Chapter 26

[English text for this chapter is available]

nārada uvāca |
itthaṃ tadvacanaṃ śrutvā dharmadattaḥ savismayaḥ |
praṇamya daṇḍavadbhūmau vākyametaduvāca ha || 1 ||
[Analyze grammar]

dharmadatta uvāca |
ārādhayaṃti sarve'pi viṣṇuṃ bhaktā'rtināśanam |
yajñairdānairvrataistīrthaistapobhiśca yathāvidhi || 2 ||
[Analyze grammar]

viṣṇuprītikaraṃ teṣāṃ kiṃcitsānnidhyakārakam |
yatkṛtvā tāni cīrṇāni sarvāṇyapi bhavaṃti hi || 3 ||
[Analyze grammar]

gaṇāvūcatuḥ |
sādhu pṛṣṭaṃ tvayā vipra śṛṇuṣvaikāgramānasaḥ |
setihāsakathāṃ puṇyāṃ kathyamānāṃ purābhavām || 4 ||
[Analyze grammar]

kāṃcipuryāṃ purā colaścakravartī nṛpo'bhavat |
yasyākhyayaiva te deśāścolā iti prathāṃ gatāḥ || 5 ||
[Analyze grammar]

yasmiñchāsati bhūcakraṃ daridro vā'pi duḥkhitaḥ |
pāpabuddhiḥ sarugvāpi naiva kaścidabhūnnaraḥ || 6 ||
[Analyze grammar]

yasyāpyunnatayajñasya tāmraparṇyāstaṭāvubhau |
suvarṇayūpaiḥ śobhāḍhyāvāstāṃ caitrarathopamau || 7 ||
[Analyze grammar]

sa kadācidagādrājā hyanaṃtaśayanaṃ dvija |
yatrā'sau jagatāṃ nātho yoganidrāmupāśritaḥ || 6 ||
[Analyze grammar]

tatra śrīramaṇaṃ devaṃ saṃpūjya vidhivannṛpaḥ |
maṇimuktāphalairdivyaiḥ svarṇapuṣpaiśca śobhanaiḥ || 9 ||
[Analyze grammar]

praṇamya daṇḍavadbhūmāvupaviṣṭaḥ sa tatra vai |
tāvadbrāhmaṇamāyāṃtamapaśyaddevasannidhau || 10 ||
[Analyze grammar]

devārcanārthaṃ pāṇau tu tulasyudakadhāriṇam |
svapurīvāsinaṃ tatra viṣṇudāsāhvayaṃ dvijam || 11 ||
[Analyze grammar]

sa tatrābhyetya viprarṣirdevadevamapūjayat |
viṣṇusūktena saṃsnāpya tulasīmaṃjarīdalaiḥ || 12 ||
[Analyze grammar]

tulasīpūjayā tasya ratnapūjāṃ purā kṛtām |
ācchāditāṃ samālokya rājā kuddho'bravīdidam || 13 ||
[Analyze grammar]

cola uvāca |
māṇikyasvarṇapūjā'tra śobhāḍhyā yā kṛtā mayā |
viṣṇudāsa kathaṃ seyamācchannā tulasīdalaiḥ || 14 ||
[Analyze grammar]

viṣṇubhaktiṃ na jānāsi varāko'si mato mama |
yastvimāmatiśobhāḍhyāṃ pūjāmācchādayasyaho || 15 ||
[Analyze grammar]

iti tadvacanaṃ śrutvā sakrodhaḥ sa dvijottamaḥ |
rājño gauravamullaṃghya jagāda vacanaṃ tadā || 16 ||
[Analyze grammar]

viṣṇudāsa uvāca |
rājanbhaktiṃ na jānāsi garvito'si nṛpaśriyā |
kiyadviṣṇuvrataṃ pūrvaṃ tvayā cīrṇaṃ vadasva tat || 17 ||
[Analyze grammar]

gaṇāvūcatuḥ |
tadbrāhmaṇavacaḥ śrutvā prahasya sa nṛpottamaḥ |
viṣṇudāsaṃ tadā garvāduvāca vacanaṃ dvijam || 18 ||
[Analyze grammar]

rājovāca |
itthaṃ cedvadase vipra viṣṇubhaktyā'tigarvitaḥ |
bhaktiste kiyatī viṣṇordaridrasyā'dhanasya ca || 19 ||
[Analyze grammar]

yajñadānādikaṃ naiva viṣṇostuṣṭikaraṃ kṛtam |
nā'pi devālayaṃ pūrvaṃ kṛtaṃ vipra tvayā kvacit || 20 ||
[Analyze grammar]

īdṛśasyā'pi te garva eṣa tiṣṭhati bhaktitaḥ |
tacchṛṇvaṃtu vaco me'dya sarve'pyete dvijātayaḥ || 21 ||
[Analyze grammar]

sākṣātkāramahaṃ viṣṇoreṣa vādo gamiṣyati |
paśyaṃtu sarve'pi tato bhaktiṃ jñāsyaṃti cāvayoḥ || 22 ||
[Analyze grammar]

gaṇāvūcatuḥ |
ityuktvā sa nṛpo'gacchannijarājagṛhaṃ tadā |
ārabhadvaiṣṇavaṃ satraṃ kṛtvā'cāryaṃ tu mudgalam || 23 ||
[Analyze grammar]

ṛṣisaṃghasamājuṣṭaṃ bahvannaṃ bahudakṣiṇam |
yacca brahmakṛtaṃ pūrvaṃ gayākṣetre samṛddhimat || 24 ||
[Analyze grammar]

viṣṇudāso'pi tatraiva tasthau devālaye vratī |
yathoktaniyamānkurvanviṣṇostuṣṭikarānsadā || 25 ||
[Analyze grammar]

māghorjayorvrataṃ samyaktulasīvanapālanam |
ekādaśyāṃ harerjāpyaṃ dvādaśākṣaravidyayā || 26 ||
[Analyze grammar]

upacāraiḥ ṣoḍaśabhirnṛtyagītādimaṃgalaiḥ |
nityaṃ viṣṇostathā pūjāṃ vratānyetāni so'karot || 27 ||
[Analyze grammar]

nityaṃ saṃsmaraṇaṃ viṣṇorgacchanbhuvi svapannapi |
sarvabhūtasthitaṃ viṣṇumapaśyatsamadarśanaḥ || 28 ||
[Analyze grammar]

māghakārtikayornityaṃ viśeṣaniyamānapi |
akarodviṣṇutuṣṭyarthaṃ sodyāpanavidhiṃ tathā || 29 ||
[Analyze grammar]

evaṃ samārādhayatoḥ śriyaḥ patiṃ tayośca coleśvaraviṣṇudāsayoḥ |
agāddhi kālaḥ sumahānvratasthayostanniṣṭhasarveṃdriyakarmaṇostadā || 30 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye colarājaviṣṇudāsabrāhmaṇavivādakathanaṃnāma ṣaḍviṃśo'dhyāyaḥ || 26 ||
[Analyze grammar]