Chapter 22

[English text for this chapter is available]

śrīnārāyaṇa uvāca |
gṛhī bubhūṣurgurave dakṣiṇāṃ svasya śaktitaḥ |
dattvā tadājñayaivā'sau samāvarttanamācaret || 1 ||
[Analyze grammar]

tataḥ kulocitāṃ yoṣāṃ vayasonāmarogiṇīm |
puṃllakṣaṇena rahitāmapāpāṃ vidhinodvahet || 2 ||
[Analyze grammar]

svādhikārānusāreṇa kṛṣṇasaṃprītaye'nvaham |
devarṣipitṛbhūtāni yajeta vidhinā tataḥ || 3 ||
[Analyze grammar]

snānaṃ saṃdhyāṃ japaṃ homaṃ svādhyāyaṃ viṣṇupūjanam |
tarpaṇaṃ vaiśvadevaṃ ca kuryāccātithyamanvaham || 4 ||
[Analyze grammar]

kuryātpuṇyaṃ yathāśakti nyāyārjitadhanena ca |
anāsaktaḥ poṣyavargaṃ puṣṇīyānna tu pīḍayet || 5 ||
[Analyze grammar]

dehaṃ ca daihikānvāsāvuddiśya paśuvatparaiḥ |
vairaṃ na kuryāddehādāvahantāṃ mamatāṃ tyajet || 6 ||
[Analyze grammar]

kuryādbhāgavatānāṃ ca satāṃ saṃgamatandritaḥ |
na straiṇānāṃ vyasanināṃ saṃgaṃ kuryānna lobhinām || 7 ||
[Analyze grammar]

kāmabhāvena nekṣeta parayoṣāṃ tu karhicit |
śrāddhaparvavratāhādau nopeyācca svayoṣitam || 8 ||
[Analyze grammar]

prāptopi puruṣaḥ sāṃkhye yoge ca paripakvatām |
putryā api prasaṃgena rahaḥsthāne tu muhyati || 9 ||
[Analyze grammar]

ato mātrā bhaginyā vā duhitrāpi rahaḥsthale |
saha nāsīta matimānyuvatyā kimutā'nyayā || 10 ||
[Analyze grammar]

amaṅgalānāṃ sarveṣāṃ vidhavā hyatyamaṃgalam |
taddarśanaṃ ca tatsparśo nṝṇāṃ sukṛtahṛttataḥ || 11 ||
[Analyze grammar]

prayāṇakāle vidhavādarśanaṃ sanmukhe yadi |
syāttadā naiva gantavyamanyathā maraṇaṃ dhuvam || 12 ||
[Analyze grammar]

āśiṣo vidhavāstrīṇāṃ samāḥ kālāhiphūtkṛtaiḥ |
tataśca bibhiyāttābhyo rākṣasībhyo yathā gṛhī || 13 ||
[Analyze grammar]

madyaṃ māṃsaṃ mādakaṃ ca dyūtādīndūratastyajet |
na drohaṃ prāṇimātrasya kuryādvācāpi karhicit || 14 ||
[Analyze grammar]

avatāracaritrāṇi śṛṇuyādanvahaṃ hareḥ |
sarvā api kriyāḥ kuryādvāsudevārthamāstikaḥ || 15 ||
[Analyze grammar]

ūrje māghe ca vaiśākhe cāturmāsye malimluce |
anyeṣu puṇyakāleṣu viśeṣaniyamāṃścaret || 16 ||
[Analyze grammar]

puṇyadeśe puṇyakāle satpātre vidhinā gṛhī |
dadyāddānaṃ yathāśakti dayāṃ kurvīta jantuṣu || 17 ||
[Analyze grammar]

puṇyāndeśānpuṇyakālānpuṇyapātrāṇi cānagha |
kathayāmi viśeṣeṇa dharmavṛddhikarāṇi te || 18 ||
[Analyze grammar]

