Chapter 59

[English text for this chapter is available]

śaunaka uvāca |
atyadbhutamidaṃ sūta guptakṣetrasya pāvanam |
mahanmāhātmyamatulaṃ kīrtitaṃ harṣavardhanam || 1 ||
[Analyze grammar]

punaryatsiddhaliṃgasya pūrvaṃ māhātmyakīrtane |
ityuktaṃ yatprasādena siddhamātustu setsyati || 2 ||
[Analyze grammar]

vijayonāma puṇyātmā sāhāyyāccaṃḍilasya ca |
ko nvasau caṃḍilonāma vijayonāma kastathā || 3 ||
[Analyze grammar]

kathaṃ ca prāptavānsiddhiṃ siddhamātuḥ prasādataḥ |
etadācakṣva tattvena śrotuṃ kautūhalaṃ hi naḥ || 4 ||
[Analyze grammar]

satāṃ caritraśravaṇe kautukaṃ kasya no bhavet |
ugraśravā uvāca |
sādhu pṛṣṭamidaṃ viprā dūrāṃtaritamapyuta || 5 ||
[Analyze grammar]

śrutā dvaipāyanamukhātkathāṃ vakṣyāmi cātra vaḥ |
purā drupadarājasya putrīmāsādya pāṃḍavāḥ || 6 ||
[Analyze grammar]

dhṛtarāṣṭramate paścādiṃdraprasthaṃ nyaveśayan |
rakṣitā vāsudevena kadācittatra pāṃḍavāḥ || 7 ||
[Analyze grammar]

upaviṣṭāḥ sabhāmadhye kathāścakruḥ pṛthagvidhāḥ |
devarṣipitṛbhūtānāṃ rājñāṃ cāpi prakīrtane || 8 ||
[Analyze grammar]

kriyamāṇe'tha tatrāgādbhīmaputro ghaṭotkacaḥ |
taṃ dṛṣṭvā bhrātaraḥ paṃca vāsudevaśca vīryavān || 9 ||
[Analyze grammar]

utthāya sahasā pīṭhādāliliṃgurmudā yutāḥ |
sa ca tānpraṇataḥ prahvo vavaṃde bhīmanaṃdanaḥ || 10 ||
[Analyze grammar]

sāśiṣaṃ ca tato rājñā svotsaṃga upaveśitaḥ |
āghrāya snehato mūrdhni proktaśca janasaṃsadi || 11 ||
[Analyze grammar]

yudhiṣṭhira uvāca |
kuta āgamyate putra kva cāyaṃ vihṛtastvayā |
kālaḥ kvacitsukhaṃ rājyaṃ kuruṣe mātulaṃ tava || 12 ||
[Analyze grammar]

kaściddeveṣu vipreṣu goṣu sādhuṣu sarvadā |
haiḍaṃbe nāpakuruṣe priyametaddhareśca naḥ || 13 ||
[Analyze grammar]

heḍaṃbasya vanaṃ sarvaṃ tasya ye sainyarākṣasāḥ |
pālyamānāstvayā sādho vardhaṃte janakṣemakāḥ || 14 ||
[Analyze grammar]

kaccinnaṃdati te mātā bhṛśaṃ naḥ priyakāriṇī |
kanyaiva yā purā bhīmaṃ tyaktvā mānaṃ patiṃ śritā || 15 ||
[Analyze grammar]

iti pṛṣṭo dharmarājñā smayanhaiḍaṃbirabravīt |
hate tasmindurācāre mātule'smi niyojitaḥ || 16 ||
[Analyze grammar]

tadrājyaṃ śāsane sthāpya duṣṭānnighnaṃścarāmyaham |
mātā kuśalinī devī tapo divyamupāśritā || 17 ||
[Analyze grammar]

māmuvāca sadā putra pitṝṇāṃ bhaktikṛdbhava |
so'haṃ māturvacaḥ śrutvā merupādātsamāgataḥ || 18 ||
[Analyze grammar]

praṇāmāyaiva bhavatāṃ bhaktiprahveṇa cetasā |
ātmānaṃ ca mahatyarthe kasmiṃścittu niyojitam |
bhavadbhirahamicchāmi phalaṃ yasmādidaṃ mahat || 19 ||
[Analyze grammar]

yadājñāpālanaṃ putraḥ pitṝṇāṃ sarvadā caret |
athorddhvalokānsa jayediha jāyeta kīrtimān || 20 ||
[Analyze grammar]

