Chapter 15

[English text for this chapter is available]

nārada uvāca |
ye devairnirjitāḥ pūrvaṃ daityāḥ pātālasaṃsthitāḥ |
te'pi bhūmaṃḍalaṃ yātā nirbhayāstamupāśritāḥ || 1 ||
[Analyze grammar]

kadācicchinnaśirasaṃ rāhuṃ dṛṣṭvā sa daityarāṭ |
papraccha bhārgavaṃ tatra tacchiraśchedakāraṇam || 2 ||
[Analyze grammar]

sa śaśaṃsa samudrasya mathanaṃ devakāritam |
ratnāpaharaṇaṃ caiva daityānāṃ ca parābhavam || 3 ||
[Analyze grammar]

sa śrutvā krodharaktākṣaḥ svapiturmathanaṃ tadā |
dūtaṃ saṃpreṣayāmāsa ghasmaraṃ śakrasannidhau || 4 ||
[Analyze grammar]

dūtastriviṣṭapaṃ gatvā sudharmāṃ prāviśadvarām |
jagādākharvamaulistu deveṃdraṃ vākyamadbhutam || 5 ||
[Analyze grammar]

ghasmara uvāca |
jalaṃdharo'bdhitanayaḥ sarvadaityajaneśvaraḥ |
dūto'haṃpreṣitastena sa yadāha śṛṇuṣva tat || 6 ||
[Analyze grammar]

kasmāttvayā mama pitā mathitaḥ sāgaro'driṇā |
nītāni sarvaratnāni tāni śīghraṃ prayaccha me || 7 ||
[Analyze grammar]

iti dūtavacaḥ śrutvā vismitastridaśādhipaḥ |
uvāca ghasmaraṃ raudraṃ bhayaroṣasamanvitaḥ || 8 ||
[Analyze grammar]

iṃdra uvāca |
śṛṇu dūta mayā pūrvaṃ mathitaḥ sāgaro yathā |
adrayo madbhayāttrastāḥ svakukṣisthāḥ kṛtāstathā || 9 ||
[Analyze grammar]

anye'pi maddviṣastena rakṣitā ditijāḥ purā |
tasmādyattatprajātaṃ tu mayā'pyapahṛtaṃ kila || 10 ||
[Analyze grammar]

śaṃkho'pyevaṃ purā devānadviṣatsāgarātmajaḥ |
mamā'nujena nihataḥ praviṣṭaḥ sāgarodaram || 11 ||
[Analyze grammar]

tadgaccha kathayasvā'sya sarvaṃ mathanakāraṇam |
nārada uvāca |
itthaṃ visarjito dūtastadeṃdreṇā'gamadbhuvam || 12 ||
[Analyze grammar]

tadidaṃ vacanaṃ sarvaṃ daityāyākathayattadā |
tanniśamya tadā daityo roṣātprasphuritā'dharaḥ || 13 ||
[Analyze grammar]

daityasenāsamāyukto yayau yoddhuṃ triviṣṭapam |
tato yuddhe mahāñjāto devadānavasaṃkṣayaḥ || 14 ||
[Analyze grammar]

tatra yuddhe mṛtāndaityānbhārgavastūdatiṣṭhapat |
vidyayā mṛtajīvinyā maṃtritaistoyabiṃdubhiḥ || 15 ||
[Analyze grammar]

devānapi tathā yuddhe tatrā'jīvayadaṃgirāḥ |
divyauṣadhī samānīya droṇādreḥ sa punaḥpunaḥ || 16 ||
[Analyze grammar]

dṛṣṭvā devāṃstathā yuddhe punareva samutthitān |
jalaṃdharaḥ krodhavaśo bhārgavaṃ vākyamabravīt || 17 ||
[Analyze grammar]

jalaṃdhara uvāca |
mayā yuddhe hatā devā uttiṣṭhaṃti kathaṃ punaḥ |
tava saṃjīvinīvidyā na vā'nyatreti viśrutam || 18 ||
[Analyze grammar]

śukra uvāca |
divyauṣadhīḥ samānīya droṇādreraṃgirāḥ surān |
jīvayatyeva tacchīghraṃ droṇādriṃ tvamapāhara || 19 ||
[Analyze grammar]

nārada uvāca |
ityuktaḥ sa tu daityeṃdro nītvā droṇācalaṃ tadā |
prākṣipatsāgare tūrṇaṃ punarāgānmahāhavam || 20 ||
[Analyze grammar]

atha devānhatāndṛṣṭvā droṇādrimagamadguruḥ |
tāvattatra girīṃdraṃ tu na dadarśa surārcitaḥ || 21 ||
[Analyze grammar]

jñātvā daityahṛtaṃ droṇaṃ dhiṣaṇo bhayavihvalaḥ |
āgatya dūrādvyājahre śvāsā'kulitavigrahaḥ || 22 ||
[Analyze grammar]

palāyadhvaṃ havāddevā nā'yaṃ jetuṃ kṣamo yataḥ |
rudrāṃśasaṃbhavo hyeṣa smaradhvaṃ śakraceṣṭitam || 23 ||
[Analyze grammar]

śrutvā tadvacanaṃ devā bhayavihvalitāstadā |
daityena vadhyamānāste palāyaṃte diśo daśa || 24 ||
[Analyze grammar]

devānvidrāvitāndṛṣṭvā daityaiḥ sāgaranaṃdanaḥ |
śaṃkhabherījayaravaiḥ praviveśā'marāvatīm || 25 ||
[Analyze grammar]

praviṣṭe nagarīṃ daitye devāḥ śakrapurogamāḥ |
suvarṇādriguhāṃ prāptā nyavasandaityatāpitāḥ || 26 ||
[Analyze grammar]

tataśca sarveṣvasuro'dhikāreṣviṃdrādikānāṃ viniveśayattadā |
śuṃbhādikāndaityavarānpṛthakpṛthaksvayaṃ suvarṇādriguhāmagātpunaḥ || 27 ||
[Analyze grammar]

iti śrī skānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye jalaṃdharavijayaprāptirnāma pañcadaśo'dhyāyaḥ || 15 ||
[Analyze grammar]