deśaḥ sarvottamastveṣa bhuvi yo madadhiṣṭhitaḥ |
mahāmunigaṇā yatra tapasyanti mahāvratāḥ || 19 ||
[Analyze grammar]

haritadbhaktamāhātmyāddeśānāmasti puṇyatā |
gaṃgādvāraṃ madhupurī naimiṣāraṇyameva ca || 20 ||
[Analyze grammar]

kurukṣetramayodhyā ca prayāgaśca gayāśiraḥ |
purī vārāṇasī caiva puṇyaśca pulahāśramaḥ || 21 ||
[Analyze grammar]

kapilāśramaḥ śrīraṃgaḥ prabhāsaśca kuśasthalī |
kṣetraṃ siddhapadākhyaṃ ca pauṣkaraṃ ca mahatsaraḥ || 22 ||
[Analyze grammar]

krīḍāsthānaṃ bhagavataḥ saśriyo raivatācalaḥ |
tathā govarddhanagiriḥ puṇyaṃ vṛndāvanaṃ vanam || 23 ||
[Analyze grammar]

mahendramalayādyāśca saptāpi kulaparvatāḥ |
bhāgīrathī mahāpuṇyā yamunā ca sarasvatī || 24 ||
[Analyze grammar]

godāvarī ca sarayūḥ kāverī gomatīmukhāḥ |
purāṇaprathitāḥ puṇyā mahānadyo nadāstathā || 25 ||
[Analyze grammar]

mahotsavairbhavedyatra bhagavatpratimārcanam |
prabhorananyabhaktāśca bhaveyuryatrayatra ca || 26 ||
[Analyze grammar]

ahiṃsrāśca svadharmasthā yatra syurbrāhmaṇottamāḥ |
mṛgādyāḥ paśavo yatra vicareyuśca nirbhayāḥ || 27 ||
[Analyze grammar]

yatrayatrāvatārāśca harervāsaśca yatra vā |
ete puṇyatamā deśā bhuvi santi viśeṣataḥ || 28 ||
[Analyze grammar]

alpopyeṣu kṛto dharmaḥ syātsahasraguṇo nṛṇām |
puṇyavṛddhikarānkālāñchṛṇvatho vacmi nārada || 29 ||
[Analyze grammar]

ayane dve ca viṣuvaṃ grahaṇaṃ sūryasomayoḥ |
dinakṣayo vyatīpātaḥ śravaṇarkṣāṇi sarvaśaḥ || 30 ||
[Analyze grammar]

dvādaśya ekādaśyaśca manvādyāśca yugādayaḥ |
puṇyāḥ syustithayaḥ sarvā amāvāsyā ca vaidhṛtiḥ || 31 ||
[Analyze grammar]

māsarkṣayukpaurṇamāsyaścatasropyaṣṭakāstathā |
svajanmarkṣāṇi ca harerjanmotsavadināni ca || 32 ||
[Analyze grammar]

svasya striyāścārbhakāṇāṃ saṃskārobhyudayastathā |
satpātralabdhiśca yadā kālāḥ puṇyatamā ime || 33 ||
[Analyze grammar]

devapitṛdvijasatāmeṣāṃ śaktyā samarcanam |
snānadānajapādīni syuranantaphalāni hi || 34 ||
[Analyze grammar]

satpātraṃ tu svayaṃ sākṣādbhagavāneva nārada |
śākhānāmiva mūlāmbu yaddattaṃ sarvatuṣṭikṛt || 35 ||
[Analyze grammar]

ahiṃsā vedavidyābhistuṣṭiḥ saddharmabhaktibhiḥ |
hṛdi viṣṇuṃ dadhīranye te satpātrāṇi vai dvijāḥ || 36 ||
[Analyze grammar]

ekāntikāśca bhagavadbhaktā baddhavimocakāḥ |
satpātrāṇīti jānīhi yeṣvāste bhagavānsvayam || 37 ||
[Analyze grammar]

