Chapter 17

[English text for this chapter is available]

brahmovāca |
kasminkṣetre hi deveśa mārgaśīrṣo'dhikaḥ smṛtaḥ |
kiṃ phalaṃ ca bhavettasminnetatsarvaṃ vada prabho || 1 ||
[Analyze grammar]

śrībhagavānuvāca |
madhureti suvikhyātamasti kṣetraṃ paraṃ mama |
suramyā ca praśastā ca janmabhūmiḥ priyā mama || 2 ||
[Analyze grammar]

padepade tīrthaphalaṃ madhurāyāṃ caturmukha |
yatrayatra naraḥ snāto mucyate ghorakilbiṣāt || 3 ||
[Analyze grammar]

sarvadharmavihīnānāṃ puruṣāṇāṃ durātmanām |
narakārtiharā putra madhurā pāpanāśinī || 4 ||
[Analyze grammar]

kṛtaghnaśca surāpaśca cauro bhagnavratastathā |
madhurāṃ prāpya manujo mucyate ghorapātakāt || 5 ||
[Analyze grammar]

sūryaudaye tamo naśyedyathā vajrabhayānnagāḥ |
tārkṣyaṃ dṛṣṭvā yathā sarpā meghā vātahatā yathā || 6 ||
[Analyze grammar]

tattvajñānādyathā duḥkhaṃ hariṃ dṛṣṭvā yathā gajāḥ |
tathā pāpāni naśyaṃti mathurādarśanātsuta || 7 ||
[Analyze grammar]

śraddhayā bhaktiyuktastu dṛṣṭvā madhupurīṃ naraḥ |
brahmahā'pi viśudhyeta kiṃ punastvanyapātakī || 8 ||
[Analyze grammar]

mathurāṃ snātukāmasya gacchatastu padepade |
nirāśāni vrajaṃtyeva pāpāni ca śarīrataḥ || 9 ||
[Analyze grammar]

anuṣaṃgeṇa gacchaṃti vāṇijyenā'pi sevayā |
madhurāsnānamātreṇa divaṃ yāṃti gatāṃhasaḥ || 10 ||
[Analyze grammar]

nāmā'pi gṛhṇatāmasyāḥ sadā muktirna saṃśayaḥ |
sadā kṛtayugaṃ tatra sadā caivottarāyaṇam || 11 ||
[Analyze grammar]

yaḥ śṛṇoti caturvaktra mādhuraṃ mama maṃdiram |
anyenoccārite sadyaḥ so'pi pāpātpramucyate || 12 ||
[Analyze grammar]

trirātramapi ye tatra vasaṃti manujāḥ suta |
teṣāṃ punaṃti sahṛṣṭāḥ spṛṣṭāścaraṇareṇavaḥ || 13 ||
[Analyze grammar]

yathā tṛṇasamūhaṃ tu jvalayaṃti sphuliṃgakāḥ |
tathā mahāṃti pāpāni dahate mathurā purī || 14 ||
[Analyze grammar]

snānena sarvatīrthānāṃ yaḥ syātsukṛtasaṃcayaḥ |
tato'dhikataraṃ proktā mathurā sarvamaṃḍale || 15 ||
[Analyze grammar]

caturṇāmapi vedānāṃ puṇyamadhyayanācca yat |
tatpuṇyaṃ jāyate tatra mathurāṃ smaratāṃ nṛṇām || 16 ||
[Analyze grammar]

anyatra hi kṛtaṃ pāpaṃ tīrthamāsādya naśyati |
tīrtheṣu yatkṛtaṃ pāpaṃ vajralepo bhaviṣyati || 17 ||
[Analyze grammar]

mathurāyāṃ kṛtaṃ pāpaṃ mathurāyāṃ praṇaśyati |
dharmārthakāmamokṣākhyaṃ sthitvā tatra labhennaraḥ || 18 ||
[Analyze grammar]

anyatra daśabhirvarṣaiḥ prārabdhaṃ bhujyate hi yat |
kilviṣaṃ ca caturvaktra māthure daśabhirdinaiḥ || 19 ||
[Analyze grammar]

divi naiva na pātāle nāṃtarikṣe na mānuṣe |
samaṃ tu mathurāyāṃ hi priyaṃ mama sadaiva hi || 20 ||
[Analyze grammar]

sarveṣāmeva tīrthānāṃ māthuraṃ paramaṃ mahat |
bālakrīḍanarūpāṇi kṛtāni saha gopakaiḥ || 21 ||
[Analyze grammar]

triṃśadvarṣasahasrāṇi triṃśadvarṣaśatāni ca |
yatphalaṃ bhārate varṣe tatphalaṃ mathurāṃ smaran || 22 ||
[Analyze grammar]

sannihatyāṃ tu yatpuṇyaṃ rāhugraste divākare |
tatodhikaṃ labhetputra mathurāyāṃ dinedine || 23 ||
[Analyze grammar]

pūrṇe varṣasahasre tu tīrtharāje tu yatphalam |
tatphalaṃ labhate putra sahomāse madhoḥ pure || 24 ||
[Analyze grammar]

