Chapter 8

[English text for this chapter is available]

ṛṣaya ūcuḥ |
bhagavansūtasarvajña kṛṣṇadvaipāyanapriya |
tvanmukhādvai kathāḥ śrutvā śrotrakāmṛtavarṣiṇīḥ || 1 ||
[Analyze grammar]

tṛptirna jāyate'smākaṃ tvadvacomṛtapāyinām |
ataḥ śuśrūṣamāṇānāṃ bhūyo brūhi kathāḥ śubhāḥ || 2 ||
[Analyze grammar]

vetālavaradaṃnāma cakratīrthasya dakṣiṇe |
tīrthamasti mahāpuṇyamityavādīdbhavānpurā || 3 ||
[Analyze grammar]

vetālavaradābhikhyā tīrthasyāsyāgatā katham |
kiṃprabhāvaṃ ca tattīrthametanno vaktumarhasi || 4 ||
[Analyze grammar]

śrīsūta uvāca |
sādhupṛṣṭaṃ hi yuṣmābhiratiguhyaṃ munīśvarāḥ |
śṛṇudhvaṃ manasā sārddhaṃ bravīmyatyadbhutāṃ kathām || 5 ||
[Analyze grammar]

pāmarā api modante yāṃ vai śrutvā kathāṃ śubhām |
kathā ceyaṃ mahāpuṇyā purā kailāsaparvate || 6 ||
[Analyze grammar]

kelikāleṣu pāvatyai śaṃbhunā kathitā dvijāḥ |
tāṃ bravīmi kathāmenāmatyadbhutatarāṃ hi vaḥ || 7 ||
[Analyze grammar]

purā hi gālavonāma maharṣiḥ satyavākchuciḥ |
ciṃtayānaḥ paraṃ brahma tapastepe nijāśrame || 8 ||
[Analyze grammar]

tasya kanyā mahābhāgā rūpayauvanaśālinī |
nāmnā kāṃtimatī bālā vyacaratpituraṃtike || 9 ||
[Analyze grammar]

āharaṃtī ca puṣpāṇi balyarthaṃ tasya vai muneḥ |
vedisaṃmārjanādīni samidāharaṇāni ca || 10 ||
[Analyze grammar]

kurvatī pitaraṃ bālā samyakparicacāra ha |
kadācitsā tu valyarthaṃ puṣpāṇyāhartumudyatā || 11 ||
[Analyze grammar]

tasminvane kāṃtimatī sudūramagamattadā |
tatra puṣpāṇi ramyāṇi samāhṛtya ca peṭake || 12 ||
[Analyze grammar]

tūrṇaṃ nivavṛte bālā pitṛśuśrūṣaṇe ratā |
nivartamānāṃ tāṃ kanyāṃ vidyādharakumārakau || 13 ||
[Analyze grammar]

sudarśanasukarṇākhyau vimānasthau dadarśatuḥ |
tāṃ dṛṣṭvā gālavasutāṃ rūpayauvanaśālinīm || 14 ||
[Analyze grammar]

kāmasya patnīṃ lalitāṃ ratiṃ mūrtimatīmiva |
sudarśanābhidho jyeṣṭho vidyādharakumārakaḥ || 15 ||
[Analyze grammar]

harṣasaṃphullanayanaścakame kāmamohitaḥ |
pūrṇacandrānanāṃ tāṃ vai vīkṣamāṇo muhurmuhuḥ || 16 ||
[Analyze grammar]

tayā riraṃsukāmo'sau vimānāgrādavātarat |
tāmupetya muneḥ kanyāmityuvāca sudarśanaḥ || 17 ||
[Analyze grammar]

sudarśana uvāca |
kāsi bhadre sutā kasya rūpayauvanaśālinī |
rūpamapratimaṃ hyetadāhlādayati me manaḥ || 18 ||
[Analyze grammar]

tvāṃ dṛṣṭvā ratisaṃkāśāṃ bādhate māṃ manobhavaḥ |
sukaṇṭhanāmadheyasya vidyādharapateraham || 19 ||
[Analyze grammar]

