tuṣṭiṃ gato yadi || 8 ||
[Analyze grammar]

mayaitadagryaṃ nirmāya brāhmaṇebhyo niveditam |
puraṃ śarvā'marādhīśa śraddhāpūtena cetasā || 9 ||
[Analyze grammar]

tasmiṃstvayā sadā vāsaḥ kartavyo mama vākyataḥ |
niścalatvena yena syādgaṇaiḥ sarvaiḥ samanvitam || 10 ||
[Analyze grammar]

bhagavānuvāca |
acalo'haṃ bhaviṣyāmi sthāne'tra tava bhūmipa |
acaleśvara ityeva nāmnā khyāto jagattraye || 11 ||
[Analyze grammar]

yo māmatra sthitaṃ martyo vīkṣayiṣyati bhaktitaḥ |
bhaviṣyaṃtyacalāstasya sarvadaiva vibhūtayaḥ || 12 ||
[Analyze grammar]

māghaśuklacaturdaśyāṃ mama liṃgasya yo naraḥ |
śraddhayā parayā yuktaḥ kartā yo ghṛtakaṃbalam || 13 ||
[Analyze grammar]

bālye vayasi yatpāpaṃ vārdhake yauvane'pi vā |
tadyāsyati kṣayaṃ tasya tamaḥ sūryodaye yathā || 14 ||
[Analyze grammar]

tasmātsthāpaya me liṃgaṃ tvamatraiva mahīpate |
ahaṃ yena karomyeva tatra vāsaṃ sadācalaḥ || 15 ||
[Analyze grammar]

sūta uvāca |
evamuktvā sa deveśastataścādarśanaṃ gataḥ |
so'pi rājā cakārāśu prāsādaṃ sumanoharam || 16 ||
[Analyze grammar]

tatra saṃsthāpayāmāsa liṃgaṃ devasya śūlinaḥ |
śraddhayā parayā yuktaḥ sarvalakṣaṇalakṣitam || 7 ||
[Analyze grammar]

yasmindṛṣṭe'thavā spṛṣṭe dhyāte vā pūjite'pi vā |
naro vimucyate pāpādājanmamaraṇāṃtikāt || 8 ||
[Analyze grammar]

tataḥ saṃciṃtayāmāsa bhūpālaḥ kiṃ maheśvaraḥ |
sāṃnidhyaṃ niścalo bhūtvā liṃge'traiva kariṣyati || 19 ||
[Analyze grammar]

etasminnaṃtare jātā vāṇī gaganagocarā |
harṣayantī mahīpālaṃ camatkāraṃ sunisvanā || 20 ||
[Analyze grammar]

mā tvaṃ bhūmipaśārdūla kāryacintāṃ kariṣyasi |
asminvāsaṃ sadātraiva liṃge kartāsmi nityaśaḥ || 21 ||
[Analyze grammar]

tathānyadapi te vacmi pratyayārthaṃ vaco nṛpa |
tacchrutvā nirvṛtiṃ gaccha vīkṣasvaiva ca yatnataḥ || 22 ||
[Analyze grammar]

sadā me niścalā chāyā liṃgasyāsya bhaviṣyati |
ekaiva pṛṣṭhadeśasthā na diksaṃsthā bhaviṣyati || 23 ||
[Analyze grammar]

sūta uvāca |
tataḥ sa vīkṣayāmāsa tāṃ chāyāṃ liṃgasaṃbhavām |
tadrūpāṃ niścalāṃ nityaṃ taddiksaṃsthe divākare || 24 ||
[Analyze grammar]

tato harṣaṃ paraṃ gatvā praṇipatya ca taṃ bhuvi |
kṛtakṛtyamivātmānaṃ sa mene pārthivottamaḥ || 25 ||
[Analyze grammar]

adyāpi dṛśyate chāyā tādṛgrūpā sadā hi sā |
tasya liṃgasya viprendrā jātā vismayakāriṇī || 26 ||
[Analyze grammar]

ṣaṇmāsābhyaṃtare mṛtyuryasya syādbhuvi bho dvijāḥ |
na sa paśyati tāṃ chāyāmeṣo'nyaḥ pratyayaḥ paraḥ || 27 ||
[Analyze grammar]

sūta uvāca |
evaṃ sa bhagavāṃstatra sarvadaiva vyavasthitaḥ |
acaleśvararūpeṇa camatkārapurāṃtike || 28 ||
[Analyze grammar]

niścalatvena deveśohyaṣṭaṣaṣṭiṣu madhyamaḥ |
kṣetrāṇāṃ vasate tatra tasya vākyānmaheśvaraḥ || 29 ||
[Analyze grammar]

tena tatpāvanaṃ kṣetraṃ sarveṣāmiha kīrtitam |
kāmadaṃ muktidaṃ caiva jāyate sarvadehinām || 30 ||
[Analyze grammar]

tathānyadapi yadvṛttaṃ vṛttāṃtaṃ tatprabhāvajam |
tadahaṃ saṃpravakṣyāmi śrūyatāṃ dvijasattamāḥ || 31 ||
[Analyze grammar]

acaleśvaramāhātmyāttasminkṣetre narā drutam |
vāṃchitaṃ manasaḥ sarve labhaṃte sakalaṃ phalam || 32 ||
[Analyze grammar]

svargameke pare mokṣaṃ dhanadhānyasutāṃstathā |
yo yaṃ kāmamabhidhyāya pūjayedacaleśvaram |
taṃtaṃ sa labhate martyaḥ svalpāyāsena ca drutam || 33 ||
[Analyze grammar]

atha dṛṣṭvā sahasrākṣaḥ sarve pāpanarā bhuvi |
svargaṃ yāṃti tathā mokṣaṃ prāpnuvanti ca sammukham || 34 ||
[Analyze grammar]

tataḥ krodhaṃ ca kāmaṃ ca lobhaṃ dveṣaṃ bhayaṃ ratim |
mohaṃ ca vyasanaṃ durgaṃ matsaraṃ rāgameva ca || 35 ||
[Analyze grammar]

sarvānmūrtānsamāhūya tataḥ provāca sādaram |
svayameva sahasrākṣo rahasye dvijasattamāḥ || 36 ||
[Analyze grammar]

naro vā yadi vā nārī camatkārapuraṃ prati |
yo gacchati dharāpṛṣṭhe yuṣmābhirvārya eva saḥ || 37 ||
[Analyze grammar]

tatraiva vasamāno'pi yo gacchedacaleśvaram |
madvākyātsa viśeṣeṇa sarvairvāryaḥ prayatnataḥ || 38 ||
[Analyze grammar]

te tatheti pratijñāya gatvā śakrasya śāsanāt |
cakrustataḥ samucchinnaṃ tanmāhātmyaṃ gataṃ bhuvi || 39 ||
[Analyze grammar]

etadvaḥ sarvamākhyātamākhyānaṃ pāpanāśanam |
acaleśvaradevasya tasminkṣetre nivāsinaḥ || 40 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'caleśvaramāhātmyavarṇanaṃnāma trayodaśodhyāyaḥ || 13 ||
[Analyze grammar]