Chapter 73

[English text for this chapter is available]

śrīhara uvāca |
trisaptatīśvaraṃ viddhi karabheśaṃ varānane |
yasya darśanamātreṇa kuyonirnaiva labhyate || 1 ||
[Analyze grammar]

vīraketurabhūddhīmānayodhyāyā mahīpatiḥ |
vidyāvinayasaubhāgyalāvaṇyāmṛta pūritaḥ || 2 ||
[Analyze grammar]

sa samyakpālayāmāsa prajāḥ putrānivaurasān |
atītānāgatajñānapariniṣṭhitamānasaḥ || 3 ||
[Analyze grammar]

athaikasmindine rājā jagāma gahanaṃ vanam |
mṛgasiṃhagajākīrṇaṃ vyāghrasaṃbarasaṃkulam || 4 ||
[Analyze grammar]

sa tatra vividhānvanyānvivyādha paravīrahā |
mṛgāṃśca mahiṣāṃścaiva varāhāṃśca sahasraśaḥ || 5 ||
[Analyze grammar]

loḍitaṃ tadvanaṃ sarvaṃ paśupakṣimṛgākulam |
rahitaṃ śvāpadaiḥ sarvaiḥ kṛtaṃ tena mahībhṛtā || 6 ||
[Analyze grammar]

yadā na śvāpadāstasmindṛśyate gahane vane |
tadā viddhastu karabho bāṇenānataparvaṇā || 7 ||
[Analyze grammar]

sa cāpi karabho devi bāṇamādāya satvaram |
viddho'pi niḥsṛto'tyarthaṃ rājñastasyaiva paśyataḥ |
sa ca rājā balī tūrṇaṃ sasāra karabhaṃ prati || 8 ||
[Analyze grammar]

tato nimnasthalaṃ caiva sa coṣṭro'dravadāśugaḥ |
muhūrtena tato devi yojanāni bahūnyapi || 9 ||
[Analyze grammar]

tataḥ sa rājā tāruṇyā daurasena balena ca |
sasāra bāṇāsanadhṛksakhaḍgaḥ sahayo nṛpaḥ || 10 ||
[Analyze grammar]

tato nadānnadīścaiva palvalāni vanāni ca |
atikramyānatikramya sasāraiva vanecaram || 11 ||
[Analyze grammar]

sa cāpi karabho devi āsādyāsādya taṃ nṛpam |
punarapyeti javano javena mahatā tataḥ || 12 ||
[Analyze grammar]

sa tasya bāṇairbahubhiḥ karabho vihvalīkṛtaḥ |
pṛṣṭhataḥ pārśvataścaiva punarabhyeti cāṃtikam |
punaśca javamāsyāya pārśve cāgre ca dṛśyate || 13 ||
[Analyze grammar]

athāraṇyaṃ mahāraudraṃ praviṣṭaḥ karabhastadā |
antardhānaṃ jagāmāśu sa ca rājā vane'viśat || 14 ||
[Analyze grammar]

praviśya ca mahāraṇyaṃ tāpasānāmathāśramam |
āsasāda tato rājā śrāṃtāśvopā viśatpunaḥ || 15 ||
[Analyze grammar]

taṃ kārmukakaraṃ dṛṣṭvā śramārttaṃ kṣudhitaṃ tadā |
samabhyetyarṣayastasmai pūjāṃ cakuryathāvidhi || 16 ||
[Analyze grammar]

sa pūjāmṛṣibhirdattāṃ pratigṛhya yathāvidhi |
apṛcchattāpasānsarvāṃstapaso vṛddhimuttamām || 17 ||
[Analyze grammar]

te tasya rājño vacanaṃ pratigṛhya tapodhanāḥ |
ṛṣayo rājaśārdūlaṃ papracchusta tprayojanam || 18 ||
[Analyze grammar]

kena bhadra sukhārthena saṃprāpto'si tapovanam |
padātirbaddhanistriṃśo dhanvī bāṇī nareśvara || 19 ||
[Analyze grammar]

etadicchāmahe śrotuṃ kutaḥ prāpto'si mānada |
kasminkule ca jātastvaṃ kiṃ nāmā brūhi pārthiva || 20 ||
[Analyze grammar]

tataḥ sa rājā sarvebhyo dvijebhyaḥ puruṣarṣabhaḥ |
ācakhyau tadyathā nyāyaṃ kulaṃ gotraṃ ca tattvataḥ || 21 ||
[Analyze grammar]