ātmajo rūpasaṃpanno nāmnā caiva sudarśanaḥ |
pratigṛhṇīṣva māṃ bhadre rakṣa māṃ karuṇādṛśā || 20 ||
[Analyze grammar]

bhartāraṃ māṃ samāsādya sarvānbhogānavāpsyasi |
ityākarṇya vacastasya vidyādharasutasya sā || 21 ||
[Analyze grammar]

tadā kāṃtimatī vākyaṃ dharmayuktamabhāṣata |
sudarśana mahābhāga vidyādharapateḥ suta || 22 ||
[Analyze grammar]

ātmajāṃ māṃ vijānīhi gālavasya mahātmanaḥ |
kanyā cāhamanūḍhāsmi pitṛśu śrūṣaṇe ratā || 23 ||
[Analyze grammar]

balyarthaṃ hi pituścāhaṃ puṣpāṇyāhartumāgatā |
āharaṃtyāśca puṣpāṇi yāma eko nyavartata || 24 ||
[Analyze grammar]

madvilaṃbena sa munirdeva tārcanatatparaḥ |
kopaṃ vidhāsyate nūnaṃ tapasvī munipuṃgavaḥ || 25 ||
[Analyze grammar]

tacchīghramadya gacchāmi puṣpāṇyapyāhṛtāni me |
kanyāśca piturādhīnā na svatantrāḥ kadācana || 26 ||
[Analyze grammar]

yadi māmicchati bhavānpitaraṃ mama yācaya |
iti vidyādharasutamuktvā kāṃtimatī tadā || 27 ||
[Analyze grammar]

piturāśaṃkitā tūrṇamā śramaṃ gantumudyatā |
gacchantīṃ tāṃ samālokya vidyādharakumārakaḥ || 28 ||
[Analyze grammar]

tūrṇaṃ jagrāha keśeṣu dhāvitvā madanārditaḥ |
abhyetya nijakeśeṣu gṛhṇante taṃ vilokya sā || 29 ||
[Analyze grammar]

uccaiścakraṃda sahasā kurarīva muneḥ sutā |
asmādvidyādharasutājjanaka trāhi māṃ vibho || 30 ||
[Analyze grammar]

balādgṛhṇāti duṣṭātmā vidyādharasuto'dya mām |
itthamuccaiḥ pracukrośa svāśramānnātidūrataḥ || 31 ||
[Analyze grammar]

tadākraṃditamākarṇya gandhamādanavāsinaḥ |
munayastu puraskṛtya gālavaṃ munipuṃgavam || 32 ||
[Analyze grammar]

kimetaditi vijñātuṃ taṃ deśaṃ tūrṇamāyayuḥ |
taṃ deśaṃ tu samāgatya sarve te ṛṣipuṃgavāḥ || 33 ||
[Analyze grammar]

vidyādharagṛhītāṃ tāṃ dadṛśurmu nikanyakām |
vidyādharasutaṃ cānyamaṃtike samupasthitam || 34 ||
[Analyze grammar]

etaddṛṣṭvā mahāyogī gālavo munipuṃgavaḥ |
gataḥ kopavaśaṃ kiṃciddurāpmānaṃ śaśāpa tam || 35 ||
[Analyze grammar]

kṛtavānīdṛśaṃ kāryaṃ yattvaṃ vidyādharādhama |
tadyāhi mānuṣīṃ yoniṃ svasya duṣkarmaṇaḥ phalam || 36 ||
[Analyze grammar]

saṃprāpya mānuṣaṃ janma bahuduḥkhasamākulam |
acireṇa tu kālena tasminneva tu janmani || 37 ||
[Analyze grammar]

manuṣyairapi niṃdyaṃ tadvetālatvaṃ prayāsyasi |
māṃsāni śoṇitaṃ caiva sarvadā bhakṣayiṣyasi || 38 ||
[Analyze grammar]

