Chapter 38

[English text for this chapter is available]

vyāsa uvāca |
tataḥ prabhāte vimale kṛtapūrvāhnikakriyāḥ |
śubhavastraparīdhānāḥ phala hastāḥ pṛthakpṛthak || 1 ||
[Analyze grammar]

ratnāṃgadāḍhyadordaṃḍā aṃgulīyakabhūṣitāḥ |
karṇābharaṇasaṃyuktāḥ samājagmuḥ praharṣitāḥ || 2 ||
[Analyze grammar]

rājadvāraṃ tu saṃprāpya saṃta sthurbrahmavādinaḥ |
tāndṛṣṭvā rājaputrastu īṣatprahasito balī || 3 ||
[Analyze grammar]

rāmaṃ ca hanumaṃtaṃ ca gatvā viprāḥ samāgatāḥ |
śrūyatāṃ maṃtriṇaḥ sarve dṛśyaṃto dvija sattamān || 4 ||
[Analyze grammar]

etaduktvā tu vacanaṃ tūṣṇīṃ bhūtvā sthito nṛpaḥ |
tato dvitrā dvijāḥ sarve upaviṣṭāḥ kramāttataḥ || 5 ||
[Analyze grammar]

kṣemaṃ papracchurnṛpatiṃ hastirathapadātiṣu |
tataḥ provāca nṛpatirviprānprati mahāmanāḥ || 6 ||
[Analyze grammar]

arihaṃtaprasādena sarvatra kuśalaṃ mama |
sā jihvā yā jinaṃ stau ti tau karau yau jinārcanau || 7 ||
[Analyze grammar]

sā dṛṣṭiryā jine līnā tanmano yajjine ratam |
dayā sarvatra kartavyā jīvātmā pūjyate sadā || 8 ||
[Analyze grammar]

yogaśālā hi gaṃtavyā karttavyaṃ guruvaṃdanam |
na cakāraṃ mahāmaṃtraṃ japitavyamaharniśam || 9 ||
[Analyze grammar]

paṃcūṣaṇaṃ hi karttavyaṃ dātavyaṃ śramaṇe sadā |
śrutvā vākyaṃ tato viprāstasya daṃtānapīḍayan || 10 ||
[Analyze grammar]

vimucya dīrghaniśvāsamūcuste nṛpatiṃ prati |
rāmeṇa kathitaṃ rājandhīmatā ca hanūmatā || 11 ||
[Analyze grammar]

dīyatāṃ vipravṛttiṃ ca dharmiṣṭho'si dharātale |
jñāyate tava ddattā syānmadattā naiva naiva ca || 12 ||
[Analyze grammar]

rakṣasva rāmavākyaṃ tvaṃ yatkṛtvā tvaṃ sukhī bhava || 13 ||
[Analyze grammar]

rājovāca |
yatra rāmahanūmaṃtau yāṃtu sarve'pi tatra vai |
rāmo dāsyati sarvasvaṃ kiṃ prāptā iha vai dvijāḥ || 14 ||
[Analyze grammar]

na dāsyāmi na dāsyāmi ekāṃ caiva varāṭikām |
na grāmaṃ naiva vṛttiṃ ca gacchadhvaṃ yatra rocate || 15 ||
[Analyze grammar]

tacchrutvā dāruṇaṃ vākyaṃ dvijāḥ kopākulāstadā |
sahasva rāmakopaṃ hi sāmpratañca hanūmataḥ || 16 ||
[Analyze grammar]

ityuktvā hanumaddattā vāmakakṣodbhavā puṭī |
prakṣiptā cāsya nilaye vyāvṛttā dvijasattamāḥ || 17 ||
[Analyze grammar]

gate tadā viprasaṃghe jvālāmālākulaṃ tvabhūt |
agnijvālākulaṃ sarvaṃ saṃjātaṃ caiva tatra hi || 18 ||
[Analyze grammar]

dahyaṃte rājavastūnicchatrāṇi cāmarāṇi ca |
kośāgārāṇi sarvāṇi āyudhāgārameva ca || 19 ||
[Analyze grammar]

mahiṣyo rājaputrāśca gajā aśvā hyanekaśaḥ |
vimānāni ca dahyaṃte dahyaṃte vāhanāni ca || 20 ||
[Analyze grammar]