ikṣvākūṇāṃ kule jāto vīraketurdvijarṣabhāḥ |
carāmi mṛgayūthāni nighnanbāṇaiḥ sahasraśaḥ || 22 ||
[Analyze grammar]

balena mahatā yuktaḥ sāmātyaḥ saparicchadaḥ |
yadā na labdho gahane mṛgo vā sūkaro'pi vā || 23 ||
[Analyze grammar]

mahiṣaścittalo vāpi śaśo vā śaṃbaro vane |
tadā me karabho viddho bāṇenānataparvaṇā || 24 ||
[Analyze grammar]

sa praṇaṣṭaḥ kṣaṇenaiva sabāṇo mama paśyataḥ |
taṃ dravaṃtamanuprāpto vanametadyadṛcchayā || 25 ||
[Analyze grammar]

bhavatsakāśaṃ naṣṭaśrīrhatāśaḥ śramakarśitaḥ |
bhavatāṃ viditaṃ sarvaṃ sarvajñā hi tapodhanāḥ |
bhavaṃtaḥ sumahābhāgāstasmātpṛcchābhi saṃśayam || 26 ||
[Analyze grammar]

kva gataḥ karabho viddho mayā bāṇena sāṃpratam |
kva ca prāpsyāmi sahasā brūta tatsusamāhitāḥ || 27 ||
[Analyze grammar]

tatasteṣāṃ samastānāmṛṣīṇāmṛṣisattamaḥ |
ṛṣabho devi karabhaṃ smarannidamathābravīt || 28 ||
[Analyze grammar]

gataḥ sa karabho bhūpa mahākālavane śubhe |
gaccha tvaṃ ca mahārāja mahākālavane śubhe || 29 ||
[Analyze grammar]

yatra devo mahādevaḥ kārabhaṃ rūpamāsthitaḥ |
vinodārthaṃ ca devānāṃ liṃgamūrttirabhūtpurā || 30 ||
[Analyze grammar]

paścime kṣetrapālasya kailāsasya mahīpate |
samīpe tasya vighneśo modaka priyasaṃjñakaḥ || 31 ||
[Analyze grammar]

brahmaṇā pūjito rājandevānāmarthasiddhaye |
sa ca dharmadhvajo rājā haihayānāṃ kulodvahaḥ || 32 ||
[Analyze grammar]

turageṇa kadācittu nīto badarikāśramam |
prasiddhaṃ triṣu lokeṣu naranārāyaṇāśramam || 33 ||
[Analyze grammar]

tatra vīrājinadharaṃ kṛśaṃ vipraṃ dadarśa ha |
śarīramapi rājeṃdra na kenāpi samaṃ tadā |
dṛṣṭvā ca hasito viprastena rājñā pramādataḥ || 34 ||
[Analyze grammar]

yasmāddhasasi māṃ dṛṣṭvā tasmāduṣṭro bhaviṣyasi |
laṃboṣṭho laṃbadaṃtaśca visvaro vikṛtā kṛtiḥ || 35 ||
[Analyze grammar]

ityuktastena vipreṇa śaptopi nṛpasattamaḥ |
taṃ vipraṃ prārthayāmāsa sa ca tuṣṭobravīdidam || 36 ||
[Analyze grammar]

na me vāganṛtā bhūpa kadā cidapi vidyate |
avaśyaṃ karabho bhūtvā paścānmuktimavāpsyasi || 37 ||
[Analyze grammar]

yadā tvaṃ karabho jāto viddho vai vīraketunā |
ayodhyādhipabhūpena gamiṣyasi śarāhataḥ || 38 ||
[Analyze grammar]

mahākālavanaṃ divyaṃ tatra tvaṃ liṃgadarśanāt |
gamiṣyasi paraṃ sthānaṃ yatra devo maheśvaraḥ || 39 ||
[Analyze grammar]

sa cekṣvākukuladbhūto vīraketurmahābalaḥ |
liṃgadarśanato bhūpa cakravartitvamāpsyati || 40 ||
[Analyze grammar]

ityukto nṛpa bhūpālaḥ karabhatvaṃ samāgataḥ |
sa tvayābhihato bhūpa bāṇenānataparvaṇā |
drakṣyasi tvaṃ vimānasthaṃ vimuktaṃ liṃgadarśanāt || 41 ||
[Analyze grammar]

ityukto nṛpatistena ṛṣabheṇa dvijena tu |
ājagāma tvarāyukto mahākālavanaṃ śubham || 42 ||
[Analyze grammar]

