Chapter 43

[English text for this chapter is available]

śrīśiva uvāca |
catvāriṃśattamaṃ viddhi tryadhikaṃ parvatātmaje |
yasya darśanamātreṇa jāyate sarvasaṃpadaḥ || 1 ||
[Analyze grammar]

ādikalpe purā jāto vakrāṃgo lohitacchaviḥ |
raudrastvaṃgārasadṛśo mama gātrādvarānane |
mayā dhṛto dharaṇyāṃ sa vikhyāto bhūmiputrakaḥ || 2 ||
[Analyze grammar]

jātamātre sute tasminmahākāye bhayāvahe |
kaṃpitā dharaṇī devī devāstrastāḥ savāsavāḥ || 3 ||
[Analyze grammar]

kṣobhaṃ gatāḥ samudrāśca celuśca dharaṇīdharāḥ |
tenaiva pīḍitaṃ sarvaṃ sadevāsuramānuṣam || 4 ||
[Analyze grammar]

ṛṣayo vālakhilyāśca devāḥ śakrapurogamāḥ |
bṛhaspatiṃ puraskṛtya brahmalokaṃ gatāḥ priye || 5 ||
[Analyze grammar]

socchvāṃsāḥ kathayāmāsurnamaskṛtya pitāmaham |
vṛttāṃtaṃ vistarātsarvaṃ lokatrayavināśanam || 6 ||
[Analyze grammar]

haragātrodbhavenaiva jātamātreṇa līlayā |
lokatrayaṃ samākrāṃtaṃ pīḍitaṃ bhakṣitaṃ tathā || 7 ||
[Analyze grammar]

tacchrutvā vacanaṃ teṣāṃ brahmā lokapitāmahaḥ |
ciṃtayitvā tu taiḥ sārddhamājagāma mamāṃtikam || 8 ||
[Analyze grammar]

mayā pṛṣṭāstu te sarve kimarthaṃ bhayavihvalāḥ |
socchvāsahṛdayā dīnāḥ kasmādvo bhayamāgatam || 9 ||
[Analyze grammar]

taiḥ sarvaṃ kathitaṃ devi mamāgre bhayavihvalaiḥ |
tvadaṃgasaṃbhavenaiva devadeva jagatpate |
pīḍitaṃ bhakṣitaṃ caiva sadevāsuramānavam || 10 ||
[Analyze grammar]

iti teṣāṃ vacaḥ śrutvā kṣemārthaṃ kṛpayā mayā |
ākārito matsamīpamuvāca vadatāṃ varaḥ || 11 ||
[Analyze grammar]

ādeśo dīyatāṃ deva kiṃ karomītyuvāca saḥ |
nākarṣa tvaṃ jagadidaṃ mayā proktaḥ punaḥpunaḥ || 12 ||
[Analyze grammar]

mamāṃgādrajasā jātastenāṃgāraka ucyase |
lokānāṃ svastaye nityaṃ maṃgalosi mayā kṛtaḥ || 13 ||
[Analyze grammar]

idānīṃ vakratāṃ yāto vakrastvaṃ gīyase budhaiḥ |
vijñapto'haṃ tadā tena mama vākyaṃ śrutaṃ yadā |
āhāreṇa vinā deva kathaṃ tṛptirbhaviṣyati || 14 ||
[Analyze grammar]

tasmānme dehi susthānamādhipatyaṃ ca dehi me |
śaktiṃ ca dehi me śīghramāhāraṃ dehi me prabho || 15 ||
[Analyze grammar]

tasya tadvacanaṃ śrutvā putro'yaṃ mama vallabhaḥ |
tasmāddāsyāmi paramaṃ sthānamakṣayamuttamam || 16 ||
[Analyze grammar]

iti saṃcintya manasā smṛtaṃ sthānaṃ mayottamam |
utsaṃge ca sutaṃ kṛtvā premṇā proktaṃ punaḥpunaḥ || 17 ||
[Analyze grammar]

dattaṃ putra mayā sthānaṃ mahākālavanottame |
gaṃgeśvarasya pūrve tu praśasyaṃ sthānamuttamam || 18 ||
[Analyze grammar]

khagartā caiva śiprā ca saṃgamastatra vidyate || 19 ||
[Analyze grammar]

yadā mayā dhṛtā gaṃgā tadā sā candramaṇḍalāt |
pramādātpatitā bhūmau mahākālavanottame || 20 ||
[Analyze grammar]