vetālā rākṣasaprāyā balādgṛhṇanti yoṣitaḥ |
tasmāttvaṃ mānuṣo bhūtvā vetālatvamavāpsyasi || 39 ||
[Analyze grammar]

tava duṣkarmaṇo yo'sāvanumaṃtā kaniṣṭhakaḥ |
sukarṇa iti vikhyāto bhavitā sopi mānuṣaḥ || 40 ||
[Analyze grammar]

kiṃtu sākṣānna kṛtavānyato'sāvīdṛśīṃ kriyām |
tanmānuṣatva mevāsya vetālatvaṃ tu no bhavet || 41 ||
[Analyze grammar]

vijñaptikautukābhikhyaṃ yadā vidyādharādhipam |
drakṣyate'sau kaniṣṭhaste tadā śāpādvimokṣyate || 42 ||
[Analyze grammar]

īdṛśasyatu yaḥ kartā mahāpāpasya karmaṇaḥ |
sa tvaṃ saṃprāpya mānuṣyaṃ tasminneva tu janmani || 43 ||
[Analyze grammar]

vetālajanma saṃprāpya ciraṃ loke cariṣyasi |
ityuktvā gālavaḥ kanyāṃ gṛhītvā munibhiḥ saha || 44 ||
[Analyze grammar]

vidyādharasutau śaptvā svāśramaṃ prati niryayau |
tatastasminmahābhāge niryāte munipuṃgave || 45 ||
[Analyze grammar]

sudarśanasukarṇākhyau vidyādharapateḥ sutau |
muniśāpena duḥkhārtau ciṃtayāmāsaturbhṛśam || 46 ||
[Analyze grammar]

kartavyaṃ tau viniścitya sudarśanasukarṇakau |
goviṃdasvāmināmānaṃ yamunātaṭavāsinam || 47 ||
[Analyze grammar]

brāhmaṇaṃ śīlasaṃpannaṃ pitṛtve parikalpya tau |
parityajya svakaṃ rūpamajāyetāṃ tadā tmajau || 48 ||
[Analyze grammar]

vijayāśokadattākhyau tasya putraubabhūvatuḥ |
suto vijayadattākhyo jyeṣṭho jajñe sudarśanaḥ || 49 ||
[Analyze grammar]

aśokadattanāmā tu sukarṇaśca kaniṣṭhakaḥ |
vijayāśokadattau tu kramādyauvanamāpatuḥ || 50 ||
[Analyze grammar]

etasminneva kāletu yamunāyāstaṭe śubhe |
anāvṛṣṭyā tu durbhikṣamabhūddvādaśavārṣi kam || 51 ||
[Analyze grammar]

goviṃdasvāmināmā tu brāhmaṇo vedapāragaḥ |
durbhikṣopahatāṃ dṛṣṭvā tadānīṃ sa nijāṃ purīm || 52 ||
[Analyze grammar]

prayayau kāśanigaraṃ saputraḥ saha bhāryayā |
sa prayāgaṃ samāsādya dvaṃ dṛṣṭvā mahāvaṭam || 53 ||
[Analyze grammar]

kapālamālābharaṇaṃ so'paśyadyatinaṃ puraḥ |
goviṃdasvāmināmā tu namaścakre sa taṃ munim || 54 ||
[Analyze grammar]

saputrasya sabhāryasya so'vādīdāśiṣo muniḥ |
idaṃ ca vacanaṃ prāha goviṃdasvāminaṃ prati || 55 ||
[Analyze grammar]

jyeṣṭhenānena putreṇa sāṃprataṃ brāhmaṇottama |
kṣipraṃ vijayadattena viyogaste bhaviṣyati || 56 ||
[Analyze grammar]

iti tasya vacaḥ śrutvā goviṃdasvāmināmakaḥ |
sūrye cāstaṃ gate tatra sāṃdhyaṃ karma samāpya ca || 57 ||
[Analyze grammar]

