Chapter 42

[English text for this chapter is available]

śrīhara uvāca |
dvācatvāriṃśataṃ devaṃ gaṃgeśvaramatho śṛṇu |
yasya darśanamātreṇa sarvatīrthaphalaṃ labhet |
dhruvādhāraṃ jagadyoneḥ padaṃ nārāyaṇasya tu || 1 ||
[Analyze grammar]

padātpravṛttā yā devī gaṃgā tripathagā nadī |
sā praviśya sudhāyoniṃ somamādhāramaṃbhasām || 2 ||
[Analyze grammar]

tataḥ saṃvarddhamānārkaraśmisaṃgatipāvanī |
papāta merupṛṣṭhe ca sā caturdhā tato yayau || 3 ||
[Analyze grammar]

merukūṭataṭāntebhyo nipatantī yaśasvinī |
vikīryamāṇasalilā nirālaṃbā papāta sā || 4 ||
[Analyze grammar]

mandarādiṣu śaileṣu pravibhaktodakā samam |
tatra sīteti vikhyātā yayau caitrarathaṃ vanam || 5 ||
[Analyze grammar]

tatplāyitvā ca yayāvaruṇodaṃ saridvarā || 6 ||
[Analyze grammar]

tathaivālakanandākhyā dakṣiṇe gandhamādane |
merupādavanaṃ gatvā nandane devanandane || 7 ||
[Analyze grammar]

mānasaṃ ca mahāvegātplāvayitvā sarovaram |
tasmācca śailarājānaṃ ramyaṃ triśikharaṃ gatā || 8 ||
[Analyze grammar]

tasmācca parvatāḥ sarve plāvitāstatkṣaṇātpriye |
tānplāvayitvā saṃprāptā himavantaṃ mahāgirim || 9 ||
[Analyze grammar]

mayā dhṛtā ca tatraiva jaṭājūṭena pārvati |
na muktā ca yadā gaṃgā tadā kruddhā mamopari || 10 ||
[Analyze grammar]

gātrāṇi plāvayāmāsa madīyāni varānane |
mayā ca ruddhā krodhena jaṭāmadhye yaśasvini || 11 ||
[Analyze grammar]

tatraiva sā tapaścakre bahukalpaśatāni ca |
bhagīrathenopavāsaiḥ stutyā cārādhito hyaham || 12 ||
[Analyze grammar]

tadā muktā mayā devi gaṃgā tripathagāminī |
mahākālamanuprāptā plāvayitvottarānkurūn || 13 ||
[Analyze grammar]

samudramahiṣī jātā prāṇebhyo'pi garīyasī |
nadīnāmuttamā gaṃgā samudreṇa kṛtā tadā |
sa tayā sahito reme samudraḥ saritāṃpatiḥ || 14 ||
[Analyze grammar]

tataḥ kadācidbrahmāṇamupāsāṃcakrire surāḥ |
tathārṇavo jagāmātha brahmalokaṃ sanātanam |
gaṃgayā sahito devi darśanārthaṃ mahotsave || 15 ||
[Analyze grammar]

atha gaṃgā saricchreṣṭhā samupāyātpitāmaham |
tasyā vāsaḥ samuddhūtaṃ mārutena śaśiprabham || 16 ||
[Analyze grammar]

tato'bhavansuragaṇāḥ sahasā'vāṅmukhāstadā |
mahābhiṣastu rājarṣirniḥśaṃko dṛṣṭavānnadīm || 17 ||
[Analyze grammar]

tasya bhāvaṃ viditvā'tha brahmaṇā sa tiraskṛtaḥ |
uktastu jāto martyeṣu punarlokānavāpsyasi || 18 ||
[Analyze grammar]

gaṃgā śaptātha kruddhena samudreṇa yaśasvini |
māṃ vihāyānyasaktāsi tasmādyāsyasi mānuṣam || 19 ||
[Analyze grammar]

lokamalpāyuṣaṃ dīnā tatra duḥkhamavāpsyasi |
taṃ śāpaṃ dāruṇaṃ śrutvā gaṃgā vacanamabravīt || 20 ||
[Analyze grammar]

vināparādhācchaptāhaṃ kasmādvai devasaṃsadi |
pativratā patiprāṇā patinā paramārthataḥ || 21 ||
[Analyze grammar]