sūta uvāca |
ityuktavaṃtaṃ taṃ rājā parirabhya punaḥpunaḥ |
uvāca dharmarāṭ putramānaṃdāśruḥ sagadgadam || 21 ||
[Analyze grammar]

tvameva no bhaktikārī sahāyaścāpi vartase || 22 ||
[Analyze grammar]

etadarthaṃ ca haiḍaṃbe putrānicchaṃti sādhavaḥ |
ihāmutra tārayaṃte tādṛśāścāpi putrakāḥ || 23 ||
[Analyze grammar]

avaśyaṃ yādṛśī mātā tādṛśastanayo bhavet |
mātā ca te bhaktimatī dṛḍhaṃ nastvaṃ ca tādṛśaḥ || 24 ||
[Analyze grammar]

aho suduṣkaraṃ devī kurute me priyā vadhūḥ |
yā bhartṛśriyamullaṃghya tapa eva samāśritā || 25 ||
[Analyze grammar]

nūnaṃ kāmena bhogairvā kṛtyaṃ vadhvā na me manāk |
yā putrasukhamanvīkṣya paralokārthamāśritā || 26 ||
[Analyze grammar]

duṣkulīnāpi yā bhaktā sūte'patyaṃ ca bhaktimat |
kulīnameva tanmanye mamedaṃ matamuttamam || 27 ||
[Analyze grammar]

evaṃ bahūni vākyāni tāni tāni vadannṛpaḥ |
dharmarājaḥ samābhāṣya keśavaṃ vākyamabravīt || 28 ||
[Analyze grammar]

puṃḍarīkākṣa jānāsi yathā bhīmādabhūdayam |
jātamātrastu yaścāsīdyauvanastho mahābalaḥ || 29 ||
[Analyze grammar]

aṣṭānāṃ devayonīnāṃ yato janma ca yauvanam |
sadya eva bhavettasmātsadyo'syāsīcca yauvanam || 30 ||
[Analyze grammar]

tadasyocitadārārthe sadā ciṃtāsti kṛṣṇa me |
ucitaṃ bata haiḍaṃbeḥ kva kalatraṃ karomyaham || 31 ||
[Analyze grammar]

tadbhavānkṛṣṇasarvajña trilokīmapi vetsi ca |
haiḍaṃberucitā dārānvaktumarhasi yādava || 32 ||
[Analyze grammar]

sūta uvāca |
evamukto dharmarājñā kṣaṇaṃ dhyātvā janārdanaḥ |
dharmarājamidaṃ vākyaṃ padāṃtaritamabravīt || 33 ||
[Analyze grammar]

asti rājanpravakṣyāmi dārānasyocitāṃ śubhām |
sāṃprataṃ saṃsthitā ramye prāgjyotiṣapure vare || 34 ||
[Analyze grammar]

sā ca putrī muroḥ pārtha daityasyādbhutakarmaṇaḥ |
yo'sau narakadaityasya prāṇatulyaḥ sakhā'bhavat || 35 ||
[Analyze grammar]

sa ca me nihato ghoraḥ pāśadurgasamanvitaḥ |
narakaśca durācārastvametadvetsi sarvaśaḥ || 36 ||
[Analyze grammar]

tato hate murau daitye mayā tasya sutāvrajat |
yoddhuṃ māmativīryatvādghorā kāmakaṭaṃkaṭā || 37 ||
[Analyze grammar]

tāṃ tato'haṃ mahāyuddhe khaḍgakheṭakadhāriṇīm |
ayodhayaṃ mahābāṇaiḥ suśārṅgadhanuṣaścyutaiḥ || 38 ||
[Analyze grammar]

khaḍgena ciccheda bāṇānmama sā ca muroḥ sutā |
samāgamya ca khaḍgena garuḍaṃ mūrdhnyatāḍayat || 39 ||
[Analyze grammar]

sa ca mohasamāviṣṭo garuḍo'bhūdacetanaḥ |
tatastasyā vadhārthāya mayā cakraṃ samudyatam || 40 ||
[Analyze grammar]

cakraṃ samudyataṃ dṛṣṭvā mayā tasminraṇājire |
kāmākhyā nāma māṃ devī puraḥ sthitvā vaco'bravīt || 41 ||
[Analyze grammar]

naināṃ haṃtuṃ bhavānarho rakṣaitāṃ puruṣottama |
ajeyatvaṃ mayā hyasyā dattaṃ khaḍgaṃ ca kheṭakam || 42 ||
[Analyze grammar]

buddhirapratimā cāpi śaktiśca paramā raṇe |
tatastvayā trirātre'pi na jitāsīnmuroḥ sutā || 43 ||
[Analyze grammar]

evamukte tadā devīṃ vacanaṃ cāhamabravam |
ayameṣa nivṛtto'smi vārayaināṃ ca tvaṃ śubhe || 44 ||
[Analyze grammar]

tataścāliṃgya tāṃ bhaktāṃ kāmākhyā vākyamabravīt |
bhadre raṇānnivartasva nāyaṃ haṃtuṃ kathaṃcana || 45 ||
[Analyze grammar]

