Chapter 6

[English text for this chapter is available]

śrīmahādeva uvāca || |
svarṇajvāleśvaraṃ ṣaṣṭhaṃ viddhi cātra yaśasvini |
yasya darśanamātreṇa dhanavāniha jāyate || 1 ||
[Analyze grammar]

purā sārddhaṃ tvayā devi krīḍato mama maṃdire |
jātaṃ varṣaśataṃ divyaṃ surataikarasasya ca || 2 ||
[Analyze grammar]

devaiḥ sarvaistato vahniḥ prerito mama saṃnidhau |
tato vahniḥ samāyātastrailokyārthe yaśasvini || 3 ||
[Analyze grammar]

tato vahnimukhe kṣiptaṃ vīryaṃ svaṃ krīḍatā mayā |
dahyamānastadā tena gaṃgāṃ vahnirjagāma ha || 4 ||
[Analyze grammar]

tatra gatvā pracikṣepa vīryamagniḥ sudurddharam |
tathāpi dahyate vahnirvīryaśeṣeṇa pārvati || 5 ||
[Analyze grammar]

jātaṃ ramyaṃ tato divyaṃ vīryaśeṣeṇa kāṃcanam |
jvalaṃtaṃ cātitāpena duḥsahaṃ durddharaṃ priye || 6 ||
[Analyze grammar]

agnerapatyaṃ prathamaṃ dṛṣṭvotpannaṃ tu pārvati |
lobhābhibhūtā asurāḥ surā gandharvakinnarāḥ || 7 ||
[Analyze grammar]

yakṣāḥ sādhyāḥ piśācāśca manuṣyā rākṣasāḥ khagāḥ |
abhyadhāvansusaṃrabdhāste suvarṇajighṛkṣavaḥ || 8 ||
[Analyze grammar]

suvarṇārthe mahānnādo mamedamiti jalpatām |
ajñānātsaṃgaraścaiva saṃjātaḥ prāṇahārakaḥ || 9 ||
[Analyze grammar]

athāvaraṇamukhyāni nānāpraharaṇāni ca |
pragṛhyābhyanadannādairdevaiḥ sārddhaṃ yaśasvini || 10 ||
[Analyze grammar]

asurā asuraiḥ sārddhaṃ manuṣyā mānuṣaiḥ saha |
gandharvāḥ saha gandharvaiḥ kiṃnaraiḥ saha kiṃnarāḥ || 11 ||
[Analyze grammar]

bhūtaiḥ sārddhaṃ ca bhūtāni rākṣasaiḥ saha rākṣasāḥ |
vetālaiḥ saha vetālā yuddhaṃ cakruḥ sudāruṇam || 12 ||
[Analyze grammar]

putrastu pitaraṃ dveṣṭi pitā putraṃ tathaiva ca |
haṃti bhāryā svabhartāraṃ bhartā ca svāṃ priyāṃ tathā || 13 ||
[Analyze grammar]

mātaraṃ svasuto haṃti mātā putraṃ hinasti ca |
tato vairavinirbaṃdhaḥ saṃjātaḥ svarṇakāraṇāt || 14 ||
[Analyze grammar]

surāṇāmasurāṇāṃ ca sarvaṃ ghorataraṃ mahat |
prāsāśca vipulāstīkṣṇā nyapataṃta sahasraśaḥ |
tomarāśca sutīkṣṇāgrāḥ śastrāṇi vividhāni ca || 15 ||
[Analyze grammar]

suvarṇārthe mahādevi vamaṃto rudhiraṃ bahu || 16 ||
[Analyze grammar]

asiśaktigadāṛṣṭyo nipeturdharaṇītale |
chinnāni paṭṭiśaiścaiva śirāṃsi yudhi dāruṇaiḥ || 17 ||
[Analyze grammar]

rudhireṇāvaliptāṃgā nihatāśca parasparam |
adrīṇāmiva kūṭāni dhātuyuktāni śerate || 18 ||
[Analyze grammar]

hāhākāraḥ samabhavadbhayakṛcca sahasraśaḥ |
anyonyaṃ chiṃdatāṃ śastraiḥ suvarṇasya ca kāraṇāt || 19 ||
[Analyze grammar]

parighairāyasaiḥ pāśairvajrakalpaiśca muṣṭibhiḥ |
nighnatāṃ samare 'nyonyaṃ śabdo divamivāspṛśat || 20 ||
[Analyze grammar]

