Chapter 6

[English text for this chapter is available]

pārāśarya uvāca |
śṛṇu sūta mahābhāga kathāṃ śrutisahodarām |
yāṃ vai hṛdi nidhāyeha puruṣaḥ puruṣārthabhāk || 1 ||
[Analyze grammar]

tataḥ śrīdarśa nānaṃda sudhādhārādhunīṃ muniḥ |
avagāhya sapatnīkaḥ parāṃ mudamavāpa saḥ || 2 ||
[Analyze grammar]

vahnikuṃḍasamudbhūta sūtanirmalamānasa |
śṛṇuṣvaikaṃ purā vidbhirbhāṣitaṃ yatsubhā ṣitam || 3 ||
[Analyze grammar]

paropakaraṇaṃ yeṣāṃ jāgarti hṛdaye satām |
naśyaṃti vipadasteṣāṃ saṃpadaḥ syuḥ padepade || 4 ||
[Analyze grammar]

tīrthasnānairna sā śuddhirbahudānairna tatphalam |
tapobhirugraistannāpyamupakṛtyāya dāpyate || 5 ||
[Analyze grammar]

paropakṛtyā yo dharmo dharmo dānādisaṃbhavaḥ |
ekatra tulitau dhātrā tatra pūrvo bhavadguruḥ || 6 ||
[Analyze grammar]

parinirmathya vāgjālaṃ nirṇītamidameva hi |
nopakārātparo dharmo nāpakārādavaṃ param || 7 ||
[Analyze grammar]

upakarturagastyasya jātametannidarśanam |
kva tādṛkkāśijaṃ duḥkhaṃ kva tādṛkśrīmukhekṣaṇam || 8 ||
[Analyze grammar]

karikarṇāgracapalaṃ jīvitaṃ vividhaṃ vasu |
tasmātparopakaraṇaṃ kāryamekaṃ vipaścitā || 9 ||
[Analyze grammar]

yallakṣmīnāmamātrāptyā naro no māti kutracit |
sākṣātsamīkṣyatāṃ lakṣmīṃ kṛtakṛtyo bhavanmuniḥ || 10 ||
[Analyze grammar]

gacchanyadṛcchayāsotha dūrācchrīśailamaikṣata |
yatra sākṣānnivasati devaḥ śrītripurāṃtakaḥ || 11 ||
[Analyze grammar]

uvāca vacanaṃ patnīṃ tadā prītamanā muniḥ || |
ihasthitaiva paśya tvaṃ kāṃte kāṃtataraṃ param || 12 ||
[Analyze grammar]

śrīśaila śikharaṃ śrīmadidaṃtadyadvilokanāt |
punarbhavo manuṣyāṇāṃ bhavetra nabhavetkvacit || 13 ||
[Analyze grammar]

giri ścaturaśītyāyaṃ yojanānāṃ hi vismṛtaḥ |
sarvaliṃgamayo yasmādataḥ kuryātpradakṣiṇam || 14 ||
[Analyze grammar]

lopāmudrovāca |
kiṃcidvijñaptumicchāmi yadyājñā svāmino bhavet |
brūte hi yā'nujñātā patyā sā patitā bhavet || 15 ||
[Analyze grammar]

agastya uvāca |
kiṃ vaktukāmā devi tvaṃ brūhi tattvamaśaṃkitā |
na tvādṛśīnāṃ vākyaṃ hi patyuḥ khedāya jāyate || 16 ||
[Analyze grammar]

tataḥ papraccha sā devī praṇamya munimānatā |
sarveṣāṃ ca hitārthāya svasaṃdehāpanuttaye || 17 ||
[Analyze grammar]

lopāmudrovāca |
śrīśailaśikharaṃ dṛṣṭvā punarjanma na vidyate |
idameva hi satyaṃ cetkimarthaṃ kāśiriṣyate || 18 ||
[Analyze grammar]