śakyaḥ kenāpi samare mādhavo raṇadurjayaḥ |
nābhūdasti bhaviṣyo vā ya enaṃ saṃyuge jayet || 46 ||
[Analyze grammar]

api vā tryaṃbakaḥ putri nainaṃ śaktaḥ kuto'nyakaḥ |
tasmādenaṃ namaskṛtya bhāvinaṃ śvaśuraṃ śubhe || 47 ||
[Analyze grammar]

raṇādasmānnivartasva tavocitamidaṃ sphuṭam |
asya bhrāturhi bhīmasya snuṣā tvaṃ ca bhaviṣyasi || 48 ||
[Analyze grammar]

tasmāttvaṃ śvaśuraṃ bhadre sammānaya janārdanam |
na ca śokastvayā kāryaḥ pitaraṃ prati paṃḍite || 49 ||
[Analyze grammar]

jātasya hi dhruvo mṛtyurdhruva janma mṛtasya ca |
bahavaścā'sya vettāro vada kenāpi vāryate || 50 ||
[Analyze grammar]

ṛṣīṃśca devāṃśca mahāsurāṃśca traividyavidyānpuruṣānnṛpāṃśca |
kānmṛtyureko na pateta kāle parāvarajño'tra na muhyate kvacit || 51 ||
[Analyze grammar]

ślāghya eva hi te mṛtyuḥ piturasmājjanārdṛnāt |
sarvapātakanirmukto gato'sau dhāma vaiṣṇavam || 52 ||
[Analyze grammar]

evaṃ kāmākhyayā proktā sā ca kāmakaṭaṃkaṭā |
tyaktvā krodhaṃ ca saṃvṛtya gātrāṇi praṇatā ca mām || 53 ||
[Analyze grammar]

tāmahaṃ sāśiṣaṃ cāpi prāvocaṃ bharatarṣabha |
asminneva pure tiṣṭha bhagadattaprapūjitā || 54 ||
[Analyze grammar]

mayā devyā pṛthivyā ca bhagadattaḥ kṛto nṛpaḥ |
sa te pūjāṃ bahuvidhāṃ kariṣyati svasuryathā || 55 ||
[Analyze grammar]

vasaṃtī cātra taṃ vīraṃ haiḍiṃbaṃ patimāpsyasi |
evamāśvāsya tāṃ devīṃ maurvīṃ cāhaṃ vyasarjayam || 56 ||
[Analyze grammar]

sā sthitā ca pure tatra gato'haṃ śakrasadma ca |
tato dvāravatīṃ prāpya tvayā saha samāgataḥ || 57 ||
[Analyze grammar]

evameṣocitā dārā haiḍaṃbervidyate śubhā |
kāmākhye ca raṇe ghorā yā vidyudiva bhāsate || 58 ||
[Analyze grammar]

na ca rūpaṃ varṇitaṃ me śvaśurasyocitaṃ yataḥ |
sādhorhi naitaducitaṃ sarvastrīṇāṃ pravarṇanam || 59 ||
[Analyze grammar]

punarekaśca samayaḥ kṛtastaṃ śṛṇu yastayā |
yo māṃ niruttarāṃ praśne kṛtvaiva vijayetpumān || 60 ||
[Analyze grammar]

yo me pratibalaścāpi sa me bhartā bhaviṣyati |
evaṃ ca samayaṃ śrutvā bahavo daityarākṣasāḥ || 61 ||
[Analyze grammar]

tasyā jayārthamagamaṃste'pi jitvā hatāstayā |
yo ya enāṃ gataḥ pūrvaṃ na sa bhūyo nyavartata || 62 ||
[Analyze grammar]

vahneriva prabhāṃ dīptāṃ pataṃgānāṃ samuccayaḥ |
evametādṛśīṃ maurvīṃ jetumutsahate yadi || 63 ||
[Analyze grammar]

ghaṭotkaco mahāvīryo bhāryāsya niyataṃ bhavet || 64 ||
[Analyze grammar]