khagarteti ca vikhyātā khādbhraṣṭā prāpatatkṣitau |
ato mayāvatārastu sahasā tava vai kṛtaḥ || 21 ||
[Analyze grammar]

liṃgamūrtirahaṃ putra tiṣṭhāmi surapūjitaḥ |
tatsthānaṃ durlabhaṃ devaistasmāttvaṃ gaccha satvaram || 22 ||
[Analyze grammar]

pūjito'haṃ tvayā tatra saṃgame lokapūjite |
triṣu lokeṣu yāsyāmi khyātiṃ vai tava nāmataḥ || 23 ||
[Analyze grammar]

madhye grahāṇāṃ sarveṣāmādhipatyaṃ mayā tava |
dattaṃ tṛtīyakaṃ sthānaṃ tatra tṛptirbhaviṣyati || 24 ||
[Analyze grammar]

pūjāṃ prāpsyasi tatraiva grahamadhye vyavasthitaḥ |
tithirdattā caturthī te tasyāṃ ye vratatatparāḥ || 25 ||
[Analyze grammar]

tvāmuddiśya kariṣyaṃti pūjāṃ śāṃtiṃ sadakṣiṇām |
tena sarveṇa te tṛptirbhaviṣyati na saṃśayaḥ || 26 ||
[Analyze grammar]

vāraścaikaśca te datto maṃgalārthaṃ mayā tava |
navavastraparīdhānaṃ vidyāraṃbhaṃ dine tava |
tailābhyaṃgaṃ kariṣyaṃti na ca prāpsyaṃti te balam || 27 ||
[Analyze grammar]

ityuktastu mayā devi vakrāṃgo maṃgalaḥ sutaḥ |
aṃgāraketi vikhyātastathetyaṃgīcakāra saḥ || 28 ||
[Analyze grammar]

santuṣṭastena vākyena madīyena varānane |
ājagāma mudā yukto mahākālavanottame || 29 ||
[Analyze grammar]

śiprāyāśca taṭe ramye khagarttāsaṃgamāṃtikam |
dṛṣṭo'haṃ liṃgarūpeṇa parāṃ tuṣṭimupāgataḥ || 30 ||
[Analyze grammar]

mayā cāliṃgitaḥ premṇā cumbitaḥ śirasi priye |
varo datto viśālākṣi vāṃchitaṃ te bhaviṣyati || 31 ||
[Analyze grammar]

dṛṣṭo'haṃ ca tvayā putra bhaktyā cārādhitastvayā |
mama vākyaṃ kṛtaṃ yasmāttasmāttuṣṭo'smi maṃgala || 32 ||
[Analyze grammar]

aṃgāreśvaranāmāhamadyaprabhṛti putraka |
triṣu lokeṣu vikhyā to bhaviṣyāmi na saṃśayaḥ || 33 ||
[Analyze grammar]

ye māṃ paśyaṃti satataṃ saṃgame'tra vyavasthitam |
na teṣāṃ punarāvṛttirbhaviṣyati mahītale || 34 ||
[Analyze grammar]

ye māṃ saṃpūja yiṣyaṃti hyaṃgārakadine narāḥ |
kalau yuge kṛtārthāste bhaviṣyaṃti na saṃśayaḥ || 35 ||
[Analyze grammar]

caturthyāṃ maṃgaladine ye māṃ paśyaṃti suvratāḥ |
na te yāsyaṃti saṃsāre ghore duḥkhaśatākule || 36 ||
[Analyze grammar]

amāvāsyā ca bhaumaśca saṃyogo dṛśyate yadā |
khagarttāyāśca śiprāyāḥ saṃgame devapūjite || 37 ||
[Analyze grammar]

snātvā tadā prapaśyaṃti māmatraiva vyavasthitam |
teṣāṃ puṇyaphalaṃ devi samāsācchṛṇu sāṃpratam || 38 ||
[Analyze grammar]

vārāṇasyāṃ prayāge ca kurukṣetre ca yatphalam |
gayāyāṃ puṣkare proktaṃ tatpuṇyamadhikaṃ bhavet || 39 ||
[Analyze grammar]

eṣa te kathito devi prabhāvaḥ pāpanāśanaḥ |
aṃgāreśvaradevasya śrūyatāmuttareśvaram || 40 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmyeṃ'gārakeśvaramāhātmyavarṇanaṃnāma tricatvāriṃśo'dhyāyaḥ || 43 ||
[Analyze grammar]