agastiruvāca |
ākarṇaya varārohe satyaṃ pṛṣṭaṃ tvayāmale |
nirṇītamasakṛccaitanmunibhistattvaciṃtakaiḥ || 19 ||
[Analyze grammar]

muktisthānānyanekāni kṛtastatrāpinirṇayaḥ |
tāni te kathayāmyatra dattacittā bhava kṣaṇam || 20 ||
[Analyze grammar]

prathamaṃ tīrtharājaṃ tu prayāgākhyaṃ suviśrutam |
kāmikaṃ sarvatīrthānāṃ dharmakāmārthamokṣadam || 21 ||
[Analyze grammar]

naimiṣaṃ ca kurukṣetraṃ gaṃgādvāramavaṃtikā |
ayodhyā mathurā caiva dvārakāpyamarāvatī || 22 ||
[Analyze grammar]

sarasvatī siṃdhusaṃgo gaṃgāsāgarasaṃgamaḥ |
kāṃtī ca tryaṃbakaṃ cāpi saptagodāvarītaṭam || 23 ||
[Analyze grammar]

kālaṃjaraṃ prabhāsaśca tathā bada rikāśramaḥ |
mahālayastathoṃkārakṣetraṃ vai pauruṣottamam || 24 ||
[Analyze grammar]

gokarṇo bhṛgukacchaśca bhṛgutuṃgaśca puṣkaram |
śrīparvatādi tīrthāni dhārātīrthaṃ tathaiva ca || 25 ||
[Analyze grammar]

mānasānyapi tīrthāni satyādīni ca vai priye |
etāni muktidānyeva nātra kāryā vicāraṇā || 26 ||
[Analyze grammar]

gayā tīrthaṃ ca yatproktaṃ pitṝṇāṃ hi muktidam |
pitāmahānāmṛṇato muktāstattanayā api || 27 ||
[Analyze grammar]

sadharmiṇyuvāca |
mānasānyapi tīrthāni yānyuktāni mahāmate |
kāni kāni ca tānīha hyetadākhyātumarhasi || 28 ||
[Analyze grammar]

agastya uvāca |
śṛṇu tīrthāni gadato mānasāni mamānaghe |
yeṣu samyaṅnaraḥ snātvā prayāti paramāṃ gatim || 29 ||
[Analyze grammar]

satyaṃ tīrthaṃ kṣamā tīrthaṃ tīrthamindriyanigrahaḥ |
sarvabhūtadayātīrthaṃ tīrthamārjavameva ca || 30 ||
[Analyze grammar]

dānaṃ tīrthaṃ damastīrthaṃ saṃtoṣastīrthamucyate |
brahmacaryaṃ paraṃ tīrthaṃ tīrthaṃ ca priyavāditā || 31 ||
[Analyze grammar]

jñānaṃ tīrthaṃ dhṛtistīrthaṃ tapastīrthamudāhṛtam |
tīrthānāmapi tattīrthaṃ viśuddhirmanasaḥ parā || 32 ||
[Analyze grammar]

na jalāplutadehasya snānamityabhidhīyate |
sa snāto yo damasnātaḥ śuciḥ śuddhamanomalaḥ || 33 ||
[Analyze grammar]

yo lubdhaḥ piśunaḥ krūro dāṃbhiko viṣayātmakaḥ |
sarvatīrtheṣvapi snātaḥ pāpo malina eva saḥ || 34 ||
[Analyze grammar]

na śarīra mala tyāgānnaro bhavati nirmalaḥ |
mānase tu male tyakte bhavatyaṃtaḥ sunirmalaḥ || 35 ||
[Analyze grammar]

jāyaṃte ca mriyaṃte ca jaleṣveva jalaukasaḥ |
na ca gacchaṃti te svargamaviśuddhamanomalāḥ || 36 ||
[Analyze grammar]

viṣayeṣvati saṃrāgo mānaso mala ucyate |
teṣveva hi virāgo sya nairmalyaṃ samudāhṛtam || 37 ||
[Analyze grammar]