pūrṇe varṣasahasre tu vārāṇasyāṃ ca yatphalam |
tatphalaṃ labhate putra mathurāyāṃ saho dine || 25 ||
[Analyze grammar]

godāvarīdvārakayornaro yaḥ kṣetre kurūṇāṃ kṣitidāyako yaḥ |
ṣaṇmāsakātsādhayate gayāyāṃ samaṃ bhavenno dinamekamāthuram || 26 ||
[Analyze grammar]

na dvārakā kāśikāṃcī na māyā gadādharo yasya samaṃ na tīrtham |
saṃtarpitā yadyamunājalena vāṃchaṃti no vai pitaraḥ piṃḍadānam || 27 ||
[Analyze grammar]

mathurāyāṃ prakurvaṃti purīsādhāraṇīdṛśam |
ye narāste'pi vijñeyāḥ pāparāśibhiranvitāḥ || 28 ||
[Analyze grammar]

na dṛṣṭā mathurā yena didṛkṣā yasya jāyate |
yatra tatra mṛtasyā'pi māthure janma jāyate || 29 ||
[Analyze grammar]

bhūme rajāṃsi gaṇayetkālenā'pi caturmukha |
māthure yāni tīrthāni teṣāṃ saṃkhyā na vidyate || 30 ||
[Analyze grammar]

kuru bhoḥ kuru bho vāsaṃ mathurākhyāṃ purīṃ prati |
vasāmi satataṃ tasyāṃ gopakanyābhirāvṛtaḥ || 31 ||
[Analyze grammar]

rere saṃsāramagnāśca śiṣyā me śṛṇutā'pare |
yadīcchatha sukhaṃ sāṃdraṃ vāsaṃ kuruta matpurīm || 32 ||
[Analyze grammar]

aho loko mahānaṃdo netrayukto na paśyati |
māthure vidyamāne'pi saṃsṛtiṃ bhajate sadā || 33 ||
[Analyze grammar]

mānuṣīṃ yonimatulāṃ labdhvā bhāgyasya yogataḥ |
vṛthaivāyurgataṃ teṣāṃ na dṛṣṭā mathurāpurī || 34 ||
[Analyze grammar]

aho mateḥ sudaurbalyamaho bhāgyasya durvidhiḥ |
aho mohasya mahimā mathurā naiva sevyate || 35 ||
[Analyze grammar]

mathurāṃ tu parityajya yo'nyatra kurute matim |
mūḍho bhramati saṃsāre mohito mama māyayā || 36 ||
[Analyze grammar]

mathurāmapi saṃprāpya yo'nyatra kurute spṛhām |
durbuddhestasya kiṃ jñānaṃ so'jñānena vijṛṃbhitaḥ || 37 ||
[Analyze grammar]

mātrā pitrā parityaktā ye tyaktā nijabaṃdhubhiḥ |
yeṣāṃ kvāpi gatirnāsti teṣāṃ mama purī gatiḥ || 38 ||
[Analyze grammar]

pāparāśibhirākrāṃtā ye dāridrya parājitāḥ |
yeṣāṃ kvāpi gatirnāsti teṣāṃ mama purī gatiḥ || 39 ||
[Analyze grammar]

sārātsārataraṃ sthānaṃ guhyādguhyataraṃ param |
gatimanveṣamāṇānāṃ mathurā paramā gatiḥ || 40 ||
[Analyze grammar]

na tatpuṇyairna taddānairna tapobhirna tu stavaiḥ |
na labhyaṃ vividhairyogairlabhyaṃ madanubhāvataḥ || 41 ||
[Analyze grammar]

mayi yeṣāṃ sthirā bhaktirbhūyasī yeṣu matkṛpā |
teṣāmeva hi dhanyānāṃ mathurāyāṃ bhavedgatiḥ || 42 ||
[Analyze grammar]

yā gatiryogayuktasya brahmajñasya manīṣiṇaḥ |
sā gatistyajataḥ prāṇānmathurāyāṃ narasya ca || 43 ||
[Analyze grammar]

kāśyādipuryo yadi saṃti loke tāsāṃ tu madhye mathuraiva dhanyā |
yā janmamauṃjīvratamuktidānairnṛṇāṃ caturdhā vidadhāti muktim || 44 ||
[Analyze grammar]

na yogairyā gatirlabhyā manvaṃtaraśatairapi |
anyatra helayā sā'tra labhyate matprasādataḥ || 45 ||
[Analyze grammar]

na pāpebhyo bhayaṃ yatra na bhayaṃ yatra vai yamāt |
na garbhavāsabhīryatra tatkṣetraṃ ko na saṃśrayet || 46 ||
[Analyze grammar]

mathurāyāṃ ca yatpuṇyaṃ tatpuṇyasya phalaṃ śṛṇu |
mathurāyāṃ samāsādya mathurāyāṃ mṛtā hi ye || 47 ||
[Analyze grammar]

api kīṭapataṃgādyā jāyaṃte te caturbhujāḥ |
kūlātpataṃti ye vṛkṣāste'pi yāṃti parāṃ gatim || 48 ||
[Analyze grammar]

