Chapter 16

[English text for this chapter is available]

śrībhagavānuvāca |
śṛṇu dhyānaṃ caturvaktra vakṣyāmi prītamānasaḥ |
śrutenaiva ca saubhāgyaṃ labhate mānavo bhuvi || 1 ||
[Analyze grammar]

atha śrīmadudyānasaṃvītahaimasthalodbhāsiratnasphuranmaṃḍapāṃtaḥ |
lasatkalpavṛkṣoditoddīptaratnasthalādhiṣṭhitāṃbhojapīṭhā'dhirūḍham || 2 ||
[Analyze grammar]

mahānīlanīlābhamatyaṃtabālaṃ guḍasnigdhavaktrāṃtavisrastakeśam |
alivrātaparyākulotphullapadmapramugdhānanaṃ śrīmadiṃdīvarākṣam || 3 ||
[Analyze grammar]

calatkuṃḍalollāsitotphullagallaṃ sughoṇaṃ suśoṇādharaṃ susmitāsyam |
anekollasatkaṃṭhabhūṣālasaṃtaṃ vahaṃtaṃ nakhaṃ pauṃḍarīkaṃ sunetram || 4 ||
[Analyze grammar]

samuddhūsaroraḥsthalaṃ dhenudhūlyā supuṣṭāṃgamaṣṭāpadākalpadīptam |
kaṭīrasthale cārujaṃghoruyugme pinaddhaṃ kvaṇatkiṃkiṇījāladāmnā || 5 ||
[Analyze grammar]

hasaṃtaṃ lasadbaṃdhujīvaprasūnaprabhāpāṇipādāṃbujodārakāṃtyā |
kare dakṣiṇe pāyasaṃ vāmahaste dadhānaṃ navaṃ śuddhahaiyaṃgavīnam || 6 ||
[Analyze grammar]

mahībhārabhūtā'marārātiyūthā'nalaṃ pūtanādīnnihaṃtuṃ pravṛttam |
prabhuṃ gopikāgopavṛṃdena vītaṃ surendrādibhirvaṃditaṃ devadevam || 7 ||
[Analyze grammar]

prage pūjayitvā tvanusmṛtya kṛṣṇaṃ bhujaṃgeṃdravajrādibhirbhaktinamraḥ |
sitāṃbhojahaiyaṃgavīnaiśca dadhnā vimiśreṇa dugdhena saṃprīṇayettam || 8 ||
[Analyze grammar]

iti prātarevā'rcayedatyutaṃ yo naraḥ pratyahaṃ śaśvadāstikyayuktaḥ |
labhetso'cireṇaiva lakṣmīṃ samagrāmiha pretya śuddhaṃ paraṃ dhāma bhūyāt || 9 ||
[Analyze grammar]

mantraścoktaḥ purā putra ādau lokamanoharaḥ |
śrīmaddāmodarākhyo hi śṛṇu tasyādhikāriṇaḥ || 10 ||
[Analyze grammar]

ayogyāya na dātavyo maṃtrarājastvayā suta |
yatnena gopanīyaṃ ca rahasyaṃ śīghrasiddhidam || 11 ||
[Analyze grammar]

alasaṃ malinaṃ kliṣṭaṃ daṃbhamohasamanvitam |
daridraṃ rogiṇaṃ kruddhaṃ rāgiṇaṃ bhogalālasam || 12 ||
[Analyze grammar]

asūyāmatsaragrastaṃ śaṭhaṃ paruṣavādinam |
anyāyenā'rjitadhanaṃ paradārarataṃ sadā || 13 ||
[Analyze grammar]

viduṣāṃ vairiṇaṃ nityamajñaṃ paṃḍitamāninam |
bhraṣṭavrataṃ kliṣṭavṛttiṃ piśunaṃ duṣṭamānasam || 14 ||
[Analyze grammar]

bahvāśinaṃ krūraceṣṭamagragaṇyaṃ durātmanām |
kṛpaṇaṃ pāpinaṃ raudramāśritānāṃ bhayaṃkaram || 15 ||
[Analyze grammar]

evamādiguṇairyuktaṃ śiṣyaṃ naiva parigrahet |
gṛhṇīyādyadi taddoṣaḥ prāyo gurumupaspṛśet || 16 ||
[Analyze grammar]

amātyadoṣo rājānaṃ jāyādoṣaḥ patiṃ yathā |
tathā śiṣyakṛto doṣo guruṃ prāpnotyasaṃśayam || 17 ||
[Analyze grammar]

tasmācchiṣyaṃ gururnityaṃ parīkṣyaiva parigrahet |
kāyena manasā vācā guruśuśrūṣaṇe ratam || 18 ||
[Analyze grammar]

asteyavṛttimāstikyayuktaṃ mokṣakṛtodyamam |
brahmacaryarataṃ nityaṃ dṛḍhavratamakalmaṣam || 19 ||
[Analyze grammar]

prasannahṛdayaṃ śuddhamaśaṭhaṃ vimalāśayam |
paropakāranirataṃ svārthe ca vigataspṛham || 20 ||
[Analyze grammar]

svacittavittadehaistu paritoṣakaraṃ guroḥ |
āśritānāṃ tathā putra paritoṣakaraṃ śucim || 21 ||
[Analyze grammar]