cittamaṃtargataṃ duṣṭaṃ tīrthasnānānna śuddhyati |
śataśotha jalairdhautaṃ surābhāṃḍamivāśuci || 38 ||
[Analyze grammar]

dānamijyātapaḥśaucaṃ tīrthasevā śrutaṃ tathā |
sarvāṇyetānyatīrthāni yadi bhāvo na nirmalaḥ || 39 ||
[Analyze grammar]

nigṛhīteṃdriyagrāmo yatraiva ca vasennaraḥ |
tatra tasya kurukṣetraṃ naimiṣaṃ puṣkarāṇi ca || 40 ||
[Analyze grammar]

jñānapūte jñānajale rāgadveṣamalāpahe |
yaḥ snāti mānase tīrthe sa yāti paramāṃ gatim || 41 ||
[Analyze grammar]

etatte kathitaṃ devi mānasaṃ tīrthalakṣaṇam |
bhaumānāmapi tīrthānāṃ puṇyatve kāraṇaṃ śṛṇu || 42 ||
[Analyze grammar]

yathā śarīrasyoddeśāḥ kecinmedhyatamāḥ smṛtāḥ |
tathā pṛthivyāmuddeśāḥ kecitpuṇyatamāḥ smṛtāḥ || 43 ||
[Analyze grammar]

prabhāvādadbhutādbhūmeḥ salilasya ca tejasaḥ |
parigrahānmunīnāṃ ca tīrthānāṃ puṇyatā smṛtā || 44 ||
[Analyze grammar]

tasmādbhaumeṣu tīrtheṣu mānaseṣu ca nityaśaḥ |
ubhayeṣvapi yaḥ snāti sa yāti paramāṃ gatima || 45 ||
[Analyze grammar]

anupoṣya trirātrāṇi tīrthānyanabhigamya ca |
adattvā kāṃcanaṃ gāśca daridro nāma jāyate || 46 ||
[Analyze grammar]

agniṣṭomādibhiryajñairiṣṭvā vipuladakṣiṇaiḥ |
na tatphalamavāpnoti tīrthabhigamanena yat || 47 ||
[Analyze grammar]

yasya hastau ca pādau ca manaścaiva susaṃyatam |
vidyā tapaśca kīrtiśca sa tīrthaphalamaśnute || 48 ||
[Analyze grammar]

pratigrahādupāvṛttaḥ saṃtuṣṭo yenakenacit |
ahaṃkāra vimuktaśca sa tīrthaphalamaśnute || 49 ||
[Analyze grammar]

adaṃbhako nirāraṃbho laghvāhāro jiteṃdriyaḥ |
vimuktasarvasaṃgairyaḥ sa tīrthaphalamaśnute || 50 ||
[Analyze grammar]

akopano'malamatiḥ satyavādī dṛḍhavrataḥ |
ātmopamaśca bhūteṣu satīrthaphalamaśnute |
tīrthānyanusarandhīraḥ śraddadhānaḥ samāhitaḥ |
kṛtapāpo viśuddhyeta kiṃ punaḥ śuddhakarmakṛt || 52 ||
[Analyze grammar]

tiryagyoni na vai gacchetkudeśe naiva jāyate |
na duḥkhī syātsvargabhākca mokṣopāyaṃ ca viṃdati || 53 ||
[Analyze grammar]

aśraddadhānaḥ pāpātmā nāstiko'cchinnasaṃśayaḥ |
hetuniṣṭhaśca paṃcaite na tīrthaphalabhāginaḥ || 54 ||
[Analyze grammar]

tīrthāni ca yathoktena vidhinā saṃcaraṃti ye |
sarvadvaṃdvasahā dhīrāste narāḥ svargabhāginaḥ || 55 ||
[Analyze grammar]

tīrthayātrāṃ cikīrṣuḥ prāgvidhāyopoṣaṇaṃ gṛhe |
gaṇeśaṃ ca pitṝnviprānsādhūñchaktyā prapūjya ca || 56 ||
[Analyze grammar]