sabhāryaḥ sasuto vipraḥ sudūrādhvasamākulaḥ |
uvāsa tasyāṃ śarvaryyāṃ śūnye vai devatālaye || 58 ||
[Analyze grammar]

tadā tvaśokadattaśca brāhmaṇī ca samākulau |
vastreṇāstīrya pṛthivīṃ rātrau nidrāṃ samāpatuḥ || 59 ||
[Analyze grammar]

tato vijayadattastu dūramārgavilaṃghanāt |
babhūvātyaṃtamalaso bhṛśaṃ śītajvarārditaḥ || 60 ||
[Analyze grammar]

goviṃdasvāminā pitrā śītavabādhānivṛttaye |
gāḍhamāliṃgyamāno'pi śītabādhāṃ na so'tyajat || 61 ||
[Analyze grammar]

bādhate'tyarthamadhunā tāta māṃ śītalo jvaraḥ |
etadbādhānivṛttyarthaṃ vahnimānaya mā ciram || 62 ||
[Analyze grammar]

iti putravacaḥ śrutvā sarvatrāgniṃ gaveṣayan |
alabdhavahniḥ provāca puna rabhyetya putrakam || 63 ||
[Analyze grammar]

na vahniṃ putra viṃdāmi mārgamāṇo'pi sarvaśaḥ |
rātrimadhye tu saṃprāpte dvāreṣu pihiteṣu ca || 64 ||
[Analyze grammar]

nidrāparavaśāḥ paurā naiva dāsyaṃti pāvakam |
itthaṃ vijayadatto'sāvuktaḥ pitrā jvarāturaḥ || 65 ||
[Analyze grammar]

yayāce vahnimevāsau pitaraṃ dīnayā girā |
śītajvarasamudbhūtaśītabādhāprapīḍitam || 66 ||
[Analyze grammar]

himaśīkaravānvāyurdviguṇaṃ bādhate'dya mām |
vahnirna labdha iti vai mithyaivoktaṃ pitastvayā || 67 ||
[Analyze grammar]

dūrādeṣa purobhāge jvālāmālāsamākulaḥ |
śikhābhirlelihānobhraṃ dṛśyate paśya pāvakaḥ || 68 ||
[Analyze grammar]

taṃ vahnimānaya kṣipraṃ tāta śītanivṛttaye |
ityuktavantaṃ taṃ putraṃ sa pitā pratyabhāṣata || 69 ||
[Analyze grammar]

nānṛtaṃ vacmi putrādya satyameva bravīmyaham |
vahnimānyo'yamuddeśo dūrādeva vilokyate || 70 ||
[Analyze grammar]

pitṛkānanadeśaṃ taṃ putra jānīhi sāṃpratam |
yadyeṣobhraṃlihajvālaḥ purastājjvalate'nalaḥ || 71 ||
[Analyze grammar]

putra vitrāsajanakaṃ taṃ jānīhi citānalam |
amaṃgalo na sevyo'yaṃ citāgniḥ sparśadūṣitaḥ || 72 ||
[Analyze grammar]

tasya cāyuḥkṣayaṃ yāti sevate yaścitānalam |
tasmāttavāyurhānirmā bhūyāditi mayā suta || 73 ||
[Analyze grammar]

amaṃgalastathā spṛśyo nānīto'yaṃ citānalaḥ |
ityuktavaṃtaṃ pitaraṃ sa dīnaḥ pratyabhāṣata || 74 ||
[Analyze grammar]

ayaṃ śavānalo vā syādadhvarānala eva vā |
sarvathānīyatāmeṣa nocenme maraṇaṃ bhavet || 75 ||
[Analyze grammar]

putrasnehābhibhūto'tha samāhartuṃ citānalam |
goviṃdasvāmināmā tu śmaśānaṃ śīghramabhyagāt || 76 ||
[Analyze grammar]

goviṃdasvāmini gate samāhartuṃ citānalam |
tūrṇaṃ vijayadatto'pi tadā gacchaṃtamanvayāt || 77 ||
[Analyze grammar]