īdṛgvidhāya śiṣyāya maṃtraṃ dadyācca nānyathā |
yadyanyathā vadettasmindevatāśāpa āpatet || 22 ||
[Analyze grammar]

śṛṇu putra pravakṣyāmi gurorapi ca lakṣaṇam |
ebhistu lakṣaṇairyukto gurureva bhavennṛṇām || 23 ||
[Analyze grammar]

samacetāḥ praśāṃtātmā vimanyuśca suhṛnnṛṇām |
sādhurmahānsamo loke sa guruḥ parikīrtitaḥ || 24 ||
[Analyze grammar]

mama vratadharo nityaṃ vaiṣṇavānāṃ susaṃmataḥ |
madāśrayakathāsakto mamotsavarataḥ sadā || 25 ||
[Analyze grammar]

kṛpāsindhuḥ supūrṇārthaḥ sarvasattvopakārakaḥ |
niḥspṛhaḥ sarvataḥ siddhaḥ sarvavidyāviśāradaḥ || 26 ||
[Analyze grammar]

sarvasaṃśayasaṃchettā'nalaso gururādṛtaḥ |
brāhmaṇaḥ sarvakālajñaḥ kuryātsarveṣvanugraham || 27 ||
[Analyze grammar]

pūrvoktalakṣaṇairyuktaḥ śiṣya īdṛgvidhādguroḥ |
gṛhṇīyātputra tanmaṃtraṃ mārgaśīrṣe madāyane || 28 ||
[Analyze grammar]

vaiṣṇavānāṃ vratānāṃ ca kuryātsvīkaraṇaṃ budhaḥ |
matpriyaṃ śṛṇuyācchaśvacchrīmadbhāgavataṃ param || 29 ||
[Analyze grammar]

śrīmadbhāgavataṃnāma purāṇaṃ lokaviśrutam |
śṛṇuyācchraddhayā yukto mama santoṣakāraṇam || 30 ||
[Analyze grammar]

nityaṃ bhāgavataṃ yastu purāṇaṃ paṭhate naraḥ |
pratyakṣaraṃ bhavettasya kapilādānajaṃ phalam || 31 ||
[Analyze grammar]

ślokārdhaṃ ślokapādaṃ vā nityaṃ bhāgavatodbhavam |
paṭhate śṛṇuyādyastu gosahasraphalaṃ labhet || 32 ||
[Analyze grammar]

yaḥ paṭhetprayato nityaṃ ślokaṃ bhāgavataṃ suta |
aṣṭādaśapurāṇānāṃ phalamāpnoti mānavaḥ || 33 ||
[Analyze grammar]

nityaṃ mama kathā yatra tatra tiṣṭhanti vaiṣṇavāḥ |
kalibāhyā narāste vai ye'rcayanti sadā mama || 34 ||
[Analyze grammar]

vaiṣṇavānāṃ tu śāstrāṇi ye'rcayanti gṛhe narāḥ |
sarvapāpavinirmuktā bhavaṃti suravanditāḥ || 35 ||
[Analyze grammar]

ye'rcayanti gṛhe nityaṃ śāstraṃ bhāgavataṃ kalau |
āsphoṭayaṃti valganti teṣāṃ prīto bhavāmyaham || 36 ||
[Analyze grammar]

yāvaddināni he putra śāstraṃ bhāgavataṃ gṛhe |
tāvatpibaṃti pitaraḥ kṣīraṃ sarpirmadhūdakam || 37 ||
[Analyze grammar]

yacchaṃti vaiṣṇave bhaktyā śāstraṃ bhāgavataṃ hi ye |
kalpakoṭisahasrāṇi mama loke vasaṃti te || 38 ||
[Analyze grammar]

ye'rcayanti sadā gehe śāstraṃ bhāgavataṃ narāḥ |
prīṇitāstaiśca vibudhā yāvadā'bhūtasaṃplavam || 39 ||
[Analyze grammar]