kṛtapāraṇako hṛṣṭo gacchenniyamadhṛkpunaḥ |
āgatyābhyarcya pitṝnyathoktaphalabhāgbhavet || 57 ||
[Analyze grammar]

na parīkṣyo dvijastīrtheṣvannārthī bhojya eva ca |
saktubhiḥ piṃḍadānaṃ ca caruṇā pāyasena ca || 58 ||
[Analyze grammar]

kartavyamṛṣibhirdṛṣṭaṃ piṇyākena guḍena ca |
śrāddhaṃ tatra prakartavyamarghyāvāhanavarjitam || 59 ||
[Analyze grammar]

akālepyathavā kāle tīrthe śrāddhaṃ ca tarpaṇam |
avilaṃbena kartavyaṃ naiva vighnaṃ samācaret || 60 ||
[Analyze grammar]

tīrthaṃ prāpya prasaṃgena snānaṃ tīrthe samācaret |
snānajaṃ phalamāpnoti tīrthayātrāśritaṃ sa ca || 61 ||
[Analyze grammar]

nṛṇāṃ pāpakṛtāṃ tīrthe pāpasya śamanaṃ bhavet |
yathoktaṃ phaladaṃ tīrthaṃ bhavecchraddhātmanāṃ nṛṇām || 62 ||
[Analyze grammar]

ṣoḍaśāṃśaṃ sa labhate yaḥ parāthaṃ ca gacchati |
ardhaṃ tīrthaphalaṃ tasya yaḥ prasaṃgena gacchati || 63 ||
[Analyze grammar]

kuśa pratikṛtiṃ kṛtvā tīrthavāriṇi majjayet |
majjayecca yamuddiśya soṣṭamāṃśaṃ labheta vai || 64 ||
[Analyze grammar]

tīrthopavāsaḥ kartavyaḥ śiraso muṃḍanaṃ tathā |
śirogatāni pāpāni yāṃti muṃḍanato yataḥ || 65 ||
[Analyze grammar]

yadahni tīrthaprāptiḥ syāttatohnaḥ pūrvavāsare |
upavāsastu kartavyaḥ prāptāhni śrāddhado bhavet || 66 ||
[Analyze grammar]

tīrthaprasaṃgāttīrthāṃgamapyuktaṃ tvatpuromayā |
svargasādhanamevaitanmokṣopāyaśca vai bhavet || 67 ||
[Analyze grammar]

kāśīkāṃtī ca māyākhyā tvayodhyādvāravatyapi |
mathurāvaṃtikā caitāḥ sapta puryotra mokṣadāḥ || 68 ||
[Analyze grammar]

śrīśailo mokṣadaḥ sarvaḥ kedāropi tato'dhikaḥ |
śrīśailāccāpi kedārātprayāgaṃ mokṣadaṃ param || 69 ||
[Analyze grammar]

prayāgādapi tīrthāgryādavimuktaṃ viśiṣyate |
yathāvimukte nirvāṇaṃ na tathākvāpyasaṃśayam || 70 ||
[Analyze grammar]

anyāni muktikṣetrāṇi kāśīprāptikarāṇi ca |
kāśīṃ dhyāyamimaṃ śrutvā naro niyatamānasaḥ |
śrāvayitvā dvijāṃścāpi śraddhābhaktisamanvitān || 73 ||
[Analyze grammar]

kṣatriyāndharmaniratānvaiśyānsanmārgavartinaḥ |
śūdrāndvijeṣu bhaktāṃśca niṣpāpo jāyate dvijaḥ || 74 ||
[Analyze grammar]

iti śrīskāndemahāpurāṇa ekāśīti sāhasryāṃ saṃhitāyāṃ caturthe kāśīkhaṇḍe tīrthādhyāyonāma ṣaṣṭho'dhyāyaḥ || 6 ||
[Analyze grammar]