yudhiṣṭhira uvāca |
alaṃ sarvaguṇaistasyā yasyāstveko guṇo mahān |
kriyate kiṃ hi kṣīreṇa yadi tadviṣamiśritam || 65 ||
[Analyze grammar]

prāṇādhikaṃ bhaimaseniṃ kathaṃ kevalasāhasāt |
kṣipeyaṃ tava vākyānāṃ śuddhānāṃ cātha kovidam || 66 ||
[Analyze grammar]

anyā api striyaḥ saṃti deśe deśe janārdana |
bahvyastāsāṃ varāṃ kāṃcidyoṣitaṃ vaktumarhasi || 67 ||
[Analyze grammar]

bhīma uvāca |
samyaguktaṃ keśavena vākyaṃ bahvarthamuttamam |
rājñā punaḥ snehavaśādyaduktaṃ tanna bhāti me || 68 ||
[Analyze grammar]

kārye duḥsādhya eva syātkṣatriyasya parākramaḥ |
karīṃdrasyeva yūtheṣu gajānāṃ na mṛgeṣu ca || 69 ||
[Analyze grammar]

ātmā prakhyātimāneyaḥ sarvathā vīrapuṃgavaiḥ |
sā ca khyātiḥ kathaṃ jāyedduḥsādhyakaraṇādṛte || 70 ||
[Analyze grammar]

na hyātmavaśagaṃ pārtha haiḍaṃberasya rakṣaṇam |
yena dattastvayaṃ dhātrā sa enaṃ pālayiṣyati || 71 ||
[Analyze grammar]

sarvathoccapadārohe yatnaḥ kāryo vijānatā |
tanna sidhyati ceddaivānnāsau doṣo vijānataḥ || 72 ||
[Analyze grammar]

yathā devavratastveko jahre kāśisutāḥ purā |
tathaika eva haiḍaṃbirmaurvīṃ prāpnotu mā ciram || 73 ||
[Analyze grammar]

arjuna uvāca |
kevalaṃ pauruṣaparaṃ bhīmenoktamidaṃ vacaḥ |
abalaṃ daivahetutvātprabalaṃ pratibhāti me || 74 ||
[Analyze grammar]

na mṛṣā hi vaco brūte kāmākhyā yā purā'bravīt |
bhīmasenasutaḥ pāṇiṃ tava bhadre grahīṣyati || 75 ||
[Analyze grammar]

anena hetunā yātu śīghraṃ tatra ghaṭotkacaḥ |
iti me rocate kṛṣṇa tava kiṃ brūhi rocate || 76 ||
[Analyze grammar]

kṛṣṇa uvāca |
rocate me vacastubhyaṃ bhīmasya ca mahātmanaḥ |
na hi tulyo bhaimasenerbuddhau vīrye ca kaścana || 77 ||
[Analyze grammar]

aṃtarātmā ca me vetti prāptāmeva muroḥ sutām |
tacchīghraṃ yātu haiḍaṃbistvaṃ ca kiṃ putra manyase || 78 ||
[Analyze grammar]

ghaṭotkaca uvāca |
na hi nyāyyāḥ svakā vaktuṃ pūjyānāmagrato guṇāḥ |
pravṛttā eva bhāsaṃte sadguṇāśca raveḥ karāḥ || 79 ||
[Analyze grammar]

sarvathā tatkariṣyāmi pitaro yena me'malāḥ |
lajjiṣyaṃti na saṃsatsu mayā putreṇa pāṃḍavāḥ || 80 ||
[Analyze grammar]

evamuktvā mahābāhurutthāya praṇanāma tān |
jayāśīrbhiśca pitṛbhirvarddhito gaṃtumaicchata || 81 ||
[Analyze grammar]

taṃ gatukāmamāhedamabhinaṃdya janārdanaḥ |
kathākathanakāle māṃ smarethāstvaṃ jayāvaham || 82 ||
[Analyze grammar]

yathā buddhiṃ sudurbhedyāṃ vardhayāmi balaṃ ca te |
ityuktvāliṃgya taṃ kṛṣṇo vyasasarjata sāśiṣam || 83 ||
[Analyze grammar]

tato hiḍaṃbātanayo mahaujāḥ sūryākṣakālākṣamahodarānugaḥ |
viyatpathaṃ prāpya jagāma tatpuraṃ prāgjyotiṣaṃ nāma dinavyapāye || 84 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe barbarikopā khyāne ghaṭotkacasya prāgjyotiṣapuraṃ prati gamanavarṇanaṃnāmaikonaṣaṣṭitamo'dhyāyaḥ || 59 ||
[Analyze grammar]