Chapter 72

[English text for this chapter is available]

īśvara uvāca |
dvisaptatīśvaraṃ viddhi candrādityeśvaraṃ priye |
yasya darśanamātreṇa kṛtakṛtyo naro bhavet || 1 ||
[Analyze grammar]

śaṃbareṇa purā devi nirjitāḥ saṃgare surāḥ |
naṣṭā raṇaṃ parityajya prāṇatrāṇaparāyaṇāḥ || 2 ||
[Analyze grammar]

grastaṃ ca rāhuṇā dṛṣṭvā śaśāṃkaṃ bhayavihvalam |
vinatāyāḥ suto jyeṣṭhaḥ proktaḥ sūryeṇa sārathiḥ || 3 ||
[Analyze grammar]

vahāruṇa rathaṃ śīghraṃ yatra yuddhaṃ na vidyate |
śrūyate candrasūryau tau daityānāṃ balavattarau || 4 ||
[Analyze grammar]

rāhurdaṃṣṭrākarālastu sa tṛtīyo bhayaṃkaraḥ |
na jñāyate raṇe candro mṛto naṣṭo'thavā punaḥ || 5 ||
[Analyze grammar]

sa ca na jñāyate śakraḥ kva gato varuṇo raṇe |
yamo na jñāyate kutra dhanadasya ca kā kathā || 6 ||
[Analyze grammar]

evamukto'ruṇo rugṇo raviṇā raṇamadhyataḥ |
rathaṃ saṃprerayāmāsa yatra yuddhaṃ na vidyate || 7 ||
[Analyze grammar]

etasminnaṃtare candraḥ samāyātastu tatkṣaṇāt |
rāhugrahagṛhīto'pi yatra devo divaspatiḥ || 8 ||
[Analyze grammar]

saṃtrastaḥ sa vilolākṣaḥ kṣaṇamātramacetanaḥ |
babhūva sahasā candro dṛṣṭvā devaṃ divākaram || 9 ||
[Analyze grammar]

śaṃbareṇa raṇe ruddhā rudrāśca bhayavidrutāḥ |
jagmurdiśo daśa bhayādasurendravibhīṣitāḥ || 10 ||
[Analyze grammar]

sādhyāḥ sarve bhayatrastā gatā yatra na dānavāḥ |
teṣu bhagneṣu deveṣu hataśiṣṭeṣu saṃgare || 11 ||
[Analyze grammar]

vyadhamatsarvagātrāṇi varmāṇi ca janakṣaye |
palāyamānadevānāmasuro balavaccharaiḥ || 12 ||
[Analyze grammar]

pṛṣṭhato nijaghānātha nikṛttāśca sahasraśaḥ |
ahaṃ naṣṭacchalenaiva vyagrībhūte 'sure tadā || 13 ||
[Analyze grammar]

āsuraṃ rūpamāsthāya prāṇatrāṇaparāyaṇaḥ |
śīghraṃ ca gamyate tāvadyāvannāyāti śaṃbaraḥ || 14 ||
[Analyze grammar]

ityuktaṃ niśināthena bhayabhītena pārvati |
candrādityau kṣaṇānnītāvaruṇena rathena vai || 15 ||
[Analyze grammar]

yatra devo jagannātho garuḍastho janārdanaḥ |
surasaṃghātasaṃketakiṃnarākīrṇakaṃdare || 16 ||
[Analyze grammar]

maṃdare suranārīṇāṃ naṃdane varacandane |
dṛṣṭvā tatra jagannāthaṃ śaṃkhacakragadādharam |
stutiṃ tau cakraturdevau candrasūryau yaśasvini || 17 ||
[Analyze grammar]

namo lokatrayādhyakṣa svaprabhājitabhāskara |
namo viṣṇo namo jiṣṇo namaste kaiṭabhāṃtaka || 18 ||
[Analyze grammar]

namaḥ sarvakriyākartre jagattrātre ca te namaḥ |
namaścakrāyudhādhṛṣya namo dānavaghātine || 19 ||
[Analyze grammar]

namaḥ kramatrayākrāṃtatrailokyāṃtarhitodbhava |
namaḥ pracaṃḍadaityeṃdrakulakāla mahābala || 20 ||
[Analyze grammar]

namo nābhihradodbhūtapadmagarbhamahāprabho |
janitāśeṣalokeśaviraṃcāya mahādyute || 21 ||
[Analyze grammar]

amarārivināśāya mahāsamaraśāline |
namaste vibudhādhīśa śaraṇaṃ bhava naḥ prabho || 22 ||
[Analyze grammar]

