Chapter 34

[English text for this chapter is available]

jaiminiruvāca |
aśvamedhāṃgasaraso nṛsiṃhasya ca dakṣiṇe |
tatrāsīnaśca bhagavānpunaścāvataranniva || 1 ||
[Analyze grammar]

babhāse divyarūpo'sau durvibhāvyaḥ surāsuraiḥ |
tadā pūjopahāraiśca bhakṣyabhojyādikaistathā || 2 ||
[Analyze grammar]

pūjayitvā jagannāthaṃ toṣayedgītanṛtyakaiḥ |
puṣpopahārairvividhaiḥ sugaṃdhairanulepanaiḥ || 3 ||
[Analyze grammar]

kṛṣṇāgurujadhūpaiśca gaṃdhatailapradīpakaiḥ |
toṣayejjagatāṃ nāthamanekairupahārakaiḥ || 4 ||
[Analyze grammar]

bindutīrthataṭe tasminsaptāhāni janārdanaḥ |
tiṣṭhetpurā svayaṃ rājñe varametatsamādiśat || 5 ||
[Analyze grammar]

tvattīrthatīre rājeṃdra sthāsyāmi prativatsaram |
sarvatīrthāni tasmiṃśca sthāsyaṃti mayi tiṣṭhati || 6 ||
[Analyze grammar]

tatra snātvā vidhānena tīrthe tīrthoghapāvane |
saptāhaṃ ye prapaśyaṃti guṃḍicāmaṇḍape sthitam || 7 ||
[Analyze grammar]

māṃ ca rāmaṃ subhadrāṃ ca matsāyujyamavāpnuyuḥ |
tatastasminmahāpuṇye sarvapāpapraṇāśane || 8 ||
[Analyze grammar]

sarvatīrthaikaphalade viṣṇu prītikare śubhe |
snātvā saṃtarpya vidhivatpitṝndevānataṃdritaḥ || 9 ||
[Analyze grammar]

taṭasthaṃ narasiṃhaṃ taṃ pūjayitvā praṇamya ca |
mahāvedīṃ naro gatvā kṛtaśaucācamakriyaḥ || 10 ||
[Analyze grammar]

pūjayetpūrvavadviprāḥ praṇamedvāpi bhaktitaḥ |
saptāhaṃ yo naro nārī na sā prākṛtamānuṣī || 11 ||
[Analyze grammar]

viṣṇusāyujyamāpnoti śāsanānmuravairiṇaḥ |
divā tadṛrśanaṃ puṇyaṃ rātrau daśaguṇaṃ bhavet || 12 ||
[Analyze grammar]

yatkiṃcitkriyate karma saṃnidhau jagadīśituḥ |
svalpaṃ vāpyathavā bhūri koṭikoṭiguṇaṃ bhavet || 13 ||
[Analyze grammar]

tulāpuruṣadānāni mahādānāni yo dadet |
eke pradatte dānepi sarvaṃ dattaṃ bhaveddvijāḥ || 14 ||
[Analyze grammar]

sarvaṃ merusamaṃ dānaṃ sarve vyāsasamā dvijāḥ |
mahāvedyāṃ gate kṛṣṇe yogo'yaṃ khalu durlabhaḥ || 15 ||
[Analyze grammar]

arddhodayādikā yogāḥ skandena paribhāṣitāḥ |
mahāvedyākhyayogasya kalā nārhaṃti ṣoḍaśīm || 16 ||
[Analyze grammar]

ataḥ paraṃ pravakṣyāmi pitṝṇāṃ kāryamuttamam |
yāvajjīvaṃ gayāśrāddhairalabhyaṃ bhuvi yatphalam || 17 ||
[Analyze grammar]

divisthā narakasthā vā tiryagyonigatāstathā |
tathā manuṣyajātisthāḥ sarve pitṛpitāmahāḥ || 18 ||
[Analyze grammar]

śataṃ puruṣavikhyātā yaṃ vāṃchaṃti sutaiḥ kṛtam |
taṃ vo vidhiṃ pravakṣyāmi śṛṇudhvaṃ munayo varam || 19 ||
[Analyze grammar]

maghā vai pitṛnakṣatraṃ pitṝṇā prītidaṃ param |
tatra śrāddhaṃ tu prīṇāti dattaṃ putrairmudānvitaiḥ || 20 ||
[Analyze grammar]

paṃcamī ca tithiḥ śreṣṭhā śrāddhebhyudayakāriṇī |
ubhayoryadi saṃyogo mahāpuṇyatamā tithiḥ || 21 ||
[Analyze grammar]

yasyāṃ śrāddhe kṛte putraiḥ pitṝṇāmuddhṛtirbhavet |
sarvatīrthamaye tasminsaṃnidhau muravairiṇaḥ || 22 ||
[Analyze grammar]