śibikāśca vicitrā vai rathāścaiva sahasraśaḥ |
sarvatra dahyamānaṃ ca dṛṣṭvā rājāpi vivyathe || 21 ||
[Analyze grammar]

na kopi trātā tasyāsti mānavā bhayaviklavāḥ |
na maṃtrayaṃtrairvahniḥ sa sādhyate na ca mūlikaiḥ || 22 ||
[Analyze grammar]

kauṭilyakoṭināśī ca yatra rāmaḥ prakupyate |
tatra sarve praṇaśyaṃti kiṃ tatkumārapālakaḥ || 23 ||
[Analyze grammar]

sarvaṃ tajjavalitaṃ dṛṣṭvā nagnakṣapaṇakāstadā |
dhṛtvā kareṇa pātrāṇi nītvā daṃḍāñchubhānapi || 24 ||
[Analyze grammar]

raktakaṃbalikā gṛhya vepamānā muhurmuhuḥ |
anupānahikāścaiva naṣṭāḥ sarve diśo daśa || 26 ||
[Analyze grammar]

kolāhalaṃ prakurvāṇāḥ palāyadhvamiti bruvan |
dāhitā vipramukhyaiśca vayaṃ sarve na saṃśayaḥ || 26 ||
[Analyze grammar]

kecicca bhagnapātrāste bhagnadaṃ ṇḍāstathāpare |
pranaṣṭāśca vivastrāste vītarāgamiti bruvan || 27 ||
[Analyze grammar]

arhatameva kecicca palāyanaparāyaṇāḥ |
tato vāyuḥ samabhavadvahnimāṃdolayanniva || 28 ||
[Analyze grammar]

preṣito vai hanumatā viprāṇāṃ priyakāmyayā |
dhāvansa nṛpatiḥ paścāditaścetaśca vai tadā || 29 ||
[Analyze grammar]

padātirekaḥ prarudankva viprā iti jalpakaḥ |
lokācchrutvā tato rājā gatastatra yato dvijāḥ || 30 ||
[Analyze grammar]

gatvā tu sahasā rājangṛhītvā caraṇau tadā |
viprāṇāṃ nṛpatirbhūmau mūrcchito nyapata ttadā || 31 ||
[Analyze grammar]

uvāca vacanaṃ rājā viprānvinayatatparaḥ |
japandāśarathiṃ rāmaṃ rāmarāmeti vai punaḥ || 32 ||
[Analyze grammar]

tasya dāsasya dāsohaṃ rāmasya ca dvija sya ca |
ajñānatimirāṃdhena jātosmyaṃdho hi saṃprati || 33 ||
[Analyze grammar]

aṃjanaṃ ca mayā labdhaṃ rāmanāmamahauṣadham |
rāmaṃ muktvā hi ye martyā hyanyaṃ deva mupāsate |
dahyaṃte te'gninā svāminyathāhaṃ mūḍhacetanaḥ || 34 ||
[Analyze grammar]

harirbhāgīrathī viprā viprā bhāgīrathī hariḥ |
bhāgīrathī harirviprāḥ sāramekaṃ jagattraye || 35 ||
[Analyze grammar]

svargasya caitra sopānaṃ viprā bhāgīrathī hariḥ |
rāmanāmamahārajjvā vaikuṃṭhe yena nīyate || 36 ||
[Analyze grammar]

ityevaṃ praṇamanrājā prāṃjalirvākyamabravīt |
vahniḥ praśāmyatāṃ viprāḥ śāsanaṃ vo dadāmyaham || 37 ||
[Analyze grammar]