candrasūryakṛtaṃ stotraṃ śrutvā devo janārdanaḥ |
āśvāsya stutipūrveṇa prāha devo hyadhokṣajaḥ || 23 ||
[Analyze grammar]

viṣṇuruvāca |
svāgataṃ candrasūryau bho bhavaṃtau stutibhājanau |
kiṃ kāraṇamiha prāptau tadbrūtāṃ vigatajvarau || 24 ||
[Analyze grammar]

nārāyaṇenaivamuktau procatuścaṃdrabhāskarau |
samare nirjitā devāḥ śaṃbareṇa durātmanā || 25 ||
[Analyze grammar]

na jñātāḥ ktra gatāste ca āvāṃ naṣṭau prayatnataḥ |
aruṇena ihānītau dṛṣṭastvaṃ deva daivataḥ || 26 ||
[Analyze grammar]

śaṃbareṇa jitā devāḥ sa ca sarvatra dṛśyate |
sthale caiva jale caiva śaṃbaraḥ krūrapauruṣaḥ || 27 ||
[Analyze grammar]

naśyatāṃ tridaśeṃdrāṇāṃ pṛṣṭhataḥ śaravṛṣṭibhiḥ |
ciccheda naravarmāṇi cchatrāṇi ca dhanūṃṣi ca || 28 ||
[Analyze grammar]

varmāṇi ca vicitrāṇi mukuṭāni mahāṃti ca |
pṛthūni cāpi cāpāni carmāṇi vividhāni ca || 29 ||
[Analyze grammar]

gajāśca madasaṃbhinnakapolāḥ koṭiśaḥ surāḥ |
vājinaścāmarāpīḍā ratnaparyāṇabhūṣaṇāḥ || 30 ||
[Analyze grammar]

vibudhā dhvastasannāhā vigajā vipadātinaḥ |
vipadāmākarākārā babhūva suravāhinī || 31 ||
[Analyze grammar]

tato daityādhipo mānī parivṛtto mahāraṇāt |
nirjitārirmahātejā jvālāvāniva pāvakaḥ || 32 ||
[Analyze grammar]

vaṃdyamāno munigaṇaiḥ stūyamāno maharṣibhiḥ |
ānaṃdito jayāśīrbhiḥ pravarairdaityapuṃgavaiḥ || 33 ||
[Analyze grammar]

tatra sarvarddhisaṃpūrṇamāsanaṃ hemabhūṣaṇam |
adhyatiṣṭhata daityeṃdrastatra maṃgalaveśmani |
tatropaviṣṭaḥ śuśubhe daityarājo mahāyaśāḥ || 34 ||
[Analyze grammar]

divyacaṃdanapuṣṭāṃgaḥ surapuṣpasamujjvalaḥ |
mukuṭākārajuṣṭāṃgaḥ sitacāmaravījitaḥ |
mṛtotthitaistathā daityairdaityādhīśairadhiṣṭhitaḥ || 35 ||
[Analyze grammar]

kratubhirmūrttimadbhiśca sevya māno mahābalaḥ |
sarvapuṣpotkarayutairnānāvihaganādibhiḥ || 36 ||
[Analyze grammar]

tatra śrīratulā loke tatra lakṣmīrnirargalā |
tatra kāṃtirdyutiḥ śobhā śaṃbaro yatra dānavaḥ || 37 ||
[Analyze grammar]

evaṃ sa daityanṛpatiḥ sabhṛtyastatra modate |
svayamiṃdrastu saṃjātaścaṃdrasūryau kṛtau svakau || 38 ||
[Analyze grammar]

tayoriti vacaḥ śrutvā sa devaḥ puruṣottamaḥ |
ciraṃ dhyātvā svamanasi tadāvocadidaṃ priye || 39 ||
[Analyze grammar]

caṃdrasūryau mayā jñātaṃ śaṃbarasya viceṣṭitam |
brahmaṇo varadānena bhoktavyaṃ tapasaḥ phalam || 40 ||
[Analyze grammar]