chiṃdhibhiṃdhi pradhāva tvaṃ pātayādhisareti ca |
aśrūyanta mahāghorāḥ śabdāstatra samaṃtataḥ || 21 ||
[Analyze grammar]

evaṃ tu tumule yuddhe varttamāne mahābhaye |
kaṃpitā dharaṇī devi devāstrastāḥ savāsavāḥ || 22 ||
[Analyze grammar]

kṣubhyaṃti sma samudrāśca celuśca dharaṇīdharāḥ |
tasyārthe pīḍitaṃ sarvaṃ sadevāsuramānuṣam || 23 ||
[Analyze grammar]

ṛṣayo vālakhilyādyā devāḥ śakrapurogamāḥ |
bṛhaspatiṃ puraskṛtya brahmalokaṃ gatāḥ striyaḥ || 24 ||
[Analyze grammar]

socchvāsā kathayāmāsurjarjarīkṛtamastakāḥ |
vṛttāṃtaṃ vistarātsarvaṃ lokatrayavināśanam || 25 ||
[Analyze grammar]

tacchrutvā vacanaṃ teṣāṃ brahmā lokapitāmahaḥ |
ciṃtayitvā ca taiḥ sārddhamājagāma mamāṃtikam || 26 ||
[Analyze grammar]

mayā pṛṣṭāstu te sarve kenaite jarjarīkṛtāḥ |
śastrāstraiḥ pīḍitāḥ kena kasmādvo bhayamāgatam || 27 ||
[Analyze grammar]

kaścāsau dānavo duṣṭo yena vai pīḍitā bhṛśam |
tatsarvaṃ kathitaṃ devi mamāgre bhayavihvalaiḥ || 28 ||
[Analyze grammar]

te māmūcustadā devā brahmādyā bhayakāraṇam || 29 ||
[Analyze grammar]

lobhātsarve vinaṣṭāḥ sma suvarṇasya ca kāraṇāt |
pīḍitaṃ ca jagatsarvaṃ sadevāsuramānuṣam || 30 ||
[Analyze grammar]

iti teṣāṃ vacaḥ śrutvā mayā jñātaṃ varānane |
tasyārthe kalaho ghoraḥ saṃjāto hi parasparam || 31 ||
[Analyze grammar]

lokatrayavināśaśca sahasā yena vai kṛtaḥ |
yamuddiśya tyajetprāṇāṃstamāhurbrahmaghāta kam || 32 ||
[Analyze grammar]

brahmahā vahniputrastu yamuddiśya mṛto janaḥ |
śarīraṃ śabalaṃ caiva savikāraṃ bhaviṣyati || 33 ||
[Analyze grammar]

dhātavo hi bhaviṣyaṃti tasya dehe na saṃśayaḥ |
lakṣyate duḥkhamatulaṃ chedadāhādigharṣaṇam || 34 ||
[Analyze grammar]

etasminnaṃtare vahnirdṛṣṭvā putrasya ceṣṭitam |
jñātvā krodhaṃ madīyaṃ tu bhīto vai putrakāra ṇāt || 35 ||
[Analyze grammar]

ājagāma suvarṇena sārddhaṃ devi mamāṃtikam |
prasādito'haṃ putrārthe vahninā hi varānane || 36 ||
[Analyze grammar]

rakṣaṇīyastvayā deva putroyaṃ tava śaṃkara |
bhāṇḍāgāre svakīye tu kriyatāṃ parameśvara || 37 ||
[Analyze grammar]

tvayi tuṣṭe mahādeva prāpyo'yaṃ nātra saṃśayaḥ |
icchayā dīyatāṃ devi yasya kasya janasya ca || 38 ||
[Analyze grammar]

iti tasya vacaḥ śrutvā pitṛdevamukhasya ca |
tatheti ca pratijñātaṃ mayā lobhādyaśasvini || 39 ||
[Analyze grammar]

snehānmayā vahniputra utsaṃge ca kṛtastadā |
snehādvai cuṃbito mūrdhni pariṣvaktaḥ punaḥpunaḥ || 40 ||
[Analyze grammar]

dadāmi te mahābhāga varaṃ varaya śobhanam |
parituṣṭo'smi vai kāmaṃ yatheṣṭaṃ samavāpnuhi || 41 ||
[Analyze grammar]