dāso'smi sāṃprataṃ viprā na me vāganyathā bhavet |
yatpāpaṃ brahmahatyāyāḥ para dārābhigāminām || 38 ||
[Analyze grammar]

yatpāpaṃ madyapānāṃ ca suvarṇasteyināṃ tathā |
yatpāpaṃ gurughātānāṃ tatpāpaṃ vā bhavenmama || 39 ||
[Analyze grammar]

yaṃyaṃ ciṃtayate kāmaṃ taṃ taṃ dāsyāmyahaṃ punaḥ |
viprabhaktiḥ sadā kāryā rāmabhaktistathaiva ca || 40 ||
[Analyze grammar]

anyathā karaṇīyaṃ me na kadāci ddvijottamāḥ || 41 ||
[Analyze grammar]

vyāsa uvāca |
tasminnavasare viprā jātā bhūpa dayālavaḥ |
anyā yā puṭikā cāsītsā dattā śāpaśāṃtaye || 42 ||
[Analyze grammar]

jīvitaṃ caiva tatsainyaṃ jātaṃ kṣipteṣu romasu |
diśaḥ prasannāḥ saṃjātāḥ śāṃtā digjanitasvanāḥ || 43 ||
[Analyze grammar]

prajā svasthā 'bhavattatra harṣanirbharamānasā |
avatasthe yathāpūrvaṃ putrapautrādikaṃ tathā || 44 ||
[Analyze grammar]

viprājñākāriṇo lokāḥ saṃjātāśca yathā purā |
viṣṇudharmaṃ parityajya nānyaṃ jānaṃti te vṛṣam || 45 ||
[Analyze grammar]

navīnaṃ śāsanaṃ kṛtvā pūrvavadvidhipūrvakam |
niṣkāsitāstu pāṣaṃḍāḥ kṛtaśāstraprayojakāḥ || 46 ||
[Analyze grammar]

vedabāhyāḥ pranaṣṭāste uttamādhamamadhyamāḥ |
ṣaṭtriṃśacca sahasrāṇi ye'bhūvangobhujāḥ purā || 47 ||
[Analyze grammar]

teṣāṃ madhyāttu saṃjātā aḍhavījā vaṇigjanāḥ |
śuśrūṣārthaṃ brāhmaṇānāṃ rājñā sarve nirūpitāḥ || 48 ||
[Analyze grammar]

sadācārāḥ sunipuṇā devabrāhmaṇapūjakāḥ |
tyaktvā pākhaṇḍamārgaṃ tu viṣṇubhaktiparāstu te || 49 ||
[Analyze grammar]

jāhnavītīramāsādya traividyebhyo dadau nṛpaḥ |
śāsanaṃ tu yadā dattaṃ teṣāṃ vai bhaktipūrvakam || 50 ||
[Analyze grammar]

sthānadharmātpracalitā vāḍavāste samāgatāḥ |
nṛpo vijñāpito vipraistairevaṃ kleśakāribhiḥ || 51 ||
[Analyze grammar]

ye tyaktavāco vipreṃdrāstānniḥsāraya bhūpate |
parasparaṃ vivādāstu saṃjātā dattavṛttaye || 52 ||
[Analyze grammar]

nyāya pradaśanārthaṃ ca kāritāstu sabhāsadaḥ |
hastākṣareṣu dṛṣṭeṣu pṛthakpṛthakprapāditam || 53 ||
[Analyze grammar]

etacchrutvā tato rājā tulādānaṃ cakāra ha |
dīyamāne tadā dāne cāturvidyā babhāṣire || 54 ||
[Analyze grammar]

asmābhirhāritā jātiḥ kathaṃ kurmaḥ pratigraham |
nivāritāstu te sarve sthānānmoherakā dvijāḥ || 55 ||
[Analyze grammar]

daśapaṃca sahasrāṇi vedavedāṃgapāragāḥ |
tatastena tadā rājanrājñā rāmānuvartinā || 56 ||
[Analyze grammar]