ślokārdhaṃ ślokapādaṃ vā varaṃ bhāgavataṃ gṛhe |
śataśo'tha sahasraiśca kimanyaiḥ śāstrasaṃgrahaiḥ || 40 ||
[Analyze grammar]

na yasya tiṣṭhate śāstraṃ gṛhe bhāgavataṃ kalau |
na tasya punarāvṛttiryāmyapāśātkadācana || 41 ||
[Analyze grammar]

kathaṃ sa vaiṣṇavo jñeyaḥ śāstraṃ bhāgavataṃ kalau |
gṛhe na tiṣṭhate yasya śvapacādadhiko hi saḥ || 42 ||
[Analyze grammar]

sarvasvenā'pi lokeśa kartavyaḥ śāstrasaṃgrahaḥ |
vaiṣṇavastu sadā bhaktyā tuṣṭyarthaṃ mama putraka || 43 ||
[Analyze grammar]

yatra yatra bhavetpuṇyaṃ śāstraṃ bhāgavataṃ kalau |
tatra tatra sadaivā'haṃ bhavāmi tridaśaiḥ saha || 44 ||
[Analyze grammar]

tatra sarvāṇi tīrthāni nadīnadasarāṃsi ca |
yajñāḥ saptapurī nityaṃ puṇyāḥ sarve śiloccayāḥ || 45 ||
[Analyze grammar]

śrotavyaṃ mama śāstraṃ hi yaśodharmajayārthinā |
pāpakṣayārthaṃ lokeśa mokṣārthaṃ dharmabuddhinā || 46 ||
[Analyze grammar]

śrīmadbhāgavataṃ puṇyamāyurārogyapuṣṭidam |
paṭhanācchravaṇādvā'pi sarvapāpaiḥ pramucyate || 47 ||
[Analyze grammar]

na śṛṇvaṃti na hṛṣyaṃti śrīmadbhāgavataṃ param |
satyaṃsatyaṃ hi lokeśa teṣāṃ svāmī sadā yamaḥ || 48 ||
[Analyze grammar]

na gacchati yadā martyaḥ śrotuṃ bhāgavataṃ suta |
ekādaśyāṃ viśeṣeṇa nā'sti pāparatastataḥ || 49 ||
[Analyze grammar]

ślokaṃ bhāgavataṃ cā'pi ślokārdhaṃ pādameva vā |
likhitaṃ tiṣṭhate yasya gṛhe tasya vasāmyaham || 50 ||
[Analyze grammar]

sarvā'śramā'bhigamanaṃ sarvatīrthā'vagāhanam |
na tathā pāvanaṃ nṝṇāṃ śrīmadbhāgavataṃ yathā || 51 ||
[Analyze grammar]

yatra yatra caturvaktra śrīmadbhāgavataṃ bhavet |
gacchāmi tatratatrā'haṃ gauryathā sutavatsalā || 52 ||
[Analyze grammar]

matkathāvācakaṃ nityaṃ matkathāśravaṇe ratam |
matkathāprītamanasaṃ nā'haṃ tyakṣyāmi taṃ naram || 53 ||
[Analyze grammar]

śrīmadbhāgavataṃ puṇyaṃ dṛṣṭvā nottiṣṭhate hi yaḥ |
sāṃvatsaraṃ tasya puṇyaṃ vilayaṃ yāti putraka || 54 ||
[Analyze grammar]

śrīmadbhāgavataṃ dṛṣṭvā pratyutthānābhivādanaiḥ |
sanmānayeta taṃ dṛṣṭvā bhavetprītirmamā'tulā || 55 ||
[Analyze grammar]

dṛṣṭvā bhāgavataṃ dūrātprakrametsaṃmukhaṃ hi yaḥ |
padepade'śvamedhasya phalaṃ prāpnotyasaṃśayam || 56 ||
[Analyze grammar]

utthāya praṇamedyo vai śrīmadbhāgavataṃ naraḥ |
dhanaṃ putrāṃstathā dārānbhaktiṃ ca pradadāmyaham || 57 ||
[Analyze grammar]

mahārājopacāraistu śrīmadbhāgavataṃ suta |
śṛṇvaṃti ye narā bhaktyā teṣāṃ vaśyo bhavāmyaham || 58 ||
[Analyze grammar]

mamotsaveṣu sarvepu śrīmadbhāgavataṃ param |
śṛṇvaṃti ye narā bhaktyā mama prītyai ca suvrata || 59 ||
[Analyze grammar]

vastrālaṃkaraṇaiḥ puṣpairdhūpadīpopahārakaiḥ |
vaśīkṛto hyahaṃ taiśca satstriyā satpatiryathā || 60 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāsamāhātmye bhāgavataśraiṣṭhyamāhātmyavarṇanaṃnāma poḍaśo'dhyāyaḥ || 16 ||
[Analyze grammar]