Chapter 17

[English text for this chapter is available]

nārada uvāca |
sa māṃ provāca vidhivatsaṃpūjyātīva bhaktimān |
saṃprahasya tadā vākyaṃ snehapūrvaṃ ca vai nṛpa || 1 ||
[Analyze grammar]

kuta āgamyate brahmankiciddṛṣṭaṃ tvayā prabho |
yadarthamiha cā'yātastadā'jñāpaya māṃ mune || 2 ||
[Analyze grammar]

nārada uvāca |
gataḥ kailāsaśikharaṃ daityeṃdrāhaṃ yadṛcchayā |
tatromayā samāsīnaṃ dṛṣṭavānasmi śaṃkaram || 3 ||
[Analyze grammar]

yojanāyutavistīrṇe kalpavṛkṣamahāvane |
kāmadhenuśatākīrṇe ciṃtāmaṇisudīpite || 4 ||
[Analyze grammar]

taddṛṣṭvā mahadāścaryaṃ vismayo me'bhavattadā |
kvā'pīdṛśī bhavedṛddhistrailokye vā na veti ca || 5 ||
[Analyze grammar]

tadā tavā'pi daityeṃdra samṛddhiḥ saṃsmṛtā mayā |
tadvilokanakāmo'smi tvatsānnidhyamihā'gataḥ || 6 ||
[Analyze grammar]

tvatsamṛddhimimāṃ paśyanstrīratnarahitāṃ dhuvam |
tarkayāmi śivādanyastrilokyāṃ na samṛddhimān || 7 ||
[Analyze grammar]

apsaronāgakanyādyā yadyapi tvadvaśe sthitāḥ |
tathā'pi tā na pārvatyā rūpeṇa sadṛśā dhruvam || 8 ||
[Analyze grammar]

yasyā lāvaṇyajaladhau nimagnaścaturānanaḥ |
svadhairyamamucatpūrvaṃ tayā kā'nyopamīyate || 9 ||
[Analyze grammar]

vītarāgo'pi hi yathā madanāriḥ svalīlayā |
sauṃdaryagahane'bhrāmi śapharīrūpayā purā || 10 ||
[Analyze grammar]

yasyāḥ punaḥ punaḥ paśyanrūpaṃ dhātā'pi sarjane |
sasarjā'psarasastāsāṃ tatsamaikā'pi nābhavat || 11 ||
[Analyze grammar]

ataḥ strīratnasaṃbhoktuḥ samṛddhistasya sā varā |
tathā na tava daityeṃdra sarvaratnā'dhipasya ca || 12 ||
[Analyze grammar]

evamuktvā tamāmaṃtrya gate sati sa daityarāṭ |
tadrūpa śravaṇādāsīdanaṃgajvarapīḍitaḥ || 13 ||
[Analyze grammar]

atha saṃpreṣayāmāsa sa dūtaṃ siṃhikāsutam |
tryaṃbakāyā'pi ca tadā viṣṇumāyāvimohitaḥ || 14 ||
[Analyze grammar]

kailāsamagamadrāhuḥ kurvañchukleṃduvarcasam |
kārṣṇyena kṛṣṇapakṣenduvarcasaṃ svāṃgajena tam || 15 ||
[Analyze grammar]

niveditastadeśāya naṃdinā praviveśa saḥ |
tryaṃbakabhrūlatāsaṃjñā prerito vākyamabravīt || 16 ||
[Analyze grammar]

rāhuruvāca |
devapannagasevyasya trailokyādhipateḥ prabhoḥ |
sarvaratneśvarasya tvamājñāṃ śṛṇu vṛṣadhvaja || 17 ||
[Analyze grammar]

smaśānavāsino nityamasthibhāravahasya ca |
digaṃbarasya te bhāryā kathaṃ haimavatī śubhā || 18 ||
[Analyze grammar]

ahaṃ ratnādhinātho'smi sā ca strīratnasaṃjñikā |
tasmānmamaiva sā yogyā naiva bhikṣāśinastava || 19 ||
[Analyze grammar]

nārada uvāca |
vadatyevaṃ tadā rāhau bhrūmadhyācchūlapāṇinaḥ |
abhavatpuruṣo raudrastīvrāśanisamasvanaḥ || 20 ||
[Analyze grammar]

siṃhāsyaḥ pralalajjihvaḥ sa jvalannayano mahān |
ūrdhvakeśaḥ śuṣkatanurnṛsiṃha iva cā'paraḥ || 21 ||
[Analyze grammar]

sa taṃ khāditumāyāṃtaṃ dṛṣṭvā rāhurbhayāturaḥ |
adhāvata sa vegena bahiḥ sa ca dadhāra tam || 22 ||
[Analyze grammar]

sa ca rāhurmahābāho meghagambhīrayā girā |
uvāca devadeva tvaṃ pāhi māṃ śaraṇāgatam || 23 ||
[Analyze grammar]

brāhmaṇaṃ māṃ mahādeva khādituṃ samupāgataḥ |
mahādevo vacaḥ śrutvā brāhmaṇasya tadā'bravīt || 24 ||
[Analyze grammar]

naivā'sau vadhyatāmeti dūto'yaṃ paravānyataḥ |
muṃceti puruṣaḥ śrutvā rāhuṃ tatyājya soṃ'bare || 25 ||
[Analyze grammar]

rāhuṃ tyaktvā'tha puruṣastadā rudraṃ vyajijñapat |
puruṣa uvāca |
kṣudhā māṃ vādhate'tyaṃtaṃ kṣutkṣāmaścā'smi sarvathā || 26 ||
[Analyze grammar]

kiṃ bhakṣayāmi deveśa tadājñāpaya māṃ prabho |
īśvara uvāca |
bhakṣayasvātmanaḥ śīghraṃ māṃsaṃ tvaṃ hastapādayoḥ || 27 ||
[Analyze grammar]

nārada uvāca |
 sa śivenaivamājñaptaścakhāda puruṣaḥ svakam |
hastapādodbhavaṃ māṃsaṃ śiraḥśeṣo yathā'bhavat || 28 ||
[Analyze grammar]

dṛṣṭvā śiro'vaśeṣaṃ taṃ suprasannastadā śivaḥ |
uvāca bhīmakarmāṇaṃ puruṣaṃ jātavismayaḥ || 29 ||
[Analyze grammar]

īśvara uvāca |
tvaṃ kīrtimukhasaṃjño hi bhava maddvārigaḥ sadā |
tvadarcāṃ ye na kurvaṃti naiva te me priyaṃkarāḥ || 30 ||
[Analyze grammar]

nārada uvāca |
tadā prabhṛti devasya dvāri kīrtimukhaḥ sthitaḥ |
nārcayantīha ye pūrvaṃ teṣāmarcā vṛthā bhavet || 31 ||
[Analyze grammar]

rāhurvimukto yastena so'pi tadbarbare sthale |
ataḥ sa barbarodbhūta iti bhūmau prathāṃ gataḥ || 32 ||
[Analyze grammar]

tataḥ sa rāhuḥ punareva jātamātmānamasminniti manyamānaḥ |
sametya sarvaṃ kathayāṃbabhūva jalaṃdharāyaiva viceṣṭitaṃ tat || 33 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye jalaṃdharopākhyāne dūtavākyakathanaṃnāma saptadaśo'dhyāyaḥ || 17 ||
[Analyze grammar]