āhūtā vāḍavāṃstāstu jñātibhedaṃ cakāra saḥ |
trayīvidyā vāḍavā ye setubaṃdhaṃ prati prabhum || 57 ||
[Analyze grammar]

gatāste vṛttibhājaḥ syurnānye vṛttyabhibhāginaḥ |
tatra naiva gatā ye vai cāturvidyatvamāgatāḥ || 58 ||
[Analyze grammar]

vaṇigbhirna ca saṃbaṃdho na vivāhaśca taiḥ saha |
grāmavṛttau na saṃbaṃdho jñātibhede kṛte sati || 59 ||
[Analyze grammar]

dvijabhaktiparāḥ śūdrāḥ ye pākhaṃḍairna lopitāḥ |
jaina dharmātparāvṛttāste gobhūjāstathottamāḥ || 60 ||
[Analyze grammar]

ye ca pākhaṃḍaniratā rāmaśāsanalopakāḥ |
sarve viprāstathā śūdrā pratibaṃdhena yojitāḥ || 61 ||
[Analyze grammar]

satyapratijñāṃ kurvāṇāstatrasthāḥ sukhino'bhavan |
cāturvidyā bahirgrāme rājñā tena nivāsitāḥ || 62 ||
[Analyze grammar]

yathā rāmo na kupyeta tathā kāryaṃ mayā dhruvama |
parāṅmukhā ye rāmasya sanmukhānugatāḥ kila || 63 ||
[Analyze grammar]

cāturvidyāste vijñeyā vṛttibāhyāḥ kṛtāstadā |
kṛtakṛtyastadā jāto rājā kumārapālakaḥ || 64 ||
[Analyze grammar]

viprāṇāṃ purataḥ prāha praśrayeṇa vacastadā |
grāmavṛttirna me luptā etadvai devanirmitam || 65 ||
[Analyze grammar]

svayaṃ kṛtāparādhānāṃ doṣo kasya na dīyate |
yathā vane kāṣṭhavarṣādvahniḥ syāddaivayogataḥ || 66 ||
[Analyze grammar]

bhavadbhistu paṇaḥ prokto hyabhijñānasya hetave |
rāmasya śāsanaṃ kṛtvā vāyuputrasya hetave || 67 ||
[Analyze grammar]

vyāvṛttā vāḍavā yūyaṃ sa doṣaḥ kasya dīyate |
avasāne hariṃ smṛtvā mahāpāpayuto'pi vā || 68 ||
[Analyze grammar]

viṣṇulokaṃ vrajatyāśu saṃśayastu kathaṃ bhavet |
mahatpuṇyodaye nṝṇāṃ buddhiḥ śreyasi jāyate || 69 ||
[Analyze grammar]

pāpasyodayakāle ca viparītā hi sā bhavet |
sakṛtpālayate yastu dharmeṇaitajjagattrayam || 70 ||
[Analyze grammar]

yoṃtarātmā ca bhūtānāṃ saṃśayastatra no hitaḥ |
iṃdrādayo'marāḥ sarve sanakādyāstapodhanāḥ || 71 ||
[Analyze grammar]

muktyarthamarcayaṃtīha saṃśayastatra no hitaḥ |
sahasranāma tattulyaṃ rāmanāmeti gīyate || 72 ||
[Analyze grammar]

tasminnaniścayaṃ kṛtvā kathaṃ siddhirbhavediha |
mama janmakṛtātpuṇyādabhijñānaṃ dadau hariḥ || 73 ||
[Analyze grammar]

pākhaṃḍādyatkṛtaṃ pāpaṃ mṛṣṭaṃ tadvaḥ praṇāmataḥ |
prasīdaṃtu bhavaṃtaśca tyaktvā krodhaṃ mamādhunā || 74 ||
[Analyze grammar]

brāhmaṇā ūcuḥ |
rājandharmo viluptaste prāpitānāṃ tathā punaḥ |
avaśyaṃ bhāvino bhāvā bhavaṃti mahatāmapi || 75 ||
[Analyze grammar]

