Chapter 25

[English text for this chapter is available]

dharmadatta uvāca |
vilayaṃ yāṃti pāpāni tīrthe dānavratādibhiḥ |
pretadehasthitāyāste teṣu naivā'dhikāritā || 1 ||
[Analyze grammar]

tvadglānidarśanādasmātkhinnaṃ ca mama mānasam |
na vai nirvṛtimāyāti tvāmanuddhṛtya duḥkhitām || 2 ||
[Analyze grammar]

tasmādājanmacaritaṃ yanmayā kārtikavratam |
tatpuṇyasyārddhabhāgena sadgatiṃ tvamavāpnuhi || 3 ||
[Analyze grammar]

nārada uvāca |
ityuktvā dharmadatto'sau yāvattāmabhyaṣecayat |
tulasīmiśratoyena śrāvayandvādaśākṣaram || 4 ||
[Analyze grammar]

tāvatpretatvanirmuktā jvaladagniśikhopamā |
divyarūpadharā jātā lāvaṇyena yatheṃdirā || 5 ||
[Analyze grammar]

tataḥ sā daṃḍavadbhūmau praṇanāmātha taṃ dvijam |
uvāca sā tadā vākyairharṣagadgadabhāṣiṇī || 6 ||
[Analyze grammar]

kalahovāca |
tvatprasādāddvijaśreṣṭha vimuktā nirayādaham |
pāpābdhau majjamānāyāstvaṃ naubhūto'si me dhruvam || 7 ||
[Analyze grammar]

nārada uvāca |
itthaṃ vadantī sā vipraṃ dadarśā'yātamaṃbarāt |
vimānaṃ bhāsvaraṃ yuktaṃ viṣṇurūpadharairgaṇaiḥ || 8 ||
[Analyze grammar]

atha sā tadvimānā'gryaṃ dvāḥsthābhyāmavaropitā |
puṇyaśīlasuśīlābhyāmapsarogaṇasevitā || 9 ||
[Analyze grammar]

tadvimānaṃ tadā'paśyaddharmadattaḥ savismayaḥ |
papāta daṇḍavadbhūmau dṛṣṭvā tau viṣṇurūpiṇau || 10 ||
[Analyze grammar]

puṇyaśīlasuśīlau ca tamutthāpyā'nataṃ dvijam |
abhinandya tato vākyamūcaturdharmasaṃyutam || 11 ||
[Analyze grammar]

gaṇāvūcatuḥ |
sādhusādhu dvijaśreṣṭha yastvaṃ viṣṇurataḥ sadā |
dīnā'nukampī sarvajño viṣṇuvrataparāyaṇaḥ || 12 ||
[Analyze grammar]

ā bālatvācchubhaṃ tvetadyattvayā kārtikavratam |
kṛtaṃ tasyā'rddhadānena puṇyaṃ dvaiguṇyamāgamat || 13 ||
[Analyze grammar]

janmāṃtaraśatodbhūtaṃ pāpaṃ tadvilayaṃ gatam |
snānaireva gataṃ pāpaṃ yadasyāḥ pūrvakarmajam || 14 ||
[Analyze grammar]

harijāgaraṇādyaiśca vimānamidamāsthitā |
vaikuṇṭhe nīyate sādho nānābhogayutā tviyam || 15 ||
[Analyze grammar]

dīpadānabhavaiḥ puṇyaistejaḥsārūpyamāsthitā |
tulasīpūjanādyaiśca kārtikavratakaiḥ śubhaiḥ |
viṣṇusānnidhyagā jātā tvayā dattaiḥ kṛpānidhe || 16 ||
[Analyze grammar]

tvamapyasya bhavasyāṃte bhāryābhyāṃ saha yāsyasi |
vaikuṇṭha bhuvanaṃ viṣṇoḥ sānnidhyaṃ ca sarūpatām || 17 ||
[Analyze grammar]

te dhanyāḥ kṛtakṛtyāste teṣāṃ ca saphalo bhavaḥ |
yairbhaktyārādhito viṣṇurdharmadatta yathā tvayā || 18 ||
[Analyze grammar]

samyagārādhito viṣṇuḥ kiṃ na yacchati dehinām |
auttānacaraṇiryena dhruvatve sthāpitaḥ purā || 19 ||
[Analyze grammar]

yannāmasmaraṇādeva dehino yāṃti sadgatim || 20 ||
[Analyze grammar]

grāhagrasto hi nāgeṃdro yannāmasmaraṇātpurā |
vimuktaḥ saṃnidhiṃ prāpto jāto'yaṃ jayasaṃjñakaḥ || 21 ||
[Analyze grammar]

yatastvayā'rcito viṣṇustatsānnidhyaṃ prayāsyasi |
bahūnyabdasahasrāṇi bhāryādvayayutaḥ kila || 22 ||
[Analyze grammar]

tataḥ puṇyakṣayejāte yadā yāsyasi bhūtalam |
sūryavaṃśodbhavo rājā vikhyātastvaṃ bhaviṣyasi || 23 ||
[Analyze grammar]

nāmnā daśarathastatra bhāryādvayayutaḥ punaḥ |
tṛtīyayā'nayā cā'pi yā te puṇyārddhabhāginī || 24 ||
[Analyze grammar]

tatrā'pi tava sānnidhyaṃ viṣṇuryāsyati bhūtale |
ātmānaṃ tava putratve prakalpyā'marakāryakṛt || 25 ||
[Analyze grammar]

tava janmavratādasmādviṣṇusaṃtuṣṭikārakāt |
na yajñā na ca dānāni na tīrthānyadhikāni vai || 26 ||
[Analyze grammar]

dhanyo'si viprāgrya yatastvayaitadvrataṃ kṛtaṃ tuṣṭikaraṃ jagadguroḥ |
yadardhabhāgātsaphalā murāreḥ praṇīyate'smābhiriyaṃ salokatām || 27 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye dharmadattopākhyāne kalahāmokṣakathanaṃnāma pañcaviṃśo'dhyāyaḥ || 25 ||
[Analyze grammar]