āḍhyastu kārayedviṣṇormandirāṇi dṛḍhāni ca |
pūjāpravāhasiddhyarthaṃ tadvṛttīścāpi kārayet || 38 ||
[Analyze grammar]

jalāśayānvāṭikāśca viṣṇvarthamupakalpayet |
sadannaiḥ surasaiḥ sādhūnbrāhmaṇāṃścaiva tarpayet || 39 ||
[Analyze grammar]

ahiṃsānvaiṣṇavānyajñānkuryācchaktyā yathāvidhi |
vratajanmotsavānviṣṇoḥ saṃbhāreṇa ca bhūyasā || 40 ||
[Analyze grammar]

prauṣṭhapadāsitepakṣe kṣayāhe tīrthaparvasu |
pitroḥ śrāddhaṃ prakurvīta tadbandhūnāṃ ca śaktitaḥ || 41 ||
[Analyze grammar]

daive karmaṇi pitrye ca bhaktānbhagavato dvijān |
pūjayeta svadharmasthānbhojayedbhagavaddhiyā || 42 ||
[Analyze grammar]

daive dvau bhojayedviprau trīṃśca pitrye yathāvidhi |
ekaikaṃ vobhayatrāpi naiva śrāddhe tu vistaret || 43 ||
[Analyze grammar]

deśakāladravyapātrapūjopakaraṇāni ca |
vistareṇa yathāśāstraṃ na syādeveti niścitam || 44 ||
[Analyze grammar]

na śrāddhe kvāpi māṃsaṃ tu dadyānnā'dyācca mānavaḥ |
munyannaiḥ kṣīrasarpirbhyāṃ tṛpyanti pitaro bhṛśam || 45 ||
[Analyze grammar]

ahiṃsā prāṇimātrasya manovāktanubhistu yā |
tayaiva pitaraḥ sarve tṛpyantyatidayālavaḥ || 46 ||
[Analyze grammar]

tasmātkusaṅgataḥ kvāpi śāstrahārdamabudhya ca |
śrāddhe māṃsaṃ naiva dadyādvāsudevaparaḥ pumān || 47 ||
[Analyze grammar]

vratāni kuryādviṣṇośca brahmacaryādibhiryamaiḥ |
sahaiva tatparo nānyatkāryaṃ kuyācca taddine || 48 ||
[Analyze grammar]

svasaṃbandhijanānāṃ cāpyāśaucaṃ janināśayoḥ |
yathāśāstraṃ pālayeta grahaṇe cārkacandrayoḥ || 49 ||
[Analyze grammar]

vyāvahārikakāryāṇāṃ vivāde nirṇayepi ca |
gṛhītarāstyāgino ye te na kāryā na cādhavāḥ || 50 ||
[Analyze grammar]

yatraite syurnna tatkāryaṃ sidhyetkvāpi dvijottama |
sarvasvanāśastatra syādityevaṃ tvasti nirṇayaḥ || 51 ||
[Analyze grammar]

dharmā ete gṛhasthānāṃ mayā saṃkṣepatoditāḥ |
yadanuṣṭhānato nṝṇāṃ syātsveṣṭasukhamakṣayam || 52 ||
[Analyze grammar]

śilādijīvikāvṛttibhedena gṛhiṇo dvijāḥ |
caturvidhāḥ prakīrtyante tattannāmnā ca nārada || 53 ||
[Analyze grammar]

strīṇāmatha pravakṣyāmi dharmānrdharmavatāṃ vara |
yeṣu sthitāḥ striyaḥ sarvāḥ prāpnuvantīpsitaṃ sukham || 54 ||
[Analyze grammar]

suvāsinībhirnnārībhiḥ svapatirdevavatsadā |
sevanīyo'nuvarttyaśca jaranrugṇo'dhanopi vā || 55 ||
[Analyze grammar]

tadbandhavaścānuvartyāḥ sevanena yathocitam |
ujjvalāni vidheyāni gṛhopakaraṇāni ca || 56 ||
[Analyze grammar]