saṃprāpya tāpanikaṭaṃ vikīrṇāsthi citānalam |
āliṃganniva sodvegaṃ śanairnirvṛtimāptavān || 79 ||
[Analyze grammar]

athāvādītsa pitaraṃ tadidaṃ parivartulam |
atidīptaṃ vibhātyagnau kiṃ raktāṃbujasannibham || 79 ||
[Analyze grammar]

iti tasya vacaḥ śrutvā putrasya brāhmaṇottamaḥ |
nipuṇaṃ taṃ nirūpyaitadvacanaṃ punarabravīt || 80 ||
[Analyze grammar]

goviṃdasvāmyuvāca |
etatkapālamanalajvālāvalayavartulam |
vasākīkasamāṃsāḍhyametadraktāṃbujopamam || 81 ||
[Analyze grammar]

dvijasya sūnuḥ śrutveti kāṣṭhāgreṇa jaghāna tat |
yena tatsphuṭanodgīrṇavasāsiktamukho'bhavat || 82 ||
[Analyze grammar]

kapālaghaṭṭanādraktaṃ yatsaṃsaktaṃ mukhe tadā |
jihvayā lelihāno'sau muhustadraktamā svadat || 83 ||
[Analyze grammar]

āsvādyaivaṃ samādāya tatkapālaṃ samākulaḥ |
pītvā vasāṃ mahākāyo babhūvātibhayaṃkaraḥ || 84 ||
[Analyze grammar]

sadyo vetā latāṃ prāpa tīkṣṇadaṃṣṭrastadā niśi |
tasyāṭṭahāsaghoṣeṇa diśaśca pradiśastadā || 85 ||
[Analyze grammar]

dyauratarikṣaṃ bhūmiśca sphuṭitā iva sarvaśaḥ |
tasminvegātsamākṛṣya pitaraṃ hantumudyate || 86 ||
[Analyze grammar]

mā kṛthāḥ sāhasamiti prādurāsīdvaco divi |
sa divyāṃ giramākarṇya vetālo'tibhayaṃkaraḥ || 87 ||
[Analyze grammar]

pitaraṃ taṃ parityajya mahāvegasamanvitaḥ |
tūrṇamākāśamāviśya prayayāvaskhaladgatiḥ || 88 ||
[Analyze grammar]

sa gatvā dūramadhvānaṃ vetālaiḥ saha saṃgataḥ |
tamāgataṃ samālokya vetolāssarva eva te || 89 ||
[Analyze grammar]

kapālasphoṭanādeṣa vetālatvaṃ yadāptavān |
kapālasphoṭanāmānamāhvayāṃcakrire tataḥ || 90 ||
[Analyze grammar]

tataḥ kapālasphoṭo 'sau vetālaiḥ sarvato vṛtaḥ |
narāsthibhūṣaṇākhyasya sadyo vetālabhūpateḥ || 91 ||
[Analyze grammar]

antikaṃ sahasā prāpa mahābalasamanvitaḥ |
narāsthibhūṣaṇaścainaṃ senāpa timakalpayat || 92 ||
[Analyze grammar]

taṃ kadācittu gandharvaścitrasenābhidho balī |
narāsthibhūṣaṇaṃ saṃkhye nyavadhītso'pi saṃsthitaḥ || 93 ||
[Analyze grammar]

narāsthibhūṣaṇe tasmi ngandharveṇa hate yudhi |
tadā kapālasphoṭo'sau tatpadaṃ samavāptavān || 94 ||
[Analyze grammar]

vidyādharendrasya sutaḥ sudarśano manuṣyatāṃ vai prathamaṃ sa gatvā |
vetālatāṃ prāpya maharṣiśāpātkramācca vetālapatirbabhūva || 95 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setu māhātmye vetālavaradatīrthapraśaṃsāyāṃ sudarśanavetālatvaprāptivarṇanaṃ nāmāṣṭamo'dhyāyaḥ || 8 ||
[Analyze grammar]