śrāddhaṃ cecchraddhayā kuryānnīlakaṇṭhanṛsiṃhayoḥ |
madhye medhyatame deśe yoge paramadurlabhe || 23 ||
[Analyze grammar]

puruṣāñchatamuddhṛtya brahmaloke mahīyate |
praśasyaḥ kutapaḥ kālo mandībhūtadivākaraḥ || 24 ||
[Analyze grammar]

pitṝnuddiśya vā dadyādaśaktaḥ kanakaṃ śuciḥ |
tarpayitvā tilaiḥ samyakpaitṛkīṃ prītimuttamām || 25 ||
[Analyze grammar]

athavā bhojayaidviprānbhojyamūlyāni vā dadet |
ekasmai vā guṇavate sahasraṃ bhojanaṃ dadet || 26 ||
[Analyze grammar]

guṇāguṇavivekastu nātra yoge vidhīyate |
tasminsudurlabhe yoge sarve munisamā dvijāḥ || 27 ||
[Analyze grammar]

āṣāḍhasya site pakṣe paṃcamī pitṛdaivatam |
nakṣatraṃ jagadīśasya mahāvedīsamāgamaḥ || 28 ||
[Analyze grammar]

ete yadā trayaḥ syuścediṃdradyumnasarovare |
catuṣpādaḥ smṛto yogaḥ pitṝṇāmakṣayapradaḥ || 29 ||
[Analyze grammar]

pitṛkārye na sīdaṃti nirūpya śrāddhamatra vai |
śṛṇudhvamanyadviprā vai prasaṃgācca bravīmi vaḥ || 30 ||
[Analyze grammar]

nabhasya darśe yaḥ kuryāccaturṣvapi yugādiṣu |
śrāddhaṃ pitṝnsamuddiśyā'śvamedhāṃgasaṃbhave || 31 ||
[Analyze grammar]

gayāśrāddhasahasrasya śraddhayā vihitasya vai |
phalaṃ yaddhi samaṃ tvasya nātra kāryā vicāraṇā || 32 ||
[Analyze grammar]

dānaṃ homo japaścāpi sarvapāpāpanodanaḥ |
dināni sapta yānyatra kṛṣṇe vasati maṃḍape || 33 ||
[Analyze grammar]

ekasmāduttaraṃ śreyo yattasmāduttarottaram |
āṣāḍhaśukla tṛtīyāyāṃ prātaḥsnānaṃ samācaret || 34 ||
[Analyze grammar]

iṃdradyumnataṭe deśe nṛsiṃhakṣetra uttame |
vratametattu gṛhṇīyātsaṃkalpya vidhivannaraḥ || 35 ||
[Analyze grammar]

vanajāgaraṇaṃ nāma bhagavatprītivarddhanam |
sarvapāpapraśamanaṃ sarvavrataphalapradam || 36 ||
[Analyze grammar]

dināni sapta maunī syātkṛtatriṣavaṇakriyaḥ |
kuṃbhe ca pūjayeddevaṃ trisaṃdhyaṃ bhaktibhāvitaḥ || 37 ||
[Analyze grammar]

goghṛtenātha tailena tilajena pradīpayet |
aharniśaṃ hareragre rakṣettaṃ yatnato vratī || 38 ||
[Analyze grammar]

divā divā vasenmaunī rātrau rātrau ca jāgṛyāt |
maṃtraṃ bhāgavataṃ japyānnityakṛtyāṃtare vratī || 39 ||
[Analyze grammar]

upavāsaparo bhūtvā saptāhāni nayedvratī |
aṣṭame prātarutthāya pratiṣṭhāṃ kārayeddine || 40 ||
[Analyze grammar]

tasminneva tīrthavare snātvāgatya gṛhaṃ punaḥ |
maṃḍale sarvatobhadre pūrve kuṃbhaṃ niveśayeta || 41 ||
[Analyze grammar]

tatrāvāhya hṛṣīkeśaṃ pūjayedupacārakaiḥ |
tasya paścimadeśe ca sthaṃḍile vidhisaṃskṛte || 42 ||
[Analyze grammar]

agniṃ praṇīya gṛhyoktavidhinā brāhmaṇāvṛtaḥ |
agnikāryaṃ prakurvīta samidājyacarūṃstathā || 43 ||
[Analyze grammar]

sahasraṃ juhuyādagnau pratyekaṃ vā śataṃ śatam |
gāyatrī vaiṣṇavī yā vai tayā homavidhiḥ smṛtaḥ || 44 ||
[Analyze grammar]

saṃprāśya dakṣiṇāṃ dayāddhenuṃ vastraṃ hiraṇyakam |
viprāṃśca bhojayedaṃte prītaye viśvasākṣiṇaḥ || 45 ||
[Analyze grammar]

vratarājamimaṃ kṛtvā vidhinānena bho dvijāḥ |
caturvargānavāpnoti yo yaḥ kāmānabhīpsati || 46 ||
[Analyze grammar]

nārī vā śraddhayā yuktā kuryādvedīmahotsavam |
sāpi tatphalamāpnoti yā kuryādvratamuttamam || 47 ||
[Analyze grammar]

yātrākartuḥ phalaṃ yādṛgvratakartuśca tatphalam |
bhavate vai dvijaśreṣṭhāḥ kathitaṃ vo mudānvitāḥ || 48 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde catustriṃśo'dhyāyaḥ || 34 ||
[Analyze grammar]