dadarśa tatra talliṃgaṃ pūjitaṃ tridaśaiḥ sadā |
etasminnaṃtare vāṇī śrutā tena mahībhṛtā || 43 ||
[Analyze grammar]

vimānasthena yā proktā tūṣṭreṇa madhurasvarā |
bhobho rājeṃdra māṃ paśya vimāne coddhṛte śubhe || 44 ||
[Analyze grammar]

darśanādasya liṃgasya prāptā me paramā gatiḥ |
tvayā hato'haṃ bāṇena tenāhaṃ tvāgato vane |
samīpamasya liṃgasya tvaṃ me baṃdhuḥ paro yataḥ || 45 ||
[Analyze grammar]

ityuktvā sa nṛpaṃ devi vacaḥ samadhurākṣaram |
gatastu paramaṃ sthānaṃ nityamavyayamakṣayam || 46 ||
[Analyze grammar]

tato devagaṇā vyomni sakiṃnaramahoragāḥ |
yakṣarākṣasagaṃdharvāḥ sapiśācāpsarogaṇāḥ || 47 ||
[Analyze grammar]

brahmeṃdraharimukhyāśca vimānairdevi saṃsthitāḥ |
ājagmurmuditāstatra draṣṭuṃ kautukamānasāḥ || 48 ||
[Analyze grammar]

vilokya karabhaṃ muktaṃ vimānasthaṃ virājitam |
liṃgadarśanamātreṇa saṃstutaṃ vividhaiḥ stavaiḥ || 49 ||
[Analyze grammar]

accharatnasamūhena mukuṭenojvalatviṣā |
bhāsaṃtaṃ ravikoṭīnāṃ jagadānaṃdakārakam || 50 ||
[Analyze grammar]

nāma cakrustato devā dṛṣṭvā māhātmyamuttamam |
darśanādasya liṃgasya mukto'yaṃ karabho yataḥ || 51 ||
[Analyze grammar]

tasmāttriṣvapi lokeṣu vikhyātaḥ karabheśvaraḥ |
bhaviṣyati na saṃdehaḥ paśuyonivimocakaḥ || 52 ||
[Analyze grammar]

ityuktvā tridaśāḥ sarve gatāḥ svaṃ dhiṣṇyamuttamam |
ayodhyādhipatirvīro vīraketuḥ svamālayam |
samṛddhaṃ niḥsapatnaṃ ca tato rājyaṃ cakāra saḥ || 53 ||
[Analyze grammar]

yaḥ paśyati naro devi karabheśvarasaṃjñakam |
sa prayātyakṣayāṃllokānpūjyamāno gaṇādhipaḥ || 54 ||
[Analyze grammar]

yadā kālādihāyāto rājarājeśvaro mahān |
pṛthivyāmekarāḍbhūtvā kramānmokṣamavāpnuyāt || 55 ||
[Analyze grammar]

na duḥkhaṃ jāyate tasya vyādhiśokabhayaṃ tathā |
ye paśyaṃti prasaṃgena talliṃgaṃ karabheśvaram || 56 ||
[Analyze grammar]

sarvamedheṣu yatpuṇyaṃ sarvadāneṣu yatphalam |
tatphalaṃ tvadhikaṃ devi karabheśvaradarśanāt || 57 ||
[Analyze grammar]

vyādhayo nopajāyaṃte dāridryaṃ na kadācana |
aiśvaryaṃ cātulaṃ teṣāṃ jāyate darśanātsadā || 58 ||
[Analyze grammar]

paśuyonigatā ye ca pitaro duḥkhitāstu ye |
tiṣṭhaṃti cāṃbare te tu ciṃtayaṃtaḥ svagotrajam || 59 ||
[Analyze grammar]

āgamiṣyati naḥ putro naptā vā saṃtatāviha |
kadā paśyati deveśaṃ karabheśvaramīśvaram |
tena darśanamātreṇa muktirno bhavitā dhruvam || 60 ||
[Analyze grammar]

yo yamuddiśya vai kāmaṃ darśanaṃ tu kariṣyati |
tasya tajjāyate sarvaṃ mṛtasya paramā gatiḥ || 61 ||
[Analyze grammar]

eṣa te kathito devi prabhāvaḥ pāpanāśanaḥ |
karabheśasya devasya śṛṇu rājasthaleśvaram || 62 ||
[Analyze grammar]

iti śrīskāṃdemahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmya umāmaheśvarasaṃvāde karabheśvaramāhātmya varṇanaṃnāma trisaptatitamo'dhyāyaḥ || 73 ||
[Analyze grammar]