ahamājñāpayāmi tvāṃ śreyaścaivamavāpsyasi |
mamābhīṣṭakaraṃ sthānaṃ vidyate pṛthivītale || 42 ||
[Analyze grammar]

akṣayaṃ pralaye putra mahākālavanaṃ śubham |
tatraiva vidyate liṃgaṃ karkoṭakasya dakṣiṇe || 43 ||
[Analyze grammar]

mahāpāpaharaṃ putra darśanāddīptidāyakam |
tasya darśanamātreṇa kṛtakṛtyo bhaviṣyasi || 44 ||
[Analyze grammar]

puṇyaścaiva pavitreṇa durlabhaśca bhaviṣyati |
akulīnaḥ kulīnastu samalo nirmalo naraḥ || 45 ||
[Analyze grammar]

virūpo rūpavāṃścaiva tvatprasādādbhaviṣyati |
dānāni paripūrṇāni vratāni niyamāstathā || 46 ||
[Analyze grammar]

yajñāścaivopavāsāśca tīrthaṃ piṃḍādikaṃ tvayā |
susaṃpūrṇā bhaviṣyaṃti tava dānena suvrata || 47 ||
[Analyze grammar]

sarveṣāṃ caiva ratnānāmādhipatyaṃ kariṣyasi |
priyābhīṣṭo hi devānāṃ lokānāṃ ca bhaviṣyasi || 48 ||
[Analyze grammar]

ityukto'sau mahādevi divyarūpo varānane |
jvālāmālā vṛtaḥ puṇyo nirmalo hi babhūva ha || 49 ||
[Analyze grammar]

liṃgenoktaḥ suvarṇastu diṣṭyādiṣṭyeti kāṃcanam |
adyaprabhṛti nāmnā vai khyātiṃ yāsyasi bhūtale || 50 ||
[Analyze grammar]

sthātavyaṃ matsamīpe tu vahniputra tvayā sadā |
akṣayā bhavitā kīrttistvadīyā bhuvanatraye || 51 ||
[Analyze grammar]

ityukto devi liṃgena vahniputro'tinirmalaḥ |
jvālāvṛtatanurjātaḥ sūryakoṭisamaprabhaḥ || 52 ||
[Analyze grammar]

dīptirlabdhā suvarṇena jvālāmālākulā tadā |
ato devi suvikhyātaḥ svarṇajvāleśvaraḥ śivaḥ || 53 ||
[Analyze grammar]

yastamarcayate bhaktyā svarṇajvāleśvaraṃ śivam |
tasya saṃjāyate devi vijayo rājyamūrjitam |
aiśvaryaṃ dānaśaktiśca putrapautramanaṃtakam || 54 ||
[Analyze grammar]

jñānato'jñānato vāpi yatpāpaṃ kurute naraḥ |
tatkṣālayati dehotthaṃ darśanānnātra saṃśayaḥ || 55 ||
[Analyze grammar]

yatphalaṃ piṃḍadānena gayāyāṃ labhate naraḥ |
tatphalaṃ dviguṇaṃ proktaṃ pūjayā nātra saṃśayaḥ || 56 ||
[Analyze grammar]

gāyatryāḥ śatasāhasraiḥ samyagjaptaiśca yatphalam |
tatphalaṃ samavāpnoti svarṇajvāleśvarastuteḥ || 57 ||
[Analyze grammar]

yatpuṇyaṃ sarvadānena dattena vidhipūrvakam |
tatphalaṃ samavāpnoti kīrtanānnātra saṃśayaḥ || 58 ||
[Analyze grammar]

pūjayaṃti caturdaśyāṃ svarṇajvāleśvaraṃ tu ye |
pūjyaṃte te sadā lakṣmyā pūrayaṃtyā manorathān || 59 ||
[Analyze grammar]

rakṣitaṃ tridaśairdevi gaṇairnānāvidhaistathā |
liṃgaṃ kaścinna jānāti mama māyāvimohitaḥ || 60 ||
[Analyze grammar]

mama prasādāttaddevi dṛśyate liṃgamuttamam |
etatte kathitaṃ samyaganyacchṛṇu varānane || 61 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe caturaśītiliṅgamāhātmye svarṇajvāleśvaramāhātmyavarṇanaṃnāma ṣaṣṭho'dhyāyaḥ || 6 ||
[Analyze grammar]