śaṃbarāya purā kṣiptaṃ vajraṃ kuliśapāṇinā |
hṛdaye nihataḥ so'pi tathāpi na mṛto'suraḥ || 41 ||
[Analyze grammar]

gamyatāṃ ca mayājñaptau mahākā lavanottame |
candrasūryau mamādeśāttatra siddhiṃ ca lapsyatha || 42 ||
[Analyze grammar]

tatrānaṃto mahākālo liṃgarūpo maheśvaraḥ |
tasya cottarato deśe liṃgaṃ kāmapradaṃ śivam || 43 ||
[Analyze grammar]

tasya darśanamātreṇa kṛtakṛtyau bhaviṣyathaḥ |
tasya jvālāsamūhena maraṇaṃ śaṃbarasya ca |
bhaviṣyati na saṃdehastasmāttatraiva gamya tām || 44 ||
[Analyze grammar]

ityuktau vāsudevena caṃdrasūryau yaśasvini |
satvaraṃ hṛṣṭaromāṇau mahākālavanaṃ gatau || 45 ||
[Analyze grammar]

tatra dṛṣṭvā mahādevaṃ tejaso rāśimavya yam |
stutaṃ ca vividhaiḥ stotraiḥ pūjitaṃ kusumaiḥ śubhaiḥ || 46 ||
[Analyze grammar]

etasminnaṃtare vāṇī liṃgamadhyātsamutthitā |
āśvāsayaṃtī tarasā candrasūryau himātmaje || 47 ||
[Analyze grammar]

hataḥ sa śaṃbaro daityo gatau tau candrabhāskarau |
daityānāṃ nirmitau duṣṭau pātālāṃtarasaṃsthitau || 48 ||
[Analyze grammar]

rāhuketū grahāṃte tu kṛtau samayapūrvakau |
sthāpitaḥ svapade śakro devaiḥ saha na saṃśayaḥ || 49 ||
[Analyze grammar]

svaṃ svaṃ sthānaṃ gatāḥ sarve lokapālā mudā yutāḥ |
kāṃtipratāpasaṃyuktau bhavantau bhuvanatraye || 50 ||
[Analyze grammar]

gagane grahanakṣatraiḥ sahitau vicariṣyathaḥ |
pūrvavatpuṇyapāpānāṃ sākṣibhūtau bhaviṣyathaḥ || 51 ||
[Analyze grammar]

ityuktau candrasūryau tu tayā vāṇyā varānane |
santuṣṭau kṛtakṛtyau tu saṃjātau liṃgadarśanāt || 52 ||
[Analyze grammar]

etasminnaṃtare devā vimānasthā samāgatāḥ |
yatra caṃdraśca sūryaśca mahākā lavane śubhau || 53 ||
[Analyze grammar]

jñātvā liṃgasya māhātmyaṃ nāma cakuḥ samāhitāḥ |
sevitaṃ caṃdrasūryābhyāṃ liṃgaṃ tejomayaṃ param || 54 ||
[Analyze grammar]

candrādityeśvaraṃnāma khyātiṃ yāsyati bhūtale |
liṃgasyāsya samutthena jvālāsaṃghena śaṃbaraḥ |
dagdho bhṛtyajanaiḥ sārddhaṃ candrasūryānusevanāt || 55 ||
[Analyze grammar]

ityuktvā tridaśāḥ saveṃ samīpe sarvataḥ sthitāḥ |
stuvanto vividhaiḥ stotraiścaṃdrādityeśvaraṃ śivam || 56 ||
[Analyze grammar]

candrādityau ca tatrasthau sthitau liṃgasamīpataḥ |
ārādhayantau deveśaṃ padaṃ prāptau ca pūrvavat || 57 ||
[Analyze grammar]

ye paśyaṃti narā bhaktyā candrādityecaraṃ śivam |
te yāṃti sūryalokaṃ tu candralokaṃ tathaiva ca || 58 ||
[Analyze grammar]

vimānaiḥ sūryasakāśaistathā caṃdraprabhaiḥ śubhaiḥ |
yāvaccandraśca sūryaśca tāvatteṣāṃ sukhaṃ bhavet || 59 ||
[Analyze grammar]

candrasūryoparāge tu caṃdrādityeśvaraṃ śivam |
ye paśyaṃti narā bhaktyā snātvā śiprāṃ ca pāvanīm || 60 ||
[Analyze grammar]

teṣāṃ kulaśataṃ yāvatpaitṛkaṃ mātṛkaṃ tathā |
loke caṃdrasya sūryasya modate śāśvatīḥ samāḥ || 61 ||
[Analyze grammar]

amāsomasamāyoge ye paśyanti prasaṃgataḥ |
candrādityeśvaraṃ devaṃ na te yāṃti yamālayam || 62 ||
[Analyze grammar]

eṣa te kathito devi prabhāvaḥ pāpanāśanaḥ |
candrādityeśvareśasya śrūyatāṃ karabheśvaram || 63 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśīti liṅgamāhātmya umāmaheśvarasaṃvāde cadrādityeśvaramāhātmyavarṇanaṃnāma dvisaptatitamo'dhyāyaḥ || 72 ||
[Analyze grammar]