pramādādvastramuddhūtaṃ vāyunā vyāpakena tu |
pratyuvāca tato brahmā tāṃ nadīṃ lokapāvanīm || 22 ||
[Analyze grammar]

vasūnāṃ kāraṇāddevi śaptā yasmānmahānadi |
bhāvyarthe toyanidhinā tasmācchīghraṃ vrajādhunā || 23 ||
[Analyze grammar]

mahākālavane ramye siddhagaṃdharvasevite |
śiprāyā dakṣiṇe bhāge vidyate liṃgamuttamam || 24 ||
[Analyze grammar]

sarvasiddhikaraṃ puṇyaṃ sarvapātakanāśanam |
tamārādhaya yatnena sa te dāsyati vāṃchitam || 25 ||
[Analyze grammar]

pitāmahavacaḥ śrutvā tuṣṭā tripathagāminī |
gamanaṃ tatra me'bhīṣṭa vidyate yatsakhī mama |
śiprāpi me priyā puṇyā mahāpātakanāśinī || 26 ||
[Analyze grammar]

iti saṃciṃtya manasā divyā devanadī tadā |
ājagāma mahākāle hyapaśyalliṃgamuttamam || 27 ||
[Analyze grammar]

pūjayāmāsa payasā divyena vidhinā tadā |
dṛṣṭvā śiprāṃ sakhīṃ tatra saṃśleṣaṃ cābhavattayoḥ || 28 ||
[Analyze grammar]

tataḥ prabhṛti saṃjātā sā śiprā pūrvavāhinī |
triṣu lokeṣu vikhyāto devo gaṃgeśvaraḥ svayam |
gaṃgayārādhito yasmātsamīhitaphalapradaḥ || 29 ||
[Analyze grammar]

saṃstutā devagaṃdharvairgaṃgā devanadī tadā |
ṛṣibhirvālakhilyādyaistathānyairmunibhirmudā || 30 ||
[Analyze grammar]

samudrastatra saṃprāpto mānitā sā mahānadī |
liṃgenoktā tadā gaṃgā kalayā sthīyatāmiti || 31 ||
[Analyze grammar]

tatsamīpe mahāpuṇye yāvattiṣṭhati medinī |
aṃgīkṛtaṃ samudreṇa yathoktaṃ ca tathā stviti || 32 ||
[Analyze grammar]

evamuktvā gatā gaṃgā kalayā tatra saṃsthitā |
gaṃgeśvaraṃ tu yaḥ paśyetsnātvā śiprāṃbhasi priye || 33 ||
[Analyze grammar]

gosahasraphalaṃ tasya jāyate nātra saṃśayaḥ |
sarvatīrthaphalaṃ tasya sarvadharmaphalaṃ tathā || 34 ||
[Analyze grammar]

sarvayajñaphalaṃ samyaksarvadānaphalaṃ tathā |
sarvayogaphalaṃ devi prāpnotyeva nirantaram || 35 ||
[Analyze grammar]

tatra tīrthāni subhage pṛthivyāṃ yāni kānicit |
dharmāraṇyaṃ phalgutīrthaṃ puṣkaraṃ naimiṣaṃ gayā || 36 ||
[Analyze grammar]

prayāgaṃ ca kurukṣetraṃ kedāramamareśvaram |
caṃdrabhāgā vipāśā ca sarayūrdevikā kuhū || 37 ||
[Analyze grammar]

godāvarī śatadruśca bāhudā vetravatyapi |
sarvā evātra saritaḥ saṃgatāḥ saṃti gaṃgayā || 38 ||
[Analyze grammar]

guptāni puṇyatīrthāni siddhakṣetrāṇi caiva hi |
tatra sarvāṇi tiṣṭhaṃti kalāmātreṇa pārvati || 39 ||
[Analyze grammar]

eteṣāṃ phalamāpnoti yaḥ paśyati samāhitaḥ |
snātvā gaṃgeśvaraṃ devaṃ satyametanmayoditam |
ataḥ puṇyatamaṃ sthānaṃ gīyate gaṇavaṃdite || 40 ||
[Analyze grammar]

eṣa te kathito devi prabhāvaḥ pāpanāśanaḥ |
gaṃgeśvarasya devasya śṛṇvaṃgāreśvaraṃ param || 41 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye gaṃgeśvara māhātmyavarṇanaṃnāma dvācatvāriṃśo'dhyāyaḥ || 42 ||
[Analyze grammar]