gṛhaṃ mārjanasekādyaiḥ svacchaṃ kāryaṃ dinedine |
priyaṃ satyaṃ ca vaktavyaṃ stheyaṃ śucitayā sadā || 57 ||
[Analyze grammar]

cāñcalyamatilobhaśca krodhaḥ steyaṃ ca hiṃsanam |
adhārmikāṇāṃ saṅgaśca varjyaḥ strīṇāṃ tathā nṛṇām || 58 ||
[Analyze grammar]

bhavitavyaṃ tatparābhirddharmakāryeṣu sarvadā |
tyaktvauddhatyaṃ vinītābhiḥ stheyaṃ jitvendriyāṇi ca || 59 ||
[Analyze grammar]

pātivratye sthitābhiśca dharme tābhī ramāpateḥ |
bhaktiḥ kāryā svatantrābhirbhavitavyaṃ na kutracit || 60 ||
[Analyze grammar]

vidhavā tu sadā viṣṇuṃ seveta patibhāvataḥ |
kāmasaṃbandhinīrvārttā na śṛṇvīta na kīrtayet || 61 ||
[Analyze grammar]

āsannasaṃbandhavato vinānyānpuruṣānkvacit |
anāpadi spṛśennaiva paśyennaiva ca kāmataḥ || 62 ||
[Analyze grammar]

stanapasya tu nuḥ sparśādvṛddhasya ca na duṣyati |
kārya āvaśyake tābhyāṃ bhāṣaṇe ca vibhartṛkā || 63 ||
[Analyze grammar]

vyāvahārikakārye ca vivādamadhikaṃ naraiḥ |
na kurvītāvaśyakārye tairbhāṣeta vinā rahaḥ || 64 ||
[Analyze grammar]

nekṣeta midhunībhūtaṃ budyā paśvādyapi kvacit |
tyajecca sakalānbhogānsyātsakṛnmitabhuktathā || 65 ||
[Analyze grammar]

sadhātusūkṣmavāsāṃsi nālaṃkārāṃśca dhārayet |
na divā śayanaṃ kuryānna khaṭvāyāmanāpadi || 66 ||
[Analyze grammar]

tāmbūlabhakṣaṇaṃ naiva kuryānnābhyaṅgamañjanam |
pumprasaṃgācca bibhiyātkṛṣṇāheriva nityadā || 67 ||
[Analyze grammar]

samīkṣya puruṣaṃ nārī yā na mohamupāvrajet |
tādṛśī tu vinā lakṣmīmekāṃ nānyāsti kutracit || 68 ||
[Analyze grammar]

dharmaniṣṭhā tato nārī svaniḥśreyasamicchatī |
nekṣeta puruṣākāraṃ buddhipūrvaṃ ca na spṛśet || 69 ||
[Analyze grammar]

kṛcchracāndrāyaṇādīni nairantaryeṇa bhaktitaḥ |
vratāni kuryācca sadā bhavenniyamatatparā || 70 ||
[Analyze grammar]

pitrā putrādinā vāpi taruṇī taruṇena ca |
saha tiṣṭhenna rahasi kusaṅgaṃ sarvathā tyajet || 71 ||
[Analyze grammar]

sadhavā vidhavā vā strī svarajodarśanaṃ kvacit |
na gopayettrirātraṃ tu manuṣyādīṃśca na spṛśet || 72 ||
[Analyze grammar]

prathame'hani caṇḍālī dvitīye brahmaghātinī |
tṛtīye rajakī proktā sā caturthe'hni śuddhyati || 73 ||
[Analyze grammar]

iti strīṇāṃ mayā dharmāḥ saṃkṣepātkathitāstava |
yuktā yairyoṣito yāyurihāmutra mahatsukham || 74 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye gṛhasthadharmanirūpaṇaṃ nāma dvāviṃśodhyāyaḥ || 22 ||
[Analyze grammar]