nagnatvaṃ nīlakaṇṭhasya mahāhiśayanaṃ hareḥ |
etaddaivakṛtaṃ sarvaṃ prabhuryaḥ sukhaduḥkhayoḥ || 76 ||
[Analyze grammar]

satyapratijñāstraividyā bhajaṃtu rāmaśāsanam |
asmākaṃ tu paraṃ dehi sthānaṃ yatra vasāmahe || 77 ||
[Analyze grammar]

teṣāṃ tu vacanaṃ śrutvā sukhamicchurdvijanmanām |
teṣāṃ sthānaṃ tu dattaṃ vai sukhavāsaṃ tu nāmataḥ || 78 ||
[Analyze grammar]

hiraṇyaṃ puṣpavāsāṃsi gāvaḥ kāmadughā nṛpa |
svarṇālaṃkaraṇaṃ sarvaṃ nānāvastucayaṃ tathā || 79 ||
[Analyze grammar]

śraddhayā parayā dattvā mudaṃ lebhe narādhipaḥ |
trayīvidyāstu te jñeyāḥ sthāpitā ye trimūrtibhiḥ || 80 ||
[Analyze grammar]

caturthenaiva bhūpena sthāpitāḥ sukhavāsane |
 te babhūburdvijaśreṣṭhāścāturvidyāḥ kalau yuge || 81 ||
[Analyze grammar]

cāturvidyāśca te sarve dharmāraṇye pratiṣṭhitāḥ |
vedoktā āśiṣo dattvā tasmai rājñe mahātmane || 82 ||
[Analyze grammar]

rathairaśvairuhyamānāḥ kṛtakṛtyā dvijātayaḥ |
mahatpramodayuktāste prāpurmoherakaṃ mahat || 83 ||
[Analyze grammar]

pauṣaśuklatrayodaśyāṃ labdhaṃ śāsanakaṃ dvijaiḥ |
balipradānaṃ tu kṛtamuddiśya kuladevatām || 84 ||
[Analyze grammar]

varṣevarṣe prakarttavyaṃ balidānaṃ yathāvidhi |
kāryaṃ ca maṃgalasnānaṃ puruṣeṇa mahātmanā || 85 ||
[Analyze grammar]

gītaṃ nṛtyaṃ tathā vādyaṃ kurvīta taddine dhuvam |
tanmāse taddine naiva vṛttināśo bhavedyathā || 86 ||
[Analyze grammar]

daivādatītakāle cetvṛddhirāpadyate yadā |
tadā prathamataḥ kṛtvā paścādvṛddhirvidhīyate || 87 ||
[Analyze grammar]

ye ca bhinnaprapāprāyāstraividyā moḍhavaṃśajāḥ |
tathā cāturvedinaśca kurvaṃti gotrapūjanam || 88 ||
[Analyze grammar]

varṣamadhye prakurvīta tathā supte janārddane |
pauṣe ca luptaṃ kṛtvā ca śrautaṃ smārttaṃ karoti yaḥ || 89 ||
[Analyze grammar]

tatra krodhasamāviṣṭā nighnaṃti kuladevatāḥ |
vivāhotsavakāle ca mauṃjībaṃdhādikarmaṇi || 90 ||
[Analyze grammar]

muhūrtaṃ gaṇanāthasya tataḥ prabhṛti śobhanam || 91 ||
[Analyze grammar]

nirvāsitāstu ye viprā āmarājñā svaśāsanāt |
paṃcadaśasahasrāṇi yayuste sukhavāsakan || 92 ||
[Analyze grammar]

paṃcapañcāśato grāmāndadau rāmaḥ purā svayam |
tatrasthā vaṇijaścaiva teṣāṃ vṛttimakalpayan || 93 ||
[Analyze grammar]

aḍālajā māṇḍalīyā gobhūjāśca pavitrakāḥ |
brāhmaṇānāṃ vṛttidāste brahmasevāsu tatparāḥ || 94 ||
[Analyze grammar]