mūkā jaḍāṃdhabadhirāstaponiyamavarjitāḥ |
kālenaiva mṛtā ye ca mama lokaṃ vrajaṃti te || 49 ||
[Analyze grammar]

sarpadaṣṭāḥ paśuhatāḥ pāvakāṃbuvināśitāḥ |
labdhā'pamṛtyavo ye ca māthure mama lokagāḥ || 50 ||
[Analyze grammar]

satyaṃ satyaṃ muniśreṣṭha bruve śapathapūrvakam |
sarvā'bhīṣṭapradaṃ nānyanmathurāyāḥ samaṃ kvacit || 61 ||
[Analyze grammar]

trivargadā kāmināṃ yā mumukṣūṇāṃ ca muktidā |
bhaktīcchorbhaktidā kastāṃ mathurāṃ nā'śrayedbudhaḥ || 52 ||
[Analyze grammar]

etādṛśī madhupurī karttavyā mārgaśīrṣake |
tadabhāve puṣkaraṃ hi kartavyaṃ vidhipūrvakam || 53 ||
[Analyze grammar]

jyeṣṭhaṃ hi brahmaṇaḥ kuṇḍaṃ madhyaṃ kuṇḍaṃ ca vaiṣṇavam |
kaniṣṭhaṃ rudradaivatyamiti jānīhi buddhiman || 54 ||
[Analyze grammar]

eṣu snānaṃ ca dānaṃ ca śrāddhaṃ ca vidhipūrvakam |
pūjā ca mahatī kāryā mama prītikarā suta || 55 ||
[Analyze grammar]

pūrṇā yā tu bhavetputra sahomāse mama priyā |
tasyāṃ yatkriyate puṇyaṃ mama prītikaraṃ bhavet || 56 ||
[Analyze grammar]

godānamannadānaṃ ca hemadānaṃ ca putraka |
dharādānaṃ ca kartavyaṃ pūrṇāyāṃ vidhipūrvakam || 57 ||
[Analyze grammar]

sahomāse hi pūrṇāyāṃ sadmadānaṃ ca kārayet |
yatkiṃcitkriyate pūrṇaṃ tadakṣayyaphalaṃ bhavet || 58 ||
[Analyze grammar]

brahmabhojyaṃ hi kartavyaṃ yathāvibhavasārataḥ |
pūrṇāyāmeva kartavya utsavo vratapūrttaye || 59 ||
[Analyze grammar]

yādṛśī mathurā putra sahomāse mama priyā |
na tathā tīrtharājādyāstadabhāve ca puṣkaram || 60 ||
[Analyze grammar]

puṣkare mathurāyāṃ vai pūrṇā kāryā vicakṣaṇaiḥ |
yatra kutrāpi vā kāryā vidhiyuktā ca pūrṇimā || 61 ||
[Analyze grammar]

snānaṃ dānaṃ tathā pūjāṃ pūrṇāyāṃ na karoti yaḥ |
ṣaṣṭivarṣasahasrāṇi pacyate rauravādiṣu || 62 ||
[Analyze grammar]

tasmātsarvaprayatnena mānyā pūrṇā vicakṣaṇaiḥ |
mārgaśīrṣeṇa saṃyuktā anaṃtaphaladāyinī || 63 ||
[Analyze grammar]

yathā te kathitaṃ vatsa mārgaśīrṣaṃ mama priyam |
karoti yo naro bhaktyā tasya puṇyaphalaṃ śṛṇu || 64 ||
[Analyze grammar]

tīrthāyuteṣu yatpuṇyaṃ yatpuṇyaṃ vratakoṭibhiḥ |
sarvayajñeṣu yatpuṇyaṃ tatpuṇyaṃ samavāpnuyāt || 65 ||
[Analyze grammar]

aputro labhate putraṃ nirdhano dhanameva ca |
vidyārthī ca tathā vidyāṃ rūpārthī rūpamāpnuyāt || 66 ||
[Analyze grammar]

brāhmaṇo brahmavarcasvī kṣatriyo vijayī bhavet |
vaiśyo nidhipatitvaṃ ca śūdraḥ śuddhyeta pātakāt || 67 ||
[Analyze grammar]

yaddurlabhaṃ ca duṣprāpyaṃ triṣu lokeṣu mānada |
tatsarvaṃ prāpnuyānmartyaḥ sahomāse na saṃśayaḥ || 68 ||
[Analyze grammar]

yadyapyeteṣu kāmeṣu saktā ye mānavāḥ suta |
tuṣṭā hyaṃte caturvaktra na kāmārhā mahābhuja || 69 ||
[Analyze grammar]

sudurlabhā hi sadbhaktirmama vaśyakarī śubhā |
sā vai saṃprāpyate putra sahomāse śrute tathā || 70 ||
[Analyze grammar]

mama prītikaraṃ māsaṃ sarvadā mama vallabham |
sarvaṃ saṃprāpyate'muṣmānmatprasādāccaturmukha || 71 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāsamāhātmye mathurāmāhātmyavarṇanaṃnāma saptadaśo'dhyāyaḥ || 17 ||
[Analyze grammar]